1 ဇဝ်ဖြာ ပီ ဒီ ဝီ မိုဝ်း နဝ်း ကာဝေ ဂေ အီ မုး လှုက်လှာန် အာကူပ်၊ အီ မုး ဒူအီ အာမျုဝ် အန်။ န့ ပီ အန် ဒီ ဝီ ရဝ်း ဂေ၊ တဲး ဂေ ဝီ ဘဲန် ဒူအီ အာမျုဝ် အန်။ အန် ဒီ ဝီ တဲး ဂေ တး ကွယ် ဒူင် ကွယ် ဘြိမ် ဂေ။ ဘော ဒူအီ အာမျုဝ် ဟဝ် ဒီ ဝီ တး ဒူပ် ဂေ ဘော ကွယ် ချြီ့ ဂေ။

2 ဂေ ဒူအီ အာမျုဝ် ဟဝ် ဒီ ဘော စွယ် ဂေ ဒူအီ အီဆာရေလ၊ တဲး ဂေ စေဝ် ဇမ် ဒူင် ကွယ် ဘြိမ် ဂေ။ ပန် တီ ဂေ ဒူအီ အာမျုဝ် ဟဝ် ဒီ ဘော လုဝ် ခမ် ဒီ ဘဲန် မှာယ် ဂေ ဒူအီ အီဆာရေလ။ ဒူအီ အီ ဟဲ့ ဒွိုမ် မှေတ့် ဂေ ဒူအီ အီဆာရေလ ဂေ ဒီ ဝီ ခမ် ဒူအီ အီဆာရေလ မှေတ့် ဂေ၊ တဲး ဂေ ဒူအီ အီဆာရေလ ဝီ ပွိုန် ဒီ အိုပ် ဒူအီ အီ ဒွိုမ် ခါနှာပ် ဂေ။

3 အိုယ် ဘေ ဒူအီ အီဆာရေလ၊ ဇဝ်ဖြာ ဒီ ဝီ တဲး ဘေ လေး ခဲင် ဒုက် အီ ဟဲ့ တဲး ဘေ ယုဝ် ကာဆဝ်။ အန် ဒီ ဘော တဲး ဘေ လေး ခဲင် ပဲ့ ဟဲ့ ခါနှာပ် အီ ဟဝ် ဒီ ဘေ။

4 ဇဝ်ဖြာ ဟီ ဟွတ့် ဘူင် ပါယ် တီ ဘေ ဒီ ဝီ ပွိုန် ဒီ နဲန ခုန်ဒီခမ် အီ အိုပ် မိူင် ဘာဘဲ တဝ်း၊ “အာလိုဝ်၊ အီ ဟဲ့ ဒွိုမ် ခါနှာပ် အီ၊ အန် အာဝ် ဟူ ပွိုန် ဒီ ဘူင် ပီ အိုင် အန်။ ပွုန် ဂေ ဒူအီ ဟာယ်၊ ဟဲ့ ဟွတ့် ဟြာယ် ဘော နဝ်း ရူ ဂေ ဟဲ့ ဟွတ့် တူတ့်။

5 ဇဝ်ဖြာ ဟဲ့ ဘူင် တဲး ပ့လူမ် ဂေ ဟဲန့် အီ ဟာယ် ကာဆဝ် တီ ဟြာယ် တူတ့်။ တဲး န့ ပီ အန် ဟဲ့ ကာဘက် ဝဲန် န့ကြွုန် ဂေ ဘော ဘ့လာ လျီး ဂေ။

6 ခုန်ဒီခမ် တီ ဟဲ့ ပျာတ့် ဒူအီ ဘဲန် မျုဝ် ဘဲန် မျုဝ် ဒေါ လေး ဒေါဆ အန်။ အန် မိူဝ် ခါနှာပ် ဂေ တူ တဲး န့ ယေန် ဒေါ မှဝ်။

7 ဒေါ တီ နီ န့ ယီ ဝီ ယေန် ဒါခိုယ် ဒဲင် ကာဒါယ် ဒွန် နာ ဒွန် ပ့လုဝ့်။ ဂေ ဒူအီ ဘောကာဂ့လျီတ် ဘော ဘျုဝ် ဒါခိုယ် တဝ်း မှုဝ်။

8 ဟေ န့ကေ ဘော ဟေ အာရိတ် အီ ကွယ် ဒီ နွန် လေဘာနုန် ဒီ ဒါခိုယ် ကာဆဝ် ကူပ် ဟဲ့ စှိုမ် ခုန်ဒီခမ်။ ဂေ ဒီ ဘော တဝ်း၊ ‘အာဝ် ဟူ မိုဝ်း အာဆေ အီ ဒီ တး ဂ်ု ယေ၊ တဲး ယေ ကေး။ အာဝ် ဟူ မိုဝ်း အာဆေ အီ ဒီ တး ပျာတ့် တး ဘ့လတ့် ယေ။’

9 မိူင် မာရာန အီ ကွယ် နာ ခြိုမ် မိူဝ် ဟဲ့ ဘ်ု ဒီ ရွုး မဲ ခုန်ဒီခမ် ခဲင် မိူင် ဘာဘဲ။ ဒူအီ ခဲင် မိူင် မာရာန အီ ဟဲ့ ဒွိုမ် မိုဝ်း ပွုန် ဒဲင် ကာဒါယ်၊ ဂေ ဘော ဒိူန် ဘောကာဂ့လျီတ်။ ဒူအီ ခဲင် မိူင် မာရာန အီ ဒွိုမ် ဘဲန် ခုန်ဒီခမ်၊ ဂေ ဘော ယိတ့် ဒဲင် မာလာင် ဂေ။

10 ဂေ မိူဝ် ကာဖြူမ် ဒီ တဝ်း၊ ‘ဒေါ တီ နီ၊ မဲ မိူဝ် အာဝ် ဟူ မိုဝ်း ပ့လူမ် ဂေ ဟဲန့် ပီ ယေ။ မဲ မိူဝ် ဟဲ့ ဘဲန် ပီ ယေ။

11 မဲ ပီ ဘော ဟဲ့ ဒွိုမ် မိုဝ်း အာဖုင် ဒင်ခုဝ်၊ န့ ဟဲ့ ဟြာယ် တူတ့် ဒွန် မျုဝ်။ ဘော ဒိင် ဘဲန် မျုဝ် ဘဲန် မျုဝ်၊ အာဝ် ဟူ မိုဝ်း။ ဒေါ တီ နီ၊ မာဝ ဟဲ့ ဝီ ဘဲန် ကာစှူင့် အိတ် မဲ။ ဘော မာ မ့ပြတ့် ဟဲ့ ဝီ ဘဲန် ဟိုပ် မဲ။’

12 အိုယ် မဲ မာလာင် ညှာ အီ ဘ့လာင် ဆိန့်ဝး စေဝ်၊ မဲ ဟဲ့ ဟွတ့် စုဝ်း ဒီ ဘ့လေန့်။ အာတ့် နီ မဲ ဟဲ့ မုး ခုန်ဒီခမ် အီ အိုပ် ဒူအီ ဘဲန် မျုဝ် ဘဲန် မျုဝ်။ ဒေါ တီ နီ၊ မဲ ဟဲ့ ဝီ ကာဒုး ဒီ စုဝ်း ဒဲင် ကာဒါယ်။

13 မဲ ဟဲ့ ခြာမ် ဒီ ဟုဝ့် ခဲင် ဂါင်ဟြာဝ်၊ ခြာမ် ဒီ ဘ့လေး မာလာင် မဲ ဒဲင် ဆီမန့် ပဲ့ ဟဲ့ ဘ့လေး အုန် ဇဝ်ဖြာ အီ ကွယ် စာ ကာဆဝ်။ မဲ ဟဲ့ ခြာမ် ဒီ တဲး မဲ ပွိုန် ဒီ တုတ့် ပီ ဂေ ခုန်ဒီခမ် အီ တုတ့် ဒဲင် နွန် အီ ကွယ် နာ ကွာ ဆိူတ်၊ အီ မုး ဒူင် တး ကာဇု ဂေ ဇဝ် ပီ ကြိုပ် အီ ဟဝ်။

14 မဲ မိူဝ် ဟဲ့ ခြာမ် ဒီ ဟုဝ့် ဒူင် စာ အီ ကွယ် ဒဲင် န့အု။ မဲ ဘော ဆီ ဘဲန် ပီ ဇဝ်ဖြာ အီ အိုပ် တူတ့် ဒွန် မျုဝ်။

15 မာလဲ၊ မဲ ယီ ဟဲ့ ဝီ ကာဒုး ဒီ စုဝ်း လူင် ခဲင် မိူင် မာရာန အီ ပီ ကာဒဝ် ဟူလဝ် အီ လိုက် ကာဆဝ်။

16 ဂေ အီ ယိုဝ် မဲ၊ ဂေ ဒီ ဘော အာင် မူတ့် ဂေ ယွတ် မဲ တဝ်း၊ ‘ဝီ နီ ဟဲ့ မှာန် မုး အန် ဝီ အီ ဟဲ့ ဘူင် တဲး န့ ကာဝှ်ု ကာဝျှီန် ဒဲင် ကာဒါယ်၊ တဲး ဒူအီ ဘဲန် မိူင် ဘဲန် မိူင် ကော ယုဝ် ဒီယုး ဒီယေန့်။း’

17 ဟဲ့ မှာန် မုး အန် ဒူအီ အီ ဟဲ့ ပျာတ့် မိူင် ဒီ တာင် ဘော ဘူင် တဲး ကာဒါယ် ဝီ ဘဲန် တူတ့် ပြဲ ကာဟဝ်း။း ဟဲ့ မှာန် မုး အန် အီ ဟဲ့ ဘူင် တူ တဲး ဂေ အီ စုဝ်း ကာပိုမ် ဝီ ပွိုန် ဒီ လေး ဝေန့် ဒီ ကာင် ဂေ။း

18 ခဲ့ ကွယ် ဂေ ခုန်ဒီခမ် ဒွန် မာန် ဒွန် မိူင်၊ ဂေ ဟဲ့ ယမ် ကွယ် ခဲင် ဘာရေဝ် ဝီ မှဝ် ဝီ အန်။ ဂေ ပီ ဘော ဟဲ့ ကွယ် ခဲင် ဘာရေဝ် မိူဝ်၊ အာဖုင် ဆာရေ ဂေ ယီ ဆီ မိုဝ်း။

19 အီ မုး မဲ၊ ဘာရေဝ် မိူဝ် မဲ တူ မိုဝ်း။ ဒုဝ် ယမ် မဲ ဂေ ဟဲ့ လာက် ဟာဝ် ဝဲန် နာ ရေတ့်၊ တဲး န့ ပီ ရာ ဟေ ပီ ကာအိး ကာဆဝ် ဒူအီ။ ဂေ ဒါ ဆိုက် အီ ဟဲ့ ယမ် ဒီ မာပွါ့ လာင်၊ ဂေ ဘော ဒီဂေတ့် ဒုဝ် မဲ ပီ အီ ပ့လိုက် ဟိုပ်။ န့ ဘော ပီ ဘေ စုဝ်း လူင် ခဲင် ကာဒဝ် မာဝ် ဂေ ကာဒဝ် ဒါအာင်၊ ပီ ဒုဝ် ယမ် ပီ ညဲတ့် အီ ဟဝ်။

20 ကူပ် ဟဲ့ ဝီ ပျာတ့် မဲ မာန် မိူင် မဲ၊ ဟဲ့ ဝီ ငဝ်း ယမ် ဘော ဒူအီ ပီ အိုပ် မဲ၊ ဂေ တူ ဒိပ် ဒုဝ် ယမ် မဲ ပီ ခုန်ဒီခမ် ကာဒင် ဟဝ်။ န့ မိူဝ် တူ မိုဝ်း ဒူအီ အီ နမ်လှုဝ်း လှုက်လှာန် ဒူအီ ဟာယ် ဇိုဝ် တီ။

21 တဲး ဘေ ရဲန် ဘ့လွယ် ငဝ်း ယမ် လှုက်လှာန် ခုန်ဒီခမ် ကူပ် မှာပ် ပဲ့ ဟဲ့ ဘူင် ဂေ ဂုန့် ဒင် ဂေ။ ဆေ အာဝ် ပါယ် တီ၊ ယုဝ် ဂေ ဒီ ဝီ အိုပ် ကာဒါယ်၊ ဝီ ဒဲ မိူင် ဒဲင် ကာဒါယ် နီ ဒွန် နာ ဒွန် ပ့လုဝ့်။” ခဲ့ တီ မှုဝ် ပီ တဝ်း ဂေ လွင် ခုန်ဒီခမ် အီ အိုပ် မိူင် ဘာဘဲ။

22 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် ဒီ ကာဂုဝ်း ဒီ မိူင် ဘာဘဲ တဲး န့ ကော လိုဝ် တူတ့်။ ကွဲ့ ဟူ တဲး န့ မိုဝ်း ဒူအီ အီ အိုပ် မိူင် တီ။ အုဝ် မိူဝ် တူ အုန် တူ တဲး န့ မိုဝ်း လှုက်လှာန် အန် ခေါ အူ ဝီ။ အုဝ် ဇဝ်ဖြာ ဟဲ့ တဝ်း ပါယ် တီ။

23 အုဝ် ဒီ ဘူင် ခဲင် မိူင် ဘာဘဲ တဲး န့ ဘဲန် ဒူင် ကွယ် မင်ဂိုဝ်း ဘော လေး ညုဝ့်။ အုဝ် ဒီ ဒိုဝ်း ဝဲန် တူတ့် ဒွန် မျုဝ်၊ တဲး န့ ပီ အီ ဒိုဝ်း မ့ဘိး ဘိး ဝဲန် ကာအး။ အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း ပါယ် တီ။”

24 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဒိူင် တဝ်း၊ “ခဲ့ ပီ ခြာမ် အုဝ် ဒီ ဘူင်၊ န့ ဒီ ဘဲန်။ ခဲ့ ပီ ဆုင်ဖျာတ် နဝ်း အုဝ် ဒီ ဘူင်၊ န့ ဒီ ဘဲန် တူတ့် ဒွန် မျုဝ်။

25 အုဝ် ဒီ ပျာတ့် ဝဲန် ခုန်ဒီခမ် အာဆူရီယာ အီ ဟဲ့ တး ကွယ် ခဲင် မိူင် အီဆာရေလ အီ မုး မိူင် အုဝ်။ အုဝ် ဒီ ညဲတ့် ဖူဖ့လမ် ဂေ ဒူအီ အာမျုဝ် အန် ဒဲင် နွန် ဒူင် ကွယ် အုဝ်။ အုဝ် ဒီ တဲး ဂေ ဒူအီ ပီ အိုပ် အုဝ် လွတ် ဒီ ဒူအီ အာဆူရီယာ တီ။ န့ ဒီ ပီ ကြုဝ် စန် ပီ လုဝ် ဂွတ် ဂေ ဒီ စုဝ်း ဒီ ဂေ ဘော မင် ဂွတ် ဂေ ဒီ လေး တ ယ ဂေ။

26 ပီ ခြာမ် အုဝ် ဒီ ဘူင် တီ၊ န့ ဘော ဘာ့ တူတ့် ဒွန် မျုဝ် ဒဲင် ကာဒါယ် နီ။ န့ ပီ အုဝ် ဒီ ဆူင့် ဒဲ အုဝ်၊ တဲး န့ ဒမ် မှာပ် ဒီ ဒူအီ ဒွန် ဇိုဝ် ဒွန် ခြိုဝ်။”

27 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဆုင်ဖျာတ် ဒီ ဘူင် ပါယ် တီ။ အန် ဟဲ့ ခြာမ် ဒီ ဒမ် မှာပ် ဒီ ဒူအီ၊ အာဝ် ဟူ မိုဝ်း အာဆေ အီ ပွိုန် ခြဲ။ န့ ပီ အန် ဟဲ့ ဟွတ့် ဆူင့် ဒဲ အန်၊ အာဝ် မိုဝ်း အာဆေ အီ ပွိုန် ဘာက် ဝဲန်။

28 ဆီနမ် ဒေါ ယမ် ခုန်ဒီခမ် အာခါတ်၊ ဇဝ်ဖြာ ပီ ဝီ ကာလာင် တဝ်း၊

29 “အိုယ် ဘေ ဒူအီ ဖီလီထီ၊ န့ ပီ မ့ဖျီ့ အီ ဒီ မး ဘေ ဟဲ့ ဟွတ့် ကာဘက် လိုဝ်။ မာလဲ၊ ဘေ ကွဲ့ ခူယ်။ ခုဝ်၊ ဆေ မာဟန့် အူ ဒုဝ် ဟဲ့ ယမ်၊ မာဟန့် ဒုဝ် အီ ဟာယ် လွှိုမ် တီ ဘော နပ် ဒီ ဝီ တး ပ့လု အန်။ ပွိုန် မာဟန့် ဒုဝ် တီ ဒီ ဘော ဝီ ကး ဘဲန် မာဟန့် အီ ခြန် အီ ဟာယ် ကာဆဝ်။

30 အုဝ် ဒီ ဟျီင် ဂေ ဒူအီ ပီ အိုပ် အုဝ် အီ မုး ဂေ ဒူအီ အီ ဒုက် အီ ဂိန်၊ တဲး န့ ပီ အီ ဟျီင် မာဘူ။ အုဝ် ဒီ တဲး ဂေ ကွယ် ဒါခိုယ်။ မာလဲ၊ အုဝ် ယီ ဒီ ဝီ တဲး ဘေ ဒူအီ ဖီလီထီ အေတ့် ပီ ဒီ ဟူမ်၊ ကွဲ့ တဲး ဘေ လွတ် ယမ် ခေါ အူ ဝီ၊ တဲး န့ ပီ အီ ရိုတ့် လေး ရျီး ဟေ။

31 အိုယ် ဘေ ဒူအီ ဖီလီထီ ဘောကာဂ့လျီတ်၊ တဲး ဘေ ယာမ် တာင် ဘော ငှုန်။ အိုယ် ဘေ ဒူအီ ဘောကာဂ့လျီတ်၊ တဲး ဘေ ယုဝ် ဘော ဒီယုး ဒီယေန့်။ ခုဝ်၊ န့ ဒီ မိုဝ်း ဒါ ဆိုက် အီ တး နာ ကွာ။ န့ ဒီ ဘော ပီ ဒက် ငဝ် တာင် ဒီ တး။ ခဲင် ဒပ် ဒါ ဆိုက် ဂေ တီ၊ အာဝ် မိုဝ်း အာဆေ အီ ကြဲ ဒီ ဒူပ် ဒီ ပန်။” ပါယ် တီ ဇဝ်ဖြာ ဟဲ့ ကာလာင် လွင် ဂေ ဒူအီ ဖီလီထီ။

32 ဆေ န့ မိုဝ်း ဒါလာမ် အီ တး ခဲင် မိူင် ဒူအီ အာမျုဝ် ဟဝ်၊ ဝီ ဒီမွှတ် လွင် ဒူအီ အီဆာရေလ၊ တဲး ဘေ တဝ်း ပါယ် နီ။ “ဇဝ်ဖြာ ဟဲ့ ဒဲ မိူင် ဇီအူန်။ ဂေ ဒူအီ ပီ အိုပ် အန် အီ မုး ဒူအီ ဒုက် ဒူအီ ဂိန်၊ အန် ဟဲ့ တဲး ဂေ ဝီ ကွယ် ခဲင် မိူင် တီ၊ တဲး ဂေ လွတ် အာဖေ အာရေ။”