1 အိုယ် မိူင် အာရေလ၊^a မဲ မုး မိူင် ဒူင် ဒွိုမ် ချ အာဒါဝိတ် တွိုန်၊ မဲ ဒီ ဇမ် ဒုက် တာင်။ ပဲ့ ဟဲ့ ဘူင် ဘေ ဆေဆေ တွိုန်၊ တဲး ဘေ ဘူင် ဟာဝ် ဒွန် ဆီနမ် ဒွန် ဆီနမ်။ ဘ့လွယ် ပဲ့ ဟဲ့ ဒွိုမ် ဘူင် ဘေ၊ တဲး ဘေ ဘော ဘူင် ဟာဝ်။

2 အုဝ် ဇဝ်ဖြာ ယီ တဲး မိူင် တီ ဇမ် ဒုက်။ ဘေ ဒီ ဘော ယာမ် ဘော ငှုန် ကူပ် ဟဲ့ ခမ် ဘေ ဒုက် တာင်။ မိူင် တီ ဘော မိူင် ဒီ ဘော ပီ ကာစှူင့် လှူ ဒီ အုဝ် အီ မိုဝ်း မီ ငဝ် ဂေ နှာမ်။

3 အုဝ် ဒီ ဘော တဲး ရန်ဆူ ဘေ တး ဝဲင် ရူပ် ဘေ။ တဲး ဂေ ဆမ် ကာစှူင့် စာ ဘော ဂိုဝ်း ကာဒါယ် ဘူင် ဘ့လဝ့် န့တဲင် ဒီ ရဲင် မိူင်၊ တဲး ဂေ ပွိုန် ဒီ လိုပ်။

4 ဘေ ဒူအီ ခဲင် မိူင် ယေရူဆာလဲမ်၊ ဘေ ဒီ ကာလာင် ဂြုဝ်း ပီ ဒူအီ အီ ကွယ် ခဲင် ကာဒဝ် ကာဒါယ်။ ဂြုဝ်း ဘေ ဒီ လေး ခဲင် ကာပုး။ န့ ပီ ဂြုဝ်း ကာပြဝ် အီ ဖူဖာပ်၊ လေး နာ ခြိုမ်။

5 ဂေ ဒူအီ အာမျုဝ် ဟဝ် အီ ဒီ ကာဂုဝ်း ဒီ ဘေ တီ၊ ဂေ ဒီ ကိူန် ကာဆဝ် ပီ ကာပုး ပီ ဘုတ် ခုန်။ ဒပ် ဒါ ဆိုက် အီ မွှိုမ် ယုဝ် ကာဆဝ် တီ၊ ဂေ ဘော ပီ ဒျီပ် ငှုဝ် ပီ ဘုတ် ခုန်။ လွင် အန် တီ၊ န့ ဒီ ဘော ဘဲန် ကာတဝ် ကာတိုဝ့် ဒီ ဘေ အူ ဇေန့်။

6 ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ တး ဒမ် မှာပ် ဒီ ဘေ၊ တဲး န့ မိုဝ်း ဟမ် ကာနမ်၊ တဲး မာအိမ် ယေန့် ဘော မိုဝ်း ဆီနန် ဆီနိူင်။ အန် ဇဝ် ဒီ စ်ု ခုန် လာင် တး ဘုတ်၊ တဲး ဘော ဂ့လာယ် တာင် စုဝ်း ဒူပ် ခုန် တာင်။ တဲး ဘော ငဝ် ကာဆိုမ် တူတ့်။

7 ခဲ့ ကွယ် ရန်ဆူ အီ မုး ဒူအီ အာမျုဝ် ဟဝ် အီ ကာဂုဝ်း အီ ပျာတ့် မိူင် အာရေလ တီ ဘော ခြိုင် ကာဂုဝ်း ပီ တာ ဂေ ဘော ဒွန် မျုဝ်၊ န့ ဒီ ဟြာယ် တူတ့် အူ ဇေန့်၊ တဲး န့ ပီ ပီ မ့ဘာဝ် အီ ဘော ပီ ယိုဝ် ဂေ ဒေါ မ့ဘာဝ် ဂေ ခဲင် မှိုဝ်။

8 ဂေ ဒူအီ တီ ဒီ ဘော ပီ ဒူအီ အီ ကာပြာန့် ပီ ဒီ ဟူမ်။ ဒေါ အိတ် ဂေ၊ ဂေ ဘော မ့ဘာဝ် ဟဲ့ ပွိုန် ဒီ ဟူမ် ဖဲ။ ဒေါ ဝီ န့ဆိုဝ်း ဂေ၊ ဂေ ယီ ဆီ ကာပြာန့် ပီ ဘြိမ်။ ဂေ ဘော ပီ ဒူအီ အီ ဟဲ့ ဆီ ဒျီင် ကာဆဝ် အိုမ်။ ဒေါ အိတ် ဂေ၊ ဂေ ဘော မ့ဘာဝ် ဟဲ့ ပွိုန် ဒီ ဒျီင် ဖဲ။ ဒေါ ဝီ န့ဆိုဝ်း ဂေ၊ ဂေ ယီ ဆီ ဒျီင် ပီ ဘြိမ်။

9 တဲး ဘေ ဘူင် ဟာဝ် နာ ဟာယ် နာ စီစိဝ် အီ တဲး ဘေ ယုဝ် ဘော ကာပိုန့်။ တဲး ဘေ ဘူင် ဟာဝ် အီ တဲး ငါယ် ဘေ အပ်။ တဲး ဘေ ယိုတ့်၊ ယီ တူ မုး ကူပ် ဒျီင် ဘေ အိုမ် မာငုန်။ တဲး ဘေ ကာကျီင် ကာကေး၊ ယီ တူ မုး ကူပ် ဒျီင် ဘေ ပဝ်း အီ ဘြာင် ကာဆဝ်။

10 ခုဝ်၊ န့ ပီ ဇဝ်ဖြာ ဟဲ့ ဘူင် တဲး ဘေ အိတ် လိုက် ဘော ပိဝ် ဒုဝ်၊ တဲး န့ ပီ ကာနမ် ဟဲ့ ပ့လိုက် ဘေ။ ဘေ ဒါ အီ ဘျာန် ဂြုဝ်း ဇဝ်ဖြာ၊ အန် ဇဝ် ဟဲ့ ကာဘိတ် ငါယ် ဘေ။ ဘေ ဒါ အီ ယိုဝ် အာရူင် ပီ ဘျ ဇဝ်ဖြာ၊ အန် ဇဝ် ဟဲ့ ဆီဘ့လိုက် ဂိန့် ဘေ။

11 ပီ ဘျ ပီ ကာလာင် ဇဝ်ဖြာ ဒွန် မျုဝ်၊ န့ တူ လိုဝ်း ဒီ ဘေ။ န့ ဒီ ဘော ပီ ဆီလွယ် ပဲ့ အီ ဟဲ့ ဒွက် အုန် ဇိုမ်။ ဘေ ပီ ဘော ဒိုဝ်း ဆီလွယ် တီ ဟာဝ် ဒူင် ကွယ် ဒူအီ အီ နပ် ဒီ တိး၊ မှာန့် တဲး အန် တိး ဘေ ထူမ် မိူဝ်၊ အန် ယီ ဝီ တဝ်း ဒီ ဘေ၊ “အုဝ် တူ ပွိုန် တိး။ ဆီလွယ် ပဲ့ တီ၊ ဟဲ့ ဟွတ့် ဒွက် ဇိုမ်။ အာဝ် ပွိုန် ဝိုဝ်း။”

12 ဆေ ဘေ ပီ ဝီ ဒိုဝ်း ဟာဝ် ညိူဝ် ဒူအီ အီ တူ နပ် ပဲ့ တဲး အန် တိး၊ အန် ပီ ဒီ ဝီ တဝ်း ဒီ ဘေ၊ “အုဝ် တူ နပ် ဒီ တိး၊ အုဝ် တူ နပ် ပဲ့။” ပါယ် တီ။ အာဝ် မိုဝ်း အာဆေ အီ နပ် ပီ အိုင် ဇဝ်ဖြာ။

13 ဇဝ်ဖြာ ပီ ဝီ တဝ်း၊ “ဒူအီ အာမျုဝ် နီ၊ ဂေ ပီ ဘော ဆာခိုဝ် ဒီ အုဝ် မိူဝ်၊ န့ မုး မီ ဂြုဝ်း ပီယေန့်၊ အာဝ် မိုဝ်း ဒီခုဝ် မာဆေ။ နဝ်း ဖွိုမ် ဂေ ယီ တူ နမ်လှုဝ်း အုဝ်။ ပီ ကြိုပ် ဂေ ဒီ အုဝ်၊ န့ ဒူပ် မီ ဟိတ် ဂေ ဒူအီ၊ ယီ တူ ဒူပ် ဒါရာ အုဝ်။

14 ကူပ် န့ ပါယ် တီ အုဝ် ဒီ ဝီ ဘူင် တဲး န့ မွှိုမ် အာမ် ဘော မွှိုမ် ယုဝ် ကာဆဝ်။ ဂေ ဒူအီ အီ မိုဝ်း အာငျာန်၊ အာဝ် ဟူ နပ် ပီ ပါယ် ဂေ။ အာငျာန် ဂေ တီ၊ အာဝ် ဟူ မိုဝ်း ဒီခုဝ် မာဆေ။ ဘော ဒူအီ အီ နပ် ဘဲန် မျုဝ် ဘဲန် မျုဝ်၊ ဂေ အာဝ် နပ် ဒီ ကာဖာ လွင် ပီ ဒီ ဘူင် ဇဝ်ဖြာ တီ။”

15 ဂေ ဒူအီ အီ ချြီင် ပီ ခြာမ် ဂေ ဒီ ဘူင်၊ ကွဲ့ တဲး ဇဝ်ဖြာ နပ် လွင် အန် တီ၊ ဂေ ဒီ လုဝ် ခမ် ဒုက် တာင်။ ခုဝ်၊ န့ ပီ ပီ ခြာမ် ဂေ ဒီ ဘူင် တီ၊ ဂေ ဟဲ့ ချြီင် ဒူင် လိုက် ကာဆဝ်။ ဂေ ကွယ် ခဲင် အပ် ဝွင့်။ ဂေ ဘော ထာင် အာဝ် မိုဝ်း အာဆေ အီ ဒီ နပ် အီ ဒီ ယိုဝ် ပီ ခြာမ် ဂေ တီ။

16 ဘေ ဒူအီ ဇိုဝ် တီ၊ ဘေ နပ် ဒီ ဘူင် ကာဘ့လျီ့ တူတ့် ဒွန် မျုဝ်။ ဆေ န့ မုး ဒူအီ အီ နပ် ဒီ ဘူင် ကာလုဝ့် ကာဒါယ်၊ ဘေ တူ ပွိုန် မာတ် အန် ပီ ဒီက့လွုန် ကာဒါယ် တီ။ အာမျုဝ် ပဲ့ ဟဲ့ ဘူင် ဒူအီ၊ အာဝ် ပွိုန် ဝီ တဝ်း ဒီ ဒူအီ အီ ဟဲ့ ဘူင် အန်၊ “အာဝ် မုး မဲ အီ ဘူင် အုဝ်။” အာဝ် ပွိုန် တဝ်း၊ “မဲ တူ မိုဝ်း အာငျာန်၊ တူ နပ် ဒီ ဘူင် မာဆေ။”

17 န့ ဒီ ဘဲန် ပီ ဂြုဝ်း ကာဘူယ် အီ တဝ်း၊ “အာဝ် လှေန့် နွန် လေဘာနုန် ဒီ ဝီ ဘဲန် မာန် ဂေ ဒူင် နာ အီ မိုဝ်း ဘ့လေ ကိူန်။ မာန် ဂေ ဒူင် နာ ဒီ ဝီ ပီ အူင့် ဟေ။”

18 အာခြာဝ် ဒေါ အန် ဂေ ဒူအီ ဟျုဝ့် ကာအာဝ်၊ ဂေ ဒီ ဘော ဝီ ပွိုန် ယိုဝ် ဂြုဝ်း ပီ တိး အီ ခဲင် ဆီလွယ် ပဲ့ တွိုန်။ ဘော ဒူအီ ငါယ် အပ် အီ ကွယ် ခဲင် အပ် ဝွင့်၊ ငါယ် ဂေ ဒီ ဝီ ဘ့လာင်၊ ဝီ ပွိုန် ယိုဝ်။

19 ဂေ ဒူအီ အီ မိုဝ်း နဝ်း တျီမ်၊ ဂေ ဒီ ဝီ ဘဲန် နဝ်း ဘျုဝ် ဒါခိုယ် ပီ ဒွါ ဇဝ်ဖြာ။ ဘော ဂေ ဒူအီ ဂိန် ဒူအီ ဖ့လာန်၊ ဂေ ဒီ ဝီ ခူယ် ဒါခိုယ်။ ခုဝ်၊ ဇဝ်ဖြာ အီ ဆီငါ ဘွတ်၊ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ အန် ကာဝေ ဂေ။

20 န့ မုး အာခြာဝ် ဒီ တူတ့် ဇာတ် ဂေ အီ ခါနှာပ် အီ ဟဝ် ဘော ဂေ အီ လုက်တာယ် ဇဝ်ဖြာ။ ဂေ အီ ဆီ ဘူင် မှာပ်၊ ဂေ ဘောကာဂ့လျီတ် ဒီ လုဝ် ခမ် ဒီ လိုဝ် စှိုမ်။

21 ဇဝ်ဖြာ ဒီ ဘော ပျာတ့် ဝဲန် ဂေ အီ ကာယွင့် အီ ဟဝ် ဘော ဂေ အီ ခြဲ ဒူအီ အီ လုဝ် ဆုင်ဖျာတ် အာမူ အီ၊ ဘော ဂေ အီ ဘူင် တဲး ဒူအီ တူ မိုဝ်း မှာပ် ဝီ လိုဝ် စှိုမ်။

22 ခုဝ်၊ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ ဇဝ်ဖြာ အီ ဟဲ့ ချွတ် အာဘြာဟမ် တွိုန်၊ အန် ဟဲ့ ကာလာင် လွင် ဂေ ဒူအီ အာမျုဝ် အာကူပ် တဝ်း၊ “အိုယ် ဘေ ဒူအီ ပီ အိုပ် အုဝ်၊ ဝါယ် နီ ဘေ အာဝ် ဟူ လုဝ် ဆာယ် အီ။ နာ ဘေ မိူဝ်၊ အာဝ် ဟူ ကာဟဝ်း တွင့်၊ အာဝ် ဟူ မှူင်။

23 ခုဝ်၊ ဘေ ဒီ ဘော ယိုဝ် ဂွန် ပီ ဒီ ဒွါ အုဝ် ဒီ ဘေ၊ တဲး ဘေ လှုဝ်း ခဲ့ ဘွတ် အုဝ်။ ပန် အန် တီ ဘေ ဒီ ဘော နပ်၊ အုဝ် မုး ဇဝ်ဖြာ အီ ဆီငါ ဘွတ်၊ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။ ဘေ ဒီ ဘော ဝီ ရုဝ်ဆေ အုဝ် ဘော အာမ် ခဲ့ ဘွတ် အုဝ်။

24 ဂေ အီ ဟဲ့ ကာဖာ ကာလိုပ် ခဲင် နဝ်း ခဲင် ဖွိုမ် ဂေ၊ ဂေ ဒီ ဘော ဝီ နပ် ဆီချာ လွင် အုဝ်။ ဂေ ဒူအီ အီ ဆီမာ ပိုန့် ဆီမာ အေး၊ ဂေ ဒီ ဝီ ထူမ် ပီ မာနုဝ် အီ ဟဝ်၊ တဲး န့ ကာလှုး ဒီ နဝ်း ဂေ။”