1 ခြိုဝ် အာယေဆေ ဟဲ့ ပီ ဟေ တာင် ပီ ဂ်ု ဝဲန် အီ။ န့ ယီ ဒီ ဝီ မိုဝ်း ဒူအီ အူ ဝီ အီ ပီ န့လုဝ်း ကာမာယ် အီ ဝီ လေး ဒီ ဒင် ဘြိမ် အန် တီ။ အန် ဘော ပီ ရာ ကာမာယ် အီ လေး ခဲင် ရျီး ဟေ တီ ဒီ ဝီ မိုဝ်း ဘ့လေ။

2 နဝ်း ဖွိုမ် ဇဝ်ဖြာ ဒီ ဘော တဲး အန် မိုဝ်း အာငျာန် ဘွတ်၊ တဲး အန် နပ် ပီ ပါယ် ဘဲန် မျုဝ် ဘဲန် မျုဝ်၊ မိုဝ်း ဘော အာကျာမ် အာငျာန် ဘော ပ့လူမ် ဂေ ဟဲန့်။ အန် ဒီ ဘော အိုပ် ဂေ ဒူအီ အန် ဘောကာဂ့လျီတ်။ အန် ဒီ ဘော နပ် ဘော ရုဝ်ဆေ ဇဝ်ဖြာ။

3 အန် ဒီ ဘော ဘျုဝ် ဒါခိုယ် ဒီ ရုဝ်ဆေ ဇဝ်ဖြာ။ အန် တူ ဆုင်ဖျာတ် ဒူပ် ပဲ့ ဟဲ့ ယိုဝ် အန်။ အန် မိူဝ် တူ တဲး ဒမ် ဒူပ် ပီ ထူမ် အန်။

4 အန် ဒီ ဆုင်ဖျာတ် ဒါရာ ဒီ ဂေ ဒူအီ ဂိန်၊ တဲး န့ ကာရမ်။ အန် ဘော ဂွင့် ရဲ ဂေ အီ တူ မိုဝ်း ပ့လူမ် ဂေ ဟဲန့် အီ ကွယ် ဒဲင် ကာဒါယ်။ ဂြုဝ်း အီ ဒမ် မှာပ် ဒီ ဂေ ဒူအီ၊ န့ ဒီ ပီ အန် တာ န့ကြွုန် အန်၊ မး ဂေ ဒူအီ ဒဲင် ကာဒါယ်။ ဂေ ဒူအီ ဟာယ် ဒူအီ မိူက် ဒီ ဘော လုဝ် ယမ် ကူပ် အာမိင် ပီ ဒွါ အန်။

5 အန် ဒီ ဘော မိုဝ်း နဝ်း ဆိူဝ် နဝ်း မှာန် ဆေဆေ ပီ ဒူအီ အီ ဟဲ့ ရိတ် ဆဲ့ ဒီ ညွယ် အန်။ အန် ဒီ ဘော ဘူင် နာ မုး နာ မှာန် ဆေဆေ ပီ ဒူအီ အီ ရိတ် ဆီဘြွတ် ဒီ ညွယ် အန် ဆေဆေ။

6 မာဆုဝ် ပြဲ ဂေ မာဘူ ဒီတဲတ် ဒီ ဘော ပွိုန် ဒီ ကွယ် ရိုမ် ကွယ် ဒါခိုယ်။ မာဒီဝါယ် ဂေ ဂွန် မာပဲ ဒီ ဘော ပွိုန် ကွယ် ရိုမ် အိတ် ရိုမ်။ ဘော ဂွန် မက် ဂေ ဂွန် မာခြင်ဆီ ဒီ ဘော ကာဒူပ် ဟြေတ့် ဒီ ဟူမ် ပေတ့်။ ဂေ ဂွန် ဒီတဲတ် ဒီ ဘော ဘဲန် အီ ဟျီင် ဂေ။

7 မာမက် ဂေ မာဂြေး ဒီ ဘော ဟူမ် ရိုမ် အူ ပ့လုဝ့်။ ဂွန် ဂေ ဒီ ဘော အိတ် ရိုမ် ကွယ် ရိုမ် ဒါခိုယ်။ ခဲ့ ကွယ် မာခြင်ဆီ ဒီ ဘော ဟူမ် ပေတ့် ပီ မာမက်။

8 ဂွန် င အီ ဆီ ပူ ဒီ ဘော ဒီလာဝ် ခူပ် ကာဒဝ် ဟန့် ဂြဝ်။ ဂွန် အီ ဟဲ့ ဂဝ်း ပူ ဒီ ဘော စူက် ခဲင် ကာဒဝ် မာဟန့် အီ ဟာယ် ကာဆဝ်။ န့ ယီ တူ ဘဲန် အာဖေ အာရေ ဒီ အန်။

9 ဒီ နွန် ဇီအူန် အီ မုး နွန် ဆီငါ ဘွတ် ဒူင် ကွယ် ဇဝ်ဖြာ၊ အာဝ် ဟူ မိုဝ်း အာဖေ အာရေ၊ အာဝ် မိုဝ်း အီ ဟာယ် အီ မိူက် ဒေါ မှဝ်။ ဒဲင် ကာဒါယ် နီ ဒွန် ပ့လုဝ့် ဂေ ဒူအီ ဘောကာဂ့လျီတ် ဒီ ဘော နပ် လွင် ဇဝ်ဖြာ။ န့ ဒီ ဘော ပီ နမ်မုက်ဆာရာ ဟဲ့ မိုဝ်း မီ အိုမ် ဒွန် နာ ဒွန် ပ့လုဝ့်။

10 ဒေါ အန် တီ ဒူအီ အီ ဒီ ဘုဝ် တး ခဲင် ခြိုဝ် အာယေဆေ၊ အီ ပီ ရာ ကာမာယ် အီ လေး ခဲင် ရျီး ဟေ တွိုန်၊ အန် ဒီ ကွယ် ပီ အာလာမ် ပီ ပွိုန် ယိုဝ် ဒွန် အီ။ ဂေ ဒူအီ ဘဲန် မျုဝ် ဘဲန် မျုဝ် ဒီ ဘော ဟြေတ့် အန်။ ဒူင် ကွယ် အန် ဒီ ဘော မိုဝ်း အာဖုင် ဒင်ခုဝ် တာင်။ 11 ဆီငဲ အန် တီ ဇဝ်ဖြာ ဒီ ဝီ ဒဲ့ ကာဇု ဂေ ဒူအီ အာမျုဝ် အန် အီ ဆီ ဂိတ် ဆီ ကွယ် ခဲင် မိူင် အာဆူရီယာ၊ မိူင် အဲဂိုပ် နာ တေတ့်၊ မိူင် အဲဂိုပ် နာ ကွာ၊ မိူင် ကူဆာ၊ မိူင် အေလမ်၊ မိူင် ဘာဘဲ၊ မိူင် ဟာမာတ်၊ မိူင် အီ ကွယ် ခူပ် အိုမ် နမ်မုက်ဆာရာ ဘော ဂေ အီ ကွယ် ဒီ ဂုန် အိုမ်။

12 ဇဝ်ဖြာ ဒီ ဘ့လေး အုန် အာလာမ်၊ တဲး ဒူအီ ဒွန် မျုဝ် ဒဲင် ကာဒါယ် ပွိုန် ဒီ ယိုဝ် ဒေါ ဝီ ဒဲ့ ကာဇု အန် ဇဝ် ဂေ ဒူအီ အာမျုဝ် အန်။ အန် ဒီ ဒဲ့ ကာဇု ဂေ ဒူအီ အာမျုဝ် ယူဒါ အီ ဟဲ့ ကာယဝ်း ကွယ် ဒွန် နာ ဒွန် ပ့လုဝ့် ဒဲင် ကာဒါယ် နီ။

13 ဂေ ဒူအီ အီဆာရေလ၊ ဂေ မိူဝ် အာဝ် ဟူ လှယ့် ဒူအီ အာမျုဝ် ဟဝ်။ ဂေ ဒူအီ အာမျုဝ် ဟဝ် အီ ဘူင် နာ စီစိဝ် ဒီ ဒူအီ အာယူဒါ မိူဝ်၊ ဂေ ဒီ ဟြာယ် တူတ့်။ ဂေ ဒူအီ အီဆာရေလ အာဝ် ဟူ လှယ့် ဂေ ဒူအီ အာယူဒါ။ ဘော ဒူအီ အာယူဒါ အာဝ် ဟူ ဘူင် နာ စီစိဝ် ဒီ ဒူအီ အီဆာရေလ။

14 ဂေ ဒီ ဝီ လာယ် ဖြူမ် ရိုမ်၊ ဟာဝ် ကာဂုဝ်း ဒီ ဒူအီ ဖီလီထီ အီ ကွယ် ဘ့လာက် နာ ဂေတ့် ဆီငဲ။ ဂေ ဒီ ဝီ လာယ် ဖြူမ် ရိုမ်၊ ဝီ ဟာဝ် ဖာတ် ဒိုဝ်း ကြုဝ်ကြာမ် ဂေ အီ ကွယ် ဘ့လာက် နာ လေး ဆီငဲ။ ဂေ ဒီ ဘော ပဲ ဘော အွင် ဒူအီ အေဒူမ် ဘော ဒူအီ မုဝ်အာပ်။ ဒူအီ အာမျုဝ် အမ်မူန် ဒီ ဘော ခမ် ဒီ ထူမ် ဂြုဝ်း ဂေ ဘော ဘူင် ပီ စ်ု ဂေ။

15 အိုမ် အီ ကွယ် ဒီ ကာတုဝ့် အိုမ် အီ စိူဝ် အိုမ် ဒီနှူင် ဇဝ်ဖြာ ဒီ တဲး န့ ဟိတ်။ အန် ဘော တဲး ခုန် တာင် တး ဘုတ် အိုမ် တာင် အီ စိူဝ် အူဖာရာတ်၊ တဲး န့ ကာယဝ်း ဘဲန် ဘူ ဘ့လဲင်၊ တဲး ဂေ ဒူအီ ပွိုန် ဒီ ကာလုဝ်း ဟာဝ် ဒီ ပ့လဝ် ဂေ။

16 န့ ဒီ ဘော မိုဝ်း န့တေန့် တာင် တဲး ဂေ ဒူအီ အီဆာရေလ ပွိုန် ဒီ လေး ခဲင် မိူင် အာဆူရီယာ။ ဂေ ဒူအီ အီ မုး ဒူအီ ပီ အိုပ် ဇဝ်ဖြာ အီ ဆီ ဂိူတ်၊ ဂေ ဒီ ဘော ဝီ တး ခဲင် မိူင် ဂေ၊ တဲး န့ ပီ ဒေါ လေး ဂုန့် ဒင် ဂေ ခဲင် မိူင် အဲဂိုပ် တွိုန်။