1 ဂေ အီ ဟာဝ် မှာန့် တဲး ဒူအီ အဲဂိုပ် စွယ် ဂေ ဘော ဂေ အီ ဘိုင် ဟဲန့် မင်ပြွင့်၊ ဂေ ဒီ ဇမ် ဒုက် တာင်။ ဘော ဂေ အီ ဝီ နဝ်း တာင် ဒီ ဒါ ဆိုက် ခဲင် မိူင် အဲဂိုပ် အီ ဟဲ့ ကိူန်၊ အီ မိုဝ်း ပ့လူမ် မိုဝ်း ဟဲန့်၊ အီ ဟဲ့ မိုဝ်း ဘော လက်လဝ် ဘော မ့ပြွင့်၊ ဂေ ဒီ ဇမ် ဒုက် တာင်။ ဂေ အာဝ် ဟူ ဝီ နှဝ့် န့ဒဝ့် ဇဝ်ဖြာ အီ ဆီငါ ဘွတ်။ ဂေ မိူဝ် တူ ဝီ ဒီမွှတ် အာကျာမ် အာငျာန် အန်။

2 အန် ဇဝ် ဟဲ့ မိုဝ်း အာငျာန်။ အန် နပ် ဒီ ဘူင် တဲး ဒူအီ လိုဝ် စှိုမ်။ အန် ဇဝ် မိူဝ် တူ ကာဝိဝ် ဂြုဝ်း ပဲ့ ဟဲ့ ဒွိုမ် ကာလာင် အန်။ အန် ဒီ ဒမ် မှာပ် ဒီ ဂေ ဒူအီ အီ တူ မွှိုမ် ဘော ဒီ ဒူအီ အီ စွယ် ဂေ။

3 ဂေ ဒူအီ အဲဂိုပ် တီ၊ ဂေ ဘော မုး ခဲ့ ဒူအီ။ ဂေ တူ မုး ဇဝ်ဖြာ။ မ့ပြွင့် ဂေ မိူဝ်၊ မုး ခဲ့ ယင်၊ အာဝ် မုး နဝ်း ဖွိုမ်။ ဆေ ဇဝ်ဖြာ ဆူင့် ဒဲ အန်၊ ဂေ ဒူအီ ပီ နဝ်း တာင် ဘေ၊ ဂေ ဒီ လိုဝ် စှိုမ်။ ဘော ဂေ ဒူအီ အီ လုဝ် အီ စွယ် ဂေ၊ ဂေ ဒီ လိုဝ် စှိုမ်။ ဂေ ဘော အာ မျုဝ် ဒီ လိုဝ် စှိုမ် ဒီ ရိုမ် အူ ဇေန့်။

4 ခုဝ်၊ ဇဝ်ဖြာ ဟဲ့ တဝ်း၊ “ဆေ မာခြင်ဆီ နှိုမ် ဟဲ့ ကဝ့် ယမ် မာဘူ၊ အန် ဒီ ဘော ကာအိူန်၊ ဘ်ု ဒုဝ် တီ။ ဆေ န့ မိုဝ်း ဖိုင် ဂေ ဒါ အီ ဟျီင် မာဘူ၊ ဂေ ပီ ဘော ဒတ် ရျီင် ခဲ့ မှဝ် မိူဝ်၊ မာခြင်ဆီ တီ ယီ တူ ဒိူန် တူ တဝ်။ ပါယ် တီ အာဝ် မိုဝ်း အာဆေ အီ ပွိုန် ခြဲ ဇဝ်ဖြာ အီ အိုပ် တူတ့် ဒွန် မျုဝ် ဒေါ တး ကာဂုဝ်း အန် ဒီ ရန်ဆူ အန် ဒဲင် နွန် ဇီအူန်။

5 န့ ဘော ပီ မာဆိမ် အီ ဘိုန့် ဝိဝ် ဘိုန့် ဝေန့် ဒဲင် ကာဟုန် အန်၊ ဘ်ု ဒီ ဂွင့် ရဲ ဂွန် အန်။ ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် မိူဝ် ဒီ ဂွင့် ရဲ ဂေ ဒူအီ ခဲင် မိူင် ယေရူဆာလဲမ်။ အန် ဒီ ဘော ဂွင့် ရဲ ဂေ ဘော ထုတ် လေး ဂေ ဘော ချွတ် ဂေ။”

6 “အိုယ် ဘေ ဒူအီ အီဆာရေလ၊ ဘေ ဟဲ့ ဘူင် မှာပ် ဘူင် အီ တူ မွှိုမ် ဘော ဟဲ့ ကာဘး ဒီ အန် ဇဝ်။ မာလဲ၊ ဒေါ တီ နီ၊ တဲး ဘေ ဝီ တး ကာဒိုက် ကာဒဝ့် ဒီ အန်။ 7 ခုဝ်၊ ဆီငဲ အန် တီ၊ ခဲ့ ကွယ် ဘေ ဘောကာဂ့လျီတ်၊ ဘေ ဒီ ဘော ကာဖြူမ် ဒီ ဝဲန် အာရိုပ် ရာင် ပဲ့ ဟဲ့ လှိုပ် ဘေ ခြိဝ် ဂေ ရွိုန် တွိုန်၊ ပဲ့ ဟဲ့ ဘူင် ဘေ၊ တဲး န့ ဘဲန် မှာပ် ဒီ ဘေ။

8 မိူင် အာဆူရီယာ ဒီ ဘော လိုဝ် စှိုမ် ဒီ မာပွါ့ လာင်။ မာလဲ၊ န့ ယီ တူ မုး မာပွါ့ လာင် ပီ တာ ဒူအီ။ ဂေ ဒူအီ အာဆူရီယာ ဒီ ဘော တဝ် ဒါ ဆိုက်။ ဒူအီ နှိုမ် ဂေ ဒီ ဘော ဘဲန် မှာယ် အီ ဟဝ်။

9 ခုန်ဒီခမ် ပီ ဘိုင် ဂေ မိူဝ် ဒီ ဘော ယုဝ် ကာဆဝ် ဘော တဝ်။ ဂေ အာမူ အာမာတ် အန် ဒီ ဘော ကာစွာ ဘော ဘ့လေး ဝဲန် အာလာမ် ပီ ဂူင့် ဂေ။” ဇဝ်ဖြာ ပီ ကြိုပ် ဒူအီ ဒဲင် နွန် ဇီအူန်၊ အီ ဟဲ့ တဲး ငဝ် ကာဆိုမ် ပီ လှူ ဂေ ခဲင် မိူင် ယေရူဆာလဲမ်၊ အန် ဟဲ့ ကာလာင် အုန် ပါယ် တီ။