1 ဇဝ်ဖြာ ဝီ ကာလာင် လွင် အီ ဒီ ပါယ် မိူင် မုဝ်အာပ် ပါယ် နီ။ “အူ မှိုဝ် မိူင် အာရာ အီ ကွယ် ခဲင် မိူင် မုဝ်အာပ် ဒီ ဘော လိုဝ် စှိုမ်။ အူ မှိုဝ် ဘော မိူင် ကီရ အီ ကွယ် ခဲင် မိူင် မုဝ်အာပ် ဒီ ဘော လိုဝ် ဟြာယ်။

2 ဂေ ဒူအီ အီ ကွယ် ခဲင် မိူင် ဒီဖူန်၊ ဂေ ဒီ ဘော ဟုဝ့် ကွယ် ဒဲင် နွန် စာ၊ တဲး ဂေ ပွိုန် ဒီ ယာမ် ဒီ တီ။ ဂေ ဒူအီ ခဲင် မိူင် မုဝ်အာပ် ဒီ ဘော က့လိုဝ် ဘော ငှုန် ကူပ် မိူင် နေပေါ ဂါယ် မိူင် မေဒေဖာ။ ဂေ ဘောကာဂ့လျီတ် ဒီ ဘော ဂါ့ ဟိုက် ဂိန့် ဂေ၊ ဂါ့ ဘော ဒီမုဝ်း ဒီ ကုင်ကာပ် ဂေ ကူပ် ဟဲ့ က့လိုဝ် ကာဆဝ် ဂေ။

3 ဂေ ဒူအီ အီ ဟာဝ် ဒူပ် န့တေန့်၊ ဂေ ဒီ ဘော စှိုပ် ဒီ တာ ခြိုင် စာန်။ ဂေ ဒူအီ အီ ကွယ် ဒီဂ့လ ဘော ဂေ အီ ကွယ် ဒဲင် ကာင်၊^a ဂေ ဒီ ဘော ယာမ် ဘော ငှုန် တာင်။

4 ဂေ ဒူအီ အီ ကွယ် ခဲင် မိူင် ဟေဆာဖူန် ဘော ခဲင် မိူင် အေလေအာလေ၊ ဂေ ဒီ ဘော လုဝ် ယာမ် တဲး န့ ကော လိုဝ်း ဇမ် မိူင် ယာဟာတ်။ ဂေ ဒါ ဆိုက် ခဲင် မိူင် မုဝ်အာပ် ဂေ ဒီ ဘော မိုဝ်း နဝ်း ယုဝ် ဒီယုး ဒီယေန့်။

5 န့ ဟဲ့ ဒုက် ကာဆဝ် ဘော ဒီ နဝ်း အုဝ် ဒါင် ဂေ ဒူအီ ခဲင် မိူင် မုဝ်အာပ်။ ဂေ ဒီ ဘော တဝ် ဟာဝ် ကော ဇမ် ခဲင် မိူင် ဇုဝ်အာန် ဘော ခဲင် မိူင် အေကာလတ်ဆေလဆီယာ။ ဂေ ဒီ ဘော ယာမ် ဒေါ ဟာဝ် ဂေ ဒူပ် န့တေန့် အီ ဟာဝ် ဒီ မိူင် လူဟိတ်။ ဂေ ဒီ ဘော ကာဖြူမ် ဒီ ယာမ် တာင် ဒေါ တဝ် ဟာဝ် ဂေ ဒီ မိူင် ဟုဝ်ရာနိမ်။ ဂေ ဒီ ဘော ငှုန် တာင် ယာမ် တာင် ကူပ် ဟဲ့ ကာပျာတ့် လိုဝ် တူတ့် မိူင် ဂေ။

6 အိုမ် ဘ့လဲင် နိမ်ရိမ် မိူဝ် ဟဲ့ ဟွတ့် ဟိတ်။ ပြဲ ဂေ ပေတ့် မိူဝ် ဟဲ့ ဟွတ့် ကာဟဝ်း ယမ် တူတ့်။ အာဝ် မိုဝ်း ပြဲ အီ ဆီ အိမ် အီ ဆီ ငျီန် ခေါ အူ ကာဒင်။

7 ခုဝ်၊ ဂေ ဒီ ဘော ဝီ ဒိုဝ်း ကြုဝ်ကြာမ် ပဲ့ ဟဲ့ ဒွိုမ် ဂဲပ် အုန် ဂေ ဘော တဝ် ကာလုဝ်း ရူင် အိုမ် အီ မိုဝ်း ဟေ အာရာပ်။

8 ဟမ် ယာမ် ဂေ၊ န့ ကော ဒီ လိုဝ်း ကာလတ့် ခဲင် မိူင် မုဝ်အာပ်၊ ဟဲ့ ပွိုန် ယိုဝ် ဘော ခဲင် မိူင် အေကာလိမ် ဘော ခဲင် မိူင် ဘီရာအေရိမ်။

9 ဘ့လဲင် အိုမ် ခဲင် မိူင် ဒီမူန် ဒီ ဘော ဘဲန် တူတ့် နှာမ်။ ပီ ဘော ဟဲ့ ပါယ် တီ မိူဝ်၊ အုဝ် ယီ ဒီ ဝီ တဲး န့ ဝဲ ဒုက် ပေါ မ့ပွါ ခဲင် မိူင် ဒီမူန်။ န့ ဘော မုး မာခြင်ဆီ အီ ဒီ တး ပျာတ့် ဂေ ဒူအီ မုဝ်အာပ် ဘော ဂေ ဒူအီ အီ ဆီ ဂိတ် ဆီ ကွယ်၊ အီ ဟဲ့ တဝ် တဲး ဂေ လွတ် ဒီ ရန်ဆူ ဂေ တွိုန်။” ခဲ့ တီ ဇဝ်ဖြာ ဟဲ့ ကာလာင် မိူင် မုဝ်အာပ်။