1 အာနီ န့ ဘော မုး လွင် ဒီလယ့် ပီ ဘျ ဇဝ်ဖြာ ဘဲန် မျုဝ် ဘဲန် မျုဝ်။ “အိုယ် ဘေ ဒူအီ ဘော မိူင်၊ မှဝ် န့ ပါယ် ပီ ဆော ကာဖြူမ် ဘေ ဒီ ကွယ် ဒဲင် ကာတု ကာင် ဘေ။း^a ဘေ မိုဝ်း ဒုက် မျုဝ် မှဝ်။း

2 ဘေ ဘော ဘူင် ဆီနန် ဆီနိူင်၊ ဘူင် တဲး န့ ဘျုဝ်၊ တဲး န့ ကျဝ်။ ဘေ ယီ တူ ဝီ နပ်၊ ဒူအီ ဘေ ဟဲ့ ယမ်။ အာဝ် မုး ဂေ ယမ် ကူပ် လာယ် ကာဂုဝ်း ဂေ ဒီ ဒါ ဆိုက်။ ဂေ တူ ယမ် ဒီ မာပွါ့ လာင်။”

3 ဂေ ဒါ ကာညာ ဘေ ဟဲ့ ဟွတ့် တဝ် တူတ့်။ ဆိန့် အာတ့် ဘန့် ဂေ ဘ့လာ ခေါ အူ ညွင့်၊ အီ ဟဝ် ဟဲ့ ဟွတ့် ဝီ ပွိုန် ဒီ မှေတ့် တူတ့် ဂေ။ ဒူအီ ဘေ ပီ ဘော ဟဲ့ တဝ် ချြီင် မိူဝ်၊ ခဲ့ ပီ ယိုဝ် ဂေ၊ ဂေ ဟဲ့ ဟွတ့် မှေတ့် တူတ့်။

4 ခုဝ် အန် တီ၊ အုဝ် ဟဲ့ တဝ်း၊ “ကွဲ့ တဲး ဘေ ယွတ် အုဝ်။ တဲး ဘေ အုန် မီ အုဝ် အူ ဝီ ကွယ်၊ တဲး အုဝ် ပွိုန် ဒီ ယာမ် အာဒါ ဂေ ဒူအီ အာမျုဝ် အုဝ် အီ ဟဲ့ ယမ် တီ။ ကွဲ့ တဲး ဘေ ဂျုဝ်ဂျာ ဒီ ဘူင် မာဆေ အီ ဒီ လှဝ် နဝ်း အုဝ်။”

5 အာခြာဝ် နီ န့ မုး အာခြာဝ် ဒီ လုဝ် ခမ် ဒုက်၊ အာခြာဝ် ဒီ စှိုမ် ဒါ ဆိုက်။ အာခြာဝ် ဒီ ဘဲန် နဝ်း ကာဝှ်ု ကာဝျှီန် ခဲင် ဒီလယ့် ဒူင် ပီ ဘျ ဇဝ်ဖြာ ဘဲန် မျုဝ် ဘဲန် မျုဝ်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဲး န့ ဘဲန် ပါယ် တီ ဒီ အေ။ ရဲင် မိူင် အေ မိူဝ် ဂေ ဟဲ့ ဘ့လုး တဲး န့ ကာဒဝ်၊ တဲး န့ ဆာဂ့လုး စုဝ်း။ ဂေ ဘော ဒတ် ဒဲ့ ဒီ နွန်၊ တဲး န့ မိုဝ်း အီ တး စွယ် ဂေ။

6 ဂေ ဒါ ဆိုက် အီ ဟဲ့ တး ခဲင် မိူင် အေလမ် ဟဲ့ ဒိုဝ်း တး အ ဂေ ဘော ဘ့လာ ဂေ၊ ဒိုဝ်း တး ဘော ဒါ ဆိုက် အီ ပဝ့် လက်လဝ် ဘော အီ ပဝ့် မ့ပြွင့်။ ဂေ ဒါ ဆိုက် အီ တး ခဲင် မိူင် ကီရ မိူဝ် ဟဲ့ ဂူင့် မင် ဂွင့် ဂေ။

7 ဒီလယ့် ခဲင် မိူင် ဘေ အီ မုး ကာဒါယ် ဘွတ် ကာဒါယ် မွှိုမ် တွိုန်၊ ဟဲ့ မုး တူတ့် ဒူင် တး ကွယ် ဒါ ဆိုက် အီ ပဝ့် လက်လဝ် ဂေ အီ ပဝ့် မ့ပြွင့်။ ဘော နာ အာတ့် မာလုဝ်း မိူင် ဂေ ဟဲ့ ချ ကွယ်။

8 မျုဝ် အီ ဒီ ရဲ ဒီ ဂွင့် ဂေ ဒူအီ အာယူဒါ၊ အန် ဇဝ် ဟဲ့ ဟွတ့် ဒိုဝ်း ဟာဝ် တူတ့်။ ဒေါ အန် တီ ဘေ ဟဲ့ နဝ်း တာင် ဒီ ခြိုင် ကာဂုဝ်း ပီ ချြီင် ပီ အုန် ဘေ ခဲင် ဟုဝ် အီ စိူဝ် ဟုဝ် ခဲင် ပြဲ တွိုန်။

9 ဘေ ဒီ ဘော ဝီ ယိုဝ် ရဲင် မိူင် ယေရူဆာလဲမ် အီ မုး မိူင် အာဒါဝိတ်။ န့ ဟဲ့ ဝီ လုဝ် မ့ပြာယ် ဘဲန် ပ့လုဝ့် ဘဲန် ပ့လုဝ့်။ ဘေ ဒီ ဘော တဲး အိုမ် တး ကာဇု ခဲင် အိုမ် ဒိုင် အီ ကွယ် နာ တေတ့်။

10 ဒေါ အန် တီ ဘေ ဒီ ဘော ဝီ တိး ဒီ ယွတ် ကာင် ခဲင် မိူင် ယေရူဆာလဲမ်။ ဘေ ဒီ ဘော ဝီ ပျာတ့် ကာင် ဂေ တီ၊ ဝီ ဒိုဝ်း တး မာဝ် ဂေ တဲး ဘေ ပွိုန် ဒီ မ့ပြာယ် ရဲင် မိူင်။

11 ဒီ ကာတဲ ရဲင် မိူင် ဘော အာ ဘ့လာက်၊ ဘေ ဒီ ဘော ဂိုဝ်း အိုမ် ဒိုင်၊ တဲး ဘေ ပွိုန် ဒီ ဂဲပ် အုန် အိုမ် အီ လှဲ တး ဒီ အိုမ် ဒိုင် ဘူင့် ဘြိမ် တွိုန်။ ဘေ ပီ ဘော ဟဲ့ ဘူင် ပါယ် တီ မိူဝ်၊ ဘေ ယီ တူ မာတ် တူ ဆွုင် ဒါ ကာညာ အီ ဟဲ့ ဒဲ အုန် မိူင် တီ။ ဘေ မိူဝ် တူ ရုဝ်ဆေ ဒါ ကာညာ အီ ဟဲ့ ခြာမ် ဒီ ဘူင် လွင် အန် တီ ဆိန့် အာတ့် နီ။

12 ဒေါ အန် တီ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ ဒဲ့ ဘေ၊ တဲး ဘေ တး ယာမ် တး က့လိုဝ်၊ တဲး ဘေ ဂါ့ ဝဲန် ဘော ဟိုက် ဂိန့် ဘေ၊ စှိုပ် ဘော ခြိုင် စာန်။

13 ပီ ဘော ဟဲ့ ပါယ် တီ မိူဝ်၊ ဘေ ယီ ဝီ ဘူင် ဘ့လွယ် ဘော ဘျုဝ် ဘျုဝ် ကျဝ် ကျဝ်။ ဘေ ဘော ဝီ ငဝ်း မာမက် ဂေ မာဘူ၊ ဝီ ဟူမ် ယင်၊ ဒျီင် အိုမ် မာငုန်။ ဘေ ဘော တဝ်း၊ “ဟူမ် ဖဲ ဖဲ၊ ဒျီင် ဖဲ ဖဲ၊ ခဲညှာ ယုဝ် အေ ပီ ဒီ ယမ်။”

14 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဝီ တဝ်း ဒီ အုဝ်၊ “မှာပ် ဘေ တီ အုဝ် တူ ဂဝ်း ဝဲန်၊ တဲး န့ ကော ဇမ် ပန် ဒီ ယမ် တူတ့် ဘေ။”

15 ဇဝ်ဖြာ အီ အိုပ် တူတ့် ဒွန် မျုဝ်၊ အန် ဝီ စ်ု အုဝ် ဟာဝ် ဒူင် ကွယ် အာဆေဘာနာ အီ အိုပ် ကြုဝ်ကြာမ် ခဲင် ဟုဝ် ခုန်ဒီခမ်၊ တဲး အုဝ် ကာလာင် ဒီ အန် တဝ်း၊

16 “မဲ ထာင် မဲ မုး အာဆေ။း အာဆေ မုး ဝေါဝဲ မဲ အီ ကွယ် ဒီ နီ၊ တဲး မဲ ဂိုဝ်း ကာဒဝ် ဘာရေဝ် အာဒါ မဲ ဒီ နီ၊ တဲး မဲ ဘော ဘ့လုဝ်း ဒါအာင် မာဝ် အီ ကွယ် ဒူင် စာ နီ၊ ဘူင် တဲး န့ ဝီ ဘဲန် ဒူင် အွုန် မဲ။း

17 ဘ်ု မဲ ယွတ်၊ မဲ အီ ဟဲ့ မိုဝ်း ပွုန် ဂေ ဟဲန့်၊ ဇဝ်ဖြာ ဒီ ဟုဝ် လေး မဲ၊ ဘူင် တဲး န့ ကာဆဝ် ဒီ မဲ။

18 ဇဝ်ဖြာ ဒီ ပါ ရိတ် မဲ ဘော မာဝတ် မဲ ပီ အီ မာဝတ် ဘ့လေ အာပိူ့။ ဇဝ်ဖြာ ဒီ ဝိုန့် ဟာဝ် မဲ၊ တဲး မဲ ဇမ် ခဲင် မိူင် တာင်၊ မိူင် ကာဝဝ်း။ မဲ ဒီ ဘော ယမ် ခဲင် မိူင် တီ ခူပ် လက်လဝ် မဲ ပဲ့ ဟဲ့ ပီဖုင် မဲ ဒီ မဲ တွိုန်။ ကူပ် ပီ ပါယ် မဲ တီ၊ ဘော ဒူအီ အီ ကွယ် ခဲင် ဟုဝ် ဒါ ကာညာ မဲ ဒီ မွှိုမ် ဆာယ်။

19 ဇဝ်ဖြာ ဒီ ဘ့လွာ့ စုဝ်း မဲ၊ ဒိုဝ်း ဝဲန် ဘော ပွုန် မဲ။ မဲ အီ ဟဲ့ ဒွိုမ် ကွယ် ဒူင် စာ၊ မဲ ဒီ ဝီ စုဝ်း လူင်။

20 ဆီငဲ အန် တီ အုဝ် ဒီ ဒဲ့ တး ဒဲစေန့် အုဝ် အီ စိူဝ် အာအေယာခိမ် အီ မုး ဂွန် အာဟီလာခီ။ 21 အုဝ် ဒီ ဝီ ဒိုဝ်း ဆီတုဝ် တုန် မဲ ဘော ဆဲ့ မဲ၊ ဝီ စှိုပ် ဒီ အန်၊ တဲး န့ ဘဲန် ပ့လူမ် ဘဲန် ဟဲန့် ဒီ အန်။ အုဝ် ဒီ ဒိုဝ်း ပွုန် မဲ၊ ဝီ အာပ် ဒီ အန်။ အန် ဒီ ဝီ ဘဲန် ပီ ဂုန့် ဂေ အီ ကွယ် ခဲင် မိူင် ယေရူဆာလဲမ် ဘော ခဲင် မိူင် ယူဒါ ဘောကာဂ့လျီတ်။ 22 အုဝ် ဒီ အာပ် တဲး အန် မိုဝ်း ပွုန်၊ တဲး အန် ဘဲန် ခုန်ဒီခမ် ခဲင် လှုက်လှာန် အာဒါဝိတ်၊ တဲး န့ ပီ အုဝ် ဒိုဝ်း လခတ်ဆဝ် ပဲ့ ဟဲ့ ဒွိုမ် ဒွါ အုဝ် ဒီ ခုန်ဒီခမ် အာဒါဝိတ် တွိုန်၊ ဝီ ဒွါ ဒီ အန်။ ခဲ့ ပီ ဝိုဝ်း အန်၊ အာဝ် မိုဝ်း အီ ပွိုန် ကာဘိတ်။ ခဲ့ ပဲ့ ဟဲ့ ကာဘိတ် အန်၊ အာဝ် မိုဝ်း အီ ပွိုန် ဝီ ဝိုဝ်း။ 23 အုဝ် ဒီ တဲး အန် ကွယ် မန် ဆီချာ ဆေဆေ၊ တဲး န့ ပီ မာဟိန် အီ ဒွက် ဒီ ရွင့် အီ ဟဲ့ မန် ဆီချာ။ ခဲင် ခြိုဝ် အန်၊ အန် ဘော မိုဝ်း အာဖုင် ဆာရေ ဒီ အာတ့် အီ ဟဝ်။ 24 ဂေ ဘီနွင် ဝေါဝဲ အန် ဘော ဂေ အီ ညှိုမ် ဘိုင် အန် ဘောကာဂ့လျီတ် န့ ဘော ပီ ဂေ တဲး အန် ပး ကြုဝ် အီ စန် ကာဆဝ်။ န့ ပီ ဘော အီ ဒိုဝ်း ကွက့် အိုမ်၊ ဒိုဝ်း ဆီလယ့် ဂေ ကာလုဝ့် ဟွယ် အုန် ဒီ မာဟိန် အီ ဟဲ့ ဒွက် ဒီ ရွင့် တွိုန်။

25 ဟဲ့ ဟွတ့် ပန် တီ မာဟိန် ပဲ့ ဟဲ့ ဒွက် အုန် ဂေ ဒီ ရွင့် အီ ဟဲ့ မန် ဆီချာ တီ၊ အန် ဒီ ဘော လုတ် စုဝ်း အူ ဇေန့်။ ပါယ် တီ ကြုဝ် ပီ ဟွယ် အုန် ဂေ ဒီ အန် တွိုန် ဘောကာဂ့လျီတ်၊ န့ ဒီ ဘော စှိုမ် တူတ့်။” ဇဝ်ဖြာ ဟဲ့ ကာလာင် ပါယ် တီ။