1 ဒေါ ဆီငဲ အန် တီ ဂေ ဒူအီ ဒီ ဝီ တဝ်း မှုဝ် ခဲင် မိူင် ယူဒါ ပါယ် နီ။ ဂေ တဝ်း၊ “မိူင် အေ ဟဲ့ မုး မိူင် အီ မန် ဆီချာ။ ဇဝ်ဖြာ ဒီ ဂွင့် ရဲ မိူင် အေ၊ တဲး န့ ဆီချာ ပီ မိူင် အီ မိုဝ်း ရဲင် ဂေ ဟုဝ် စာ။

2 တဲး ဘေ ဝိုဝ်း မာလုဝ်း မိူင်၊ တဲး ဂေ ဒူအီ အီ မိုဝ်း နဝ်း ဘွတ် နဝ်း မွှိုမ် ဘော ဂေ အီ မိုဝ်း နဝ်း ဆိူဝ် နဝ်း မှာန် ပွိုန် ဒီ တး လိုပ်။

3 မဲ ဇဝ်ဖြာ အီ မုး ဒါ ကာညာ ယေ မဲ ဒီ ဒွါ နဝ်း ဂတ် ဂျီတ် ဒီ ဂေ အီ မိုဝ်း နဝ်း ဆီ ဘိုင် ဆီချာ မဲ။

4 တဲး အေ ဘိုင် ဇဝ်ဖြာ ဆေဆေ။ အန် ဇဝ် မုး ဒူင် ပွိုန် ဘိုင် ဆေဆေ။ အန် ပီ ဒါအာင် မာဝ် အီ ကွယ် မန် ဆေဆေ။

5 အန် ဇဝ် ဟဲ့ တဲး ဂေ အီ မိုဝ်း နဝ်း ပီခိုက် ဝီ စုဝ်း လူင်။ အန် ဟဲ့ ပျာတ့် ဝဲန် ဘော မိူင် အီ မိုဝ်း ပ့လူမ် ဂေ ဟဲန့် ကိူန်။ အန် မိူဝ် ဟဲ့ ပျာတ့် ဝဲန် ဘော ရဲင် မိူင် ဂေ၊ တဲး န့ ကာပျာတ့် လိုဝ်၊ ဝီ ကွယ် ခဲင် ကာပုး။

6 ဂေ ဒူအီ အီ ဟဲ့ ခမ် ပီ ခါနှာပ် အီ ဟဝ် တွိုန် ဂေ အီ ဂိန် အီ ဖ့လာန် ဂေ ဝီ ပွိုန် ဒီ ညဲတ့် မာဝ် ဂေ တီ။

7 အိုယ် မဲ ဇဝ်ဖြာ၊ မဲ ဟဲ့ စွယ် ဂေ ဒူအီ အီ မိုဝ်း နဝ်း ဆိူဝ် နဝ်း မှာန်။ မဲ ဇဝ် ဟဲ့ ဘူင် တဲး န့တေန့် ပီ ဝဝ့် ဂေ တီ လိူမ် ဆီချာ ဘော ဂ့လင် ကာရမ်။

8 ယေ ဒဲစေန့် မဲ ဇဝ်ဖြာ၊ ဒေါ ဒူပ် ယေ န့တေန့် ပီ အိုင် မဲ၊ ယေ ဘိုင် မဲ ဘော နှဝ့် န့ဒဝ့် မဲ ဇဝ်။ ပီ ဆီ ပွိုန် ယေ ပီ ခြာမ် ယေ န့ ဘော မုး မီ လွင် မဲ ဇဝ်။

9 ခဲင် မှိုဝ် နဝ်း ဖွိုမ် အုဝ် ဘော ဂါဝ် ပွုန် မဲ ဇဝ်။ ပန် ဒီ ဆုင်ဖျာတ် မဲ ဇဝ် အာမူ အီ ဒဲင် ကာဒါယ် နီ၊ န့ ဒီ မာနုဝ် ဂေ၊ တဲး ဂေ နပ် လွင် နာ ဆိူဝ် နာ မှာန်။

10 အီ မုး ဒူအီ တူ မွှိုမ် ဂေ ပီ ဘော ဟဲ့ ပွိုန် ပီ ဂေဇူ မဲ ဇဝ် မိူဝ်၊ န့ ယီ တူ ကာလှုး ဒီ ဂေ နာ မုး နာ မှာန် တီ။ ဂေ ဘော ဝီ ဘူင် နာ ဟာယ် နာ မိူက် ခဲင် မိူင် ဒူအီ အီ ဒူပ် ဒါရာ။ ဂေ မိူဝ် တူ လှုဝ်း တူ ရုဝ်ဆေ ပွုန် မဲ ဇဝ်။

11 အိုယ် မဲ ဇဝ်ဖြာ၊ မဲ ဟဲ့ စုဝ့် ဒဲ မဲ၊ တဲး မဲ ဒမ် မှာပ် ဒီ ဂေ ဒူအီ မိူက် ဒူအီ ဟာယ် တီ။ ဂေ ယီ တူ နပ် လွင် အန် တီ။ တဲး မဲ ဇဝ် တဲး ဂေ ဝီ နပ် ခဲ့ တာင် နဝ်း ရွက့် မဲ ဒီ ဒူအီ ပီ အိုပ် မဲ၊ တဲး ဂေ ဝီ ဆာယ် အီ။ တဲး မဲ ဇဝ် ဒမ် မှာပ် ဒီ ဂေ၊ တဲး န့ ပီ ဂေ ကာဆိုမ် ခဲင် ငဝ်။

12 အိုယ် မဲ ဇဝ်ဖြာ၊ တဲး မဲ တဲး ယေ ကွယ် ဒါခိုယ်၊ ကွယ် ဂတ် ဂျီတ်။ ခဲ့ ပဲ့ ဟဲ့ မိုဝ်း ပဲ့ ဟဲ့ ပွိုန် ယေ တူတ့် ဒွန် မျုဝ်၊ န့ မုး မဲ ဇဝ် အီ ဟဲ့ ဒွါ ဒီ ယေ။

13 အိုယ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် ယေ၊ ယေ ဟဲ့ ဒွိုမ် ခမ် အီ ဟဝ် အိုပ် ယေ။ ပီ ဘော ဟဲ့ ပါယ် တီ မိူဝ်၊ မဲ ဇဝ် အူ ကာဒင် နီ ယီ မုး ဇဝ်ဖြာ ပီ ကြိုပ် ယေ။

14 ဒေါ တီ နီ ဂေ အီ ဒွိုမ် အိုပ် ယေ တီ ဟဲ့ ဟွတ့် ယမ် တူတ့်။ ဂေ မိူဝ် အာဝ် ဟူ ပွိုန် ဝီ ယိတ့် ဝီ အိမ် ဒေါ မှဝ်။ မဲ ဇဝ် ဟဲ့ ပျာတ့် ဂေ၊ ကွဲ့ တဲး န့ မိုဝ်း အာဆေ အီ ဝီ နမ်လှုဝ်း ဂေ ဒေါ မှဝ်။

15 မဲ ဇဝ်ဖြာ၊ မဲ ဟဲ့ တဲး ဒူအီ အာမျုဝ် ယေ ဝီ ဟိူင် ဘြဲ ကိူန်။ မဲ ဇဝ် ဟဲ့ ဝီ ပီဝဝ်း ပီလေး မာန် မိူင် ပီ အိုပ် မဲ ဇဝ်၊ တဲး အာဖုင် ဒင်ခုဝ် မဲ ဇဝ် ဝဲ တာင်။

16 မဲ ဇဝ်ဖြာ၊ ဒေါ ဟဲ့ ခမ် ယေ ဒုက်၊ ယေ ဟဲ့ လှုဝ်း မဲ။ ယေ ဘော ဆာခိုဝ် ဘော ကာလာင် ဒီ မဲ ဒေါ ခမ် ယေ ပီ မာနုဝ် ကာဆဝ် မဲ ဒီ ယေ။

17 မဲ ဇဝ်ဖြာ ဟဲ့ ဘူင် တဲး ယေ ဒဲစေန့် မဲ ကာဒုး ဒီ ယာမ် ရျီင် ပီ အီဘိုန့် အီ ဟဲ့ ဝတ့် ဆဝ် ဒီ မိုဝ်း ဂွန်။

18 ယေ ပီ ဘော ဟဲ့ ခမ် ဒုက် ဇိုဝ် တီ မိူဝ်၊ ယေ ယီ တူ ဂွိုတ် မာဆေ။ ယေ မိူဝ် တူ ပဲ ဒီ ချွတ် ဒူအီ ခဲင် မိူင် ပီ အိုပ် မဲ ဇဝ်။ ရန်ဆူ ယေ မိူဝ် တူ စှိုမ် တူ ပါယ် မှဝ်။

19 ဂေ ဒဲစေန့် မဲ ဇဝ် အီ ဟဲ့ ယမ် တွိုန်၊ ဂေ ဒီ ဝီ ယိတ့် ဝီ အိမ်။ ဒုဝ် ယမ် ဂေ ဒီ ဝီ ယိတ့် ဝီ အိမ်။ အိုယ် ဘေ အီ ဟဲ့ ကွယ် ခဲင် ကာဒဝ် ဘာရေဝ်၊ တဲး ဘေ ဝီ ခူယ်၊ တဝ်း မှုဝ် ဒါခိုယ်။ ပီ ဘူင် မဲ ဇဝ်၊ န့ ဒီ ပီ အိုမ် ဒီငါန် အီ စုဝ်း ဒဲင် ကာဒါယ်၊ တဲး ပေတ့် ဂေ ပြဲ ဝီ ငျီန် ဝီ အိမ်။ မဲ ဇဝ် မိူဝ် ဒီ ဘူင် တဲး ဂေ အီ ဟဲ့ ယမ် အီ ဟဲ့ ကွယ် ခဲင် ကာဒဝ် ဘာရေဝ် ဝီ လေး။

20 ဇဝ်ဖြာ ဒီ ဘော တဝ်း၊ အိုယ် ဘေ ဒူအီ ပီ အိုပ် အုဝ်၊ တဲး ဘေ တး လိုပ် ခဲင် ကာင် ဘေ၊ ဝီ ကာဘိတ် ဆီချာ မာလုဝ်း ကာင် ဘေ။ တဲး ဘေ ကွယ် နှိမ် နှိမ် အာဒါ အူ ကာစန်၊ တဲး နဝ်း ရူ ဇဝ်ဖြာ ကော ဟြာယ် တူတ့်။

21 ခုဝ်၊ ဇဝ်ဖြာ ဟဲ့ လေး တး ဒူင် ကွယ် အန်၊ တဲး အန် ဒမ် မှာပ် ဒီ ဒူအီ ဒဲင် ကာဒါယ် နီ။ ဒေါ အန် တီ၊ န့ ဒီ လိုဝ်း ဆီချာ ပဲ့ ဟဲ့ ဘူင် ဒူအီ။ န့ ဒီ ပီ ကာဒါယ် ဒီ ဘော ကာလာင် ဘျ တူတ့် ပီ ချြီင် ပီ ပြာ အီ ဒီ ငဝ်း ယမ်။ န့ မိူဝ် ပီ ကာဒါယ် တူ ချြီင် ဂေ အီ ခမ် အီ ဟဝ် ငဝ်း ယမ် ဂေ။”