1 ဒေါ မုး စုဝ် ဘာန် ခုန်ဒီခမ် အာခါတ် အီ မုး ဂွန် အာယုဝ်ထာမ် ဘော လှာန် အာအူဇီယာ အီ ဟဲ့ ဘဲန် ခုန်ဒီခမ် အီ အိုပ် မိူင် ယူဒါ၊ န့ ဘော မိုဝ်း ရန်ဆူ အီ တး ဇမ် ဒီ မိူင် ယေရူဆာလဲမ်။ န့ မုး အာရေဆိန် အီ မုး ခုန်ဒီခမ် ခဲင် မိူင် အာရာမ် ဘော ခုန်ဒီခမ် အာဘေခါ အီ မုး ဂွန် ခုန်ဒီခမ် အာရေမာလီ အီ အိုပ် မိူင် အီဆာရေလ။ ဂါယ် ဟဲ့ တး ကာဂုဝ်း ဒီ မိူင် ယေရူဆာလဲမ်၊ ယီ တူ ပဲ ဂေ။

2 ခုန်ဒီခမ် အီ အိုပ် မိူင် ယူဒါ ဘော ယိုဝ် လွင် ခုန်ဒီခမ် အီ အိုပ် မိူင် အာရာမ် ဂါယ် ခုန်ဒီခမ် အီ အိုပ် မိူင် အီဆာရေလ ဟဲ့ ကာဖြူမ် ဒီ တး ကာဂုဝ်း ဒီ မိူင် ယူဒါ။ န့ တဲး ဘော အန် ဘော ဂေ ဒူအီ အန် ဘောကာဂ့လျီတ် ဘော ယုဝ် ဒီယုး ဒီယေန့်။ န့ ပီ ဟေ ဂေ ပြဲ ဒီယုး ဒီယေန့် ဒေါ တး ဘုတ် ခုန်။

3 ဒေါ အန် တီ ဇဝ်ဖြာ ဝီ ကာလာင် ဒီ အာအီဆာယ တဝ်း၊ “တဲး မဲ ဒဲ့ ဘော ဂွန် မဲ အီ စိူဝ် အာဆာဖာဆူပ်၊ တဲး ဘာယ် ဟာဝ် ကာတုန့် ခုန်ဒီခမ် အာခါတ်။ ဘာယ် ဒီ ဟာဝ် ကာတုန့် အန် ဒူပ် န့တေန့် အီ ဇမ် ဒူင် လး ဂေ ခြိုင် အီ ကွယ် ဘာင် အိုမ် ဒိုင် နာ ကွာ။ န့ ဘော မုး ဒူင် အီ ကွယ် ကာတတ် ဒီ မူတ့် ရူင် အိုမ် တွိုန်။ 4 တဲး မဲ ကာလာင် ဒီ အန် တဝ်း၊ ‘တဲး မဲ ဆာဒိက် ဘော ကွယ် နှိမ် နှိမ်။ ကွဲ့ တဲး မဲ ယုဝ်၊ ကွဲ့ တဲး မဲ ကာစွာ ဝီ ဘဲန် နဝ်း ဒီတဲတ် ဒီ မဲ ကူပ် နဝ်း ရူ ခုန်ဒီခမ် အာရေဆိန် ဘော ဂေ ဒူအီ အာရာမ်၊ ဘော ကူပ် နဝ်း ရူ ခုန်ဒီခမ် အီ မုး ဂွန် အာရေမာလီ တီ။ ဂေ ပီ မာဆီဘ့လာဝ် အီ ဟဲ့ ရိန် ဒီ ယတ်။ 5 ဂေ ဒူအီ အာရာမ် ဘော ဂေ ဒူအီ အီဆာရေလ ဘော ခုန်ဒီခမ် ဂေ ဟဲ့ ခြာမ် ဒီ တဲး မဲ စှိုမ်။’ 6 ဂေ ဟဲ့ တဝ်း၊ ‘တဲး အေ ဟာဝ် လိုပ် ခဲင် မိူင် ယူဒါ၊ တဲး အေ ဟာဝ် ကာယဝ်း မိူင် တီ ဘဲန် ပ့လုဝ့် ဘဲန် ပ့လုဝ့်၊ တဲး အေ ဝီ ကာဆာင် ဒီ အေ။ ဟဲ့ ဟွတ့်၊ တဲး အေ ဝီ ဒါင် ဂွန် အာတာဘီလာ၊ တဲး အန် ဝီ ဘဲန် ခုန်ဒီခမ် အီ အိုပ် မိူင် ယေရူဆာလဲမ်။’ ”

7 မာလဲ၊ ဇဝ်ဖြာ ပီ ဝီ တဝ်း ပါယ် နီ၊ “လွင် အန် တီ န့ တူ ဘဲန် ဒေါ မှဝ်။ ပီ ခြာမ် ဂေ တီ၊ ဂေ တူ ပွိုန် ဘူင်။

8 ခုဝ်၊ ဒူအီ ခဲင် မိူင် တာင် အီ မုး မိူင် အာရာမ်၊ ဂေ မိုဝ်း မီ ပ့လူမ် ဂေ ဟဲန့် ခဲ့ ပီ မိုဝ်း ဂေ ဒူအီ အီ ကွယ် ခဲင် မိူင် ဒါမာခူ။ ပါယ် တီ ဘော ဒူအီ ခဲင် မိူင် ဒါမာခူ ဂေ မိုဝ်း ပ့လူမ် ခဲ့ ပီ မိုဝ်း ခုန်ဒီခမ် အာရေဆိန်။ အီ မုး ဂေ ဒူအီ အီဆာရေလ၊ အာတ့် နုဝ့် ဒဝ် ဂိုဝ် ဒီ ဖန် ဆီနမ်၊ ဂေ ဒီ ဘော ကာယဝ်း ကာရေး၊ အာဝ် ဟူ ဘဲန် ရဝ် ဘဲန် မိူင်။

9 ဂေ ဒူအီ ခဲင် မိူင် အီဆာရေလ ဘော မိူင် မိူဝ် ဂေ တူ မိုဝ်း ပ့လူမ် ဂေ ဟဲန့် လွှိုမ် ဂေ ဒူအီ ခဲင် မိူင် ဆာမာရီ။ ဘော ဒူအီ ခဲင် မိူင် ဆာမာရီ မိူဝ် ဂေ မိုဝ်း ပ့လူမ် ဂေ ဟဲန့် ခဲ့ ပီ မိုဝ်း ဂွန် အာရေမာလီ တွိုန်။ ခုဝ်၊ ဆေ ဘေ တူ ညှိုမ် ဆီချာ၊ ဘေ ဒီ ဘော စှိုမ်၊ အာဝ် ပွိုန် ကွယ် လှေန့်။”

10 ဝါယ် အန် တီ ဇဝ်ဖြာ ပီ ဝီ ကာလာင် ဒီ ခုန်ဒီခမ် အာခါတ် တဝ်း၊ 11 “တဲး မဲ မှာန့် ဒီ အုဝ် အီ မုး ဇဝ်ဖြာ ပီ ကြိုပ် မဲ၊ တဲး အုဝ် ဘူင် အူ မျုဝ် အီ ဒီ စွယ် တဲး မဲ ညှိုမ် အုဝ်။ န့ ဘော မုး ပီ ဘူင် အုဝ် ခဲင် ဒူင် လိုက် ကာဆဝ် ကော ဇမ် ခဲင် မိူင် မာရာန။ ဆေ အာဝ် ပါယ် တီ၊ န့ ဘော မုး ပီ ဘူင် အုဝ် ဒူင် စာ ကာဆဝ် ကော ဇမ် ခဲင် ဂါင်ဟြာဝ်၊ တဲး မဲ မှာန့်။”

12 ခုန်ဒီခမ် အာခါတ် ဝီ တဝ်း၊ “အုဝ် တူ ဆီ မှာန့် လက်ဆာနာ မာဆေ ဒီ ဇဝ်ဖြာ။ အုဝ် တူ ဆီ ထေဝ် ဇဝ်ဖြာ ယုဝ် န့ ဒီ ဘဲန် တူ ဘဲန် ပီ တဝ်း အန်။”

13 အာအီဆာယ ဝီ တဝ်း၊ “အိုယ် ဘေ ခြိုဝ် ခုန်ဒီခမ် အာဒါဝိတ် တဲး ဘေ ဘောကာဂ့လျီတ် ထူမ်။ ဘေ ဟဲ့ အွန် ဒီ ဘူင် တဲး ဒူအီ ကော ဇာန် ကော ပိုဝ် ဘေ၊ န့ ညှမ် ဘြေ့ ဒီ နဝ်း ဘေ။ ဘေ ပီ ဝီ ဘူင် တဲး ဘော ဇဝ်ဖြာ အီ မုး ဇဝ်ဖြာ ပီ ကြိုပ် အုဝ် ကော ဇာန် ကော ပိုဝ် ဘေ။ 14 ခုဝ်၊ အန် ဇဝ် ယီ ဒီ ဘျ ဒီ ဘေ ပီ ဒီ ဘူင် အန်။ န့ ဒီ မိုဝ်း ဒီဘျာ အူ ဝီ၊ အန် ဒီ ဒဲ ဘာဒိက် ဆန်ထေ။ အန် ဒီ မိုဝ်း ဂွန် အီမာယ်။ ဂေ ဒီ ဘော တဲး အန် စိူဝ် အာမာနူအေန်။ 15 ပန် ဒီ နပ် အန် ဒီ ရဝ်း အီ မွှိုမ် ဘော ဝဲန် အီ တူ မွှိုမ်၊ အန် ဒီ ဟူမ် မီ အိုမ် ပူ မက် အီ ပြာင် ဂြုဝ့် ဘော ငါမ် မာဖျီန်။ 16 န့ ယီ မုး အာတ့် နပ် အန် ဒီ ရဝ်း အီ မွှိုမ် ဘော ဝဲန် အီ တူ မွှိုမ်၊ မိူင် ခုန်ဒီခမ် အာ ကာဒင် ပီ ယုဝ် ဘေ ဒေါ တီ နီ၊ ဂေ ဒီ ဘဲန် မိူင် အီ ကာပျာတ့် လိုဝ်၊ မိူင် ပီ ဝဲန် အီ။ 17 ဇဝ်ဖြာ ဒီ တဲး ဘေ ခမ် ဒုက် တာင်၊ တဲး န့ လွှိုမ် ဒုက် ပီ ဒွိုမ် ကာဒုး ဘေ ဒေါ ကာဂဝ်း ဂေ ဒူအီ အီဆာရေလ ဒီ ဒူအီ အာယူဒါ။ ဘေ ဒီ ခမ် ဒုက် တာင် ဒီ ခုန်ဒီခမ် အီ အိုပ် မိူင် အာဆူရာ။ ဘော မဲ၊ ဘော ဒူအီ ပီ အိုပ် မဲ၊ ဘော ဒူအီ ခဲင် န့ဟူမ် မဲ၊ ဘေ ဘောကာဂ့လျီတ် လုဝ် ခမ် ဒုက် တီ။

18 ဒေါ အန် တီ ဇဝ်ဖြာ ဒီ ကာဟူတ့် ဒဲ့ ဂေ ဒူအီ အဲဂိုပ် တး။ ဂေ ဒီ ပီ မာရွယ် အီ တး ဒီ ဘ့လဲင် အိုမ် ခဲင် မိူင် အဲဂိုပ်။ ဇဝ်ဖြာ ဒီ ဒဲ့ ဘော ဂေ ဒူအီ အာမျုဝ် အာဆူရာ၊ တဲး ဂေ တး၊ တဲး ဂေ ကော ပီ ဖိုင် မာဖျီန်။ 19 ဂေ ဒီ ဘော တး ကွယ် ဒွန် နာ ဒွန် ပ့လုဝ့်။ ဂေ ဒီ ကွယ် ဒူပ် ဒီလယ့် ဒူင် ငွင့် ဒူအီ။ ဂေ ဒီ ဘော တး ကွယ် ဘော ခဲင် မာအ ဒါအာင်၊ ဘော ဒီ ဟေ မာအာတ့် ဂေ ဒီ ပြဲ ငျီန်။ 20 ဒေါ အန် တီ ဇဝ်ဖြာ ဒီ တး ဒဲ့ ဒူအီ အီ ကွယ် နာ ဒွယ် အိုမ် ဘ့လဲင် အူဖာရာတ် အီ မုး ဒူအီ ပီ အိုပ် ခုန်ဒီခမ် ခဲင် မိူင် အာဆူရာ။ န့ ပီ အန် ဇာင် ဂေ၊ တဲး ဂေ တး၊ တဲး ဂေ ဂါ့ ဝဲန် ဒီမုဝ်း ဘေ ဘော ဟိုက် ဂိန့် ဘေ ဘော ဟိုက် ဒီ ဒုဝ် ဘေ။ 21 ဒေါ အန် တီ ဒူအီ အူ ဝီ ဒီ ဘော မိုဝ်း ဒီ ဟျီင် မီ မာမက် အူ ဒုဝ် ဘော မာပဲ မီ အာ ဒုဝ်။ 22 မာဒုဝ် ဆတ် ဂေ တီ ယီ မိုဝ်း အိုမ် ပူ ကိူန် ကာဆဝ်၊ တဲး အန် ပွိုန် ဒီ ဘူင် အိုမ် ပူ အီ ပြာင် ဂြုဝ့်။ ခုဝ်၊ ဂေ ဒူအီ အီ ဆီ ဂိတ် ဆီ ကွယ် ခဲင် မိူင် တီ မိူဝ်၊ ဂေ ဒီ ဘော ပွိုန် ဒီ ဟူမ် အိုမ် ပူ ပြာင် ဂြုဝ့် တီ ဘော ငါမ် မာဖျီန်။ 23 ဒေါ အန် တီ ခဲင် မာန် မာငုန် အီ ဟဲ့ ဒွိုမ် မိုဝ်း ဟေ မာငုန် အူ ဟြဲန့် ကာဒင်၊ ဘော မိုဝ်း ဒီငဝ်း ဒီခန် ရွိုန် အူ ဟြဲန့် ဘူင့်၊ န့ ဒီ ဝီ ဘဲန် တူတ့် ယွုန် မာအာတ့်။ 24 ဂေ ဒူအီ ဒီ ဘော ဂူင့် အ ဂေ ဘ့လာ ဆေ ဂေ ဟာဝ် ဒူင် တီ။ ခုဝ်၊ ကာဒါယ် ဒီ တီ ဟဲ့ ဝီ လေး တူတ့် ယွုန် မာအာတ့် ဒီလူယ်။ 25 ဒွန် ပ့လုဝ့် အီ မုး ဒူင် ပီ ဒွိုမ် လုဝ့် ဂေ ဒီ ဝီ လေး တူတ့် ဒဝ် မာအာတ့်။ အာဝ် မိုဝ်း အီ ယ ဟာဝ် ကာတတ်။ န့ ဝီ ဘဲန် ဒူင် ဘ့လေး ဂေ မာမက် ဘော မာဘူ ဂေ မာပဲ၊ တဲး ဂေ ပွိုန် ဒီ ဟူမ် ပေတ့်။” ခဲ့ တီ အာအီဆာယ ဟဲ့ ကာလာင် ဒီ ခုန်ဒီခမ် အာခါတ် ဘော ဂေ အီ ဒူပ် အန်။