1 အူ ဆီနမ် ခုန်ဒီခမ် အာဆာရာန် အီ အိုပ် မိူင် အာဆူရီယာ ဘော ဒွါ အာမိင် ဒီ ဒါ ဘုဝ် တာင် အီ အိုပ် ဒါ ဆိုက် ခဲင် မိူင် အာဆူရီယာ၊ တဲး အန် ယဲတ့် ဂေ ဟာဝ် ကာဂုဝ်း ဒီ ဒူအီ ခဲင် မိူင် အာစုတ်။ ဒေါ အန် တီ ဂေ ဘော ဟာဝ် ကာဂုဝ်း ဘော ပဲ မိူင် အာစုတ် တီ။ 2 ဒေါ အန် တီ ဇဝ်ဖြာ ဟဲ့ ဒွိုမ် စ်ု အာအီဆာယ အီ မုး ဂွန် အာမူတ် တဝ်း၊ “တဲး မဲ ဘုတ့် လေး ခူဒိန့် မဲ၊ ဘုတ့် ဘော ခြိုင် စာန် ပီ စှိုပ် မဲ။” အန် မိူဝ် ဘူင် ဒူပ် ဂြုဝ်း တီ ဘော ဟာဝ် ဒုဝ် ဂ့လ၊ တူ စှိုပ် ခူဒိန့် အန်။

3 ဝါယ် အန် တီ ဇဝ်ဖြာ ဝီ တဝ်း၊ “ဒဲစေန့် အုဝ် အီ စိူဝ် အာအီဆာယ တွိုန်၊ အန် ဟဲ့ ကွယ် ဒုဝ် ဂ့လ ဘော တူ စှိုပ် ခူဒိန့် အာဒါ အူယ် ဆီနမ်။ လွင် အန် တီ၊ န့ ဘျ အီ ဒီ ဘုဝ် ဘဲန် ခဲင် မိူင် အဲဂိုပ် ဘော ခဲင် မိူင် ကူဆာ။ 4 ခုန်ဒီခမ် အာဆူရီယာ ဒီ မှေတ့် ဒူအီ အာ မိူင် တီ၊ ဘုတ့် ဝဲန် ခြိုင် တာ ဂေ၊ တဲး ဂေ ကွယ် အာဂ့လ၊ ဘဲန် ဘော မှာယ် အန်။ ဘော ဒူအီ ဂတ် ဘော ဒူအီ နှိုမ် ဂေ တူ ပွိုန် စှိုပ် ခူဒိန့်၊ ဂေ ကာဒုး ဒီ ဟာဝ် အာဂ့လ ဒွန် အီ၊ အာဝ် ပွိုန် ဒိုဝ်း မာဆေ ကာဘိတ် ဆီပူင့် ဂေ၊ တဲး န့ ဖျာက် ဆာရေ ဂေ ဒူအီ အဲဂိုပ်။ 5 ခဲ့ ကွယ် ဂေ အီ နဝ်း တာင် ဒီ ဒူအီ မိူင် ကူဆာ ဘော အိူပ် မျုက် မိူင် အဲဂိုပ်၊ ဂေ ဒီ ဝီ ယုဝ် ကာဆဝ် ဘော ဆာယ် အီ။ 6 အာခြာဝ် ဒေါ အန် တီ ဂေ အီ ကွယ် ခူပ် ဘာင် အိုမ် နမ်မုက်ဆာရာ၊ ဂေ ဒီ ဘော တဝ်း၊ ‘တဲး ဘေ ယွတ်၊ ဒူင် ဟဲ့ ခြာမ် အေ ဒီ တဝ် ဟာဝ် ချြီင် တဲး အေ လွတ် ဒီ ရန်ဆူ အေ အီ မုး ခုန်ဒီခမ် အာဆူရီယာ တွိုန်၊ န့ ဟဲ့ ဝီ ပါယ် မှဝ် ဒေါ တီ နီ။း မှဝ် အေ ဒီ ပါယ် တဲး အေ လွတ်။း’ ”