1 ဇဝ်ဖြာ ဝီ ကာလာင် လွင် အီ ဒီ ပါယ် မိူင် ဒါမာခူ တဝ်း၊ “ဘ်ု ဘေ ယွတ်၊ မိူင် ဒါမာခူ အာဝ် ဟူ ဝီ ဘဲန် မိူင် ဒေါ မှဝ်။ န့ ဒီ မိုဝ်း မီ မျုဝ် အီ ကာပျာတ့် လိုဝ်။

2 မိူင် ဘဲန် မိူင် ဘဲန် မိူင် အီ ကွယ် ခူပ် မိူင် တာင် အာရော၊ ဂေ ဒီ ဘော ရာမ် တူတ့်။ ခဲင် မိူင် ဂေ တီ၊ န့ ဒီ ဝီ လတ့် မီ ပေတ့်၊ တဲး န့ ဝီ ဘဲန် ဒူင် တး ဟူမ် မာဘူ ဂေ မာမက်။ ဆေ ဂေ ဒီ ဘော အိတ် ဒီလှဝ်၊ အာဝ် မိုဝ်း အာဆေ အီ တး ညွန် တဝ် ဂေ ခေါ အူ ဝီ။

3 ဂေ ဒူအီ ခဲင် မိူင် အီဆာရေလ ဘော ဂေ ဒူအီ ခဲင် မိူင် ဒါမာခူ အာဝ် ဟူ မိုဝ်း ဒူင် ဒီ ပွိုန် ဘိုင် ပွိုန် ချြီင်။ ဂေ ဒူအီ အာရာမ် အီ ဆီ ဂိတ် ဆီ ကွယ်၊ ဂေ ပီ ဒူအီ အီဆာရေလ အီ ဟဲ့ ဒွိုမ် မိုဝ်း အာဖုင် ဒင်ခုဝ် အီ ဟဲ့ ဟွတ့် ဟြာယ်။ အုဝ် ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် ဟဲ့ ကာလာင် အုန် ပါယ် တီ။”

4 ဇဝ်ဖြာ ပီ ဝီ တဝ်း၊ “ဆီငဲ အန် တီ အာဖုင် ဒင်ခုဝ် ဂေ ဒူအီ အီဆာရေလ ဒီ ယူမ် လူင်။ ဂေ ဟဲ့ ဒွိုမ် မုး ဒူအီ အီ ဟဲ့ ဂ့လန့်၊ ယီ ဟဲ့ ဝီ ချာ ကာဆဝ်။

5 န့ ဒီ ဘော ပီ ဘော ဒူအီ အီ ဆုဝ့် ငှုဝ်၊ အီ ဟဲ့ ဂြူပ် အုန် ခဲင် ဒဲ အန်။ န့ ဒီ ပီ ဘော ဒူအီ ဂိန် အီ ဂဲပ် ကာယူင့် ငှုဝ် ဝါယ် ဟဲ့ ဟွတ့် အီ ဆုဝ့်။ န့ ဒီ ဂိတ် မီ အီ စဲက်။

6 ဂေ ဒူအီ အီဆာရေလ၊ ဂေ ဒီ ဘော ပီ ဟေ ဘ့လေ နာမန် ပဲ့ ဟဲ့ ခြး စုဝ်း အီ တဲး န့ ရး။ န့ ဒီ ဂိတ် မီ အာ အူယ် ဘူင့် ဒီ ကာဒဲ့ အန်။ ဆေ အာဝ် ပါယ် တီ မိူဝ်၊ န့ ဒီ ပီ ရာ အီ ဟဲ့ မိုဝ်း ဘ့လေ မိုက် ဘ့လေ ကိူန်၊ ယီ ဟဲ့ ဝီ ဂိတ် ဖွုန် ဖန် ဘူင့် ဒီ ရာ တီ။ အုဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ ဟဲ့ ကာလာင် အုန် ပါယ် တီ။”

7 အာခြာဝ် ဒေါ အန် တီ ခဲ့ ကွယ် ဒူအီ ဘောကာဂ့လျီတ်၊ ဂေ ဒီ ဘော ဝီ နဝ်း တာင်၊ ဝီ ဘိုင် အန် ဇဝ် အီ ဖာန် ဘ့လေး ဂေ အီ မုး ဇဝ်ဖြာ အီ ဆီငါ ဘွတ်၊ ဇဝ်ဖြာ ပီ ကြိုပ် ဂေ ဒူအီ အီဆာရေလ။

8 ဂေ မိူဝ် အာဝ် ဟူ ရီမာတ် ကာစှူင့် လှူ ပီ ဘူင် ဂေ ဒီ ဒဲ ဂေ။ ဂေ အာဝ် ဟူ ရုဝ်ဆေ အီ မုး အာရိုပ် ရာင် ပီ ဘူင် ဂေ။ ဘော အာရိုပ် နာင် ကာနမ် အီ စိူဝ် အေဆူရာ ဘော ကာစှူင့် ဒူင် ဒုဝ့် ဂေ န့ကြိုဝ်း အုး ငှုန် ဂေ အာဝ် ဟူ ကြိုပ်။

9 ဒေါ အန် တီ မိူင် ဒီ တာင် အီ ဟဲ့ မန် ဆီချာ၊ ဂေ ဒီ ဘ့လေး ဝဲန်၊ တဲး န့ ကာပျာတ့် လိုဝ်၊ တဲး န့ ပီ မိူင် ဒူအီ အာမျုဝ် ဟီဝိတ် ဘော မိူင် ဒူအီ အာမျုဝ် အာမုဝ်ရိတ် ပဲ့ ဟဲ့ ဘ့လေး ဝဲန် ဂေ ဒေါ တဝ် ဂေ ဒီ ဒူအီ အီဆာရေလ တွိုန်။

10 ခုဝ်၊ ဘေ ဒူအီ အီဆာရေလ၊ ဘေ ဟဲ့ ပိဝ် ဇဝ်ဖြာ အီ ပီ ဒါအာင် မာဝ်၊ အီ ဟဲ့ ချွတ် ဘေ၊ အီ ဟဲ့ ဂွင့် ရဲ ဘေ။ ဘေ ဟဲ့ ဝီ ဆမ် ဟေ အီ ဘွတ် အီ မျာတ် ဘော ကြိုပ် ပီ ကြိုပ် ဒူအီ အာမျုဝ် ဟဝ်။

11 ဘေ ပီ ဘော ဟဲ့ ဘူင်၊ တဲး အန် ဘုဝ်း အန် လတ့် ညှာ ဆမ် ဘေ တီ အူ ဇေန့် မိူဝ်၊ ဘေ ယီ တူ ပွိုန် ဒီ ဘေတ့် ဘ့လေ အန်။ န့ ယီ ဒီ ဝီ ဘဲန် အီ ဒုက် အီ ညှာပ် ကာဆဝ် ဒီ ဘေ။

12 န့ ဒီ မိုဝ်း ဒူအီ ကိူန်၊ ဂေ ဒီ ဘော ဆီနန် ဆီနိူင်၊ တဲး န့ ကော ပီ ဒီငိုန့် ဟမ် အိုမ် နမ်မုက်ဆာရာ။ ဂေ ဒီ ဘော ပီ မာအိုမ် အီ ဟဲ့ ဟုဝ့် ဟဲန့် ကာဆဝ် ဘော ခြန် ဒီ ဆီလွယ် ပ့လိုက်။

13 ဂြန့် ဂေ ဒူအီ ကိူန် ဒီ ဘော ပီ ဟမ် မာအိုမ် တာင်။ ဇဝ်ဖြာ ယီ ဒီ ဝီ ခြဲ ဂေ၊ တဲး ဂေ ဝီ ကာဒုး ဒီ တဝ် ဟာဝ် တူင့်၊ ကာဒုး ဘော အီ ခုင်ခြး ဂေ၊ တဲး ဂေ ကော ပီ ကာပုး အီ ဟဲ့ ကာဟိုင် ဒဲင် နွန်၊ ဘော ကာအး ပဲ့ ဟဲ့ ဘုတ် ခုန်။

14 ဂေ ဘူင် တဲး အာဖေ အာရေ တး ဒီ ဂေ ဒေါ မုး ဂိန့် မှိုဝ်။ ပြဲ ညှမ် ဒန် ဝး၊ ဂေ ဟဲ့ ဟွတ့် ဝီ ဟြာယ် တူတ့်။ အာတီ ဒီ ဘဲန် ဒီ ဂေ ဒူအီ အီ ဟဲ့ ဖာတ် ဒိုဝ်း ကြုဝ်ကြာမ် ယေ။