1 အိုယ် မဲ ဇဝ်ဖြာ၊ မဲ မုး ဇဝ်ဖြာ ပီ ကြိုပ် အုဝ်။ အုဝ် ဒီ အိူပ် မျုက် မဲ ဇဝ်။ အုဝ် အိူပ် ခဲ့ တာင် ပွုန် မဲ ဇဝ်။ မဲ ဇဝ် ဟဲ့ ဘူင် အီ မွှိုမ် အာမ် ကာဆဝ်။ မဲ ဇဝ် ဘော မိုဝ်း နဝ်း ဆိူဝ် နဝ်း မှာန် ဘော ဘူင် ဒူပ် ခဲ့ ပဲ့ ဟဲ့ ခြာမ် မဲ ဒီ ဘူင် ဆိန့် ဒေါ မွိုန်။

2 မဲ ဇဝ် ဟဲ့ ဘူင် တဲး မိူင် တာင် လိုဝ် ကာပျာတ့်၊ တဲး မိူင် အီ မန် ဆီချာ ကာဘက် လိုဝ် တူတ့်။ ဟုဝ် ခုန်ဒီခမ် ပီ ဒါင် ဂေ ရန်ဆူ မဲ ဇဝ် မဲ ဟဲ့ တဲး န့ ဟြာယ် တူတ့်၊ ကွဲ့ တဲး ဂေ ပွိုန် ဒီ ဝီ ဆမ် ဒေါ မှဝ်။

3 ကူပ် ဟဲ့ ဘူင် မဲ ပါယ် တီ၊ ဂေ ဒူအီ အီ ကွယ် ခဲင် မိူင် အီ မိုဝ်း ပ့လူမ် တာင် ဂေ ဝီ အိူပ် မဲ ဇဝ်။ ဂေ အာမျုဝ် ဒူအီ ဟာယ် ဂေ ယီ ယုဝ် မဲ ဇဝ်။

4 ခုဝ်၊ ဂေ ဒူအီ ဒုက် ဒူအီ ဂိန် ဂေ ဝီ တဝ် ဟာဝ် ဘိုင် မဲ ဇဝ်၊ တဲး ဂေ ဝီ ပွိုန် ဒီ ကွယ် ဒါခိုယ်၊ အာဝ် ဟူ လုဝ် ယုဝ် မာဆေ ဒေါ မိုဝ်း အာခြာဝ် ဒုက်။ မဲ ဇဝ် ဘော ဂွင့် ရဲ ဂေ၊ တဲး န့ ပီ ဂေ ဟဲ့ လွတ် ဒီ ခုန် တာင် ဘော ဂ့လာယ် တာင်၊ တဲး န့ ဘော ပီ ဂေ ဟဲ့ ပွိုန် ဒီ ကွယ် ဒူင် အပ်၊ ကွဲ့ တဲး န့ ဆောဒါတ် ကာဆဝ် ဒီ ဂေ။ ဂေ ဒူအီ ဟာယ် ဒူအီ မိူက် ဂေ နပ် ဒီ ဘူင် ပီ ဂ့လာယ် ဂေ ဘျြီ အီ စုဝ်း အာခြာဝ် ဂတ်။

5 န့ ဘော ပီ ဘော ဆောဒါတ် အီ ဆွိုန် ဒူင် ကာဒါယ် ကာဟဝ်း။ အီ ဆီနန် ဆီနိူင် ပီ ဘူင် ဒူအီ ဟဝ် မဲ ဇဝ် ယီ ဝီ တဲး န့ ယေန်။ ဘော မှုဝ် ပီ တဝ်း ဂေ ဒူအီ ဟာယ် ဒူအီ မိူက်၊ မဲ ဝီ တဲး န့ ယေန်၊ တဲး န့ ဟြာယ် ပီ ဆောဒါတ် ဟဲ့ ဟြာယ် ဒေါ ဝီ မိုဝ်း န့အု ဂေ ဂ့လာယ်။

6 ဒဲင် နွန် တီ ဇဝ်ဖြာ အီ အိုပ် တူတ့် ဒွန် မျုဝ် အန် ဒီ ဘော ရဲန် ဘ့လွယ် တာင်၊ ဟျီင် ဂေ ဒူအီ ဘောကာဂ့လျီတ်။ အန် ဇဝ် ဒီ ဘော ဒိုဝ်း ပီ ဒီ ဟူမ် အီ မွှိုမ် အီ ဆီငဲး ဘော အိုမ် မာငုန် အီ မွှိုမ် အီ ဆီငဲး လွှိုမ် မျုဝ် ဟဝ်၊ ဝီ ဟျီင် ဂေ ဟူမ်။

7 ဒဲင် နွန် တီ အန် ဇဝ် ဒီ ဘော ဒိုဝ်း ဝဲန် အီ ဒုက် အီ ညှာပ် ဒီ နဝ်း ဂေ အီ ပီ ဘိက် အီ ကာမှုဝ့် နာ ဂေ။ အန် ဒီ ဘော ဒိုဝ်း ဝဲန် အီ ပ့လိုက် ဂေ ဒူအီ ဒွန် မျုဝ်။

8 ဇဝ်ဖြာ အီ အိုပ် တူတ့် ဒွန် မျုဝ် ဒီ ဘော ဒိုဝ်း ဝဲန် ဇဝ် မာရာန၊ ကွဲ့ တဲး အီ ယမ် ဒေါ မှဝ်။ အန် ဇဝ် ဒီ ဘော ခုတ် ဝဲန် အိုမ် ငါယ် ဂေ ဒူအီ ဒွန် အီ။ အန် မိူဝ် တူ တဲး အီ နဲန ဂေ ဒူအီ ပီ အိုပ် အန်၊ ကွဲ့ တဲး န့ မိုဝ်း အာဆေ ဒဲင် ကာဒါယ် အီ ပွိုန် ဒီ ခါနှာပ် ဂေ။ ဇဝ်ဖြာ ဟဲ့ ကာလာင် အုန် ပါယ် တီ။

9 ဒေါ အန် တီ ဂေ ဒူအီ ဒွန် အီ ဒီ ဘော တဝ်း၊ “အန် ဇဝ် မုး ဇဝ်ဖြာ ပီ ကြိုပ် အေ။ အေ ဟဲ့ ဘိုင် အန် ဇဝ်၊ တဲး အန် ချွတ် အေ။ အန် ဇဝ် မိူဝ် မုး ဇဝ်ဖြာ ပီ နှဝ့် န့ဒဝ့် အေ၊ တဲး အေ ခူယ် ဒါခိုယ် ကူပ် ဟဲ့ ချွတ် အန် ဇဝ် ဒီ အေ။”

10 ဇဝ်ဖြာ ဒီ ဘော ဂွင့် ရဲ နွန် ဇီအူန်။ အီ မုး ဒူအီ ခဲင် မိူင် မုဝ်အာပ်၊ ဂေ ယီ လုဝ် ခမ် အီ ညဲတ့် ဂေ၊ တဲး န့ ပီ အီ ညဲတ့် ဟျြီင် ခဲင် ကာဒဝ် အျီင် မက်။

11 ဂေ ပီ ဘော ဘျာက် ဒီ လေး၊ တဲး န့ ပီ ဒူအီ အီ ဂျုဝ်ဂျာ ဒီ ဝါယ် အိုမ် မိူဝ်၊ ဇဝ်ဖြာ ယီ ဒီ တဲး ဂေ စုဝ်း ဒူင် တျီမ်။ အန် ဒီ ဒိုဝ်း ဝဲန် တူတ့် ဒွန် မျုဝ် ပီ ဂျုဝ်ဂျာ ဂေ ဒီ ဘူင် ဘော ခဲ့ ကျ ဂေ။

12 အန် ဇဝ် ဒီ ဘော ပျာတ့် ဝဲန် ဟုဝ် စာ ဘော ရဲင် မိူင်၊ တဲး ဂေ စုဝ်း၊ ဘုင် ဘြတ် ဒွန် ပ့လုဝ့်၊ ဝီ ဘဲန် တူတ့် ကာပုး။