ဂေ ဒူအီ အာမျုဝ် အာအေဖာရိမ် အီ ဒျီင် ပဝ်း ဆေဆေ ဘော ပီခိုက် နဝ်း ဂေ၊ ဂေ ဒီ ဇမ် ဒုက် တာင်။ ဘော ဂေ ဒူအီ အီ ကွယ် ခဲင် ဒီလယ့် အီ မုး ကာဒါယ် ဘွတ် ကာဒါယ် မွှိုမ်၊ ဂေ ဒူအီ အီ ဟဲ့ ဒွိုမ် စှိတ် ကာဆဝ် ယီ ပီ ဘုဝ်း အီ ကြဲ ဒီ ဟျီ့ ကာဟဝ်း၊ ဂေ အီ ဒျီင် ပဝ်း တဲး ဂေ ဟာဝ် ကာကျီင် ကာကေး၊ ဘော ဂေ ဒီ ဇမ် ဒုက် တာင်။

2 တဲး ဘေ ယွတ်၊ ဇဝ်ဖြာ ဟဲ့ မိုဝ်း ဒူအီ အီ ဟဲန့် အီ မိုဝ်း ပ့လူမ် တာင်၊ အီ ဟဲ့ ဖြူမ် ဒီ ကာဂုဝ်း ဒီ ဂေ။ ဂေ ဒီ တး ပီ ဂ့လာယ် တာင် ဘော ဘျြီ ဘော ခုန် တာင် အီ ဟဲန့် ကာဆဝ်။ န့ ဒီ ဘော ပီ အိုမ် အီ ဇဲဝ် အီ ဇုး ဘော မ့ပုန် မိူင်။ အန် ဒီ ဘော ဆတ့် ဝဲန် ဂေ။

3 ဂေ ဒူအီ အာအေဖာရိမ် အီ ပီဖုင် ဂေ၊ အီ ဟဲ့ ယိုတ့် ပဝ်း ဆေဆေ၊ ဂေ ဒီ ဝီ ဘဲန် ပီ ညဲတ့် ပီ ဆီဂွ အီ ဟဝ်။

4 ဘော ဂေ ဒူအီ အီ ကွယ် ခဲင် ဒီလယ့် အီ မုး ကာဒါယ် ဘွတ် ကာဒါယ် မွှိုမ်၊ ဂေ အီ ဟဲ့ ဒွိုမ် စှိတ် ကာဆဝ်၊ ယီ ပီ ဘုဝ်း အီ ကြဲ ဒီ ဟျီ့ ကာဟဝ်း၊ ဂေ ဒီ ပီ ဘ့လေ ဒီပူ အီ မုး ဘ့လေ ဒင် အာတ့် ဇမ် အာခြာဝ် ဒီယာင်။ ဆေ အီ ဟဝ် ဟီ ယိုဝ်၊ ဂေ ဒီ ဘော ဘေတ့် ဟူမ် အူ ဇေန့်။

5 ဒေါ အန် တီ၊ ဂေ အီ ဆီ ဂိတ် ဆီ အိမ် တွိုန်၊ ဂေ ဒီ မာတ် ဇဝ်ဖြာ အီ အိုပ် တူတ့် ဒွန် မျုဝ် မိုဝ်း အာဖုင် ဒင်ခုဝ် တာင် ပီ မင်ဂိုမ်။

6 အန် ဇဝ် ဒီ ဘော ဒွါ အာငျာန် ဒီ ဂေ ဒါ တာင် အီ ဆုင်ဖျာတ် ဒါရာ၊ တဲး ဂေ နပ် ဒီ ဆုင်ဖျာတ် ဒူပ် နာ မှာန်။ အန် ဇဝ် ဒီ ဘော ဒွါ ပ့လူမ် ဂေ ဟဲန့် ဒီ ဂေ အီ ဘ်ု မာလုဝ်း မိူင် အီ ဘ်ု ဒီ ကာဂုဝ်း ဒီ ရန်ဆူ ဂေ အီ ဆီ လိုပ်။

7 အုဝ် ဒီ ဘော ကာလာင် ဒီ ဂေ လွင် ဒူအီ အီ ဟဲ့ ဒျီင် ပဝ်း ဘော ဟာဝ် ကာကျီင် ကာကေး။ န့ ဘော မုး ဒါ အီ လှူ ဒီ ဇဝ်ဖြာ၊ ဒါ အီ ဘျာန် ဂြုဝ်း ဇဝ်ဖြာ။ ဂေ ဟဲ့ ယိုတ့် ပဝ်း၊ ကွဲ့ တဲး ဂေ ဆီ ပွိုန် ဟာဝ် ဆီချာ ဒူပ် န့တေန့်၊ ကွဲ့ တဲး ဂေ နပ် ဆီချာ ပီ ဆီ ဘျ၊ ပီ ဆီ ကာလာင် ဇဝ်ဖြာ ဒီ ဂေ။ ဂေ ဟဲ့ ယိုတ့် ပဝ်း၊ ကွဲ့ တဲး ဂေ နပ် ဒီ ဆုင်ဖျာတ် အာမူ အီ တဲး န့ ကာဇီ။

8 ခုဝ်၊ ကာစှူင့် ဒူင် ဒျီင် ဂေ ပဝ်း တီ၊ ဟဲ့ မုး ဟိုဝ် ဂေ ဒီလူယ်၊ အာဝ် မိုဝ်း ကာဆိူဝ် အီ တူ ကာဒါတ့်။

9 ဒူအီ ဝီ တီ အန် ဘော ထာင် အန် ဒီ ပွိုန် မာနုဝ် အာဆေ။း အန် ဒီ တဲး အာဆေ နပ် အာငျာန် အန် တီ။း န့ မုး ဂွန် င အီ ဆီ လဝ့် ဂဝ်း ပူ။း

10 အန် ဘော နပ် ဒီ ဒိုဝ်း ဒါရာ ဘဲန် ညွင့် ဘဲန် ညွင့်။ ဒိုဝ်း ဘဲန် မ့ပြဲင် မ့ပြဲင်။ ဒိုဝ်း အူ ပ့လုဝ့် အီ စဲက် အီ စဲက်။

11 ဇဝ်ဖြာ ယီ တူ တဲး ဂေ မာနုဝ် ပါယ် တီ။ ဇဝ်ဖြာ ဒီ ဝီ စ်ု ဒူအီ ပေါ အူ မျုဝ် အီ ကာလာင် ဂြုဝ်း အီ လာယ် ဘ့လိူင် ဒီ ဘေ၊ တဲး ဂေ ဝီ တး မာနုဝ် ဘေ။

12 အန် ဇဝ် ဟဲ့ ဒွိုမ် တဝ်း၊ “အုဝ် ဟဲ့ ကာဝေ ဘေ၊ တဲး ဘေ ပွိုန် ဒီ ဒီလှဝ်၊ တဲး ဘေ ပွိုန် ဒီ ဝီ ဒူမ် ပ့လူမ် ဘေ ဂေ ဟဲန့် ဘေ။” မာလဲ၊ ဂေ ဟဲ့ ဝီ ဝဲန် တူ ဒိုဝ်း ဒီ ထူမ် ဂြုဝ်း ဇဝ်ဖြာ။

13 ပါယ် တီ ဇဝ်ဖြာ ဒီ တဲး ဂေ ဝီ ထူမ် ဒါရာ ဘဲန် ညွင့် ဘဲန် ညွင့်၊ ဘဲန် မ့ပြဲင် ဘဲန် မ့ပြဲင်၊ ဒိုဝ်း အူ ပ့လုဝ့် အီ စဲက် အီ စဲက်၊ တဲး န့ ပီ ဂေ ဟာဝ် ဒီပ့လာတ် ကေး။ ဂေ ဒီ ဘော လိုဝ် စှိုမ်၊ တဲး န့ ပီ ဂေ ကွယ် ခဲင် ယွတ့်၊ တဲး အီ ဟဝ် ပွိုန် ဒီ မှေတ့် ဟာဝ် ဂေ။

14 ကူပ် န့ ပါယ် တီ ဘေ ဒူအီ အီ ဆီမာ ပိုန့် ဆီမာ အေး၊ ဘေ အီ မုး ဒါ တာင် အီ ယဲတ့် အီ ခဲင် မိူင် ယေရူဆာလဲမ်၊ တဲး ဘေ ဝီ ထူမ် ဂြုဝ်း ဇဝ်ဖြာ။

15 ဘေ ဟဲ့ ပီဖုင် ဘေ တဝ်း၊ “ယေ ဟဲ့ ဟွတ့် လာယ် ဘဲန် အူ ဂိုက်၊ ဟဲ့ လာယ် ကာလဝ့် ဒီ ဘုဝ် အီ တဲး အီ ယမ်။ ယေ ဟဲ့ လာယ် ဒွိုမ် ဒီ ဇဝ် မာရာန။ အာဖေ အာရေ အီ နပ် ဒီ တဲး အီ လိုဝ် စှိုမ် တီ ပီ ဘော တး မိူဝ်၊ ယေ ဟဲ့ နပ်၊ ယေ ဒီ လွတ် ဒီ အာဖေ အာရေ တီ။ ခုဝ်၊ ယေ ဟဲ့ ဘိုင် အီ ကာလုဝ်။ ယေ ဟဲ့ ညှိုမ် အီ တူ မုး တူ မှာန်၊ တဲး န့ ပီ ယေ ဟဲ့ ချြီင် ခြိုမ် ထိုပ်။”

16 ကူပ် န့ ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ “အုဝ် ဒီ ဘ့လေး အုန် စေန့် ရွင့် အီ မန် ဆီချာ အီ ငဝ်း တာင် ကာဆဝ်၊ တဲး န့ ဘဲန် ဒင် ရွင့် ခဲင် မိူင် ဇီအူန်။ အာဆေ ညှိုမ် ဘိုင် အုဝ် လွင် အန် တီ၊ အန် တူ လုဝ် တဝ် ဟာဝ် ဟဲ ဟဲ။

17 အုဝ် ဒီ တဲး ဒူအီ ဆုင်ဖျာတ် ဒူပ် ဒါရာ၊ တဲး န့ ပီ ဆေန့် မဲမီ ပီ တာ အီ ဒေါ ဆမ် ကာင်၊ တဲး န့ ကာဆိူဝ်။ ပီ ဆုင်ဖျာတ် ဂေ နာ မုး နာ မှာန်၊ အန် ဘော ပီ ဘ့လေ အာဖမ် ပီ တာ အီ ဒေါ ဆမ် ကာင်၊ တဲး ရွင့် စွင့် ဆိူဝ်။ ဆေ ဂ့လာယ် ဂေ ဘျြီ ဟီ တး၊ န့ ယီ ပျာတ့် ဝဲန် အီ တူ မှာန် ပီ ဘိုင် ဘေ တွိုန်။ အိုမ် ဒီ ဘော မ့ပုန် ဒူင် ချြီင် ဘေ တီ။

18 ပဲ့ ဟဲ့ ကာဆဲန့် ဘေ ဒီ ဘုဝ် အီ တဲး အီ ယမ်၊ န့ ဒီ လိုဝ် စှိုမ်။ ဘော ပဲ့ ဟဲ့ လာယ် ကာလဝ့် ဘေ ဒီ ဇဝ် မာရာန န့ ဒီ ကာပျာတ့် လိုဝ်။ န့ ဒီ စှိုမ် ပန် ဒီ တး အာဖေ အာရေ အီ နပ် ဒီ တဲး အီ လိုဝ် စှိုမ် တူတ့်။

19 ဒွန် ဇေန့် ဒေါ တး အာဖေ အာရေ တီ ဘေ ဒီ ဘော လုဝ် ခမ် ဒူပ် အီ ဟဝ်။ ဒွန် ဆီငဲ ဒွန် ဆီငဲ န့ ဒီ တး ဒွင် ခိူန် ဒွင် ဝန်။” ဆေ ဆီဖဝ် ဂြုဝ်း ဇဝ်ဖြာ တီ ကော လိုဝ်း ဒီ ဘေ၊ န့ ဒီ ဘဲန် ကာစွာ ဘဲန် ကာပိုန့် ဒီ ဘေ။

20 ဘေ ပီ ဘော ဘူင်၊ တဲး ဘေ လာယ် ကာလဝ့် ဒီ အီ၊ န့ ပီ ကာစှူင့် အိတ် ဘေ ဟဲ့ ဒီတျီမ်၊ အာဝ် ကူပ် ကာညာတ်။ ဟိုပ် ဘေ မိူဝ် ဟဲ့ ဒီတဲတ်၊ အာဝ် ကူပ် ပ့လိုက် ဒီ ဒုဝ် ဘေ။

21 ဇဝ်ဖြာ ဒီ ဘော ကာဂုဝ်း တဲး န့ ကော ပီ ပီ ဒွိုမ် ဘူင် အန် ဒီ နွန် ဘေန်ရာဆိမ် ဘော ဒီ ဂ့လင် ကီပွင်။ ဆေ အန် ဇဝ် ဒီ ဘူင် ပါယ် တီ န့ ဒီ ဘ့လိူင် ဒီ နဝ်း ဘေ။ ဆေ အန် ဘော ဘူင် ပီ ခြာမ် အန် ဒီ ဘူင်၊ န့ တူ ဒူပ် ပီ ထာင် အီ။

22 ကွဲ့ တဲး ဘေ ကာညး ဘော လုက်တာယ် အန်။ ကွဲ့ တဲး န့ ဝဲ ညှာပ် ဒီ ဘေ။ အုဝ် ဟဲ့ ယိုဝ် ဂြုဝ်း ဇဝ်ဖြာ အီ အိုပ် တူတ့် ဒွန် မျုဝ်။ အန် ဇဝ် ဟဲ့ ဆုင်ဖျာတ် ဒီ ပျာတ့် မိူင် ဘော မိူင်၊ တဲး န့ လိုဝ် စှိုမ် တူတ့်။

23 တဲး ဘေ ထူမ် ဂြုဝ်း ပီ ကာလာင် အုဝ် နီ။ ဂြုဝ်း ပီ ကာလာင် အုဝ် နီ၊ တဲး န့ ဘော လိုဝ်း ဆီချာ ဒီ ဘေ။

24 ဒူအီ ရန့် ဒူင် နာ၊ အန် တူ နပ် ဒီ ထဲ ဒူင် နာ အန် ဒွန် ဆီငဲ ဒွန် ဆီငဲ။ အန် မိူဝ် တူ ဂိုဝ်း ကာဒါယ် ဆေဆေ။

25 အန် ဟဲ့ ဟွတ့် ထဲ၊ ဟဲ့ ဟွတ့် ဝှိုဝ် ဆီချွင် ဆီချာ၊ အန် ကော ဒီ ဝီ ဘြတ် ဆီမာ ဒဝ် ဆာမုင် ဘော ဆီမာ န့ကြိုဝ်း မှီ။ ဟဲ့ ဟွတ့်၊ အန် ပီ ဝီ ဒိုဝ်း ဆီမာ ခဝ်ချုင် ဘြတ် ဘဲန် မ့ပြဲင် မ့ပြဲင်၊ ဘော ဆီမာ ခဝ် ဘာလီ တဲး န့ လေး ဒူင် ကွယ် အန်။ ဒီ ခူပ် ဒူင် နာ တီ၊ အန် ဒီ ဘော ဝီ ဘြတ် ဆီမာ ဆီဂူင့်ရာ။

26 အန် ဟဲ့ နပ် ဆီချာ လွင် အန် တီ။ ခုဝ်၊ ဇဝ်ဖြာ ဟဲ့ ဟွတ့် မာနုဝ် အန်။

27 အန် မိူဝ် တူ ဒိုဝ်း ဟေ စန် ထိပ် ကာအာင် ဒဝ် ဆာမုင်။ အန် မိူဝ် တူ ဒိုဝ်း ကာလေန့် လက်လဝ်၊ ဝီ လွယ် ကာအာင် န့ကြိုဝ်း မှီ။ အန် ဘော ဒိုဝ်း မ့ဖျီ့ မး ကာအာင် ဒဝ် ဆာမုင်။ အန် ဘော ဒိုဝ်း န့ကြွုန် မး ကာအာင် န့ကြိုဝ်း မှီ၊ တဲး န့ ရး။

28 ဆေ န့ ယီ မုး ဂဝ် ခဝ် ချုင် ဘော ဂဝ် ခဝ် ဘာလီ လုဝ် ကြိတ် တဲး န့ ဘဲန် ကာပဲ့။ အန် ယီ တူ ကြိတ် ဆေဆေ။ အန် ဘော နပ် ပီ ဒီ ပါယ် ဒီ တဲး မင်ပြွင့် လာက် လက်လဝ် ဒဲင် ဂဝ် တီ၊ ယီ တူ တဲး ဂဝ် တီ ကာလာတ့် လိုဝ် စှိုမ်။

29 အာငျာန် ဇိုဝ် တီ ဒွန် မျုဝ် ဘော တး တူတ့် ဒီ ဇဝ်ဖြာ အီ အိုပ် တူတ့် ဒွန် မျုဝ်။ အာကျာမ် အာငျာန် ပီ ဒွါ ဇဝ်ဖြာ တီ၊ ဘော အာငျာန် အန် ဟဲ့ ဘွတ် ကာဆဝ်။