1 အာနီ န့ ဘော မုး ပီ ဝီ ဘျ ဇဝ်ဖြာ ဒီ အာအီဆာယ အီ မုး ဂွန် အာမူတ်။ ဇဝ်ဖြာ ဝီ ဘျ ဒီ အန် လွင် မိူင် ဘာဘဲ။

2 အန် တဝ်း၊ “ဒဲင် နွန် အီ ဟဲ့ ကာဂ့လ ဆီချာ တွိုန်၊ တဲး ဘေ ဘ့လေး အုန် အာလာမ် အီ ဘျ ဒါ ဆိုက် ဒီ လုဝ် ကာဂုဝ်း။ ဒဲ့ ခဲ့ ကွယ် ဒါ ဆိုက် ဘောကာဂ့လျီတ်၊ တဲး ဂေ ဆူင့် ဒဲ ဂေ၊ တဲး န့ ဘဲန် လက်ဆာနာ ဂေ ဒီ လိုပ် ဒူင် ကွယ် ဂေ ဒါ တာင် အီ အိုပ် မိူင်။”

3 ဇဝ်ဖြာ မိူဝ် တဝ်း၊ “အုဝ် ဟဲ့ ဒွါ အာမိင် ဒီ ဒူအီ အီ ဘူင် ဂါန် အုဝ်။ အုဝ် မိူဝ် ဟဲ့ ဒဲ့ ကာဇု ဂေ ဒါ ဆိုက် အီ ကျ အီ ယ ဒီ ဘူင် တဲး နဝ်း ရူ အုဝ် ဝီ ဘြေ့။ ဂေ အီ မုး ဒူအီ အီ ခူယ် ဒါခိုယ် ဒီ ဘူင်၊ တဲး န့ ဝီ လိုဝ်း အာဖုင် ဒင်ခုဝ် အုဝ်။

4 တဲး ဘေ ထူမ် အီ ဆီနန် ဆီနိူင် ဒဲင် နွန်၊ အီ ပီ ဆီနန် ဆီနိူင် ဒေါ တး ကာဇု ဒူအီ ကိူန်။ ဟဲ့ ပီ ဒူအီ ဘဲန် မိူင် ဘဲန် မိူင် ဟဲ့ တး ကာဇု။ ဇဝ်ဖြာ ဟဲ့ ရဝ်း ဒါ ဆိုက် အန်၊ ဘ်ု ဒီ ကာဂုဝ်း။

5 ဒူအီ ဂေ တီ ဂေ တး နာ ကာတူင့် ကာဆဝ်။ ဂေ ဘော တး ဒူင် ဆိူတ် ကာဒါယ်။ ဇဝ်ဖြာ မိူဝ် ဘျ ပီ ပါယ် အန် ဒီ ရူ၊ တဲး အန် ဝီ ဘူင် တဲး ကာဒါယ် လိုဝ် စှိုမ် တူတ့်။

6 တဲး ဘေ က့လိုဝ် ခဲင် နဝ်း ဘေ ဘော ယာမ်။ ခုဝ်၊ အာခြာဝ် ဒီ ဘူင် ဇဝ်ဖြာ ဇိုဝ် တီ၊ န့ ဟဲ့ ကာတတ် ဒီ ဇမ်။ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ တဲး ကာဒါယ် လိုဝ် စှိုမ် အာခ်ု မှာန်။

7 ဒူအီ ဒွန် အီ ဒီ ဘော ဒီလှး န့စမ်။ နဝ်း ယ ဂေ ဒီ ဘော ဟြာယ် တူတ့် ဒွန် အီ။

8 ဂေ ဒီ ဘော ယုဝ် ကာဆဝ် ဘော ဘဲန် ဒုက် တာင် ခဲင် နဝ်း ဂေ။ န့ ဒီ ဘော ပီ ဆဝ် အီဘိုန့် အီ ဒီ မိုဝ်း ဂွန်။ ဂေ ဒီ ဘော ခါမွှင့်၊ ဝီ လာယ် ယွတ် ပီ ပါယ် ဂေ။ နာ ဂေ မိူဝ် ဒီ ရေန့် ဒီရျီင် ကူပ် ဟဲ့ ယုဝ် ဟဲ့ ဆာယ် ဂေ။

9 တဲး ဘေ ဘ်ု ဒီ ယွတ်၊ ဆီငဲ ဒီ ဘူင် ဇဝ်ဖြာ တီ၊ န့ ဒီ ဘော တး။ ဒေါ အန် တီ အန် ဇဝ် ဒီ ဘူင် တဲး န့ ကာဆဝ် ဒီ အီ၊ တဲး န့ ဒူပ် ခဲ့ ဟဲ့ ရူ ကာဆဝ် အန်။ အန် ဒီ ဘူင် တဲး မိူင် ဒဲင် ကာဒါယ် ဝီ ဘဲန် ပီ ပြဲ ကာဟဝ်း။ အန် ဒီ တဲး ဂေ ဒူအီ အီ မိုဝ်း မှာပ် ယမ် တူတ့် ဒွန် အီ။

10 ဆီမန့် အီ ကွယ် ခဲင် ဂါင်ဟြာဝ် ဘော ဆီမန့် အီ ပီ ရာင် ဘဲန် မျုဝ် ဘဲန် မျုဝ်၊ အာဝ် ဟူ ပွိုန် ယိုဝ် ခေါ အူ ဘူင့်။ ဆီငဲ မိူဝ် ဒီ အပ် ဝွင့် ဆိန့် ဒေါ လေး အန်။ မာဂျီန် မိူဝ် အာဝ် ဟူ ဘ့လာင်။

11 အုဝ် ဒီ ဒမ် မှာပ် ဒီ ဒူအီ ဒဲင် ကာဒါယ် နီ။ အုဝ် ဒီ ဒမ် မှာပ် ဒီ ဂေ ဒူအီ အီ တူ ဒူပ် ဒါရာ ကူပ် အီ တူ မွှိုမ် ပဲ့ ဟဲ့ ဘူင် ဂေ။ အုဝ် ဒီ ဝဲန် ဂေ အီ ပီခိုက် ပီစာ ဂေ၊ ဝီ ဘူင် တဲး ဂေ စုဝ်း တျီမ်။

12 ဝါယ် အန် တီ ဂေ အီ ဆီ ဂိတ် ဆီ ကွယ် ဂေ ဒီ ပြေတ့် ကာဆဝ်၊ ဂေ ဝီ မိုဝ်း ဒီ ငဝ်း ဒီခန် တာင် ပီ ခြိဝ် ဇဲတ်။ ဂေ အာမျုဝ် ဒူအီ ဒီ မိုဝ်း ငဝ်း တာင် လွှိုမ် ခြိဝ် အီ တး ခဲင် မိူင် အုဝ်ဖီ။

13 ဆီငဲ ဒီ ရူ ကာဆဝ် အုဝ် ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် ဒီ ဘော ဘူင် တဲး ဘ့လေန့် ဂေ ဂါင်ဟြာဝ် ရ်ု ဒီယုး ဒီယေန့်။ ကာဒါယ် မိူဝ် ဒီ ဘော ရ်ု ဒီယုး ဒီယေန့် ဘော ကာထုဝ့် ဒူင် ကွယ် အန်။

14 ဂေ ဒူအီ ဒီ ဘော ဝီ တဝ် ပီ မာဇ ဒုဝ် မာ အီ တဝ် ဒီ ဒူအီ လဲ ပြဲ။ ဂေ ဒီ ဘော တဝ် ကာယဝ်း ကာရေး ပီ မာဘူ အီ တူ မိုဝ်း ဒါ ကာညာ အီ ဟျီင် ဂေ။ ဒွန် အီ ဒီ ဝီ တဝ် ဝေန့် မိူင် ဘြိမ် ဂေ၊ ရာင် အာဆေ ရာင် အန်။

15 ဒူအီ ပီ ကာတုန့် ရန်ဆူ တီ၊ ဂေ ဒီ လုဝ် ခမ် ရန်ဆူ ဆတ် ယမ် ဂေ။ ဒူအီ ပဲ့ ဟဲ့ ပွိုန် ရန်ဆူ ဒီ မှေတ့်၊ ဂေ ဒီ ဘော ယမ် ဒီ မာပွါ့ လာင်။

16 ဂွန် ဒီတဲတ် ဂေ မိူဝ် အီ ဒီ ဘော မး ယမ် ဒီ အာတ့် ဂေ။ ကြုဝ်ကြာမ် ခဲင် ကာင် ဂေ၊ အီ ဒီ ဘော ဖာတ် ဒိုဝ်း တူတ့်။ ဘော အီဘိုန့် ဂေ ဒီ ဘော လုဝ် ခမ် အီ လုတ့် အီ လာယ် ဂေ။

17 ဘ်ု ဘေ ယွတ်၊ အုဝ် ဟဲ့ ကာဆုး ဒူအီ အာမျုဝ် မီဒီ၊ တဲး ဂေ တး ကာဂုဝ်း ဒီ ဒူအီ အီ ကွယ် ခဲင် မိူင် ဘာဘဲ။ ဒူအီ ဂေ တီ၊ ဂေ တူ တဲး ရွိုန် ဘဲန် အီ အာရေ တာင် ဒီ ဂေ။ ခြိဝ် မိူဝ် ဂေ တူ လုဝ်။

18 ဂေ ဒီ ဒိုဝ်း အ ဂေ ဘော ဘ့လာ ဂေ ဘန့် ဒူအီ နှိုမ် တဲး ဂေ ဘောကာဂ့လျီတ် ယမ်။ ဒူအီ ဂေ တီ ဂေ မိူဝ် တူ မိုဝ်း နဝ်း ကာဝေ ဂွန် င ဒီတဲတ်။ ဂွန် ဒီရွယ် မိူဝ်၊ ဂေ တူ လှယ့်။

19 မိူင် ဘာဘဲ ဘော မိုဝ်း အာဖုင် ဒင်ခုဝ် တာင် လွှိုမ် မိူင် အီ ဟဝ်။ အာဖုင် ဒင်ခုဝ် ဇိုဝ် တီ၊ ဟဲ့ တဲး ဒူအီ အီ ကွယ် ခဲင် မိူင် ဘာဘဲ၊ ဝီ ဘဲန် နဝ်း လေး နဝ်း တာင် ဒီ ဂေ။ မာလဲ၊ အုဝ် ဇဝ်ဖြာ ယီ ဒီ ပျာတ့် ဝဲန် ဂေ၊ တဲး န့ ပီ ဒေါ ပျာတ့် ဝဲန် အုဝ် မိူင် ဆုဝ်ဒူမ် ဂါယ် မိူင် ဂုဝ်မုဝ် တွိုန်။

20 ဒူင် တီ၊ အာဝ် ဟူ မိုဝ်း အီ ကွယ် ဒေါ မှဝ်။ ဘော နာ အာတ့် ဟာဝ် ဒွန် စုဝ် ဒွန် ဘာန်၊ အာဝ် ဟူ မိုဝ်း အီ ကွယ်။ ဂေ ဒူအီ အာမျုဝ် အာရာပ် အီ ဟဲ့ ဒွိုမ် ဟာဝ် ဝိဝ် ဟာဝ် ဝေန့် ဒူင် တီ၊ ဂေ မိူဝ် အာဝ် ဟူ ကွယ်၊ အာဝ် ဟူ ဆမ် ထိုပ် ဂေ ဒေါ မှဝ်။ ဂေ ဒါ အီ ဟျီင် မာဘူ မိူဝ် ဂေ အာဝ် ဟူ တး ဟျီင် ဒီ တီ။

21 န့ ဒီ ဝီ ဘဲန် ဒူင် ကွယ် ဂေ မာဒုဝ် ပြဲ ဟာယ်။ ခဲင် ကာင် ဂေ တီ မာဒီဘုဝ့် ဒီ ဘော ဘူင် ကာဟုန် အန်။ မာဆိမ် ကာဟာတ့် ဒီ ဘော ကွယ် ဒီ တီ။ မာပဲ ပြဲ ဒီ ဘော ဒဲန် ဝိဝ် ဒဲန် ဝေန့် ဒူင် ဟဲ့ ကာပျာတ့် လိုဝ် တီ။

22 မာဆုဝ် ပြဲ ဂေ မာပြုဝ့် ဒီ ဘော ကွယ် ဒူင် ကွယ် ဟုဝ် စာ ဘော ဒူင် ကွယ် ဟုဝ် ခုန်ဒီခမ် ဂေ တွိုန်။ ဆီငဲ ဒီ လိုဝ် စှိုမ် မိူင် ဘာဘဲ ဟဲ့ ကာတတ် ဒီ ဇမ်။ အာခြာဝ် ဒီ တူတ့် အာဆာက် မိူင် ဘာဘဲ အာဝ် ဟူ လှေန့်။”