1 နာ ဒွယ် ဘ့လဲင် အိုမ် ခဲင် မိူင် ကူဆာ၊^a အီ မုး မိူင် အီ ပွိုန် ယိုဝ် ဟမ် မာဖ့လပ် ဖျီင်၊ ဂေ ဒီ ဇမ် ဒုက် တာင်။

2 ဂေ ဒီ တိုယ် ဒါလာမ် ဂေ၊ တဲး ဂေ ပဝ့် ရိုဝ် ဂ့လူင့် လူင် ဒူပ် ဘ့လဲင် အိုမ် နီလာ။ အိုယ် ဘေ ဒါလာမ် အီ ဟဲ့ ခြန် ကာဆဝ်၊ တဲး ဘေ ဟာဝ် ဇမ် ခဲင် မိူင် အီ ဟဲ့ မိုဝ်း ဘ့လဲင် အိုမ် အီ ကာခန်။ ဒူအီ ခဲင် မိူင် တီ ဟဲ့ မိုဝ်း ပ့လူမ် ဂေ ဟဲန့်။ ဂေ မိူဝ် ကာလာင် ဂြုဝ်း ပီ တူ နပ် အီ ဟဝ်။ ဒုဝ် ဂေ ဒီ တူင့် ဒီ တာင် အီ မွှိုမ် ယုဝ် ကာဆဝ်။ ဒူအီ အီ ကွယ် ကာတူင့် ဘော အီ ကွယ် ကာတတ် ဘော ယုဝ် ဂေ ဒွန် အီ။

3 အိုယ် ဘေ ဒူအီ အီ ကွယ် ဒဲင် ကာဒါယ် နီ ဒွန် အီ၊ တဲး ဘေ ထူမ်။ ဆေ အီ ဆမ် ရွင့် အာလာမ် ဒဲင် နွန်၊ တဲး ဘေ ယွတ်။ ဆေ ဂေ ဘုတ် ဝဝ်၊ တဲး ဘေ ထူမ် ဘော ဟမ် အန်။

4 ခုဝ်၊ ဇဝ်ဖြာ ဟဲ့ ကာလာင် ဒီ အုဝ် တဝ်း၊ “အုဝ် ဟဲ့ ကွယ် ခဲင် ဂါင်ဟြာဝ် ဘော ယွတ် လူင် ယေန် ယေန် နှိမ် နှိမ်၊ တဲး န့ ပီ ဘ့လာင် ဆီငဲ အီ ဟဲ့ ထွင် ဒဲင် ကာဒါယ်၊ ဘော အိုမ် ဒီငါန် အီ စုဝ်း ဒေါ မုး အာခြာဝ် ကာဟွာ့ ဒေါ ဆုဝ့် အီ ဒီ ငှုဝ်။

5 အာတ့် ပွိုန် ဂေ ဒီ ဘေတ့် မ့ပူင့် ဘ့လေ မာငုန် ဂေ၊ ဒေါ ဟဲ့ ကာတတ် ဘ့လေ မာငုန် ဒီ ဆိန်၊ န့ ဒီ မိုဝ်း ရန်ဆူ တး ပျာတ့် ဒူအီ ခဲင် မိူင် ကူဆာ တီ။ န့ ဒီ ပီ အီ ဒိုဝ်း မာပွါ့၊ ဒဲပ် ဝဲန် ရာ ဂေ ယွုန် ဟေ မာငုန် တီ။

6 ဒုဝ် ယမ် ဂေ ဒါ ဆိုက်၊ ဂေ ဒီ ဘော ဘ့လေး အုန် ပါယ် တီ တဲး မာဆိမ် ဂေ မာဒုဝ် ပြဲ ဟာယ် တး ဟူမ်။ န့ ဒီ တဲး မာဆိမ် မိုဝ်း ပီ ဒီ ဟူမ် ဒေါ မုး အာခြာဝ် ဆောဒါတ်။ န့ ဒီ ဘော တဲး မာဒုဝ် ပြဲ မိုဝ်း ပီ ဒီ ဟူမ် ဒေါ မုး အာခြာဝ် ဂတ် ဂျီတ်။”

7 ဒေါ အန် တီ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ ဘော ဒိုဝ်း လက်ဆွင် ဒီ ဂေ ဒူအီ ခဲင် မိူင် အီ မိုဝ်း ဘ့လဲင် အိုမ် ကာခန်။ န့ ဘော မုး ဒူအီ အီ မိုဝ်း ပ့လူမ် ဂေ ဟဲန့်၊ ဒူအီ ဒုဝ် ဒီ တူင့် ဒီ တာင် အီ မွှိုမ် ယုဝ် ကာဆဝ်။ ဒူအီ အီ ကွယ် ကာတူင့် ဘော အီ ကွယ် ကာတတ် ဘော ယုဝ် ဂေ ဒွန် အီ။ ဂေ ဒီ ဘော တး ဒီ နွန် ဇီအူန် ဒူင် ကြိုပ် အီ ဇဝ်ဖြာ အီ အိုပ် တူတ့် ဒွန် မျုဝ်။