1 ဂေ ဒူအီ မုဝ်အာပ် ဘော ဝီ ဒိုဝ်း ဂွန် မာဘူ၊ တဲး န့ ဘဲန် လက်ဆွင်၊ ဝီ ဒွါ ဒီ ဒါ ကာညာ အီ အိုပ် မိူင်။ ဂေ အီ ကွယ် ခဲင် မိူင် ဆီလ ဘော တိုယ် ဒုဝ် တီ တဲး န့ ကာလုဝ်း ပြဲ ကာဟဝ်း၊ ဇမ် မိူင် ယေရူဆာလဲမ်၊ မှာန့် တဲး ဒါ ကာညာ တီ စွယ် ဂေ။

2 ဂေ အီဘိုန့် အာမျုဝ် မုဝ်အာပ် အီ ကွယ် ဒီ ဘာင် ကာလုဝ်း ဘ့လဲင် အိုမ် အာရာနုန်၊ ဂေ အာဝ် ဟူ နပ် ပီ ဒီ ပါယ်။ ဂေ ဘော ဟာဝ် ဝိဝ် ဟာဝ် ဝေန့် ပီ မာဆိမ် ပဲ့ ဟဲ့ ညွန် တဝ် အီ၊ တဲး အန် လေး တ ကာဟုန် အန်။

3 ဂေ ဝီ ကာလာင် ဒီ ဒူအီ အာယူဒါ တဝ်း၊ “ယေ အာဝ် ဟူ နပ် ပီ ဒီ ပါယ်၊ မှာန့် တဲး ဘေ ဒွါ အာကျာမ် အာငျာန် ဒီ ယေ၊ တဲး အီ ဟဝ် ဝီ ဘူင် ဆိူဝ် ဆိူဝ် မှာန် မှာန် ဒီ ယေ၊ တဲး န့ ပီ ယေ ကွယ် ခြိုမ် ယာပ် ဟေ၊ တဲး န့ ကော ပီ ခဲင် အပ် ဝွင့် ဒေါ ကာတဲ ဆီငဲ။ ယေ အီ ဟဲ့ တဝ် ဒီ ရန်ဆူ ယေ၊ ယေ မှာန့်၊ တဲး ဘေ ဒိုဝ်း ချြီင် ယေ ဒူင် တူ ပွိုန် ယိုဝ် ဂေ။

4 ယေ မှာန့်၊ တဲး ယေ ပွိုန် ဒီ ကွယ် ခဲင် မိူင် ဘေ၊ တဲး ဘေ ဘော ခြဲ ဂေ အီ ဆီ ရန် ဆီ ဖျာက် ယေ တွိုန်၊ တဲး န့ ကော ဇမ် ပန် ဒီ ဟြာယ် ဂေ အီ ဟဲ့ ခါနှာပ် ယေ ဘော ပန် ဒီ စူ ဂေ ပျာတ့် မိူင်။

5 ပန် အန် တီ န့ ဝီ မိုဝ်း အူ ဝီ ခဲင် လှုက်လှာန် အာဒါဝိတ်၊ အန် ဒီ ဘဲန် ခုန်ဒီခမ် အီ နပ် ဒီ ကာဝေ ဒူအီ။ အန် ဒီ ဘော အိုပ် ဒူအီ ဘော ဘူင် ဆိူဝ် ဆိူဝ် မှာန် မှာန်။ အန် ဒီ ဘူင် ခြန် ခြန် နာ မုး နာ မှာန် ဘော ဆုင်ဖျာတ် တဲး န့ ကာရမ်။”

6 ဂေ ဒူအီ အာယူဒါ ပီ ဝီ လာယ် တဝ်း၊ “အေ ဟဲ့ ယိုဝ် ပီ ပါယ် ဂေ ဒူအီ မုဝ်အာပ် ဒီ ပီခိုက် ဂေ။ အေ ဟဲ့ နပ် ဂေ ဟဲ့ ပီခိုက် ဂေ ဘော နဝ်း တာင် ဒီ ဒုဝ် ဘြိမ် ဂေ။ မာလဲ၊ ပီ ခြာမ် ဂေ ဘော ပီ ပီဖုင် ဂေ ဒီ ဂေ တီ၊ အာဝ် မိုဝ်း ဒီခုဝ် မာဆေ။”

7 ခုဝ်၊ တဲး ဂေ ဒူအီ မုဝ်အာပ် ယာမ် တာင်။ တဲး ဂေ ဘောကာဂ့လျီတ် ယာမ် ကူပ် မိူင် မုဝ်အာပ်။ တဲး ဂေ ယာမ် ကူပ် ဟဲ့ ဝီ နမ်လှုဝ်း ဂေ ဒေါ ဟဲ့ ပွိုန် ဂေ ဒီ ဟူမ် ဆီငဲး ဟူမ် ဖဲ ဒေါ ကွယ် ဂေ ခဲင် မိူင် ကီရဟေဆိတ်။

8 ဒူင် နာ အီ ကွယ် ခဲင် မိူင် ဟေဆာဖူန် ဘော ဟေ မာငုန် အီ ကွယ် ခဲင် မိူင် ဆီဘာမာ ဟဲ့ ဟွတ့် ကာဟဝ်း။ ဂေ ခုန်ဒီခမ် အာမျုဝ် ဟဝ်၊ ဟဲ့ ဒဲပ် ဝဲန် ရာ အန်။ န့ ပီ ရာ အန် တီ ဟဲ့ ဒွိုမ် လေး တူင့်၊ ကော ဇမ် ဒီ မိူင် ယာဇေရာ၊ ဇမ် ဘော ခဲင် ပြဲ ကာဟဝ်း။ ရာ အန် ပေါ အူ ဘ့လာက် ဟဲ့ တူင့် ကော ဇမ် ဒီ အိုမ် ဒိုင်။

9 ခုဝ် အန် တီ၊ အုဝ် မိူဝ် ဝီ ယာမ် ရိုမ် ဒူပ် ဂေ ဒူအီ အီ ကွယ် ခဲင် မိူင် ယာဇေရာ အာဒါ ဟေ မာငုန် အီ ကွယ် ခဲင် မိူင် ဆီဘာမာ တီ။ အိုမ် ငါယ် အုဝ် မိူဝ် ဟဲ့ ရး အာဒါ မိူင် ဟေဆာဖူန် ဘော အာဒါ မိူင် အေလေအာလေ။ ခုဝ်၊ ခဲင် မိူင် တီ၊ အာဝ် ဟူ မိုဝ်း အီ ပွိုန် ဒီ ဆုဝ့် ပွိုန် ဒီ ဘေတ့် ဒွန် မျုဝ် ပီ ဆမ် ဂေ ကူပ် ဟဲ့ တး ရန်ဆူ။

10 အာဝ် ဟူ မိုဝ်း ဒူအီ အီ ဘျုဝ် ဒါခိုယ် ကူပ် ပီ ဆမ် ပီ ပိတ် ဂေ ဟဲ့ လေး ကိူန် ခဲင် ဒူင် နာ အီ မုး ကာဒါယ် ဘွတ် ကာဒါယ် မွှိုမ်။ အာဝ် ဟူ မိုဝ်း အာဆေ အီ ဟဲ့ ညဲတ့် ဘ့လေ မာငုန်၊ တဲး န့ ဘဲန် အိုမ် မာငုန်။ ဂေ အီ ဟဲ့ ဒွိုမ် ဒတ် ဆီနန် ဆီနိူင် အီ ဘျုဝ် ဘျုဝ် ကျဝ် ကျဝ် ခဲင် မာန် မာငုန် မိူဝ် ဟဲ့ ဟွတ့် ယေန် တူတ့်။

11 ကူပ် န့ ပါယ် တီ အုဝ် ဘော က့လိုဝ် ကာဆဝ် အာဒါ မိူင် မုဝ်အာပ်။ ခဲင် နဝ်း အုဝ်၊ အုဝ် ဘော ငှုန် ပီ ဟမ် ဒိင် အီ ဟဲ့ ထုန် ကာဆဝ်။ အုဝ် ဘော ယာမ် အာဒါ မိူင် ကီရဟေဆိတ်။

12 န့ ဒီ ဘော ဒုက် ကာဆဝ် ခဲင် နဝ်း ဂေ ဒူအီ မုဝ်အာပ်။ ဂေ ဒီ ဘော ဟုဝ့် ဒဲင် နွန် စာ၊ ဝီ ဟာဝ် လိုပ် ခဲင် ဇူင် ဂေ ဘော ဘူင် တဲး ဂေ နုန် ကာဆဝ်၊ ဝီ ဆာခိုဝ် ဝီ မှာန့် ဒီ ဇဝ် ပီ ကြိုပ် ဂေ။ မာလဲ၊ န့ ယီ တူ မိုဝ်း ဒီခုဝ် မာဆေ။

13 အာတီ န့ မုး ပီ ဒွိုမ် ဘျ ဇဝ်ဖြာ လွင် ပဲ့ ဟဲ့ ပါယ် မိူင် မုဝ်အာပ်။ 14 ဒေါ အန် တီ ဇဝ်ဖြာ ဟဲ့ တဝ်း၊ “ဒူအီ အူ ဝီ ဟဲ့ ကာဆဲန့် ဒီ ဇာင် ဒီ အီ ဟဝ် အာဒါ အူယ် ဆီနမ်၊ အန် ဒီ ဘော တိး ဆီချာ ဆီငဲ အန်။ ပါယ် တီ အုဝ် ဇဝ်ဖြာ မိူဝ် ဒီ တိး ဆီချာ။ အာတ့် တူတ့် အူယ် ဆီနမ် အုဝ် ဒီ ဘူင် တဲး ကြုဝ်ကြာမ် အီ ကွယ် ခဲင် မိူင် မုဝ်အာပ် ဟြာယ် တူတ့်။ ဂေ ဒူအီ အီ ဟဲ့ ကိူန် ကာဆဝ်၊ ဂေ ဒီ ဝီ ဂိတ် မီ အီ စဲက်၊ ဂေ ဒီ ဘော ဒီလှး ကာဆဝ်။”