ခါန် 21
လွင် မိူင် ဘာဘဲ ဒီ လိုဝ် စှိုမ်
1 ခါ နီ ဒီ ဝီ ကာလာင် လွင် အီ ဒီ ပါယ် ခဲင် ပြဲ ကာဟဝ်း အီ ကွယ် ခူပ် အိုမ် နမ်မုက်ဆာရာ။ ခုန် လာင် နပ် ဒီ ဘုတ် ခဲင် ပြဲ ကာဟဝ်း၊ နပ် ဒီ ပျာတ့် လိုဝ် တူတ့်။ ပါယ် တီ ဒုက် အီ တာင် ကာဆဝ် ဒီ တး ခဲင် ပြဲ ကာဟဝ်း။ န့ ဒီ တး ခဲင် ကာဒါယ် မိူင် အီ မွှိုမ် ယုဝ် ကာဆဝ်။
2 ဇဝ်ဖြာ ဝီ ဘျ တဲး အုဝ် ယိုဝ် အီ ညှာပ် ကာဆဝ်။ န့ ဘော မုး လွင် ဒူအီ အီ တူ ပွိုန် ညှိုမ်၊ အန် ဘူင် တဲး န့ ဘဲန် ဒုက် ဒီ အီ၊ ဘော လွင် ဒါ ဇူန် အီ ဖာတ် ဒိုဝ်း ကြုဝ်ကြာမ် အီ။ အိုယ် ဘေ ဒူအီ ခဲင် မိူင် အေလမ်၊ တဲး ဘဲ ကာဂုဝ်း။ ဘေ ဒူအီ ခဲင် မိူင် မေဒီ၊ တဲး ဘေ ဟာဝ် ဝဲင် ရူပ် မိူင် တီ။ ဒုက် ပီ ဒွိုမ် ဒွါ မိူင် တီ ဒီ အီ၊ ဇဝ်ဖြာ ဒီ တဲး န့ ဝီ ယေန်။
3 ခဲ့ ပီ ယိုဝ် အုဝ် တဲး န့ ဘဲန် ဒုက် ဒီ အုဝ်၊ တဲး န့ ဆဝ် ကာဆဝ် ဒီ အုဝ်။ န့ ကော ပီ အီဘိုန့် ဆဝ် ဒီ မိုဝ်း ဂွန်။ န့ ဟဲ့ စန် ကာဆဝ် ဒီ နဝ်း အုဝ် ကူပ် ပဲ့ ဟဲ့ ထူမ် အုဝ်။ န့ ဟဲ့ ဒုက် တိူက် ဒီ နဝ်း အုဝ် ကူပ် ပဲ့ ဟဲ့ ယိုဝ် အုဝ်။
4 ဂိန့် အုဝ် မိူဝ် ကော ဘတ် ကော ရိုဝ် ကူပ် ယုဝ် ကာဆဝ် အုဝ်။ အုဝ် ဘော ကာပြာ တဲး န့ ဇမ် ဘာ ဒီ အပ် အီ ဒါခိုယ်။ န့ ယီ တူ ဘဲန် အာဂျိုဝ် မာဆေ။ န့ ဝီ တဲး မီ နဝ်း ယုဝ် နဝ်း ကာပိုန့် ဒီ အုဝ်။
5 ခဲ့ ပီ ယိုဝ် အုဝ် တီ၊ ဂေ ဟဲ့ ရဲန် ပီ ဒီ ဟူမ်။ ဂေ ဟဲ့ ဒ အုန် ဘော မ့ဘေ၀် အာဒါ ဒူင် ဒီ တး တုတ့် ခဲတ့်။ ဟဲ့ ဟွတ့်၊ ဂေ ဘော ဟူမ် ဘော ဒျီင်။ ဒေါ အန် တီ အူ ဇေန့်၊ န့ ဝီ မိုဝ်း ဂြုဝ်း တဝ်း၊ “အိုယ် ဘေ ဒါ ကာညာ၊ တဲး ဘေ ရဲန် အုန် ခြိုင် ကာဂုဝ်း ဘေ။”
6 ဒေါ အန် တီ ဇဝ်ဖြာ ပီ ဝီ ကာလာင် ဒီ အုဝ် တဝ်း၊ “တဲး မဲ ဟာဝ် ဒါင် တဲး န့ မိုဝ်း ဒူအီ အီ ဘ်ု မိူင် အူ ဝီ၊ တဲး အန် ဝီ ကာလာင် ခဲ့ ပီ ယိုဝ် အန်။
7 ဆေ အန် ဘော ယိုဝ် ဒူအီ အီ ပဝ့် မ့ပြွင့် အီ ပဝ့် ဘဲန် ဂူ ဘဲန် ဂူ၊ ဆေ အန် ယိုဝ် ဘော ဒူအီ အီ ပဝ့် မာလာ ဂေ မင်ပြွင့် ကာဟာတ့်၊ တဲး အန် ဆာဒိက် ဘော ယွတ် ဆီချာ ဘော ထူမ် တူတ့် ဒွန် မျုဝ်။”
8 ဒေါ အန် တီ ဒါ အီ ဘ်ု မိူင် ဒီ ဝီ ဒဲ့ တဝ်း၊ “အိုယ် မဲ ဇဝ်၊ အုဝ် ဟဲ့ ကွယ် ဒီ နီ၊ ဘ်ု ဒူင် ဘ်ု အုဝ် နီ ဒွင် ဝန် ဒွင် ခိူန်။
9 ဒေါ တီ နီ အုဝ် ဟဲ့ ယိုဝ် ဂေ အီ ပဝ့် မ့ပြွင့် ဘဲန် ဂူ ဘဲန် ဂူ ဟဲ့ တး။” အူ ဝီ ဘော ဒဲ့ တဝ်း၊ “မိူင် ဘာဘဲ ဟဲ့ ဟွတ့် ကာပျာတ့် လိုဝ် တူတ့်။ ခဲ့ ကွယ် အာရိုပ် ရာင် ပီ ကြိုပ် ဂေ မိူဝ် ဟဲ့ ဟွတ့် ကာဘက် စုဝ်း တူတ့် ဒဲင် ကာဒါယ်။”
10 အိုယ် ဘေ ဒူအီ အာမျုဝ် အုဝ်၊ အုဝ် ဟဲ့ တဲး ဘေ ခမ် ဒုက် ဘဲန် မျုဝ် ဘဲန် မျုဝ် ပီ အီ မး ငှုဝ် ဘော ကိုမ် ဒီဂါဝ်။ ဒေါ တီ နီ ခဲ့ ပီ ယိုဝ် အုဝ် ပီ ကာလာင် ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အုဝ် ဝီ ကာလာင် ဟာဝ် ဒီ ဘေ ပါယ် တီ။
လွင် မိူင် အီ ငွင့်
11 အာနီ န့ ဝီ မုး လွင် မိူင် အီ ငွင့်။a ဒူအီ အူ ဝီ ကွယ် ဒဲင် နွန် ဆေအီ၊ အန် ဝီ ဒဲ့ ဒီ ကာလာင် တဝ်း၊ “အိုယ် မဲ အီ ဘ်ု ခဲင် မှိုဝ်၊ မှိုဝ် နီ န့ ဒီ ပွုန် ဒေါ မှဝ်။း မှိုဝ် နီ ပန် မှဝ် အန် ဒီ တူတ့်။း တဲး မဲ ကာလာင် ဒီ အုဝ်။”
12 ဒါ အီ ဘ်ု ခဲင် မှိုဝ် ဝီ တဝ်း ဒီ အန်၊ “ဆိန့်ဝး ဒိူန် ဒီ တး။ မာလဲ၊ ခဲင် မှိုဝ် ပီ ဒီ ဝီ တး။ ဆေ မဲ ဆီ ဒီမွှတ် ပေါ န့ ပွါ ဝါယ် အန် တီ၊ တဲး မဲ ဝီ တး ဒီမွှတ်။”
လွင် မိူင် အာရာပ်
13 အာနီ န့ မုး လွင် မိူင် အာရာပ်။ “အိုယ် ဘေ ဒူအီ ခဲင် မိူင် ဒဲဒါန် အီ ဟာဝ် ဘဲန် ဖိုင်၊ ဟာဝ် ဒူပ် န့တေန့် တူင့်၊ ဘေ လုဝ် ချ လုဝ် ချြီင် ဘေ ခဲင် မိူင် အာရာပ် ဒူင် မိုဝ်း မီ ယွုန် ဂေ ပြဲ ကာဟဝ်း။
14 အိုယ် ဘေ အီ ကွယ် ဒီ ဒူင် စိူဝ် ထေမာ၊ တဲး ဘေ ဒွါ အိုမ် ဒီ ဂေ အီ ဆီ ဒျီင် အိုမ် အီ ဟဲ့ တး ဒူင် ကွယ် ဘေ။ တဲး ဘေ ဒွါ ပီ ဒီ ဟူမ် ဒီ ဂေ အီ ဟဲ့ တဝ် လေး ဒူင် ကာဂုဝ်း ဒါ ဆိုက်။
15 ခုဝ်၊ ဒူအီ ဂေ တီ၊ ဂေ ဟဲ့ တဝ် တဲး ဂေ လွတ် ဒီ မာပွါ့ လာင် အီ ဟဲ့ ဟွတ့် ထွတ် အုန် ဘော ဒီ ဘ့လာ အ အီ ဟဲ့ ဟွတ့် ဝိတ့် အုန်။ ဂေ ဟဲ့ တဝ် ဘော ဒီ အာဖေ အာရေ ဒွန် မျုဝ် ဒူင် ကာဂုဝ်း ဒါ ဆိုက်။”