1 အာအီဆာယ ပီ ဝီ တဝ်း၊ “မာလဲ၊ ဂေ ဒူအီ အီ ဟဲ့ ဟွတ့် ခမ် ဒုက် တီ၊ ဂေ အာဝ် ဟူ လုဝ် ကွယ် ခဲင် အပ် ဝွင့် ဇိုဝ် တီ။ အန် ဇဝ် ဟဲ့ ဘူင် တဲး ကာဒါယ် မိူင် ဇေဘူလူန် ဘော ကာဒါယ် မိူင် နာပ်ထာလီ စုဝ်း တျီမ်။ ဝါယ် အန် တီ အန် ဇဝ် ဒီ ဝီ ဘူင် တဲး အိူင် ဂါလီလေ ဝီ မိုဝ်း ဆာရေ။ န့ ဘော ကွယ် ခူပ် န့တေန့် အီ ဇမ် ဒူင် ကွယ် အိုမ် တာင် ဘော ဒီ ခူပ် ဘ့လဲင် အိုမ် ယောဒါန်။ အိူင် ဂါလီလေ တီ ဘော မုး ဒူင် ကွယ် ဒူအီ အာမျုဝ် ဟဝ်။

2 ဇဝ်ဖြာ ဟဲ့ တဲး အုဝ် ယိုဝ် အီ ဒီ ပါယ် နာ အာတ့်။ အုဝ် ယိုဝ် ဂေ ဒူအီ အီ ကွယ် ခဲင် အပ် ဝွင့်။ ဂေ ဟဲ့ ဝီ ယိုဝ် ဘ့လာင် အီ တာင် ကာဆဝ်။ ဘ့လာင် တီ ဟဲ့ ထွင် ဂေ ဒူအီ အီ ကွယ် ခဲင် အီ အပ် ဝွင့် ဒီတိန့် တွိုန်။

3 ဇဝ်ဖြာ ဟဲ့ ဝီ တဲး ဂေ ဒူအီ အီဆာရေလ ဘြဲ ကိူန် ကာဆဝ်၊ တဲး ဂေ ဘျုဝ် ဒါခိုယ် ကာဆဝ်။ ဂေ ဟဲ့ ခူယ် ဒီ အာတ့် အန် ဇဝ် ကော ပီ ဒေါ ဟဲ့ ဒါခိုယ် အီ ဒေါ မုး အာခြာဝ် ဟဲ့ ဟွတ့် ဆုဝ့်၊ ဟဲ့ ဟွတ့် မး ဂေ ငှုဝ်။ န့ ဘော ပီ ဒေါ ဟဲ့ ဘျုဝ် ဒါခိုယ် ဒါ ဆိုက် ဒေါ လာယ် ကာဆာင် ဂေ ကြုဝ်ကြာမ် ပဲ့ ဟဲ့ ဖာတ် တး ဂေ။

4 ခုဝ်၊ န့ ပီ မဲ ဇဝ် ဟဲ့ ကာဘက် ဝဲန် မင် ဂွတ် ဂေ၊ ဘော အဲ့မဝ် အီ စှိုပ် ဒီ ယ ဂေ။ မဲ ဟဲ့ ဒိုဝ်း ဝဲန် ဘော မ့ဖျီ့ ဂေ ဒူအီ အီ ခါနှာပ် ဂေ။ မဲ ဇဝ် ဟဲ့ ဘူင် ပါယ် တီ တဲး န့ ပီ ဒေါ ဟဲ့ ကာဂုဝ်း အွင် မဲ ဇဝ် ဂေ ဒူအီ ခဲင် မိူင် မီဒီအာန် တွိုန်။

5 ခူဒိန့် ပီ စှိုပ် ဒါ ဆိုက် ဒေါ ကာဂုဝ်း ဂေ ဒီ အီ ဘော ခြိုင် တာ ဂေ အီ ဟဲ့ ဘဲ နှာမ်၊ ဘောကာဂ့လျီတ် ဒီ ကာဆိုမ် တူတ့် ခဲင် ငဝ်။

6 ခုဝ်၊ ဟဲ့ မိုဝ်း ဂွန် ဒီတဲတ် အီ ဟဲ့ ဂွိုတ် တး၊ တဲး အန် စွယ် အေ။ န့ မုး ဂွန် အီမာယ် ပဲ့ ဟဲ့ ဒွါ ဇဝ်ဖြာ ဒီ အေ။ ဂွန် တီ၊ အန် ဒီ ဘဲန် ဒါ ကာညာ တာင် အီ အိုပ် အေ။ အန် ဒီ ဘော စိူဝ် အီ ဒွါ အာကျာမ် အာငျာန် အီ မွှိုမ် အာမ်။ အန် ဘော မုး ဇဝ်ဖြာ အီ မိုဝ်း ပွုန် တာင် ဘော ဂုန့် အေ အီ ကွယ် ဆေဆေ ဘော အီ နပ် ဒီ ဒွါ နဝ်း ဂျီတ် ယေန်။

7 အာဖုင် ဒင်ခုဝ် အန်၊ န့ ဒီ ဘော ကြဲ ဒီ တာင် ကာဆဝ်။ မာန် မိူင် ပီ ဒီ အိုပ် အန်၊ န့ ဒီ ဘော ဒါခိုယ် ဂတ် ဂျီတ် ဆေဆေ။ အာခြာဝ် ပီ အိုပ် အန် တူ တူတ့် ဒေါ မှဝ်။ အန် ဒီ ဘော အိုပ် မိူင် ပီ ဒွိုမ် အိုပ် ခုန်ဒီခမ် အာဒါဝိတ်။ အန် ဒီ တဲး မိူင် တီ ကွယ် မန် ဆီချာ ကူပ် ဘူင် အန် နာ ဆိူဝ် နာ မှာန် ဘော ဆုင်ဖျာတ် ဒူပ် ဒါရာ။ အန် ဒီ ဘူင် ပါယ် တီ ဆိန့် ဒေါ တီ နီ ကော ဇမ် နာ အာတ့် ဟာဝ် ဒွန် စုဝ် ဒွန် ဘာန်။ န့ မုး ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ ဒီငန့် ဒီ ဘူင် တဲး န့ ကော ဟွတ့် တူတ့် ဒွန် မျုဝ်။”

8 ဝါယ် အန် တီ၊ အာအီဆာယ ပီ ဝီ ကာလာင် ဟာဝ် တဝ်း၊ “ဇဝ်ဖြာ ဟဲ့ တိုယ် ဂြုဝ်း အီ ဒမ် ဆာဒိက် ဒီ ဂေ ဒူအီ အီဆာရေလ ဘောကာဂ့လျီတ် အီ မုး ခြိုဝ် အာကူပ်။ န့ ဒီ ဘော ဘဲန် ခဲ့ ပီ ကာလာင် အန်။

9 ဂေ ဒူအီ အီဆာရေလ ဘောကာဂ့လျီတ်၊ ဂေ အီ ကွယ် ခဲင် မိူင် အာအေဖာရိမ် ဘော ဂေ အီ ကွယ် ခဲင် မိူင် ဆာမာရီ ဒီ ဘော နပ် လွင် ပီ ဒီ ဘူင် အန် ဇဝ် တီ။ ဂေ ဟဲ့ ဝီ ပီစာ ဂေ ဘော မိုဝ်း နဝ်း ပီခိုက်။ ဂေ ဘော ကာလာင် တဝ်း၊

10 ‘ရဲင် မာဝ် မာအုတ် တာင် ပီ ဘော ဟဲ့ ကေး မိူဝ်၊ ယေ ဒီ ဝီ ဂုဝ် တာ မာဝ် ပဲ့ ဟဲ့ ဒဝ်း အီ။ ဟေ ဘ့လေ ဒီပူ ပီ ဘော ဟဲ့ ဂ်ု ကေး တူတ့် မိူဝ်၊ ယေ ဒီ ဝီ ဒိုဝ်း ဟေ အာရိတ် ဝီ ဆမ် ပ့လု။’

11 မာလဲ၊ ဇဝ်ဖြာ ဟဲ့ စွယ် ဂေ ရန်ဆူ ခုန်ဒီခမ် အာရေဆိန် တွိုန်၊ တဲး ဂေ ဘဲန် နဝ်း ဆီ တး ကာဂုဝ်း ဒီ မိူင် အာရာမ် ပီ အိုပ် ခုန်ဒီခမ် အာရေဆိန်။ အန် ဇဝ် မိူဝ် ဟဲ့ ကာဆုး ရန်ဆူ ဂေ တီ။

12 ဂေ ဒူအီ အာရာမ် အီ တး နာ လေး ဆီငဲ ဘော ဒူအီ ဖီလီထီ အီ တး နာ ဂေတ့် ဆီငဲ ဒီ ဘော ပဲ ဂေ ဒူအီ အီဆာရေလ။ န့ ပီ ဂေ ဟဲ့ အာင် မူတ့် ဂေ၊ မဲင် ဘ့လွိုပ် ဂေ ဘောကာဂ့လျီတ်။ ပီ ဘော ဟဲ့ ပါယ် တီ မိူဝ်၊ နဝ်း ရူ ဇဝ်ဖြာ ယီ တူ ယေန်။ န့ ပီ အန် ယီ ဆီ ဆူင့် ဒဲ အန်၊ တဲး အန် မး ဂေ ပေါ မ့ပွါ။

13 ဂေ ဒူအီ အီဆာရေလ ယီ တူ လှုဝ်း မှာပ် ဂေ၊ တူ လှုဝ်း ဇဝ်ဖြာ အီ ဟဲ့ တဲး ဂေ ခမ် ဒုက် တီ။ ဇဝ်ဖြာ အီ အိုပ် တူတ့် ဒွန် မျုဝ် ပီ ဘော ဟဲ့ ဒမ် မှာပ် ဒီ ဂေ မိူဝ်၊ ဂေ တူ ဘျွင် နဝ်း ဂေ၊ တဲး ဂေ ဝီ ဒူပ် ဇဝ်ဖြာ။

14 ကူပ် န့ ပါယ် တီ ဇဝ်ဖြာ ဒီ ဝဲန် ဂေ ဒူအီ အီ ပီ ဂိန့် ဂေ ဆီဒါ ခဲင် မိူင် အီဆာရေလ။ န့ ဘော ပီ အန် ဒီ ဒဲပ် ဝဲန် ဘော ရာ ဟေ စိုက် ဘော ဂ့လူင့် အီ ကွယ် ခဲင် မိူင် အီဆာရေလ၊ တဲး န့ ကော တူတ့် အူ ဆီငဲ။

15 ဂေ ဒါ တာင် ခဲင် မိူင် ဘော ဂေ ဒူအီ ကတ် ဒူအီ ဂဲ၊ ဂေ ပီ ဂိန့် ဂေ။ ဂေ ဒူအီ အီ ကာလုဝ် ဒီ ဘျာန် ဂြုဝ်း ဇဝ်ဖြာ၊ ဂေ ဘော ပီ ဆီဒါ ဂေ ဒူအီ အီဆာရေလ။

16 ဂေ ဒါ တာင် အီ ဟဲ့ ယဲတ့် ဒူအီ ကိူန်၊ ဂေ ဟဲ့ ယဲတ့် တဲး ဒူအီ ကာလိုပ်။ ဘော ဒူအီ ပီ ယဲတ့် ဂေ တီ၊ ဂေ ဟဲ့ လိုဝ် စှိုမ် တူတ့်။

17 ကူပ် န့ ပါယ် တီ ဇဝ်ဖြာ တူ ကာဝေ ဒူအီ နှိုမ် ခေါ အူ ဝီ။ အန် ဇဝ် မိူဝ် တူ မိုဝ်း နဝ်း ကာဝေ ဂေ ယာ ဆီပြး ဘော ဂွန် ဆီပြး။ ခုဝ်၊ ခဲ့ ကွယ် ဒူအီ ဘောကာဂ့လျီတ်၊ အာဝ် ဟူ နပ် ဒါရာ ဇဝ်ဖြာ။ ဂေ ဟဲ့ ဟာယ် ကာဆဝ်။ ဂေ ဒွန် အီ ဘော ကာလာင် မီ ဂြုဝ်း ကာလုဝ် ဘော ဂြုဝ်း တူ မှာန် ဒီလူယ်။ ကူပ် ပါယ် တီ န့ တူ တဲး နဝ်း ရူ ဇဝ်ဖြာ ယေန်။ န့ ပီ အန် ယီ ဆီ ဆူင့် ဒဲ အန်၊ တဲး အန် မး ဂေ ပေါ မ့ပွါ။

18 အီ ဟာယ် အီ မိူက် ပီ ဘူင် ဒူအီ ဂေ တီ၊ န့ ဘော ပီ ငဝ် အီ ကာဆိုမ် ဒဝ် မာအာတ့် ဘော ယွုန် ဂေ ပြဲ။ န့ ဘော ကုး ပီ ငဝ် ကာဆိုမ် ပြဲ၊ တဲး ဒက် ငဝ် ကော ဟေတ့် ကာဆဝ်။

19 န့ ယီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ ရူ ကာဆဝ်။ အန် ဇဝ် ဒီ တဲး ငဝ် ကာဆိုမ် တူတ့် မိူင် ဂေ၊ တဲး ဒူအီ ဘောကာဂ့လျီတ် စှိုမ်။ အာဝ် မိုဝ်း အာဆေ အီ ပွိုန် စွယ် ဘီနွင် ဝေါဝဲ အန်။

20 ဂေ ဒီ ဘော ဟြေတ့် ပီ ဒီ ဟူမ်၊ ဘော ဟာဝ် အူ ပ့လုဝ့်၊ ပွိုန် ဒီ ဘာဝ် ဟူမ် ခဲ့ ပွိုန် ဂေ အီ စဲက်။ န့ ယီ တူ တဲး ဂေ ဖဲ။ ဂေ ပီ ဝီ ဟာဝ် ပေါ အူ ဘ့လာက်၊ ပီ ဝီ ပွိုန် ဒီ ဟူမ် အီ စဲက်၊ ကာပြာန့် ဂေ ယီ တူ ဟြာယ်။ ဂေ ဒီ ဘော ဝီ ဟူမ် ယင် ဂွန် ဂေ။

21 ဒူအီ အာမာနာဆေ ဒီ ဘော ကာဂုဝ်း ဒီ ဒူအီ အာအေဖာရိမ်။ ဂေ ဘော အာ မျုဝ် ပီ ဒီ ဝီ လာယ် ဖြူမ်၊ ဝီ ကာဂုဝ်း ဒီ ဒူအီ အာယူဒါ။ ပီ ဘော ဟဲ့ ပါယ် တီ မိူဝ်၊ နဝ်း ရူ ဇဝ်ဖြာ ယီ တူ ယေန်။ န့ ပီ အန် ဆီ ဆူင့် ဒဲ အန်၊ တဲး အန် မး ဂေ ပေါ မ့ပွါ။”