1 အာနီ ဇဝ်ဖြာ ဝီ ဘျ အီ ဒီ ပါယ် လွင် မိူင် ထူရုဝ်။ အန် တဝ်း၊ “အိုယ် ဘေ အီ ပဝ့် ရိုဝ် ဆင်ဖုဝ် အီ ကွယ် ဒီ မိူင် ထာဆိတ် အီ ဟာဝ် ဝိဝ် ဟာဝ် ဝေန့် ခဲင် အိုမ် နမ်မုက်ဆာရာ၊ တဲး ဘေ ယာမ် ဘော ငှုန်။ ခုဝ်၊ မိူင် ထူရုဝ် ဟဲ့ ဟွတ့် ရာမ်။ ဘော ကာင် ဘော ဒူင် ချ ရိုဝ် ဆင်ဖုဝ် အာဝ် ဟူ မိုဝ်း။ ဂေ ဒူအီ အီ ဟာဝ် ဝိဝ် ဟာဝ် ဝေန့် ခဲင် အိုမ် နမ်မုက်ဆာရာ ဂေ ဟဲ့ ယိုဝ် လွင် အန် တီ ဒီ ဒူအီ အီ ကွယ် ဒဲင် ဂုန် အိုမ် ခူဖြုဝ်။

2 အိုယ် ဘေ ဒူအီ အီ ကွယ် ဘာင် အိုမ် ခဲင် မိူင် ဆီဒူန် ဘော ဘေ အီ ဟဲ့ ကာစိုဝ်း ကာယွင့် ကြုဝ်၊ တဲး ဘေ ကွယ် နှိမ်၊ တဲး ဘေ ကွယ် ဆီတွင့်။ ဘေ အီ ဟဲ့ စ်ု အီ ဟဝ် ဟာဝ် ကာလုဝ်း အိုမ် နမ်မုက်ဆာရာ ဘေ ဟဲ့ စှိုမ်။

3 ဘေ ဟဲ့ တဲး အီ ဟာဝ် စိုဝ်း ငှုဝ် ပီ ဆမ် ဂေ ဒူအီ အီ ကွယ် ခူပ် ဘ့လဲင် ဆီဟုဝ်ရာ ဘော ခူပ် ဘ့လဲင် နီလာ။ ဟဲ့ ဟွတ့်၊ ဘေ ဟဲ့ ဝီ ယွင့် ဒီ ဒူအီ အီ တး ဒွန် မာန် ဒွန် မိူင်။

4 အိုယ် ဘေ ဒူအီ ခဲင် မိူင် ဆီဒူန်၊ တဲး ဘေ ဆာယ် အီ ကူပ် ဟဲ့ စှိုမ် တူတ့် ဘေ ဒွန် မျုဝ်။ န့ ပီ အိုမ် နမ်မုက်ဆာရာ ဘော မိူင် အီ ကွယ် ခူပ် အိုမ် တီ အီ မိုဝ်း ပွုန် တာင် ဟဲ့ တဝ်း ဒီ ဘေ၊ ‘အုဝ် တူ ဒွိုမ် မိုဝ်း ဂွန် ခေါ အူ ဇေန့်။ အုဝ် မိူဝ် တူ ဒွိုမ် လိုမ်လာ ဂွန် ကာညူမ် ဂေ ဂွန် ဒီဘျာ ဒေါ မှဝ်။’

5 ဂေ ဒူအီ ခဲင် မိူင် အဲဂိုပ်၊ ဂေ ဒီ ဘော ကာစွာ ကာပိုန့် ဒေါ ယိုဝ် ဂေ လွင် ဟဲ့ လိုဝ် စှိုမ် ဒူအီ ခဲင် မိူင် ထူရုဝ်။

6 အိုယ် ဘေ ဒူအီ အီ ကွယ် ခူပ် အိုမ် နမ်မုက်ဆာရာ၊ တဲး ဘေ ယာမ် ဘော ငှုန်။ တဲး ဘေ ကာလုဝ်း ဟာဝ် ဒီ မိူင် ထာဆိတ်။

7 န့ တူ မွှိုမ် ညှိုမ်၊ မိူင် ထူရုဝ် တီ ဟဲ့ ဒွိုမ် မုး မိူင် အီ ဟဲ့ တဲး ဒူအီ ဘျုဝ် ဒါခိုယ်။ န့ ဘော မုး မိူင် အီ ဟဲ့ ကွယ် ဆီချာ ဆေဆေ ဆိန့် ဒေါ မွိုန်၊ အီ ဟဲ့ ဒွိုမ် တဲး ဒူအီ အန် ဟာဝ် ဒွန် နာ ဒွန် ပ့လုဝ့် ဒဲင် ကာဒါယ်။

8 န့ မိူဝ် တူ မွှိုမ် ညှိုမ် လွင် မိူင် ထူရုဝ် ဟဲ့ ဇမ် ဒုက် တီ။ ဂေ ခဲင် မိူင် တီ ဟဲ့ ဒွိုမ် ဒွါ မင်ဂိုမ် ဒီ အီ။ ဂေ ဟဲ့ ဒွိုမ် တဲး ဂေ ဒါ ကာညာ ကြုဝ် ဘဲန် ပီ ဂွန် ခုန်ဒီခမ် အီ မိုဝ်း ဆာရေ လွှိုမ် ဒူအီ ဟဝ် ဒဲင် ကာဒါယ် နီ။”

9 ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ ခြာမ် ဒီ ဘူင် ပါယ် တီ။ အန် ဒီ ပျာတ့် ဝဲန် ခဲ့ ကွယ် မျုဝ် အီ မိုဝ်း ဆာရေ ဘော ဂေ ဒါ တာင် ပီ ရုဝ်ဆေ ဂေ ဒူအီ ဒဲင် ကာဒါယ် နီ၊ တဲး ဂေ စှိုမ်။

10 အိုယ် ဘေ ဒူအီ ဘော ရဝ် ဘော ကာင် အီ ကွယ် ခဲင် မိူင် ထာဆိတ်၊ တဲး ဘေ ရန့် မာန် ခဲင် မိူင် ဘေ၊ တဲး န့ ပီ ပီ ဘူင် ဂေ ခူပ် ဘ့လဲင် နီလာ တွိုန်။ ခုဝ်၊ အာဝ် ဟူ မိုဝ်း ဒူင် ဒီ ချ ရိုဝ် ဆင်ဖုဝ် ဘေ။

11 န့ ပီ အန် ဇဝ် ဟဲ့ ဘ့လး ဒဲ အန် ဒဲင် အိုမ် နမ်မုက်ဆာရာ။ အန် ဘော ဒီယုး မာန် မိူင် တဲး န့ ဒီယေန့်။ ဇဝ်ဖြာ ဝီ ဒွါ အာမိင် လွင် ဒူအီ ခဲင် မိူင် ကာနန့်၊ တဲး ရန်ဆူ တး ပျာတ့် ဒွန် ပ့လုဝ့် အီ ဟဲ့ မန် ဆီချာ။

12 ဇဝ်ဖြာ ပီ ဝီ တဝ်း၊ “အိုယ် ဘေ ဒူအီ ခဲင် မိူင် ဆီဒူန်၊ ဘေ အီ ပီ ဒီဘျာ အီ ဟဲ့ ခမ် ပီ ခါနှာပ် အီ၊ ဘေ အာဝ် ဟူ ဘျုဝ် ဒါခိုယ် ဒေါ မှဝ်။ ဘေ ပီ ဘော ဟဲ့ တဝ် ဟာဝ် ဇမ် ဒီ မိူင် ခူဖြုဝ် မိူဝ်၊ ဘေ ယီ တူ ပွိုန် ဒီ ကွယ် ဆီချာ ကွယ် ယေန်။”

13 တဲး ဘေ လှုဝ်း ဂေ ဒူအီ အာမျုဝ် ကာလာဒေ။ ဂေ အာဝ် ဟူ ကွယ် ခဲင် မိူင် ဂေ။ ဂေ ဒူအီ အာဆူရီယာ ဟဲ့ ဘူင် တဲး န့ ဝီ ဘဲန် ဒူင် ကွယ် မာဒုဝ် ပြဲ ဟာယ်။ ဂေ ဟဲ့ ဆမ် ကာစှူင့် စာ နာ ရေတ့် မိူင်၊ တဲး ဂေ နပ် မှဝ် ဂေ ဒီ ပါယ် ဒီ လိုပ်။ ဟဲ့ ဟွတ့်၊ ဂေ ဘော ပျာတ့် ဝဲန် တူတ့် ဒွန် မျုဝ်။

14 အိုယ် ဘေ ဒူအီ အီ ပဝ့် ရိုဝ် ဆင်ဖုဝ် အီ တး ခဲင် မိူင် ထာဆိတ်၊ တဲး ဘေ ယာမ် ဘော ငှုန်။ ခုဝ်၊ မိူင် တာင် ပီ ဘိုင် ဘေ ဟဲ့ ဟွတ့် လိုဝ်။

15 ဒေါ အန် တီ ဂေ ဒီ ပိဝ် မိူင် ထူရုဝ် အာဒါ ဘူ ဂိုဝ် ဆီနမ်။ န့ ဒီ မုး စုဝ် ခုန်ဒီခမ် အာဒါ အူ စုဝ်။ ဆေ ဟဲ့ ဟွတ့် ပွုန် ဘူ ဂိုဝ် ဆီနမ် တီ၊ န့ ဒီ ဘဲန် ခဲင် မိူင် ထူရုဝ် ပီ မှုဝ် ပီ တဝ်း ဂေ ယာ မာလမ်။

16 ဂေ ဘော တဝ်း၊ “အိုယ် ယာ မာလမ် ပဲ့ ဟဲ့ ပိဝ် အီ ဟဝ်၊ တဲး မဲ ဒိုဝ်း ဒိင် မဲ၊ ဝိန် ဒီ ဘး ခဲင် မိူင်၊ တဲး န့ ကော ကာလတ့်။ တဲး မဲ ပီ ဒါခိုယ် ဘော မဲင် မဲ၊ တဝ်း မှုဝ် ကိူန် ကိူန်၊ တဲး ဂေ အီ ဟဝ် ဝီ လှုဝ်း မဲ။”

17 ပန် ဒီ ဟွတ့် ဘူ ဂိုဝ် ဆီနမ် တီ၊ ဇဝ်ဖြာ ဒီ ဝီ တး လဲ၊ တး စ်ု ဒူအီ ခဲင် မိူင် ထူရုဝ်။ အန် ဒီ တဲး ဂေ ဝီ ကာစိုဝ်း ကာယွင့် ပီ ဘြိမ်။ ဂေ ဒီ ဘော ဝီ ပွိုန် ရုး ဇာင် ဂေ ဒီ ဒူအီ ဒဲင် ကာဒါယ် နီ အီ ပီ ရုး ယာ မာလမ် အီ လာယ် လုတ့် လာယ် လာယ် ခဲင် မိူင် ဒွန် မိူင်။ 18 ဂေ ဒီ ဘော ဒိုဝ်း ရုး ပီ ပွိုန် ဂေ တီ၊ ဝီ အာပ် လှူ ဒီ ဇဝ်ဖြာ။ ဂေ မိူဝ် တူ ဂဲပ် အုန် မာဆေ။ ဂေ အီ ကွယ် ကာဒိုက် ကာဒဝ့် ဒီ ဇဝ်ဖြာ ဒီ ဝီ ဒိုဝ်း ရွိုန် ပီ လှူ ဂေ တီ၊ ဝီ စိုဝ်း ပီ ဒီ ဟူမ်၊ စိုဝ်း ဘော ခြိုင် ပီ လုဝ် ဂေ၊ တဲး ဂေ မိုဝ်း ဒီ ဟူမ် လိုင်၊ တာ လိုင်။ ဇဝ်ဖြာ ဟဲ့ ဘျ ခဲ့ တီ လွင် မိူင် ထူရုဝ် ဂါယ် မိူင် ဆီဒူန်။