ဂေ ဘော တဝ်း၊ “ဒေါ အန် တီ ဇဝ်ဖြာ ဘော ဂူင့် အာဖုင် ဒင်ခုဝ် အန် ဘော မာပွါ့ လာင် အီ နပ် ဒီ ငဝ်း အီ။ အန် ဝီ ဒမ် မှာပ် ဒီ မာကြာယ် အီ မုး ဟန့် တာင် အီ ခြန် ဒီ ဟာဝ် ကာဂုဝ့် ကာဂဲ့။ အန် ဒီ ငဝ်း မာကြာယ် တာင် အီ ကွယ် ခဲင် အိုမ် နမ်မုက်ဆာရာ။”

2 ဒေါ အန် တီ ဇဝ်ဖြာ ဝီ ကာလာင် လွင် မာန် မာငုန် အန်။ အန် တဝ်း၊

3 “အုဝ် ဇဝ်ဖြာ လိုမ်လာ ဘော ရိုက် အိုမ် ဆေဆေ ဒီ မာန် မာငုန် အုဝ်။ အုဝ် ဘော ဘ်ု အန် ဒွင် ခိူန် ဒွန် ဝန်၊ ကွဲ့ တဲး န့ မိုဝ်း အာဆေ အီ ပွိုန် ဒီ တး ပျာတ့် အန်။

4 အုဝ် မိူဝ် တူ မိုဝ်း ဒီ ရူ ကူပ် အန်။ ဆေ န့ ဒီ မိုဝ်း ဒူအီ အီ တး ဘြတ် ဒဝ် မာအာတ့်၊ အုဝ် ဒီ ဘော ကာဂုဝ်း ဒီ ဂေ တဲး န့ ပီ အီ ဝီ ကာနူမ် ဒုဝ့် ဒဝ် မာအာတ့် တီ ခဲင် ငဝ်။

5 ဆေ အာဝ် ပါယ် တီ မိူဝ်၊ ဂေ အီ ဘဲန် ရန်ဆူ အုဝ်၊ ဆေ ဂေ ဆီ တဲး အုဝ် ဂွင့် ရဲ ဂေ၊ ဂေ လုဝ် တး ဘဲန် ဂိုက် အုဝ်၊ တး လာယ် ကာလဝ့် ဒီ အုဝ်။ ဟဲ့ မှာန်၊ ဂေ လုဝ် တး ဘဲန် အူ ဂိုက် ဒီ အုဝ် ဘော လာယ် ကာလဝ့် ဒီ အုဝ်။”

6 ဝါယ် အန် တီ၊ ဂေ ဒူအီ အီဆာရေလ အီ မုး ခြိုဝ် အာကူပ် တွိုန်၊ ဂေ ဒီ ဝီ ဘြဲ ကိူန်။ ဂေ ဒီ ဘော ပီ ဟေ အီ ဟဲ့ ဝီ မိုဝ်း ရျီး၊ ဝီ မိုဝ်း န့လုဝ်း။ ဘော ဘ့လေ ဟေ တီ ဒီ ဘော ကိူန်၊ တဲး န့ ကော နုဝ့် ဒဲင် ကာဒါယ် နီ။

7 ဇဝ်ဖြာ မိူဝ် တူ ဒွိုမ် မာနုဝ် ကာဆဝ် ဂေ ဒူအီ အီဆာရေလ၊ တဲး န့ ပီ ခဲ့ ပီ ဘူင် အန် ဒီ ရန်ဆူ ဂေ။ အန် မိူဝ် တူ ဒွိုမ် တဲး ဂေ ယမ် ကိူန်၊ တူ တဲး န့ ပီ အန် ငဝ်း ယမ် ရန်ဆူ ဂေ။

8 မဲ ဇဝ်ဖြာ၊ မဲ မာနုဝ် လဲ တဲး ဂေ ခမ် ဒုက် ဒီ ဒူအီ ဟဝ် အီ တး မှေတ့် ဂေ။ မဲ ဇဝ် ဟဲ့ တဲး ဂေ ကာဒုး ဒီ တဝ်၊ တဲး န့ ပီ ခုန် တာင် အီ တး နာ လေး ဆီငဲ ဟဲ့ တး ဘုတ် ဇုန် ဟာဝ် ဂေ။

9 ကူပ် န့ ပါယ် တီ ဇဝ်ဖြာ ဒီ ဘ့လွာ့ ဝဲန် မှာပ် ဂေ ဒူအီ အီဆာရေလ။ န့ ယီ လိုဝ်း ဆီချာ လွင် ဟဲ့ လွတ် ဂေ ဒေါ ဟဲ့ ပျာတ့် ဂေ ဒီ ကာစှူင့် လှူ ဂေ ဒီ ဇဝ် ပီ ကြိုပ် အီ ဟဝ်။ မာဝ် ဒီ ကာစှူင့် လှူ တီ၊ ဂေ လုဝ် ကာဘက် တဲး န့ လိုဝ် ပီ မာဝ် ထုန်၊ ကွဲ့ တဲး န့ ဆီ မိုဝ်း ကာစှူင့် လှူ ဒီ နာင် ကာနမ် အီ စိူဝ် အေဆူရာ၊ ဘော ကာစှူင့် လှူ ဆီနမ် အုး ငှုန် ဒီ ဇဝ် ဘဲန် မျုဝ် ဘဲန် မျုဝ်။

10 မိူင် အီ ဟဲ့ မိုဝ်း ရဲင် အီ မန် ဆီချာ ဝီ ဘဲန် ဒူင် ယေန် ဒူင် ငွင့်။ န့ ဘော ရာမ် ဝီ ဘဲန် နင် ဟေ နင် ပြဲ ဒီလူယ်။ န့ ဒီ ဝီ ဘဲန် ဒူင် ဘ့လေး ဒူင် ဟျီင် ဂေ မာမက် အီ ဒီ အိတ် ဒီ တီ ဘော ကာဘက် ရာ ဟေ။

11 ရာ ဟေ ဂေ တီ ဘော ကာဟဝ်း ကာဘက် စုဝ်း။ ဂေ အီဘိုန့် ဒီ ဘော ဝီ တး ကေတ်၊ တဲး န့ ဘဲန် ဟေ ဒုဝ့် ဂေ။ ခုဝ်၊ ခဲ့ ကွယ် ဂေ ဒူအီ အာဝ် မိုဝ်း အာဆေ အီ မိုဝ်း အာငျာန်။ ပါယ် တီ ဇဝ်ဖြာ အီ ဟဲ့ ဖာန် ဘ့လေး ဂေ၊ အန် အာဝ် ဟူ ကာဝေ ဂေ၊ အာဝ် ဟူ တဲး ဂေ ယိုဝ် ပီ ဂေဇူ အန် ဒီ ဂေ။

12 ဒေါ အန် တီ ဇဝ်ဖြာ ဒီ ဝီ ဂဲပ် ကာဇု ဂေ ဒူအီ ပီ အိုပ် အန် ဘဲန် ဝီ ဘဲန် ဝီ။ အန် ဒီ စုး ဒီ ဘ့လဲင် အိုမ် အူဖာရာတ် ကော ဇမ် ဒီ အိုမ် ဘ့လဲင် အဲဂိုပ်။ န့ ဒီ ပီ အီ မး ငှုဝ်၊ တဲး ဂဝ် အန် လေး။ 13 ဒေါ အန် တီ န့ ဒီ ဘော မိုဝ်း ဟမ် ဝဝ် နိုင် ပဲ အီ ဟမ် တာင် ကာဆဝ်၊ တဲး န့ ဒဲ့ တး ဂေ ဒူအီ အီဆာရေလ အီ ဟဲ့ ဘျုဝ်း ဟဲ့ ဟြာယ် ခဲင် မိူင် အာဆူရီယာ ဘော ဂေ အီ ဟဲ့ လေး တဝ် ခဲင် မိူင် အဲဂိုပ်။ ဂေ ဘောကာဂ့လျီတ် ဒီ ဝီ တး ဂူမ် ကြိုပ် ဇဝ်ဖြာ ခဲင် မိူင် ယေရူဆာလဲမ် ဒီ နွန် အီ ဆီငါ ဘွတ်။