1 ဘ်ု ဘေ ယွတ်၊ န့ ဒီ မိုဝ်း ခုန်ဒီခမ် အူ ကာဒင် အီ ဒီ အိုပ် မာန် မိူင် ဘော ဆုင်ဖျာတ် ဆိူဝ် ဆိူဝ် မှာန် မှာန်။ ဂေ အာမူ အာမာတ် အန် ဒီ ဘော အိုပ် မာန် မိူင် ဘော ဘူင် ဒူပ် ဒါရာ။

2 ဒါ တာင် တီ ဒွန် အီ ဒီ ဘော ပီ ကာပ့လုယ် အီ ရဲ ခုန်၊ တဲး အီ ပွိုန် ဒီ တး ခြုတ် တး ဘိုင် ဒေါ မိုဝ်း ခုန် တာင် တး။ ဂေ ဒီ ဘော ပီ ဘ့လဲင် အိုမ် တာင် အီ လှဲ ဟာဝ် ခဲင် ဒူင် ကာဟဝ်း။ ဂေ ဒီ ဘော ပီ ဘော မာဝ် ဒါအာင် တာင် အီ တဲး န့ အပ် ဒူင် ကာဂ့လ ကာဂ့လဲန့်။

3 ပန် အန် တီ ငါယ် ဂေ အီ ယိုဝ် ဆီချာ၊ အာဝ် ဟူ ကာပျွယ်၊ အာဝ် ဟူ မုဝ်။ ဟျုဝ့် ဂေ အီ ထူမ် လွင် အန် တီ မိူဝ်၊ ဂေ ဒီ ဘော ထူမ် ဆီချာ။

4 ဂေ အီ တူ မိုဝ်း နဝ်း ကာဟဝ်း၊ နဝ်း အီ ငှိုယ် ရူ၊ ဂေ ဒီ ဘော ဘူင် ဒူပ် အာငျာန် ဘွတ်။ ဘော ဂေ အီ ဟဲ့ ကာလာင် ဂြုဝ်း ဟဝ့်၊ ဂေ ဒီ ဝီ ပွိုန် ဒီ ကာလာင် ဆီချာ၊ ကာလာင် ဘြီ။

5 ဆေ ဒူအီ တူ မိုဝ်း အာငျာန်၊ အီ ဟဝ် မိူဝ် တူ တဝ်း အန် မုး ဒူအီ မွှိုမ် ဒူအီ ဘွတ်။ ဒူအီ အီ ဆီမာ ကာလုဝ် မိူဝ်၊ ဂေ တူ တဝ်း၊ အန် မုး ဒူအီ ဆိူဝ် ဆိူဝ် မှာန် မှာန်။

6 ခုဝ်၊ ဒူအီ အီ တူ မိုဝ်း အာငျာန်၊ အန် ဒီ ဘော ကာလာင် မီ ဂြုဝ်း အီ တူ မိုဝ်း ဒီခုဝ်။ ခဲင် နဝ်း အန် မိူဝ်၊ အန် ခြာမ် ဒီ ဘူင် မီ အီ တူ ဘွတ် အီ တူ မွှိုမ် ပီ တူ အိုင် ဇဝ်ဖြာ။ ခဲ့ ပီ ဘူင် အန်၊ န့ မုး တူတ့် အီ နဲန ဇဝ်ဖြာ။ အန် မိူဝ် တူ ယွတ် လိုမ်လာ ဂေ အီ ကာပြာန့် ပီ ဒီ ဟူမ်၊ တူ ဒွါ အိုမ် ဒီ ဂေ အီ ဆီ ဒျီင် အိုမ်။

7 ဂေ ဒူအီ ဟာယ် ဒူအီ မိူက်၊ ဂေ ဒီ ဘော ဘူင် နာ ဟာယ် ဆေဆေ။ ဂေ ခြာမ် ဒီ ဘူင် နာ တူ မွှိုမ် ဆေဆေ။ ဂေ ဒီ ကာလုဝ် ဒူအီ ဂိန်၊ ဘူင် တဲး ဂေ စှိုမ် တူတ့်။ ဂေ ဒူအီ ဂိန် တီ ပီ ဘော ကာလာင် နာ မုး နာ မှာန် မိူဝ်၊ ဂေ ဘော ဝီ ဟြေတ့် ပီ ဒီ ပါယ် ဒီ ပီ လွှက့် ဂေ ဒီ ဒူအီ ဒုက် ဒူအီ ဂိန်။

8 မာလဲ၊ ဂေ အီ မိုဝ်း နဝ်း ဘွတ် နဝ်း မွှိုမ်၊ ဂေ ဒီ ဘော ဘူင် နာ ဘွတ် နာ မွှိုမ်။ ခဲ့ ပီ လုဝ် ဘူင် ဂေ နာ ဘွတ် နာ မွှိုမ်၊ ဂေ ဒီ ဘော ဘူင်။

9 အိုယ် ဘေ အီဘိုန့် အီ ကွယ် ဘျုဝ် ဘျုဝ် ကျဝ် ကျဝ်၊ တဲး ဘေ ဆာဒိက်။ ဘေ အီ ကွယ် ဒီလူယ် ဒီလာယ်၊ တဲး ဘေ ထူမ် ပီ ကာလာင် အုဝ် နီ။

10 ဒေါ အန် တီ န့ ပီ ဘော ဟဲ့ ဇေ့ဇုင် ဒီ နဝ်း ဘေ မိူဝ်၊ ပန် နာ ဒီ တး၊ အာခြာဝ် နီ န့ ဒီ ဝီ ညှာပ် ဒီ နဝ်း ဘေ။ ခုဝ်၊ ဟေ မာငုန် အာဝ် ဟူ မိုဝ်း ဒီ ဘေတ့် ဘ့လေ အန်။ ဘော ဘ့လေ ဘဲန် မျုဝ် ဘဲန် မျုဝ် အာဝ် ဟူ မိုဝ်း ဒီ ဘေတ့်။

11 အီ ဟဲ့ ပွုန် တး နာ ပန် နီ၊ ဘေ အီဘိုန့် ဟဲ့ ဘျုဝ် ဒါခိုယ်၊ တူ မိုဝ်း ဒုက် တူ မိုဝ်း ညှာပ် မာဆေ။ မာလဲ၊ ဒေါ တီ နီ ဘေ ဒီ ဝီ မိုဝ်း ပီ ယုဝ် မိုဝ်း ပီ ကာစွာ။ တဲး ဘေ ဘုတ့် လေး ခြိုင် တာ ဘေ၊ ဝီ စှိုပ် ဒီ တာ ခြိုင် စာန် ကူပ် က့လိုဝ် ဘေ။

12 တဲး ဘေ လှယ့် ဘော က့လိုဝ် ကူပ် မာန် ဘေ ဂေ ဒူင် နာ ဘေ အီ ဟဲ့ ဒွိုမ် အွင်။ တဲး ဘေ ဘော ယာမ် ကူပ် ဟေ မာငုန် ဘေ အီ ဟဲ့ ဒွိုမ် မိုဝ်း ဘ့လေ မိုက် ကာဆဝ်။

13 ယွုန် မာအာတ့် ဂေ ဟေ မာအာတ့် ဒီ ဝီ လတ့်၊ ဝီ န့လုဝ်း ခဲင် ကာဒါယ် ဒူင် ကွယ် ဂေ ဒူအီ ပီ အိုပ် အုဝ်။ ပါယ် တီ တဲး ဘေ ဘော ယာမ် ကူပ် ဂေ ဒူအီ အီ ကွယ် ဘျုဝ် ဘျုဝ် ကျဝ် ကျဝ် ခဲင် ကာင် ဂေ၊ ဘော ဂေ အီ မိုဝ်း နဝ်း ဂျီတ် နဝ်း ယေန် ခဲင် မိူင် ဂေ။

14 ခုဝ်၊ ဟုဝ် ခုန်ဒီခမ် ဒီ ဘော ကာပျာတ့် လိုဝ်။ မိူင် ဒီ တာင် တွိုန် မိူဝ်၊ န့ ဒီ ဘော ရာမ်။ ဘော ဟုဝ် စာ အီ မုး ဒူင် ဘ်ု ဂေ မိူင်၊ န့ ဒီ ဘော လိုဝ် ကာပျာတ့်၊ အာဝ် ဟူ မိုဝ်း အီ ဝီ ဆမ် ဒေါ မှဝ်။ ဒူင် တီ မာလာ ပြဲ ဒီ ဘော ဝီ ဟာဝ် ဟာဝ် တး တး။ ဘော မာဘူ ဒီ ဘော တး ဟူမ် ပေတ့် ဒီ တီ။

15 န့ ဒီ ဘဲန် ပါယ် တီ တဲး န့ ကော ဇမ် အာခြာဝ် ဒီ ဒွါ ဇဝ်ဖြာ နဝ်း ဖွိုမ် အန် ဒီ အေ။ ကာဒါယ် အီ တူ ဘွတ် အီ တူ မွှိုမ် တွိုန်၊ န့ ဒီ ဝီ ဘဲန် ကာဒါယ် ဘွတ်၊ ကာဒါယ် မွှိုမ်။ မာန် ဂေ ဒူင် နာ အီ မုး ကာဒါယ် မွှိုမ် တီ၊ န့ ဒီ ဝီ ပီ အူင့် ဟေ။

16 ခဲင် ပြဲ ကာဟဝ်း တွိုန်၊ ဂေ ဒီ ဆုင်ဖျာတ် ဒူပ် ဒါရာ ဘော ခဲင် မာန် ဂေ ဒူင် နာ အီ ဘွတ် ကာဆဝ် ဂေ ဒီ ဘူင် ဒူပ် နာ မုး နာ မှာန်။

17 ကူပ် ဆုင်ဖျာတ် ဂေ တဲး န့ ကာရမ်၊ ဂေ ဒူအီ ပွိုန် ကွယ် ဒါခိုယ် ကွယ် ဂျာမ်ဆာ။ ကူပ် ဒူအီ ဒွန် အီ ဘူင် ဆိူဝ် ဆိူဝ် မှာန် မှာန်၊ န့ တဲး ဂေ မိုဝ်း နဝ်း ဂတ် ဂျီတ် အီ ညှိုမ် ဘိုင် ဇဝ်ဖြာ ဆေဆေ။

18 ဂေ ဒူအီ ပီ အိုပ် အုဝ် ဇဝ်ဖြာ၊ ဂေ ဒီ ပွိုန် ကွယ် ဒူင် အီ လွတ် အာဖေ အာရေ။ ခဲင် ကာင် ဂေ၊ ဂေ ဒီ ပွိုန် ကွယ် ဒီလှဝ် နှိမ် နှိမ်။

19 မာလဲ၊ ဂ့လာယ် ဂေ ဘျြီ ဒီ ဘော ဝီ စုဝ်း ခဲင် အူင့် ဟေ၊ တဲး န့ ဝီ စှိုမ်။ မိူင် ဒီ တူင့် ဒီ တာင် ဒီ ဘော ကာပျာတ့် လိုဝ်။

20 ဘေ အီ ဘြတ် ခြိုင် ဆီမာ ခူပ် ဘ့လဲင် အိုမ်၊ ဘေ ဒီ ဘော ဘျုဝ် ဒါခိုယ်။ ဘော ဘေ အီ ပွိုန် ဒီ ဘ့လေး ဖိုင် မာလာ၊ ဖိုင် မာဘူ ဘော ဖိုင် မာမက် ဘေ၊ တဲး ဂေ ဟူမ် ပေတ့်၊ ဘေ ဟဲ့ ဒါခိုယ်။