1 ဇဝ်ဖြာ ဝီ ကာလာင် ဒီ အုဝ် တဝ်း၊ “တဲး မဲ ဒိုဝ်း တး ဘဲန် တာင် အူ ဒီဖ့လ၊ ဒဲမ် နာ ဒဲင်၊ တဲး န့ လိုဝ်း ဆီချာ ဒီ အီ။ ပီ လုဝ် ဒဲမ် မဲ တီ၊ တဲး န့ တဝ်း၊ ‘မာဟေ ဆာလာ ဟာဆာဘာတ်။’” (န့ ဘော မုး စိူဝ် ဒူအီ အီ လေး “ဖာတ် ဒိုဝ်း ဟဲ ဟဲ၊ ပျာတ့် ဝဲန် ခြန် ခြန်။”) 2 ဇဝ်ဖြာ တဝ်း၊ “တဲး မဲ ဘော ဝီ ဒဲ့ ဒါ အီ လှူ ဒီ ဇဝ်ဖြာ အီ စိူဝ် အာအူရီယာ ဘော အာဆာခါရာ အီ မုး ဂွန် အာဘေန်ရာခီ၊ တဲး ဂါယ် ယိုဝ် ပီ ဘူင် မဲ၊ တဲး ဂါယ် ဘဲန် ဆက်ဆေ အီ နပ် ဒီ ဝီ ကာလာင် လွင် အန် တီ ဒီ အီ။”

3 ဝါယ် အန် တီ အုဝ် ဘော ဝီ ဟာဝ် ကွယ် ဒူပ် ယာ အီ ဘျာန် ဂြုဝ်း ဇဝ်ဖြာ အီ မုး အီဘိုန့် အုဝ်။ အန် ဘော ဝီ ဒဲ ဘာဒိက် ဆန်ထေ ဘော မိုဝ်း ဂွန် အီမာယ်။ ဇဝ်ဖြာ ဘော ဝီ တဝ်း ဒီ အုဝ်၊ “တဲး မဲ တဲး ဂွန် မဲ တီ စိူဝ် မာဟေ ဆာလာ ဟာဆာဘာတ်။ 4 ခုဝ်၊ အာတ့် နပ် ဂွန် မဲ ဒီ တဝ်း၊ “ဂုန့် ဂါယ် မာ” ခုန်ဒီခမ် အီ အိုပ် မိူင် အာဆူရီယာ ဒီ ဘော ဖာတ် ဒိုဝ်း ဟာဝ် တူတ့် ခဲ့ ကွယ် ကြုဝ်ကြာမ် အီ ကွယ် ခဲင် မိူင် ဒါမာခူ ဘော ခဲ့ ပီ ပွိုန် ဒိုဝ်း တး ဂေ ခဲင် မိူင် ဆာမာရီ တွိုန်။

5 ဇဝ်ဖြာ ပီ ဝီ ကာလာင် ဒီ အုဝ် ပေါ အူ စိုပ် တဝ်း၊

6 “ဒူအီ ဂေ နီ ဟဲ့ ဝဲန် အုဝ်။ န့ ပီ ဂေ တူ ဒိုဝ်း အိုမ် ဘ့လဲင် ဆီလွင် အီ လှဲ ဟာဝ် နှိမ် နှိမ်။ ဂေ မိူဝ် ဟဲ့ ဘျုဝ် ဒီ ဒူပ် ခုန်ဒီခမ် အာရေဆိန် ဘော ခုန်ဒီခမ် အီ မုး ဂွန် အာရေမာလီ တွိုန်။

7 ခုဝ် အန် တီ၊ အုဝ် ဒီ တဲး ခုန်ဒီခမ် အီ အိုပ် မိူင် အာဆူရီယာ တး။ အန် ဒီ ဒဲ့ ကာဇု တူတ့် ခဲ့ ကွယ် ဒါ ဆိုက် အန် ဘောကာဂ့လျီတ်၊ တဲး အီ ယိုဝ် ခဲ့ တာင် အာဖုင် ဒင်ခုဝ် အန်။ အုဝ် ဒီ တဲး ဂေ တး ကာဂုဝ်း ဘော ပဲ ဒူအီ ခဲင် မိူင် ယူဒါ နီ။ ဂေ ဒီ ဘော ပီ အိုမ် တာင် အီ မုး ဘ့လဲင် အိုမ် အူဖာရာတ် အီ ဟဲ့ မ့ပုန် တူတ့် ဘော ဒီလယ့်။ န့ ဒီ မ့ပုန် ဘော ဘာင် အန် ဒွန် ပ့လုဝ့်။

8 န့ ပီ အိုမ် တီ ဒီ ဘော တး ဇမ် ခဲင် မိူင် ယူဒါ ဘော ဇုး ဘော ဇဲဝ် ကာဆဝ်၊ အန် ဒီ မ့ပုန် မိူင် ဘော မိူင်၊ တဲး န့ ကော ဘိန် ဇမ် မဲင် ဂေ။ ဒါ ဆိုက် ဂေ တီ ဘော ပီ မာဆိမ် တာင် အီ ဟဲ့ ဘ့လး ဖျီင် အန် အီ ပွိုန် ပ့လိုက် မိူင် ယူဒါ ဘော မိူင်။” ကူပ် န့ ပါယ် တီ တဲး အာမာနူအေန် စွယ် ယေ။

9 အိုယ် ဘေ ဒူအီ အီ ကွယ် ခဲင် မိူင် ဘဲန် မိူင်၊ တဲး ဘေ ဘူင် ဟာဝ် အီ တူ မွှိုမ်၊ တဲး န့ တဲး ဘေ ကာပျာတ့် လိုဝ်။ အိုယ် ဘေ အီ ကွယ် မိူင် တူင့်၊ တဲး ဘေ ထူမ်၊ တဲး ဘဲ ရဲန် ဒုဝ် ဘေ၊ ဘ်ု ဒီ ကာဂုဝ်း၊ တဲး န့ တဲး ဘေ ကာပျာတ့် လိုဝ်။ တဲး ဘေ ဘော ရဲန် ဒုဝ် ဘေ ဘော ကာပျာတ့် လိုဝ်။

10 တဲး ဘေ လာယ် ကာမွုန် ဆင်ချာင် ခဲ့ ပီ နပ် ဘေ။ မာလဲ၊ အာကျာမ် အာငျာန် ဘေ ယီ ဒီ လိုဝ် တူတ့်။ တဲး ဘေ ကာလာင် ဂြုဝ်း ခဲ့ ပီ ဆီ ကာလာင် ဘေ။ မာလဲ၊ န့ ယီ တူ မိုဝ်း ဒီခုဝ် မာဆေ။ ခုဝ်၊ ဇဝ်ဖြာ ကွယ် ရိုမ် ဒူပ် ယေ။

11 ဒေါ ဝီ ကာလာင် ဇဝ်ဖြာ ဂြုဝ်း အန် ဒီ အုဝ်၊ န့ ပီ အန် ဟဲ့ ပါ အုဝ် တာ ဒဲ အန် အီ မိုဝ်း ပ့လူမ် တာင်။ အန် ဒမ် ဆာဒိက် ဒီ အုဝ်၊ ကွဲ့ တဲး ယေ ဒူပ် ဂေ ဒူအီ ဟဝ် ခဲင် မိူင် ဂေ တွိုန်။ အန် တဝ်း၊

12 “ဆေ အီ ဟဝ် ဖျာက် ဘေ၊ တဝ်း ဘေ ဟဲ့ ခြာမ် ဒီ ပြာ ဒီ ဘူင် နာ တူ မွှိုမ်၊ ကွဲ့ တဲး န့ ဒိုဝ် နဝ်း ဘေ။ ဘေ ကွဲ့ ယုဝ် ပီ ယုဝ် ဂေ။

13 တဲး ဘေ လှုဝ်း လဲ၊ အုဝ် မုး ဇဝ်ဖြာ အီ အိုပ် တူတ့် ဒွန် မျုဝ်။ အုဝ် ဘော မုး ဘော ဇဝ်ဖြာ အီ ဆီငါ ဘွတ် ဘော မုး ဇဝ်ဖြာ ပီ လုဝ် ယုဝ်၊ လုဝ် ရုဝ်ဆေ ဘေ။

14 အုဝ် ဒီ ကွယ် ရိုမ် ဒူပ် ဘေ၊ တဲး ဘေ မိုဝ်း ဒူင် ဆီငါ ဘွတ် ကာတဲ ဘေ။ ခဲင် ဒူအီ အီဆာရေလ အီ ကွယ် ဘော အာ မိူင် အုဝ် ဘော ပီ မာဝ် အီ တဲး ဒူအီ တး ကာဝှး ကေး။ ခဲင် မိူင် ယေရူဆာလဲမ် အုဝ် ဘော ပီ ဘော ယွတ့် ဂေ ခိူမ် အီ ဒီ မှေတ့် ဂေ။

15 ဒူအီ ကိူန် ဒီ ဘော တး ကာဝှး ကေး။ ဂေ ဒီ ဘော ကာပျာတ့် လိုဝ်။ ဂေ ဒီ ဘော တး ခြေ ယွတ့် ဘော ခမ် အီ ဟဝ် မှေတ့် ဂေ။”

16 ဇဝ်ဖြာ ဟဲ့ ဟွတ့် ကာလာင် ပါယ် တီ အာအီဆာယ ဝီ တဝ်း။ “အိုယ် ဘေ အီ မုး ဒီဘဲ အုဝ်၊ တဲး ဘေ ကာဘန် အုန် ဆီချာ ပဲ့ ဟဲ့ ဒဲမ် အုန် အုဝ် ဂြုဝ်း ပီ ကာလာင် ဇဝ်ဖြာ ဒီ အုဝ်။ တဲး ဘေ ဒီဘဲ အုဝ် ကာဘိတ် ဆီချာ ဘပ် တီ၊ ဒွက် ဇိုမ်၊ ကွဲ့ တဲး န့ ဘျုဝ်း။

17 အုဝ် ဒီ ဘော ဘ်ု ဒီ ယွတ် ဇဝ်ဖြာ အီ ဟဲ့ ဘ့လေး အုန် ဒူအီ အီ မုး ခြိုဝ် အာကူပ်။ အုဝ် ဒီ ဘော နှဝ့် န့ဒဝ့် ဘော ဘိုင် အန် ဇဝ်။

18 တဲး ဘေ ယွတ် ဘော အုဝ် ဘော ဂွန် ပီ အာပ် ဇဝ်ဖြာ ဒီ အုဝ်။ ဇဝ်ဖြာ အီ အိုပ် တူတ့် ဒွန် မျုဝ်၊ အီ ကွယ် ဒဲင် နွန် ဇီအူန် တွိုန်၊ အန် ဟဲ့ တဲး ယေ ဘဲန် လက်ဆာနာ အီ ဘျ အီ မွှိုမ် အာမ် ပီ ဒီ ဘူင် အန် ဒီ ဂေ ဒူအီ အီဆာရေလ။

19 ကွဲ့ တဲး ဘေ ထူမ် ဆေ န့ မိုဝ်း ဒူအီ အီ ကာလာင် ဒီ ဘေ၊ တဲး ဘေ ဟာဝ် ဒီမွှတ် ဒူအီ မိုဝ်း ပြေ ဘော ဒူအီ အီ ဒဲ့ ကာနမ်၊ အီ နပ် ဒီ ဖူဖိပ် ဖူဖာပ် ဘော ကာလာင် ဂြုဝ်း အီ တူ လိုဝ်း ဘြီ။ ဘေ လုဝ် ဝီ တဝ်း၊ “အာမျုဝ် ဒူအီ ဟဲ့ ကာအာပ် ဒီ ဘိုင် ဇဝ်ဖြာ ဘော ဒီမွှတ် အန် ဇဝ် အီ မုး ဇဝ်ဖြာ ပီ ကြိုပ် ဂေ။ အာဝ် ကာအာပ် ဒူအီ အိမ် ဝီ ဟာဝ် ဘိုင် ကာပြဝ် ဒူအီ ယမ်။” 20 ဘေ ယီ လုဝ် ဒူပ် ဒါရာ ပဲ့ ဟဲ့ မာနုဝ် ဇဝ်ဖြာ ဒီ ဘေ။ ဆေ ဂေ တူ ကာလာင် ဂြုဝ်း တီ၊ န့ တူ တဲး ဂေ ယိုဝ် ဘ့လာင် ဆိန့်ဝး။ 21 ဒူအီ ဂေ တီ ဒီ ဘော ဟာဝ် ဝိဝ် ဟာဝ် ဝေန့်။ ဂေ တူ ဒါခိုယ် ခဲင် နဝ်း ဘော အေတ့် ပီ ဒီ ဟူမ်။ ပီ ကာပြာန့် ဂေ ပီ ဒီ ဟူမ်၊ န့ တဲး ဂေ ရူ ကာဆဝ်။ ဂေ ဒီ ဘော ဆာကိုဝ်း ယွတ် နာ ဒဲင်၊ ဘော အေး ခုန်ဒီခမ် အီ အိုပ် ဂေ ဘော ဇဝ်ဖြာ ပီ ကြိုပ် ဂေ။ 22 ဂေ ပီ ဒီ ဝီ မုတ် ယွတ် ဘော ဒဲင် ကာဒါယ်၊ ဂေ ဒီ ဘော ယိုဝ် မီ အီ အပ် ဝွင့် ဒီတိန့် ဘော ဒုက် အီ မွှိုမ် ယုဝ် ကာဆဝ်။ ပါယ် တီ ဂေ ဒီ စုဝ်း ခဲင် အပ် ဝွင့် အီ တူ တဲး ဂေ ယိုဝ် မာဆေ။