1 ဒေါ အန် တီ ဘေ ဒီ ဘော တဝ်း မှုဝ် အီ အိူပ် ဇဝ်ဖြာ။ ဘေ ဒီ ဘော တဝ်း၊ “အိုယ် မဲ ဇဝ်ဖြာ၊ အုဝ် ဒီ ဒါင် ဂုင် ဂေဇူ ဒီ မဲ ဇဝ်။ မဲ ပီ ဘော ဟဲ့ ရူ ဟဲ့ ဘ့လေး ဝဲန် ယေ မိူဝ်၊ မဲ ယီ ဟဲ့ ဝီ ပီ ကြွိုမ် နဝ်း ယေ။

2 မဲ ဇဝ်ဖြာ မဲ မုး ဇဝ်ဖြာ အီ ဒီ ချွတ် အုဝ်။ အုဝ် မိူဝ် ညှိုမ် ဘိုင် မဲ။ အုဝ် မိူဝ် တူ လုဝ် ယုဝ် မာဆေ။ မဲ ဇဝ် မိူဝ် ဒွါ ပ့လူမ် ဂေ ဟဲန့် ဒီ အုဝ်။ အုဝ် ဒီ ဘော ပွိုန် တဝ်း မှုဝ် လွင် မဲ။ မဲ ဘော မုး ဇဝ်ဖြာ အီ ဒီ ချွတ် အုဝ်။”

3 နဝ်း ဘေ ဒီ ဒါခိုယ် ပါယ် တီ ပန် ဒီ ချွတ် ဇဝ်ဖြာ အာဆာက် ဘေ။ န့ ဒီ ပီ ဒူအီ ဟဲ့ ဒါခိုယ် ကူပ် ပွိုန် အန် ဒီ တဝ့် အိုမ် ခဲင် အိုမ် ခိုမ် အီ မိုဝ်း အိုမ် ကိူန်။

4 ဆီငဲ တီ ဘေ ဒီ ဘော တဝ်း၊ “တဲး အေ အိူပ် ဇဝ်ဖြာ ဘော ဒတ် ဒဲ့ အန် ဇဝ်။ တဲး အေ ကာလာင် ဒီ ဒူအီ ဘဲန် မျုဝ် ဘဲန် မျုဝ် လွင် ပဲ့ ဟဲ့ ဘူင် အန် ဇဝ် ဒီ အေ။ တဲး အေ ကာလာင် လွင် အန် တီ၊ တဲး ဒွန် အီ အိူပ် မျုက် အန် ဇဝ်။

5 တဲး အေ တဝ်း မှုဝ် အီ အိူပ် အန် ဇဝ် ကူပ် ဟဲ့ ဘူင် အန် အီ မွှိုမ် အာမ် ကာဆဝ် အီ ဘျ အာဖုင် ဒင်ခုဝ် အန် အီ တာင် ကာဆဝ်။ တဲး အေ ကာလာင်၊ တဲး ဒူအီ ဘော ကာဒါယ် နပ် လွင် အန် တီ။

6 ဘေ ဒူအီ အီ ကွယ် ခဲင် မိူင် ဇီအူန် ဒွန် အီ၊ တဲး ဘေ တဝ်း မှုဝ် တာင် တာင်။ ခုဝ်၊ ဇဝ်ဖြာ ပီ ကြိုပ် ဘေ ဒူအီ အီဆာရေလ အီ ဆီငါ ဘွတ် ကာဆဝ်၊ အန် ကွယ် ကာတဲ ဘေ။”