1 တဲး ဘေ ယွတ်၊ ဇဝ်ဖြာ ဒီ ဘော ပျာတ့် တဲး ကာဒါယ် နီ လိုဝ် ရာမ် တူတ့်၊ တဲး န့ ပီ အန် ကာဘ့လျီ့ ဝဲန်။ ဒူအီ ဘောကာဂ့လျီတ် ဒီ ဘော ဘုင်ဘြတ် ဟာဝ် ဒွန် ဘ့လာက်။

2 ခဲ့ ကွယ် ဂေ ဒူအီ၊ ဘော မုး ဒါ အီ လှူ ဒီ ဇဝ်ဖြာ၊ ဘော မုး ဒူအီ ရဝ် ဒူအီ ကာင်၊ ဘော မုး ဒါ ကာညာ၊ ဘော မုး မှာယ် အီ၊ ဘော မုး ယာ ကာညာ၊ ဘော မုး ဒဲစေန့် ယာ ကာညာ၊ ဘော မုး ဒူအီ အီ ယွင့် ကြုဝ်၊ ဘော မုး ဂေ အီ ထုက် နီ အီ ဟဝ်၊ ဘော မုး ဂေ ဒါ ကာညာ နီ၊ ဘော မုး ဂေ ဒူအီ ဂိန် ဒူအီ ခြမ်၊ ဂေ ဘောကာဂ့လျီတ် လုဝ် ခမ် ဒုက် အီ မုး အူ မျုဝ်။

3 ကာဒါယ် နီ ဒီ ဘော ကာပျာတ့် လိုဝ် တူတ့်။ ခုဝ်၊ ဇဝ်ဖြာ ဟဲ့ ဟွတ့် ကာလာင် အုန် ပါယ် တီ။

4 န့ ပီ ကာဒါယ် ဒီ ယာမ် ဘော ဟျီ့ ကာဟဝ်း။ န့ ဘော ပီ ဒူအီ ယာမ် ကူပ် ဟဲ့ မိုဝ်း ဒူအီ ယမ်။ ဒွန် အီ ဒီ ဘော ဒီလှး န့စမ်၊ တူ မိုဝ်း ပ့လူမ် ဂေ ဟဲန့်။ ဒွန် မျုဝ် ဒဲင် ကာဒါယ် ဒီ ဘော ဟျီ့ ဒီလှး။

5 ဒူအီ ဘော မာန် ဘော မိူင် ဟဲ့ ဘူင် တဲး ကာဒါယ် ကာဒါတ့် ကူပ် ဟဲ့ လှိုဝ် ဂေ ဒါရာ ဇဝ်ဖြာ။ ဂေ ဟဲ့ ဝဲန် ဂြုဝ်း ပဲ့ ဟဲ့ ဒမ် အုန် ဇဝ်ဖြာ။ ဂေ မိူဝ် တူ ခမ် ပဲ့ ဟဲ့ ကာဆဲန့် ဇဝ်ဖြာ ဒီ ဂေ ဒူအီ ဒွန် ဇာတ် ဒွန် ဘာန်။

6 ခုဝ်၊ ဇဝ်ဖြာ ဟဲ့ ဒိူင် ကာဒါယ် တီ၊ တဲး န့ စှိုမ်။ ဂေ ဒူအီ ဘော မာန် ဘော မိူင် ဘော လုဝ် ဝီ ခမ် မှာပ် ပီ ဘူင် ဂေ။ ဂေ ဒီ ဘော ကာဆိုမ် ခဲင် ငဝ်။ ဂေ အီ ဆီ ဂိတ်၊ ဂေ ဒီ ဘော ပြေတ့် ကာဆဝ်။

7 ဟေ မာငုန် ဟဲ့ ဟျီ့ ကာဟဝ်း။ ဘ့လေ မာငုန် မိူဝ် အာဝ် ဟူ မိုဝ်း အိုမ်။ ဂေ အီ ဟဲ့ ဒွိုမ် ဘျုဝ် ဘျုဝ် ကျဝ် ကျဝ် တွိုန်၊ ဂေ ဝီ မိုဝ်း မီ အီ ဒုက် အီ ညှာပ် ဒီ နဝ်း။

8 ဟမ် ဒါခိုယ် ပီ ဒွယ် ပီ ဘး အီ ဘော ဟမ် ဂြိုင် ဂေ တွိုန် ဟဲ့ ဟွတ့် ဟြာယ် တူတ့်။ ဘော ဟမ် ဒိင် အီ ဒါခိုယ် အာဝ် ဟူ မိုဝ်း။

9 ဂေ အီ တဝ်း မှုဝ် အီ ဘျုဝ် ဒါခိုယ် ဘော ဒျီင် အိုမ် မာငုန် တွိုန် မိူဝ် အာဝ် ဟူ မိုဝ်း။ ဘော အိုမ် ပဝ်း အီ ပြာင် ဟဲ့ ဝီ ဘဲန် အီ ဆွင့် ဒီ ဂေ။

10 မိူင် အီ ဟဲ့ ရာမ် တွိုန် မိူဝ် ဟဲ့ ဟွတ့် လိုဝ် ကာပျာတ့် တူတ့်။ ဒူအီ အီ ဆီ ကွယ်၊ ဂေ ဟဲ့ ဝီ ကာဘိတ် ရိတ် မာလုဝ်း၊ ကွဲ့ တဲး န့ မိုဝ်း အာဆေ အီ ပွိုန် ဒီ လိုပ်။

11 ဂေ ဒူအီ လေး ဟာဝ် ဒူပ် န့တေန့်၊ ဒတ် တဝ်း၊ “မှဝ် အိုမ် မာငုန် ယေ။း” မျုဝ် အီ တဲး ဂေ ဘျုဝ် ဒါခိုယ် ဟဲ့ ကြဲ ဒီ ယူမ်။ ခဲင် မိူင် ဘော မိူင် အာဝ် ဟူ မိုဝ်း ဒူအီ အီ မိုဝ်း နဝ်း ဒါခိုယ်။

12 မိူင် တီ ဟဲ့ ဟွတ့် လိုဝ်။ ဘော မာလုဝ်း မိူင် ဟဲ့ ဟွတ့် ဒး ကာပျာတ့် တူတ့်။

13 လွင် အန် တီ န့ ဒီ ဘော ဘဲန် ဒီ ဒူအီ ဘဲန် ခြိုဝ် ဘဲန် ခြိုဝ် အီ ကွယ် ဒဲင် ကာဒါယ် နီ။ န့ ဒီ ပီ ဒေါ ဟဲ့ ဟွတ့် ဂေ ဘေတ့် ဘ့လေ ဘဲန် မျုဝ် ဘဲန် မျုဝ်၊ ဒေါ ဟဲ့ ဟွတ့် ဂေ ညဲတ့် ဘ့လေ နာမန်၊ တဲး န့ ကော ဟွတ့် ဒွန် ကာဒင်။ န့ ဒီ ဘော ပီ ဒေါ ဟဲ့ ဘေတ့် ဂေ ဘ့လေ မာငုန် အီ ဆီ ဂိတ်။

14 ဂေ အီ ဆီ ဂိတ် ဆီ ကွယ် တွိုန်၊ ဂေ ယီ ဝီ တဝ်း မှုဝ်။ ဂေ အီ ကွယ် ဘ့လာက် နာ ဂေတ့် ဆီငဲ၊ ဂေ ဒီ ဘော ကာလာင် ခဲ့ တာင် ပွုန် ဇဝ်ဖြာ။

15 ဂေ အီ ကွယ် နာ လေး ဆီငဲ၊ ဂေ ဒီ ဘော ကာလာင် ခဲ့ တာင် အာဖုင် ဒင်ခုဝ် အန် ဇဝ်။ ဂေ အီ ကွယ် ခူပ် အိုမ် နမ်မုက်ဆာရာ ဂေ မိူဝ် ဒီ ဝီ အိူပ် မျုက် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။

16 အေ ဒီ ဘော ဝီ ယိုဝ် အီ တး ဒူင် ဆိူတ် ကာဒါယ်၊ တဝ်း မှုဝ် အီ အိူပ် မျုက် အန် ဇဝ်။ ဂေ ဒီ ဘော တဝ်း၊ “တဲး ဝီ အီ မိုဝ်း နဝ်း ဆိူဝ် ဆိူဝ် မှာန် မှာန် မိုဝ်း အာဖုင် ဒင်ခုဝ် တာင်။” ပီ ဘော ဟဲ့ ပါယ် တီ မိူဝ်၊ အုဝ် ယီ မိုဝ်း ဒုက် တာင် ခဲင် နဝ်း။ ပ့လူမ် အုဝ် မိူဝ် ဟဲ့ ကြဲ ဒီ ယူမ် လူင်။ ဂေ ဒူအီ အီ ဆီမာ ကာလုဝ် မိူဝ် ဟဲ့ ဝဲ ကာလုဝ် ဆေဆေ။ ဂေ အီ တူ ဒူပ် နာ မုး နာ မှာန် မိူဝ်၊ ဂေ ပီလွှက့် ဒီ အီ ဘော ပုဝ်း အီ ဆေဆေ။

17 အိုယ် ဘေ ဒူအီ ဒွန် အီ ဒဲင် ကာဒါယ်၊ တဲး ဘေ ထူမ် ဂြုဝ်း အုဝ်။ ဘေ ဒီ ကာဒုး ဒုက် အီ မွှိုမ် ယုဝ် အီ ပီ ကာဒဝ် ကာဒါယ် ဘော ယွတ့် ဂေ ခိူမ်။

18 ဂေ ဒူအီ အီ ဆီ တဝ် ဒေါ ယိုဝ် ဂေ အီ မွှိုမ် ယုဝ် ကာဆဝ်၊ ဂေ ဒီ ဝီ စုဝ်း ခဲင် ကာဒဝ် ကာဒါယ် တွိုန်။ ဂေ အီ ဂျုဝ်ဂျာ ဒီ လေး ခဲင် ကာဒဝ် ကာဒါယ် တီ၊ ဂေ ဒီ ဝီ ဟာဝ် ခြေ ယွတ့် ခြေ ခိူမ် တွိုန်။ ဒဲင် တီ၊ န့ ဒီ ဘော မိုဝ်း ဂ့လာယ် အီ စုဝ်း ခဲင် ဂါင်ဟြာဝ်၊ စုဝ်း ဟဲန့် ကာဆဝ်။ ဘော ဒင် ကာဒါယ် ဒီ ဒီယုး ဒီယေန့်။

19 န့ ဒီ ဘော ဒီယုး ကာဆဝ်၊ တဲး ကာဒါယ် ကော ဒး မာတုး ကာလာတ့် တူတ့်။

20 န့ ဘော ပီ ကာဒါယ် တီ ဟဲ့ ကာကျီင် ကာကေး ပီ ဒူအီ ယိုတ့် ပဝ်း။ အန် ဒီ ဘော ဒီယုး ဒီယေန့် ပီ ထိုပ် အီ တူ မန်။ န့ ပီ ကာဒါယ် တီ ဟဲ့ စန် ကာဆဝ် ကူပ် မှာပ် ပီ ဘူင် ဒူအီ။ အန် ဟီ ကေး၊ အန် မိူဝ် အာဝ် ဟူ ဝီ ပွိုန် ဒီ ယိတ့် ဒေါ မှဝ်။

21 ဒေါ အန် တီ ဇဝ်ဖြာ ဒီ ဘော ဒမ် မှာပ် ဒီ ဂေ အီ အိုပ် ခဲင် ဂါင်ဟြာဝ် ဘော ဂေ ခုန်ဒီခမ် အီ အိုပ် ဒဲင် ကာဒါယ် နီ။

22 ဇဝ်ဖြာ ဒီ ဘော ဒိုဝ်း တး ကာဇု ဂေ တီ၊ တဲး န့ ပီ ဂေ စုဝ်း ကာပိုမ် ခဲင် ကာဒဝ် ကာဒါယ်။ အန် ဇဝ် ဒီ ဘော ခြွင့် အုန် ဂေ၊ တဲး န့ ကော လှေန့်၊ တဲး န့ ကော ဇမ် ပန် ဒီ ဆုင်ဖျာတ် အန် အာမူ ဂေ။

23 ဒေါ အန် တီ မာဂျီန် အာဝ် ဟူ ဘ့လာင်။ န့ ဒီ ပီ နာ ဒူအီ အီ ဟဲ့ မှူင်။ ဆီငဲ မိူဝ်၊ အာဝ် ဟူ ဘ့လာင်။ န့ ပီ ဒူအီ အီ ဟဲ့ မွှိုမ် ဆာယ်။ ခုဝ်၊ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ အိုပ် ဒီ နွန် ဇီအူန် ဘော ခဲင် မိူင် ယေရူဆာလဲမ်။ ဟဲ့ ဟွတ့်၊ ဂေ ဒါ တာင် အီ ကွယ် ဒီ အာတ့် အန် ဇဝ်၊ ဂေ ဒီ ဘော ယိုဝ် အာဖုင် ဒင်ခုဝ် အန်။