1 ဇဝ်ဖြာ ပီ ဝီ တဝ်း၊ “ဂေ ဂွန် အုဝ် အီ ဘူင် ကာဘး ဒီ အုဝ်၊ ဂေ ဒီ ဇမ် ဒုက်။ ဂေ ဘော ဘူင် ဒူပ် ပီ ခြာမ် ဂေ။ န့ ယီ တူ မုး ပီ ခြာမ် အုဝ်။ ဂေ ဘော ဘူင် ပီ လာယ် ကာဆဲန့် ဒီ အီ၊ ယီ တူ ဒူပ် ပီ အိုင် အုဝ်။ ပါယ် တီ ဂေ ဘူင် တဲး မှာပ် ဂေ ဝဲ ကိူန်။

2 ဂေ တူ မှာန့် အာကျာမ် အာငျာန် ဒီ အုဝ်။ ဂေ ယီ ဝီ ဟာဝ် ဒီ မိူင် အဲဂိုပ်၊ ဝီ ဟာဝ် ဘိုင် ခုန်ဒီခမ် ဖာရုဝ် ခဲင် မိူင် အဲဂိုပ်၊ တဲး အန် ဝီ စွယ် ဂွင့် ရဲ ဂေ၊ တဲး န့ ပီ ဂေ ကွယ် ခြိုမ် ယာပ် ဟေ။

3 မာလဲ၊ ခုန်ဒီခမ် မိူင် အဲဂိုပ် တီ အန် ယီ တူ မိုဝ်း ပွုန် ဂေ ဟဲန့် ဒီ စွယ် ဘေ။ ပီ ဒီ စွယ် ခုန်ဒီခမ် မိူင် အဲဂိုပ် ဒီ ဘေ န့ ဒီ ဝီ ဘဲန် အီ မွှိုမ် ဆာယ် ဒီ ဘေ။ ပီ ဟြေတ့် ဘေ ဒီ ဘိုင် ခဲင် မိူင် အဲဂိုပ်၊ န့ ဒီ ဝီ တဲး ဘေ စှိုမ် ဆာရေ။

4 ဒါ တာင် ဂေ ပီ ဘော ဇမ် ခဲင် မိူင် အဲဂိုပ် ဒီ မိူင် စောနာ ဘော အာမူ အာမာတ် ဂေ ပီ ဘော ဇမ် ဒီ မိူင် ဟာနိတ် မိူဝ်၊

5 ဂေ ယီ ဝီ မွှိုမ် ဆာယ် ကူပ် ဟဲ့ ဘိုင် ဂေ ဒူအီ အီ တူ မိုဝ်း ဒီခုဝ်၊ ဒူအီ အီ တူ ပွိုန် စွယ်၊ အီ တူ ပွိုန် ဂေဇူ ဂေ ဒေါ ဒီ လုဝ် ဂေ။ န့ တဲး မီ ဂေ စှိုမ် ဆာရေ။”

6 ဇဝ်ဖြာ ဝီ ကာလာင် လွင် ဒုဝ် ဆတ်ဒါဝါ ပီ ဒါင် ဂေ ကြုဝ် အီ ကွယ် ဒီ မိူင် နာ တေတ့်။ ဂေ အာမူ အာမာတ် တွိုန် ဟဲ့ ဟာဝ် ဒူပ် န့တေန့် အီ ကာလုဝ်း ဒူင် မိုဝ်း ဒုက် ဘော အာဖေ အာရေ၊ မိုဝ်း မာခြင်ဆီ ဒုဝ် အာလူင့် ဘော ဒုဝ် မာ၊ မိုဝ်း ဘော မာဟန့် ဂြဝ် ဘော မာဟန့် အီ ခြန် အီ ဟာယ် ကာဆဝ်။ ဂေ ဘော ဒိုဝ်း ကြုဝ်ကြာမ် ဂေ အီ မိုဝ်း ဒီငဝ်း ဒီခန်၊ ဝီ ဒါင် ဒဲင် ကာတု မာလာ၊ ဒါင် ဘော ဒဲင် ကာတု မင်ပြွင့် ကာဟာတ့်၊ တဲး ဂေ ဟာဝ် ဒွါ ဒီ ဂေ ဒူအီ အီ တူ ပွိုန် စွယ် တူ ပွိုန် ဂေဇူ ဂေ။

7 ဂေ ဒူအီ ခဲင် မိူင် အဲဂိုပ် တီ ဂေ ယီ တူ ပွိုန် စွယ် မာဆေ။ ခုဝ်၊ အုဝ် ဟဲ့ တဝ်း၊ တဲး ဂေ စိူဝ် ‘ရာဟာပ် ကွယ် ဆီတွင့် တူ ရ်ု။^a

8 ဇဝ်ဖြာ ပီ ဝီ စ်ု အုဝ် တဝ်း၊ “တဲး မဲ ဒဲမ် အုန် ခဲင် ဘပ် လွင် ဒူအီ ဂေ တီ၊ လွင် ဂေ ဒီ ပါယ် မှဝ်၊ တဲး ဂေ အီ ဒီ ဂွိုတ် နာ အာတ့် ဟာဝ် မိုဝ်း ဒီ နုဝ် ဆေဆေ လွင် ခဲ့ ဟဲ့ ဘူင် ဂေ အီ တူ မွှိုမ်။

9 ခုဝ်၊ ဂေ ဘော ဘူင် အီ ကာဘး ဒီ ဇဝ်ဖြာ ဆေဆေ။ ဂေ ပီ ဂွန် အုဝ် အီ ကာလာင် ဂြုဝ်း ကာလုဝ် ဆေဆေ။ ဂေ မိူဝ် တူ ဆီ ထူမ် ဒါရာ အုဝ် ဒေါ မှဝ်။

10 ဂေ ဘော ကာလာင် ဒီ ဂေ ဒူအီ အီ ယိုဝ် အာရူင် ပီ ဘျ ဇဝ်ဖြာ တဝ်း၊ ‘ကွဲ့ ယွတ်။’ ဂေ ဘော ကာလာင် ဒီ ဒါ အီ ဘျာန် ဂြုဝ်း ဇဝ်ဖြာ တဝ်း၊ ‘ဘေ ကွဲ့ ကာလာင် ဂြုဝ်း ဆိူဝ် ဂြုဝ်း မှာန် ဒီ ယေ။ တဲး ဘေ ကာလာင် ဂြုဝ်း ပီ အိုင် ယေ၊ ပီ ဆီ ထူမ် ယေ။ တဲး ဘေ ဒိုဝ်း ဂြုဝ်း အီ တူ မုး အီ တူ မှာန်၊ ဝီ ကာလာင် ဒီ ယေ။

11 တဲး ဘေ ဝး န့တေန့်။ ယေ မိူဝ် တူ ဆီ ထူမ် လွင် ဇဝ်ဖြာ အီ မုး ဇဝ်ဖြာ အီ ဆီငါ ဘွတ်၊ ဇဝ်ဖြာ ပီ ကြိုပ် ဂေ ဒူအီ အီဆာရေလ တီ။’”

12 ကူပ် န့ ပါယ် တီ ဇဝ်ဖြာ အီ ဆီငါ ဘွတ်၊ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဝီ တဝ်း၊ “ဘေ ဟဲ့ ဝဲန် ဂြုဝ်း ဇဝ်ဖြာ၊ ဘော ဝီ ဒူပ် ဒူအီ အီ ခါနှာပ် အီ ဟဝ်၊ ဒူပ် ဘော ဒူအီ အီ မိုဝ်း နဝ်း ဂုဝ့် ဂဲ့။

13 ကူပ် ဘူင် ဘေ ပါယ် တီ ဘေ မိုဝ်း မှာပ်။ န့ ပီ ရဲင် အီ စာ အီ ဟဲ့ ဝီ မိုဝ်း ပန် ဒး၊ ပန် မာတုး အီ ဟဲ့ ရိန် ဒီ ကေး။ န့ ဒီ ဘော မာတုး ဒီဂ့လဝ်း စုဝ်း တူတ့် အူ ဇေန့်။

14 န့ ဒီ ဘော ကာလာတ့် ပီ ကာလုဝ့် ကာဒါယ် ပီ ဆတ့် ဝဲန် ဒူအီ။ တဲး န့ ကာမုန် ကာလာတ့်၊ ကွဲ့ တဲး န့ ဆီ ပွိုန် ဝီ ဒိုဝ်း ဒူန့် အန်၊ ဝီ ဘဲန် မင် ဆူက် န့ကိုဝ် ငဝ်၊ ဘော ကွက့် ပ့လက် အိုမ် ခဲင် မ့ပါန် အိုမ်။”

15 ဇဝ်ဖြာ အီ အိုပ် တူတ့် ဒွန် မျုဝ်၊ အီ မုး ဇဝ်ဖြာ အီ ဆီငါ ဘွတ်၊ ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဝီ ကာလာင် တဝ်း၊ “ဆေ ဘေ ဒီ ဝီ တး ဘိုင် အုဝ် ဘော ကွယ် နှိမ် နှိမ်၊ အုဝ် ဒီ ချွတ် ဘေ။ ဆေ ဘေ ပီနှိမ် နဝ်း ဘေ ဘော ညှိုမ် အုဝ်၊ ဘေ ဒီ ဝီ မိုဝ်း ပ့လူမ် မိုဝ်း ဟဲန့်။” မာလဲ၊ ဘေ ယီ ဟဲ့ ဝဲန် ဂြုဝ်း တီ၊ တူ ဘူင် ဒူပ်။

16 ဘေ ဟဲ့ တဝ်း ဒီ ပဝ့် မင်ပြွင့် ဘေ၊ လေး ဟာဝ် ခြန် ခြန်၊ တဲး ဘေ လွတ် ဒီ ရန်ဆူ ဘေ။ ကူပ် န့ ပါယ် တီ ဘေ ဒီ ဘော လေး တဝ် ခြန် ခြန်။ ဘေ မိူဝ် ဟဲ့ တဝ်း၊ “ယေ ဒီ ပဝ့် ဒုဝ် အီ ခြန် အီ ဟဲ။” ပါယ် တီ ဘော ဂေ အီ ခုင်ခြး ဘေ၊ ဂေ မိူဝ် ဒီ ခြန် ဒီ ဟဲ။

17 ရန်ဆူ ဘေ အူ ဝီ ဒီ ဘော ကာစွှာ့၊ တဲး ဘေ အူ ဟြဲန့် ဝီ တဝ်။ ရန်ဆူ ဘေ ဖန် ဝီ၊ ဂေ ဒီ ဘော ကာဘျုဝ် ဘေ ဘောကာဂ့လျီတ် တဝ် ဟာဝ်။ ဟဲ့ ဟွတ့်၊ ဂေ အီ ဆီ ဂိတ်၊ ဂေ ပီ အာလာမ် ပီ ဆမ် ဂေ ဒဲင် နွန်။

18 မာလဲ၊ ဇဝ်ဖြာ ယီ ဆီ နှဝ့် ဒီ ဂေဇူ ဘေ။ နဝ်း ရွက့် အန် တဲး အန် ကာဝေ ဘေ။ ခုဝ်၊ အန် ဘူင် နာ မုး နာ မှာန် ဆေဆေ။ ဂေ အီ ဘိုင် ဇဝ်ဖြာ၊ ဂေ ဒီ ဘျုဝ် ဒါခိုယ်။

19 အိုယ် ဘေ အီ ကွယ် ဒဲင် နွန် ဇီအူန် ခဲင် မိူင် ယေရူဆာလဲမ်၊ ဘေ အာဝ် ဟူ ကာဒုး ဒီ က့လိုဝ်၊ အာဝ် ဟူ လုဝ် ယာမ်။ ဇဝ်ဖြာ အီ နပ် ဒီ ရွက့် ကာဝေ ဘေ။ ဒေါ ဆာခိုဝ် ဒဲ့ ဘေ ဒီ အန်၊ အန် ဒီ ထူမ် ဂြုဝ်း ဘေ အူ ဇေန့်။ 20 ဇဝ်ဖြာ ပီ ဘော တဲး န့ ညှာပ် ဒီ နဝ်း ဘေ၊ တဲး န့ ပီ ပီ ဒီ ဟူမ် ဘေ၊ ဘော ဒွါ ဒုက် ဒီ ဘေ အီ ပီ ပီ ဒီ ဒျီင် ဘေ မိူဝ်၊ အန် ယီ ဒီ စွယ် ဘေ။ ဒါ ဆာရာ အီ ဒီ မာနုဝ် ဘေ၊ အာဝ် ဟူ လုဝ် ချြီင် ဒီ ဘေ။ ဂေ ဒီ ဝီ ကွယ် ဒူပ် ဘေ၊ တဲး ဘေ ပွိုန် ဒီ ဝီ ယိုဝ် ဂေ။ 21 ဘေ ဒီ ဘော ယိုဝ် ဂြုဝ်း အီ တဝ်း ဒီ ပန် ဘေ၊ “န့တေန့် ကွယ် ဒီ နီ၊ တဲး ဘေ ဟာဝ် ဆိူဝ် ဆိူဝ် ဒူပ် န့တေန့် တီ။” အန် ဒီ ဘော ကာလာင် ပန် မှဝ် လုဝ် ဝး နာ အး ဘော ဝး နာ ဂ။ 22 ဘေ ဒီ ဘော ဝီ ဒိုဝ်း ဝဲန် အာရိုပ် ရာင် ပဲ့ ဟဲ့ လှိုပ် ဘေ ရွိုန်၊ ဘော အာရိုပ် ရာင် ပဲ့ ဟဲ့ လှိုပ် ဘေ ခြိဝ်။ ဘေ ဒီ ဘော ဝီ မာတ် န့ မုး ကြုဝ် အီ ကာဒါတ့်။ ဘေ ဒီ ဘော ဝီ ကာလာင် တဝ်း၊ “အိုဝ်၊ ဟဲ့ ဟွတ့် ဝဲန်။ အာဝ် ဟူ လုဝ် ညှာပ် ကူပ် အန်။”

23 ဆေ ဘေ ဟဲ့ ဟွတ့် ဆမ် ခြိုင် ဆီမာ ဒွန် မျုဝ်၊ ဇဝ်ဖြာ ဒီ ဘော တဲး ဂ့လာယ် စုဝ်း၊ တဲး ပီ ဆမ် ဘေ နပ် ဒီ ဟြေး နပ် ဒီ တာင် ဘော မိုဝ်း ဘ့လေ ကိူန်။ အန် ဒီ တဲး ဘော ဖိုင် မာဘူ ဂေ မာမက် ဘေ ပွိုန် ဒီ ဟူမ် ပေတ့် ဒူင် ကာဝဝ်း ဒါခိုယ်။

24 မာမက် ဘေ ဘော မာလာ အီ ထဲ မာန် ထဲ ဒူင် နာ ဘေ တွိုန် မိူဝ်၊ ဂေ ဒီ ဘော ပွိုန် ဒီ ဟူမ် ပေတ့် အီ စဲ ကာဆူ ဆယ့် ဘော ငှုဝ် အီ ဟဲ့ ခြိုင် တဲး န့ ဆီချာ။

25 ဆီငဲ တီ အိုမ် ဘ့လဲင် ဒီ ဘော တး ဒွန် နွန် ဒွန် ဒီလယ့်။ ဒေါ အန် တီ န့ ဒီ ဘော မိုဝ်း ဒူအီ ကိူန် အီ လာယ် ကာဂုဝ်း၊ လာယ် ကာငဝ်း။

26 ဘော မာဂျီန် ဒီ ဘ့လာင် ကာဆဝ် ပီ ဆီငဲ။ ဆီငဲ ဒီ ဘော ဝဲ ဘ့လာင် လွှိုမ် ဒေါ တီ နီ န့ မုး ပေါ ဘူ ဘုန်။ ဘ့လာင် ဆီငဲ တီ၊ န့ ဒီ ဘော ပီ အီ ဘ့လာင် ဘူ ဆီငဲ၊ ဟဲ့ ဝီ ကာဇု ဘဲန် အူ ဆီငဲ။ လွင် အန် တီ၊ န့ ဒီ ဘော ဘဲန် ဆီငဲ ပန် ဒီ ဆီနမ် ဇဝ်ဖြာ ဒီ ဂေ ဒူအီ ပီ အိုပ် အန်။ အန် ဟဲ့ ဒွိုမ် မာနုဝ် ဂေ၊ တဲး ဂေ မိုဝ်း ဆဝ် မိုဝ်း ဒိမ်။ အန် ယီ ဝီ တဲး ဂေ ကဲန် ပန် အန် တီ။

27 တဲး ဘေ လှုဝ်း ဟဲ့ လှေန့် ကာဆဝ် ဒေါ ကာလာင် ဇဝ်ဖြာ စိူဝ် အန် ဒီ ဘေ၊ တဲး ဘေ နပ်။ ပန် ဒီ တး အန် ခါ နီ၊ နဝ်း အန် ဒီ ရူ ဒီ ဂေ အီ တူ နမ်လှုဝ်း အန်။ ဘော ဒက် ငဝ် ဝွင့် ဒီ ကွယ် ရူပ် အန်၊ တဲး ဘေ နပ် ခဲ့ ရူ အန်။ ဘော ဂြုဝ်း ပီ ကာလာင် အန် ဇဝ်၊ န့ ဒီ ဘော ပီ ငဝ် အီ တဲး န့ လိုဝ်း ခဲ့ စာဝ် အန်။

28 ဖွိုမ် ပီ ဟိုဝ်း လေး အန်၊ န့ ပီ အိုမ် အီ မ့ပုန် တူတ့် ဒွန် မျုဝ်။ ပါယ် တီ အန် ဘော ကာယဝ်း ဒူအီ၊ တဲး န့ ပီ ဒူအီ ခြိုင် လေး ခါမ်။ အန် မိူဝ် ဘူင် တဲး န့ ပီ ဒူအီ ဟပ် န့ကဝ့် ခဲင် မူတ့် မ့ပြွင့်၊ တဲး အီ တိုန့် ဟာဝ် ပေါ ပ့လုဝ့်။

29 မာလဲ၊ ဘေ အီ မုး ဒူအီ ပီ အိုပ် ဇဝ်ဖြာ၊ ဘေ ယီ ဒီ ဝီ ခူယ် ဒါခိုယ် ဘော တဝ်း မှုဝ် ခဲင် မှိုဝ်၊ တဲး န့ ပီ ဒေါ လာယ် ဟျီင် ဘေ ခဲင် ဘ့လွယ် အီ ဆီငါ ဘွတ် တွိုန်။ ဘေ ဒီ ဘော ဘျုဝ် ဒါခိုယ်၊ တဲး န့ ပီ ဝီ အီ ဘုတ် ဝဝ် အီ ဟာဝ် ဒီ နွန် ဇဝ်ဖြာ၊ ဇဝ်ဖြာ အီ ပီ ဒါအာင် မာဝ် အီ ဂွင့် ရဲ ဂေ ဒူအီ အီဆာရေလ တွိုန်။

30 ဇဝ်ဖြာ ဒီ ဘော တဲး ဂေ ယိုဝ် ဂြုဝ်း အန် အီ မိုဝ်း ပွုန် တာင်။ ဂေ ဒီ ဘော လုဝ် ခမ် ခဲ့ ရူ အန် ဇဝ် တီ။ န့ ဒီ မိုဝ်း ဘော ငဝ် ဘော ခုန် တာင်၊ ဂ့လာယ် တာင် ဘော ဘျြီ။

31 ပါယ် တီ ဂေ ဒူအီ အာဆူရီယာ ဒီ ဘော ကာစွာ ဒေါ ယိုဝ် ဂေ ဂြုဝ်း အန် ဇဝ် အီ မိုဝ်း ပွုန် တာင် တီ။ န့ ဒီ ဘော ပီ အန် ဒီ မး ဂေ တာ န့ကြွုန်။

32 ဇဝ်ဖြာ ဒီ မး ဂေ တာ ဒဲ အန်။ ဒေါ မး ဇဝ်ဖြာ ဒီ ဂေ ဒွန် ဇေန့်၊ ဂေ ဒူအီ ပီ အိုပ် ဇဝ်ဖြာ၊ ဂေ ဒီ ဘော က်ု ဂြိုင် ဘး ဒိင်။ ဇဝ်ဖြာ ဒီ ဘော ကာဂုဝ်း ဒီ ဂေ ဒူအီ အာဆူရီယာ ပါယ် တီ။

33 ခုဝ်၊ ဒူင် ပီ ဒုဝ့် ကာဆိုမ် ဂေ ဘဲန် မျုဝ် ဘဲန် မျုဝ် ဟဲ့ ကွယ် လှေန့်။ ငဝ် အီ ဒီ ဒုဝ့် ကာဆိုမ် ဇဝ်ဖြာ ခုန်ဒီခမ် အာဆူရီယာ တီ၊ ဟဲ့ ဟွတ့် ရဲန် အုန် ပါယ် တီ။ ဂေ ဟဲ့ ခပ် အုန် ဟေ ကိူန်၊ တဲး န့ ဘဲန် ကာနူမ် တာင်။ ဇဝ်ဖြာ ဒီ ဟိုဝ်း ဖွိုမ် အန်၊ တဲး န့ လေး ဘဲန် ငဝ် အီ ကုး ဟဲန့် ကာဆဝ်။