ဂေ ဒူအီ အီ ဟဲ့ ဒဲမ် အုန် ဒါရာ အီ တူ မှာန် အီ နပ် ဒီ ခါနှာပ် ဒူအီ ပီ အိုပ် အုဝ်၊ ဂေ လုဝ် ခမ် ဒုက် တာင်။

2 ဒါရာ ဂေ တီ၊ န့ ဒီ ဘော ခြဲ ဒူအီ ဂိန် ဒူအီ အေတ့်၊ တူ တဲး ဂေ မိုဝ်း ပွုန် မာဆေ။ ဒူအီ ဂေ တီ၊ ဂေ မိူဝ် တူ ဆုင်ဖျာတ် တဲး န့ ကာရမ်။ ဂေ ဘော ဖာတ် ဒိုဝ်း ကြုဝ်ကြာမ် ယာ ဆီပြး ဂေ ဂွန် အီ တူ မိုဝ်း ဂုန့်။

3 “ဘေ အီ ဘူင် ဇိုဝ် တီ၊ မှဝ် ဘေ ဒီ ပါယ် ဆေ ဟီ ဇမ် ဆီငဲ ဒီ ဒမ် ဇဝ်ဖြာ မှာပ် ဒီ ဘေ၊ ပန် ဒီ တး အာဖေ အာရေ နာ ကာတူင့်၊ တး ပျာတ့် ဘေ။း ဘေ ထာင် ဘေ ဒီ လွတ်။း ဘေ ဒီ တဝ် ဟာဝ် နာ မှဝ်၊ ဟြေတ့် အီ စွယ် ဘေ။း ဘော ကြုဝ်ကြာမ် ဘေ၊ ဘေ ဒီ ဒိုဝ်း ဟာဝ် ချြီင် ဒီ မှဝ်။း

4 ဘေ ယီ တူ လွတ် ဒေါ မှဝ်။ ဘေ ဒီ လုဝ် ခမ် အီ မှေတ့် ခြွင့် ဘေ ခဲင် ကာပိုမ် ဒူပ် အီ ဟဝ်။ ဆေ ဒါ ဆိုက် ငဝ်း ယမ် အီ ဟဝ်၊ န့ ဘော ဘာ့ ဘော ဘေ။ ပီ ဘော ဟဲ့ ပါယ် တီ မိူဝ်၊ နဝ်း ရူ ဇဝ်ဖြာ ယီ တူ ဟြာယ်၊ အန် ဇဝ် ယီ ဆီ နဲ့ ဒမ် မှာပ် ဒီ ဘေ။” ခဲ့ တီ အာအီဆာယ ဟဲ့ ကာလာင်။

5 ဇဝ်ဖြာ ဝီ တဝ်း၊ “အိုယ် ဘေ ဒူအီ အာဆူရီယာ၊ ဘေ ပီ န့ကြွုန် ဘော မင် မး အုဝ်။ အုဝ် ဒီ တဲး ဘေ မး ဒူအီ အီ ဟဲ့ ဘူင် တဲး အုဝ် ရူ ကာဆဝ်။

6 အုဝ် ဒီ စ်ု ဒူအီ အာဆူရီယာ ဟာဝ် ဒူင် ကွယ် ဂေ ဒူအီ အီ တူ ရုဝ်ဆေ ဇဝ်ဖြာ၊ တဲး ဂေ ကာဂုဝ်း ဒီ ဒူအီ အီ တူ ဒူပ် ဒါရာ၊ အီ ဟဲ့ ဘူင် တဲး အုဝ် ရူ ကာဆဝ်။ အုဝ် ဒီ တဲး ဘေ ဖာတ် ဒိုဝ်း တူတ့် ကြုဝ်ကြာမ် ဂေ၊ တဲး ဘေ အိုပ် ဒူအီ ဂေ တီ ဘောကာဂ့လျီတ်၊ တဲး န့ ပီ ဒူအီ ညဲတ့် ညုဝ့် ဒူပ် န့တေန့်။

7 မာလဲ၊ ခုန်ဒီခမ် အီ အိုပ် မိူင် အာဆူရီယာ တူ ဝီ ထာင် န့ မုး အုဝ် ဇဝ်ဖြာ အီ ဟဲ့ စ်ု အန်။ အန် မိုဝ်း ပီ ခြာမ် ခဲင် နဝ်း အန် ရာင် အန်။ အန် ဝီ ခြာမ် ဒီ ပျာတ့် ဒူအီ ဘဲန် မျုဝ် ဘဲန် မျုဝ်။

8 အန် ဒီ ဘော ပီဖုင် အန် တဝ်း၊ ‘အာမူ အာမာတ် အုဝ် ဒွန် အီ၊ ဂေ ဒီ ဘဲန် တူတ့် ခုန်ဒီခမ်။

9 အုဝ် ဒီ ဘော ကာဂုဝ်း ပွိုန် မိူင် ကာလာနော ပီ ဒေါ ဟဲ့ ပွိုန် အုဝ် မိူင် ခါဆေမိတ်။ မိူင် ဟာမာတ်၊ န့ ဒီ ဘော ပီ မိူင် အာရာဖာတ်။ မိူင် ဆာမာရီ ဒီ ဘော ပီ မိူင် ဒါမာခူ။

10 အုဝ် ဟဲ့ ပျာတ့် မာန် မိူင် အီ မိုဝ်း အာရိုပ် ရာင် အီ မျာတ် လွှိုမ် အာရိုပ် ရာင် အီ ကွယ် ခဲင် မိူင် ယေရူဆာလဲမ် ဂါယ် မိူင် ဆာမာရီ။

11 အုဝ် မိူဝ် ဒီ ပျာတ့် မိူင် ဆာမာရီ ဘော အာရိုပ် ရာင် အီ ကွယ် ခဲင် မိူင် တီ။ ပါယ် တီ အုဝ် ပီ ဒီ ဝီ ပျာတ့် ဝဲန် ဘော မိူင် ယေရူဆာလဲမ် ဘော အာရိုပ် ရာင် အီ ကွယ် ခဲင် မိူင် တီ။’” ခဲ့ တီ ဇဝ်ဖြာ ဟဲ့ တဝ်း လွင် ခုန်ဒီခမ် အာဆူရီယာ။

12 မာလဲ၊ ဇဝ်ဖြာ ဝီ ကာလာင် လွင် ပန် ဟဲ့ ဟွတ့် ဘူင် အန် ခဲ့ ပီ ဆီ ဘူင် အန် ဒီ နွန် ဇီအူန် ဂါယ် မိူင် ယေရူဆာလဲမ်။ အန် ပီ ဝီ တဝ်း၊ “အုဝ် ဒီ ဝီ ဒမ် မှာပ် ဒီ ခုန်ဒီခမ် အာဆူရီယာ။”

13 ခုဝ်၊ ဇဝ်ဖြာ တဝ်း၊ “ပွုန် အုဝ် ပွိုန် ဘူင် ပါယ် တီ အုဝ် စ်ု န့တေန့် နပ် အုဝ်၊ စ်ု န့တေန့် ကျ အုဝ်။ အုဝ် ဟဲ့ ပျာတ့် ဝဲန် တူတ့် ကာအုန် ကာဒါယ် အီ ကာခန် ဒူင် ကွယ် ဂေ ဒူအီ။ အုဝ် ဟဲ့ ဖာတ် ဒိုဝ်း တူတ့် ကြုဝ်ကြာမ် ပီ အုန် ဂေ။ ပ့လူမ် အုဝ် ဟဲ့ ပီ ပ့လူမ် မက် ဒီဆုဝ်၊ န့ ဟဲ့ တဲး ဂေ ဒူအီ အီ ကွယ် ဒဲင် မာလာင် စုဝ်း လူင်၊ စှိုမ် တူတ့်။ အုဝ် ဒီ ညဲတ့် ဒူအီ ဂေ တီ ဘောကာဂ့လျီတ်။

14 ကြုဝ်ကြာမ် ဂေ ဒူအီ ဒဲင် ကာဒါယ် အီ မိုဝ်း ဒီငဝ်း ဒီခန်၊ န့ ပီ ကာဟုန် မာဆိမ်။ အုဝ် မိူဝ် ဟဲ့ ဂဲပ် ကာဇု တူတ့် ဒီ အုဝ်။ အုဝ် ဟဲ့ ပွိုန် ဒိုဝ်း ငှိုယ် ငှိုယ် ခဲ့ မိုဝ်း ကြုဝ်ကြာမ် ဒဲင် ကာဒါယ် ပီ ဒူအီ အီ ပြာ ပွိုန် မာဆိမ်။ အာဝ် မိုဝ်း အာဆေ အီ ယ ခြဲ အုဝ်၊ ကာဘျုဝ် အုဝ်။” ဇဝ်ဖြာ ပီ ဘော ဟဲ့ တဝ်း ပါယ် တီ မိူဝ်၊ 15 “ဘေ ထာင် မိုယ် ဒီ ဘော ပွိုန် တဝ်း၊ အန် တာင် လွှိုမ် ဒါ ကာညာ အီ စ်ု အန်။း ဘေ ထာင် လေက်လိုဝ် ဒီ ဘော ဘွတ် ဘော ခိုက်ခမ် လွှိုမ် ဒူအီ အီ ပါ အီ ကာဆွာ့ အန်။း ဘော န့ကြွုန် တူ နပ် ဒီ ဂူင့် ဒူအီ။ မင် မး မိူဝ် တူ နပ် ဒီ မး အီ ဂူင့် အန်။

16 ကူပ် ခုန်ဒီခမ် ပီဖုင် အန် ပါယ် တီ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ ဘော ဒိုဝ်း ဆဝ် ရောဂါ ဟပ် ဒီ ဂေ ဒါ ဆိုက် ခုန်ဒီခမ် အီ မိုဝ်း ပ့လူမ် မိုဝ်း ဟဲန့်။ ဘော အာဖုင် ဒင်ခုဝ် အန် ဒီ ဟြာယ် ပီ ဒူအီ ဟဲ့ ဘ့လေး ငဝ် နာ ခြိုမ် တဲး န့ ကာဆိုမ်။

17 ဇဝ်ဖြာ အီ ပီ ဘ့လာင် ဒီ ဂေ ဒူအီ အီဆာရေလ၊ အန် ဒီ ဘဲန် ပီ ငဝ်။ ဇဝ်ဖြာ အီ ဆီငါ ဘွတ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဒီ ဘော ဘဲန် ပီ ပ့လဲ့ ငဝ်။ အန် ဇဝ် ဒီ တဲး န့ ကာဆိုမ် ဘော ယွုန် မာအာတ့် ဘော ပေတ့် ဂေ ပြဲ တဲး န့ ကာဆိုမ် တူတ့် ကာန်ု အူ ဆီငဲ။

18 ဘော နင် ဟေ အီ မိုဝ်း ဆာရေ တာင် ဘော မာန် ဂေ ဒူင် နာ အီ ဘွတ် ကာဆဝ် ဒီ ဘော လိုဝ် စှိုမ် တူတ့် ပီ ဒူအီ အီ မိုဝ်း ဆဝ် ရောဂါ အီ တဲး အန် လိုဝ် စှိုမ်။

19 နင် ဟေ အီ ဆီ ဂိူတ် ဆီ ကွယ် ဝါယ် အန် တီ ဒီ ဘော ပြေတ့် ကာဆဝ်။ ဂွန် ဒီရွယ် မိူဝ် ဒီ ဘော ပဲ ဒီ တိး ဘော ဒဲမ် အုန် လွင် အန်။” ခဲ့ တီ ပဲ့ ဟဲ့ ကာလာင် ဇဝ်ဖြာ။

20 ဝါယ် အန် တီ ဇဝ်ဖြာ ပီ ဝီ တဝ်း၊ “အာခြာဝ် ဒေါ အန် တီ ဂေ ဒူအီ အီဆာရေလ အီ ဆီ ဂိတ် ဘော အာမျုဝ် အာကူပ် အီ လွတ် အာဖေ အာရေ၊ ဂေ တူ ဝီ ထူမ် ဂြုဝ်း ဒူအီ အီ ဟဲ့ ဒွိုမ် ခါနှာပ် ဂေ။ ဂေ ဒီ ဝီ ဘိုင် အာခ်ု မှာန် ဇဝ်ဖြာ အီ ဆီငါ ဘွတ် အီ အိုပ် ဒူအီ အီဆာရေလ။

21 ဂေ ဒူအီ အီဆာရေလ အီ ဆီ ဂိတ် တီ၊ ဂေ ဒီ ဝီ တး ဘိုင် ဇဝ်ဖြာ အီ မိုဝ်း အာဖုင် ဒင်ခုဝ် တာင်။

22 ဒေါ တီ နီ၊ ဂေ ဒူအီ အီဆာရေလ ပီ ဘော ဟဲ့ ကိူန် ကော ပီ ကာဟာတ့် အီ ကွယ် ခူပ် အိုမ် နမ်မုက်ဆာရာ မိူဝ်၊ န့ ယီ ဒီ ဂိတ် မီ မင် အီ အီ ဒီ ဝီ တး။ ဂေ ဒူအီ ဘောကာဂ့လျီတ် ဒီ လုဝ် ခမ် အီ တဲး ဂေ လိုဝ် စှိုမ်။ ဂေ ဒီ လုဝ် ခမ် ခဲ့ ကာအာပ် ဂေ ခမ်။

23 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ ဘော ပျာတ့် ဝဲန် တူတ့် ဘော ရဝ် ဘော မိူင်၊ တဲး န့ ဒူပ် ပီ တဝ်း အန် ဒီ ဘူင်။”

24 ဇဝ်ဖြာ အီ အိုပ် တူတ့် ဒွန် မျုဝ်၊ အန် ဝီ တဝ်း၊ “အိုယ် ဘေ ဒူအီ ပီ အိုပ် အုဝ် အီ ကွယ် ခဲင် မိူင် ဇီအူန်၊ ဂေ ဒူအီ အာဆူရီယာ ပီ ဘော ဟဲ့ ခါနှာပ် ဘေ ပီ ဂေ ဟဲ့ ခါနှာပ် ဒူအီ ခဲင် မိူင် အဲဂိုပ် မိူဝ်၊ ကွဲ့ တဲး ဘေ ယုဝ်။

25 အာဝ် ဟူ ဘော လှေန့်၊ နဝ်း ရူ ဘော နဝ်း စာဝ် အုဝ် ဒီ ဘေ၊ န့ ဒီ တူတ့်။ အုဝ် ယီ ဒီ ဝီ ဘူင် တဲး ဂေ ဒူအီ အာဆူရီယာ ဝီ လိုဝ် စှိုမ်။

26 ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ ဒိုဝ်း မ့ဖျီ့ မး ဂေ၊ တဲး န့ ပီ ဒေါ မး အန် ဒူအီ မီဒီအာန် ဒေါ ကွယ် ဂေ ခူပ် ဒါအာင် မာဝ် အီ စိူဝ် အောရာဖ တွိုန်။ အန် ဒီ ဒမ် မှာပ် ဒီ ဂေ ဒူအီ အာဆူရီယာ၊ တဲး န့ ပီ ဒေါ ဒမ် အန် မှာပ် ဒီ ဂေ ဒူအီ ခဲင် မိူင် အဲဂိုပ် တွိုန်။

27 ဒေါ အန် တီ ကြုဝ် စန် ပီ ဂွတ် ဘေ၊ အာဝ် ဟူ မိုဝ်း။ ဘော မင် ဂွတ် ဘေ ဒီ ကာဘက် လိုဝ်။ န့ ဒီ ကာဘက် လိုဝ် ကူပ် ဟဲ့ ဝီ ပ့လူမ် ခ ဘေ။” ခဲ့ တီ ဇဝ်ဖြာ ဟဲ့ ကာလာင်။

28 ပန် ဒီ တး ကာဂုဝ်း ရန်ဆူ န့ ဒီ ပါယ် နီ။ ရန်ဆူ ဘေ ဒီ ဘော ကာဂုဝ်း ပွိုန် မိူင် အာယာတ်။ ဂေ ဒီ ဘော ဝီ ကာလုဝ်း ဇမ် မိူင် မီခြူန်။ ပီ ဝီ ချ အုန် ကြုဝ်ကြာမ် ဂေ ဒီ မိူင် မိက်မာတ်။

29 ဂေ ဒီ တး ဒူပ် န့တေန့် အီ ဟာဝ် ဒီ ကာတဲ နွန်၊ ဝီ တး ချ ဒီ မိူင် ဂီဘာ အာဒါ အူ မှိုဝ်။ ဟဲ့ ဟွတ့်၊ ဂေ ဒူအီ ခဲင် မိူင် ရာမာ ဘောကာဂ့လျီတ် ဒီ ဘော ယုဝ် ဒီယုး ဒီယေန့်။ ဒူအီ ခဲင် မိူင် ဂီဘီယာ အီ မုး မိူင် ဒူင် ကွယ် ခုန်ဒီခမ် အာဆောလူ တွိုန်၊ ဂေ ဒီ ဘော ဝီ တဝ်။

30 အိုယ် ဘေ ဒူအီ အီ ကွယ် ခဲင် မိူင် ကာလိမ်၊ တဲး ဘေ ဒတ် တာင် တာင်။ ဘေ ဒူအီ အီ ကွယ် ခဲင် မိူင် လေဆာ၊ တဲး ဘေ ထူမ်။ ဘေ ဒူအီ အီ ကွယ် ခဲင် မိူင် အာနာထူတ်၊ တဲး ဘေ ဝျီ့ ဂြုဝ်း ဂေ တီ။

31 ဂေ ဒူအီ အီ ကွယ် ခဲင် မိူင် မာတာမဲနာ ဒီ ဘော တဝ် ဂေ။ ဂေ ဒူအီ ခဲင် မိူင် ဂေဘိမ် ဒီ ဘော ဟြေတ့် ဒူင် ဒီ တဝ် ဟာဝ် ဂေ၊ တဲး ဂေ လွတ် ယမ်။

32 ဆီငဲ တီ၊ ခဲ့ ကွယ် ရန်ဆူ ဘောကာဂ့လျီတ် ဒီ ဂိူတ် တူတ့် ဒီ မိူင် နုဝ်ဘ။ ဂေ ဒီ ဘော တာ ကာလိုမ် ဂေ ငှာ ဒီ ဒူအီ အီ ကွယ် ဒဲင် နွန် ဇီအူန် အီ မုး နွန် မိူင် ယေရူဆာလဲမ်။

33 ဇဝ်ဖြာ အီ အိုပ် တူတ့် ဒွန် မျုဝ်၊ အန် ယီ ဒီ ဘူင် တဲး ရန်ဆူ ဂေ တီ လိုဝ် စှိုမ်၊ တဲး န့ ပီ အီ ဒဲပ် စုဝ်း ရာ ဟေ အီ တာင် ကာဆဝ်။ ကာတဲ ဒူအီ ဂေ တီ၊ ဝီ မှဝ် အီ ကျ၊ ဝီ မှဝ် အီ တာင် လွှိုမ် အီ ဟဝ်၊ အန် ဒီ ဝီ စုဝ်း တျီမ် ပီ အီ ဂ်ု ကေး ဟေ တာင်။

34 ဟေ အီ ဘွတ် အီ မွှိုမ် အီ ကွယ် ခဲင် ပြဲ၊ ဇဝ်ဖြာ ဒီ ဘော ဂ်ု ဝဲန် တာ မိုယ်။ ဟေ တာင် အီ ကွယ် ဒီ နွန် လေဘာနုန်၊ အန် ဇဝ် အီ မိုဝ်း ပွုန် တာင် ကာဆဝ် ဒီ ဘော ဂ်ု တဲး န့ ကေး။