1 အာအီဆာယ ပီ ဝီ တဝ်း၊ “န့ မုး ဆီနမ် ဒေါ ယမ် ခုန်ဒီခမ် အာအူဇီယာ တွိုန်။ ဒေါ အန် တီ အုဝ် ဟဲ့ ယိုဝ် ဇဝ်ဖြာ။ အန် ဇဝ် ဟဲ့ တုတ့် ဒဲင် မာလာင် အန် အီ စာ ကာဆဝ် ဘော ဘျ ခဲ့ တာင် ပွုန် အန်။ ဘြုဝ် ခြိုင် ပီ တာ အန် ဇဝ် မိူဝ်၊ ဟဲ့ နုဝ့် ခဲင် ဟုဝ် အန်။ 2 ဂေ အာမူ အာမာတ် အန် အီ စိူဝ် ဆေရာပ် ဟဲ့ ကွယ် နာ ဒဲင် အန် ဇဝ်။ အာမူ အာမာတ် ဂေ တီ၊ အူ ကာဒင် ပီ ဝီ မိုဝ်း ဖျီင် ဒဝ် ဘူင့်။ ဖျီင် အာဒါ အာ ဘူင့် ဘော ဆီဘ့လိုက် နာ ဂေ။ အာဒါ ပေါ အာ ဘူင့် ဘော ဆီဘ့လိုက် ပ့လဝ် ဂေ။ အာဒါ ပေါ အာ ဘူင့် ဂေ ဘော ဘိုန့်။ 3 ဂေ ဒွန် ကာဒင် ဘော လာယ် ဒဲ့ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ ဆီငါ ဘွတ်၊ ဆီငါ ဘွတ်၊ ဆီငါ ဘွတ်။ ဘော အာဖုင် ဒင်ခုဝ် အန် ဇဝ် ကော နုဝ့် တူတ့် ဒဲင် ကာဒါယ်။’

4 ဂြုဝ်း ပီ လာယ် ဒဲ့ ဂေ တီ၊ န့ ဘော တဲး စေန့် ရွင့် ခဲင် ဟုဝ် ဇဝ်ဖြာ ဒီယုး ဒီယေန့်။ ဒက် ငဝ် မိူဝ် တး နုဝ့် ခဲင် ဟုဝ် ဘော ဟုဝ်။”

5 အုဝ် ဟဲ့ ဟွတ့် ယိုဝ် လွင် အန် တီ၊ အုဝ် ဘော ဝီ ဒတ် တဝ်း၊ “အာလိုဝ်၊ အုဝ် ဟဲ့ ဇမ် ဒုက် တာင်။ အာဆာက် အုဝ် ဒီ စှိုမ်။ ခုဝ်၊ အုဝ် မုး ဒူအီ အီ နပ် ဒီ ကာလာင် ဂြုဝ်း အီ တူ မွှိုမ်။ အုဝ် မိူဝ် ဟဲ့ ကွယ် ရိုမ် ဒူပ် ဂေ ဒူအီ အီ ကာလာင် ဂြုဝ်း တူ မွှိုမ်။ အုဝ် ယီ ဟဲ့ ယိုဝ် ဇဝ်ဖြာ အီ မုး ခုန်ဒီခမ် အီ အိုပ် တူတ့် ဒွန် မျုဝ်။”

6 ဝါယ် အန် တီ အာမူ အာမာတ် အူ ကာဒင် အီ စိူဝ် ဆေရာပ်၊ အန် ဝီ တး ဒူင် ကွယ် အုဝ်။ ခဲင် ဒဲ အန်၊ အန် ဘော ဂူင့် န့ကျီပ် အီ ဟဲ့ ကျီပ် န့ကိုဝ် ငဝ် ပဲ့ ဟဲ့ ဒိုဝ်း အန် ဒီ ကာစှူင့် လှူ။ 7 အန် ဘော ဒိုဝ်း န့ကိုဝ် ငဝ် တီ ပိတ် ဒီ မူတ့် အုဝ်။ အန် ဘော တဝ်း၊ “အာနီ ဟဲ့ ဟွတ့် ဒိုဝ် ဆီပိုန့် မဲ။ အီ တူ မွှိုမ် အီ ကွယ် ဒီ မဲ၊ ဇဝ်ဖြာ ဟဲ့ တဲး န့ ဟြာယ်။ မှာပ် ပဲ့ ဟဲ့ ဘူင် မဲ မိူဝ်၊ အန် ဇဝ် ဟဲ့ ဟွတ့် ဂဝ်း ဝဲန်။”

8 ဟဲ့ ဟွတ့် ပါယ် တီ အုဝ် ဝီ ယိုဝ် ဂြုဝ်း ဇဝ်ဖြာ တဝ်း၊ “အာဆေ ဒီ ခမ် ဒီ ဘဲန် ဒါလာမ် အုဝ် ဘော ဘူင် ပီ စ်ု အုဝ်။း” အုဝ် မိူဝ် ဝီ တဝ်း၊ “အုဝ် ကွယ် ဒီ နီ၊ တဲး မဲ ဇဝ် စ်ု အုဝ်။”

9 အန် ဇဝ် ပီ ဝီ တဝ်း၊ “တဲး မဲ ဟာဝ် ကာလာင် ဒီ ဒူအီ ဂေ နီ တဝ်း၊ ‘တဲး ဘေ ထူမ် ဆေဆေ၊ ယီ တူ တဲး န့ ကာလှုး ဒီ နဝ်း ဘေ ဒေါ မှဝ်။ တဲး ဘေ ဘော ယွတ် ဆေဆေ၊ ယီ တူ တဲး ဘေ ယိုဝ် ဒေါ မှဝ်။’

10 တဲး မဲ ဘူင် တဲး နဝ်း ဒူအီ ဂေ တီ ကော ဒိူဝ် ကာဆဝ်၊ ကွဲ့ တဲး ဂေ ဆီ နပ် ဒီ ဘျွင်။ တဲး မဲ ဘူင် တဲး ဟျုဝ့် ဂေ ကော ကာအာဝ်။ တဲး မဲ ကာဒး ငါယ် ဂေ။ ဆေ မဲ တူ ဘူင် ပါယ် တီ ဂေ ဒီ ဘော ပွိုန် ဒီ ယွတ်၊ ဘော တဲး န့ လိုဝ်း ဒီ ငါယ် ဂေ။ ဂေ ဒီ ဘော ပွိုန် ဒီ ထူမ်၊ ဘော တဲး န့ လိုဝ်း ဆီချာ ဒီ ဟျုဝ့် ဂေ။ ဟဲ့ ဟွတ့်၊ န့ ဒီ ဘော လိုပ် ခဲင် နဝ်း ဂေ၊ ဘော တဲး ဂေ ဘျွင် နဝ်း။ ဆေ န့ ပါယ် တီ အုဝ် ဒီ ဘော ဘ့လွာ့ ဝဲန် မှာပ် ဂေ၊ တဲး န့ ပီ ဒူအီ ဆဝ် ဟဲ့ ဝီ ကဲန်။”

11 အုဝ် ဝီ တဝ်း ဒီ ဇဝ်ဖြာ၊ “န့ ဒီ ဘဲန် ပါယ် တီ လှေန့် ခဲ့ မှဝ်။း” အန် ဇဝ် ဝီ တဝ်း ဒီ အုဝ်၊ “န့ ဒီ ဇမ် ပန် ဒီ လိုဝ် ရာမ် တူတ့် မိူင် အီ ကွယ် ခဲင် ကာဒါယ် မိူင် အီဆာရေလ။ န့ မိူဝ် အာဝ် ဟူ မိုဝ်း ဒူအီ အီ ကွယ် ခဲင် ကာင် ဂေ တီ။ ဘော မာန် မိူင် ဂေ၊ န့ ဒီ လိုဝ် တူတ့်။

12 အုဝ် ဒီ ဒိုဝ်း ခဲ့ ကွယ် ဒူအီ၊ တိုယ် ဂေ ဟာဝ် တူင့် တူင့်၊ ကွဲ့ တဲး န့ ဆီ မိုဝ်း ဒူအီ ခေါ အူ ဝီ အီ ကွယ် ဒီ တီ။

13 ခဲင် ဒူအီ ဂိုဝ် ဝီ၊ န့ ပီ ဘော ဝီ ဂိတ် အူ ဝီ မိူဝ်၊ အုဝ် ယီ ဒီ ဝီ ဘူင် တဲး ဂေ ကော လိုဝ် စှိုမ် တူတ့်။ န့ ဒီ ဘဲန် ပီ ငူယ် ဟေ ထေရေပ်။ ဝါယ် ဟဲ့ ဂ်ု ဝဲန် ဂေ ဟေ တီ၊ ငူယ် အန် အီ ဆီ ဂိတ် ဒီ ဘော ဝီ န့လုဝ်း။” ခဲ့ တီ ဇဝ်ဖြာ ဟဲ့ ကာလာင် ဒီ အုဝ်။