1 ခါ နီ ဇဝ်ဖြာ ဝီ ကာလာင် လွင် အီ ဒီ ပါယ် ခဲင် မိူင် အဲဂိုပ်။ ဘ်ု ဘေ ယွတ်၊ န့ ပီ ဇဝ်ဖြာ ဒီ ပဝ့် န့အု အီ ခြန် ကာဆဝ်၊ တး ဇမ် ဒီ မိူင် အဲဂိုပ်။ အာရိုပ် ရာင် အီ ကွယ် ခဲင် မိူင် အဲဂိုပ် တီ ဒီ ဘော ဒီယုး ဒီယေန့် ကူပ် တး အန် ဇဝ်။ နဝ်း ဂေ ဒူအီ အဲဂိုပ် အီ မိုဝ်း နဝ်း ယ နဝ်း ကျ မိူဝ်၊ ဟဲ့ ဟွတ့် ဟြာယ် တူတ့်။

2 ဇဝ်ဖြာ ဘော ဝီ တဝ်း၊ “အုဝ် ဒီ ကာဆုး ဂေ ဒူအီ အဲဂိုပ်၊ တဲး ဂေ ဝီ လာယ် ကာဂုဝ်း ကာတဲ ဂေ။ ဂေ အီ ကွယ် ကာချြီ့ အီ မုး အူကတ် အူဝါ၊ ဂေ ဒီ ဝီ လာယ် ကာဂုဝ်း။ ခဲင် မိူင် တာင် အဲဂိုပ် တီ အူ အိူင် ဒီ ဝီ ကာဂုဝ်း ပေါ အူ အိူင်၊ အူ မိူင် ဒီ ဝီ ကာဂုဝ်း ဒီ ပေါ အူ မိူင်။

3 အုဝ် ဒီ ဘူင် တဲး ဂေ ဒူအီ ခဲင် မိူင် အဲဂိုပ် ဝီ ဘဲန် နဝ်း လိုဝ်၊ နဝ်း ဒီတဲတ်။ အုဝ် ဒီ ပျာတ့် ဝဲန် ပီ ခြာမ် ဂေ ဒီ ဘူင်။ ဂေ ဒီ ဝီ ဟာဝ် ဒီမွှတ် အာရိုပ် ရာင်၊ တဲး န့ စွယ် ဂေ။ ဂေ ဒီ ဘော ဟာဝ် ဒီမွှတ် ဒူအီ အီ နပ် ဒီ ဘူင် အာဒါတ်၊ ဟာဝ် ဒီမွှတ် ကာနမ် ဒူအီ ယမ်၊ ဟာဝ် ဒီမွှတ် ယာ ပြေ၊ တဲး ဂေ ဝီ မိုဝ်း အာကျာမ် အာငျာန်။

4 အုဝ် ဒီ အာပ် ဒူအီ အဲဂိုပ် ဒီ ဒါ ကာညာ အီ တူ နပ် ဒီ ကာဝေ ဒူအီ။ ခုန်ဒီခမ် အီ ဟာယ် ကာဆဝ် ဒီ ဝီ အိုပ် ဂေ။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။”

5 ဒေါ အန် တီ အိုမ် ဘ့လဲင် နီလာ ဒီ ဘော ယူမ် လူင်။ န့ ဒီ ဘော ဟိတ် တူတ့်။

6 အိုမ် ခဲင် ရူင်ဝှါယ် ဒွန် ပ့လုဝ့် ဒီ ဘော အုး အမ်။ ဘ့လဲင် အိုမ် အီ တး လိုပ် ခဲင် ဘ့လဲင် နီလာ ဒီ ဟိတ် တူတ့်။ ဂ့လူင့် ဂေ ခဲမ် မိူဝ် ဒီ ဟျီ့ ကာဟဝ်း ယမ်။

7 ဟေ ဇေ အီ လတ့် ခူပ် ဘ့လဲင် အိုမ် နီလာ ဘော ပီ ဆမ် ဒူအီ ဒီ တီ မိူဝ်၊ ဒီ ဘော ကာဟဝ်း တွင့် လိုဝ် စှိုမ်။

8 ဂေ ဒူအီ အီ မှေတ့် မာဂါ ဒူပ် ဘ့လဲင် နီလာ၊ ဂေ ဒီ ဘော ယာမ် ဘော ငှုန် ဒွန် အီ။ ဒူအီ အီ တာ မ့ပဲတ်၊ တာ န့ရပ်၊ ဂေ ဒီ ဘော ကာပြာန့် ပီ ဒီ ဟူမ်။

9 ဂေ အီ ဘူင် ဒီ ဒဝ့် အီ ဘတ် ဆေန့် လုယ်၊ ဘတ် ကာတမ် လုယ် မိူဝ်၊ ဂေ ဒီ ဘော ဘဲန် နဝ်း ဂွင့်။

10 ဂေ ဒူအီ အီ ပွိုန် ဘိုင်၊ အီ ပီ ရွင့် ကာင် တဲး န့ မန်၊ ဂေ ဒီ စှိုမ်။ ဘော ဂေ ဒူအီ အီ ဇာင် ဒီ ဟူမ်၊ ဂေ ဒီ ဘော ဘဲန် နဝ်း လိုဝ် နဝ်း တျီ့။

11 ဂေ အာမူ အာမာတ် အီ ကွယ် ခဲင် မိူင် စောနာ၊ ဂေ ဒီ ဘော ဝှိုန့် ဘော ရိုဝ်။ ဂေ ဒူအီ အီ မိုဝ်း အာငျာန်၊ ဂေ ဒီ ဘော ဝီ ဒွါ အာကျာမ် အာငျာန် အီ မိူက် အီ အပ် ဝွင့် ဒီ ခုန်ဒီခမ် ဖာရုဝ်။ ဂေ ယီ ယ ကာလာင် ဒီ ခုန်ဒီခမ် တဝ်း၊ “ယေ ဘော မုး ခြိုဝ် ဒူအီ အီ မိုဝ်း အာငျာန်၊ ယေ ဘော မုး န့ကြိုဝ်း ခုန်ဒီခမ် ဆိန့် ဒေါ မွိုန်။”

12 “အိုယ် ခုန်ဒီခမ် အီ အိုပ် မိူင် အဲဂိုပ်၊ ဒူအီ မဲ အီ မိုဝ်း အာငျာန် အီ လွှက့် လှဲမ်၊ ဂေ ကွယ် နာ မှဝ်။း တဲး မဲ စ်ု ဂေ ကာလာင် နှဲ လွင် ပီ ခြာမ် ဇဝ်ဖြာ အီ အိုပ် တူတ့် ဒွန် မျုဝ်။ တဲး ဂေ ကာလာင်၊ အန် ဒီ ဘူင် ပါယ် မှဝ် ခဲင် မိူင် အဲဂိုပ် တီ။

13 ဂေ အာမူ အာမာတ် အီ ကွယ် ခဲင် မိူင် စောနာ၊ ဂေ ဟဲ့ ဟွတ့် ဘဲန် ဒူအီ ရိုဝ် ဒူအီ ဝှိုန့်။ ဂေ အာမူ အာမာတ် အီ ကွယ် ခဲင် မိူင် နောဖ၊ ဂေ ဘော ညှိုမ် ပီ ကာလုဝ် အီ။ ဂေ အီ ပီ စေန့် ရွင့် ခဲင် ခြိုဝ် ဂေ၊ ဂေ ယီ ဝီ ယဲတ့် တဲး ဒွန် အီ ကာလိုပ်။

14 ခုဝ်၊ ဇဝ်ဖြာ ဟဲ့ ဘူင် တဲး အာငျာန် ဂေ ကာဝှ်ု ကာဝျှီန်။ ကူပ် န့ ပါယ် တီ ဂေ ဒူအီ ခဲင် မိူင် အဲဂိုပ် ဘော ဘူင် ကာလိုပ် တူတ့် ဒွန် မျုဝ်။ ဂေ ဘော ပီ ဒူအီ ယိုတ့် ပဝ်း အီ ဟဲ့ ဝီ ဒီပ့လာတ် ကေး အိတ် ခဲင် ဟိုဝ် ဘြိမ် ဂေ။

15 ဂေ ဒူအီ ခဲင် မိူင် အဲဂိုပ်၊ ဘော မုး ဒူအီ ခြမ်၊ ဘော မုး ဒူအီ ဂိန်၊ ဘော မုး ဒါ တာင်၊ ဘော မုး ဒူအီ ရဝ် ဒူအီ ကာင်၊ အာဝ် မိုဝ်း အီ ပွိုန် စွယ် ခေါ အူ ဝီ။” ဇဝ်ဖြာ ဟဲ့ ကာလာင် ပါယ် တီ။

16 ဇဝ်ဖြာ ပီ ဝီ ကာလာင် ဟာဝ် တဝ်း၊ “ဒေါ အန် တီ ဂေ ဒူအီ မိူင် အဲဂိုပ် ဒီ ဘော ပီ အီဘိုန့် အီ တူ မိုဝ်း ဒူင် ဒီ ဘိုင်။ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ ဘော စုဝ့် မ့ဖျီ့ ဒီ ဂေ၊ တဲး ဂေ ယုဝ် ဒီယုး ဒီယေန့်။ 17 ဂေ ဒူအီ အဲဂိုပ်၊ ဂေ ဒီ ဘော ယုဝ် ကာဆဝ် ဂေ ဒူအီ အာမျုဝ် အာယူဒါ။ ဆေ ဂေ ယိုဝ် မီ အီ ကာလာင် စိူဝ် ဂေ ဒူအီ အာယူဒါ၊ ဂေ ဒွန် အီ ဒီ ဘော ယုဝ်။ ခုဝ်၊ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ခြာမ် ဒီ ဘူင် ပါယ် တီ။

18 အာခြာဝ် ဒေါ အန် တီ ခဲင် ကာဒါယ် မိူင် အဲဂိုပ် တီ၊ ဂေ ဒီ ကာဒုး ဒီ ကာလာင် တူတ့် ဂြုဝ်း ဟဲဘြဲ အာဒါ ဖန် မိူင်။ ဒူအီ ဂေ တီ ဒီ ဝီ ခမ် ဘော ဒိူင် ကာဆဲန့် ဒီ ဇဝ်ဖြာ အီ အိုပ် တူတ့် ဒွန် မျုဝ်၊ တဲး ဂေ ရုဝ်ဆေ အန်။ ခဲင် မိူင် ဖန် မိူင် တီ၊ အာဒါ အူ မိူင်၊ ဂေ ဒီ တဲး န့ စိူဝ်၊ “မိူင် ဆီငဲ။” ^a

19 ဒေါ အန် တီ န့ ဒီ မိုဝ်း ကာစှူင့် လှူ ဒီ ဇဝ်ဖြာ ခဲင် မိူင် အဲဂိုပ်။ န့ ဒီ မိုဝ်း ဘော ရွင့် မာဝ် ဒူင် ဒီ ကြိုပ် ဂေ ဇဝ်ဖြာ အီ ကွယ် ဒီ ကာအုန် ကာဒါယ် မိူင် အဲဂိုပ် တီ။ 20 အာတီ န့ ဒီ ဘဲန် လက်ဆာနာ အီ ဘျ၊ ခဲင် မိူင် အဲဂိုပ် န့ မိုဝ်း ဒူအီ အီ ကြိုပ် ဇဝ်ဖြာ အီ အိုပ် ဒွန် မျုဝ်။ ဆေ ဂေ ဒူအီ တီ လုဝ် ခမ် ပီ ခါနှာပ် အီ ဟဝ်။ ဆေ ဂေ ဘော ဝီ ဒဲ့ ဇဝ်ဖြာ စွယ် ဂေ၊ အန် ဇဝ် မိူဝ် ဒီ တိုယ် အီ ဒီ ချွတ် ဂေ၊ တဲး အန် တး ထုတ် လေး ဂေ။ 21 ဇဝ်ဖြာ ဒီ ဘော ဘျ ပီ မုး အန် ဒီ ဂေ ဒူအီ အဲဂိုပ်။ ဂေ မိူဝ် ဒီ နပ် အန် ဘော ကြိုပ် မီ အန်။ ဆီငဲ တီ၊ ဂေ ဒီ ဘော ဒိုဝ်း တး ပီ ဒီ လှူ ဂေ ဘော ဒုဝ် ပီ လှူ အီ ဒုဝ့် ဒီ ငဝ်၊ ဝီ လှူ ဒီ ဇဝ်ဖြာ။ ဂေ ဒီ ဘော ဒွါ ကာဒိက် ဆတ်ဇာ ဒီ ဇဝ်ဖြာ ဘော ဘူင် ဒူပ် ကာဒိက် ဆတ်ဇာ ဂေ တီ။ 22 ဇဝ်ဖြာ ဒီ ဘော ဒမ် ကာဆဝ် မှာပ် ဒီ ဂေ ဒူအီ အဲဂိုပ်။ ဟဲ့ ဟွတ့်၊ အန် ပီ ဒီ ဝီ တဲး ဂေ ဒါခိုယ်၊ တဲး ဂေ ကဲန်။ ဆီငဲ တီ၊ ဂေ ဒီ ဘော ကာပ့လု နဝ်း ဂေ။ အန် ဇဝ် မိူဝ် ဒီ ဝီ ထူမ် ဂြုဝ်း ပီ ဆာခိုဝ် ပီ မှာန့် ဂေ၊ ဝီ တဲး ဒုက် ဂေ ဟြာယ်။

23 ဒေါ အန် တီ န့ ဒီ မိုဝ်း န့တေန့် တာင် စုး ဒီ မိူင် အဲဂိုပ်၊ ဇမ် မိူင် အာဆူရီယာ။ ဂေ ဒူအီ အာ မိူင် တီ ဒီ ဘော ဟာဝ် ဟာဝ် တး တး လာယ် လိုပ် ခဲင် မိူင် ဂေ။ ဂေ ဒူအီ ဘော အာ မိူင် ဒီ ဘော ကြိုပ် ဒီ ရိုမ် အူ ပ့လုဝ့်။

24 ပန် အန် တီ မိူင် အီဆာရေလ ဒီ ဘဲန် မိူင် ဟာအူယ် အီ ကာရမ် မိူင် အဲဂိုပ် ဘော မိူင် အာဆူရီယာ။ န့ ဒီ ဘော ဘဲန် ပီ မွင့်ကာရာ ဒွါ ဇဝ်ဖြာ ဒီ ဒူအီ ဒဲင် ကာဒါယ် နီ။ 25 ဇဝ်ဖြာ အီ အိုပ် တူတ့် ဒွန် မျုဝ်၊ အန် မွင့်ကာရာ ဒွါ ဒီ ဂေ ဘော တဝ်း၊ ‘ဘေ ဒူအီ အာမျုဝ် အဲဂိုပ် အီ မုး အာမျုဝ် အုဝ်၊ ဘော ဘေ ဒူအီ အာမျုဝ် အာဆူရီယာ အီ မုး ဒူအီ ပီ ဖာန် ဘ့လေး အုဝ်၊ ဘော ဘေ ဒူအီ အီဆာရေလ အီ မုး ဒူအီ ပီ ရဝ်း အုဝ်၊ တဲး ဘေ ဘောကာဂ့လျီတ် ဘျုဝ် ဒါခိုယ်။’ ”