1 အိုယ် ဘေ အီ ဟဲ့ ဘူင် တဲး အီ ဟဝ် စှိုမ် ယီ တူ ခမ် အီ ဟဝ် ဘူင် ဝျီ့ ဒီ ဘေ၊ ဘေ ဒီ ဇမ် ဒုက် တာင်။ ဘေ ဟဲ့ ပီလွှက့် ဒီ အီ။ ဘေ ယီ တူ ခမ် အီ ဟဝ် ပီလွှက့် ဒီ ဘေ။ မာလဲ၊ ဝါယ် ဟဲ့ ဟွတ့် ဘေ ဘူင် တဲး အီ ဟဝ် စှိုမ်၊ ဘော ဘေ ဒီ ဝီ စှိုမ်။ ဝါယ် ဟဲ့ ဟွတ့် ပီလွှက့် ဘေ ဒီ အီ ဟဝ်၊ ဘေ ပီ ဝီ လုဝ် ခမ် အီ ဟဝ် ပီလွှက့် ဒီ ဘေ။

2 အိုယ် မဲ ဇဝ်ဖြာ၊ တဲး မဲ ကာဝေ ယေ။ ယေ နှဝ့် န့ဒဝ့် မဲ။ တဲး မဲ ဇဝ် ဂွင့် ရဲ ယေ ဒွန် ဆီငဲ ဆိန့် ဆိန့်ဝး။ ယေ မှာန့်၊ တဲး မဲ ဇဝ် ချွတ် ယေ ဒေါ မိုဝ်း ယေ အာဖေ အာရေ။

3 ဂေ ဒူအီ ကိူန် ဒီ ဘော ကာဖြူမ် ဒီ တဝ် ကူပ် ဟဲ့ ယိုဝ် ဂေ ဆီနန် ဆီနိူင်။ ဂေ ဒူအီ ဘဲန် မျုဝ် ဘဲန် မျုဝ် ဒီ ဘော ကာစှူတ့် တဝ် ဒေါ တး မဲ ဇဝ် ဘော ဘျ ပွုန် မဲ။

4 ဒူအီ အီ ဖာတ် ဒိုဝ်း ကြုဝ်ကြာမ် အီ ဟဝ်၊ ဂေ ပီ ဝလွာ အီ ဒိုဝ်း ကာဇု ကိူန် ပီ ဒီ ဟူမ် အန်။ ဂေ ဘော ဖာတ် ကြုဝ် အီ ဟဝ်၊ ပီ ဖိုင် မာအာဇူင့် တး ဟူမ် တူတ့်။

5 တဲး အေ အိူပ် မျုက် ဇဝ်ဖြာ။ ခုဝ်၊ ဇဝ်ဖြာ ဟဲ့ အိုပ် တူတ့် ဒွန် မျုဝ်။ အန် ဇဝ် ဒီ တဲး ဒူအီ ခဲင် မိူင် ယေရူဆာလဲမ် နပ် ဒီ ဆုင်ဖျာတ် ဒူပ် ဒါရာ၊ ဘော ဆုင်ဖျာတ် ဆိူဝ် ဆိူဝ် မှာန် မှာန်။

6 အန် ဇဝ် မုး ဒူင် ဘိုင် ယေ ဆေဆေ။ အန် ဇဝ် ဒီ ဂွင့် ရဲ ဂေ ဒူအီ ပီ အိုပ် အန် ဘော ဒွါ အာငျာန် ဒီ ဂေ၊ ဘော တဲး ဂေ နပ် ဘဲန် မျုဝ် ဘဲန် မျုဝ်။ အာဆေ ရုဝ်ဆေ ဘော ယုဝ် ဇဝ်ဖြာ ဟဲ့ ပီ အန် မိုဝ်း ခါဂုန် ဘွတ်။

7 တဲး ဘေ ယွတ်၊ ဂေ ဒူအီ ကျ ကွယ် ဒီဂ့လ ဘော ဒတ် ဒဲ့ တဲး န့ မိုဝ်း အီ စွယ် ဂေ။ ဂေ ဒါလာမ် အီ တး ကာလာင် ဂြုဝ်း ဆီ လာယ် ကာလဝ့်၊ ဂေ ဘော ယာမ် တာင်၊ ဒတ် တာင် ကာဆဝ်။

8 ဒူပ် န့တေန့် တာင်၊ န့ ဒီ ဘော ငွင့်၊ အာဝ် ဟူ မိုဝ်း ဒူအီ အီ ဟာဝ် ဟာဝ် တး တး။ ပဲ့ ကာဒိက် ဆတ်ဇာ ပီ လာယ် ကာဆဲန့် အီ၊ ဂေ ဟဲ့ ဟွတ့် ဘူင် ကာပျာတ့်၊ ဟဲ့ ဟွတ့် လိုဝ်။ ဂြုဝ်း ပီ ကာလာင် ဆက်ဆေ၊ အာဝ် မိုဝ်း အီ ညှိုမ်။ ဒူအီ မိူဝ်၊ အာဝ် ဟူ လာယ် ရီမာတ်။

9 မာန် မိူင် ဘော ပီ ဒူအီ ဟဲ့ ဘဲန် နဝ်း လိုဝ် နဝ်း တျီ့။ ပြဲ ဒီ နွန် လေဘာနုန် ဒီ ဘော ဟျီ့ ကာဟဝ်း၊ ပီ ဒူအီ အီ ဟဲ့ မွှိုမ် ဆာယ်။ ဒီလယ့် အီ စိူဝ် ဆာရူန် အီ ဒွိုမ် မုး ကာဒါယ် ဘွတ် ကာဒါယ် မွှိုမ်၊ န့ ဒီ ဝီ ဘဲန် ပီ ပြဲ ကာဟဝ်း။ လှာ ဟေ ဒီ နွန် ဘာဆန် ဘော ဒီ နွန် ဂါမေလ ဒီ ဘော ဆာဂ့လုး စုဝ်း။

10 ဇဝ်ဖြာ ဝီ တဝ်း၊ “ဒေါ တီ နီ၊ အုဝ် ဒီ ယိတ့်။ အုဝ် ဒီ ဘျ ခဲ့ တာင် အာဖုင် ဒင်ခုဝ် အုဝ်၊ ခဲ့ ကာအာပ် အီ အိူပ် အုဝ်။

11 ဘေ ဟဲ့ ခြာမ် ဒီ ဘူင် အီ တူ မိုဝ်း ဒီခုဝ်။ န့ ပီ ခါမ် ဂေ ဟျြီင် ပီ ဒုဝ့် အီ ခဲင် ငဝ်။ ဘော ဖွိုမ် ပီ ဟိုဝ်း ဘေ၊ ဟဲ့ ပီ ငဝ် အီ ဝီ ဒုဝ့် ကာဆိုမ် ဘေ။

12 ခဲ့ ကွယ် ဒူအီ ဒွန် မျုဝ်၊ ဂေ ပီ မာဝ် ထုန် ပဲ့ ဟဲ့ ဒုဝ့် အီ။ ဂေ ဒီ ဘော ပီ ဘော ဒဝ် မာအာတ့် ပီ ဒုဝ့် ဝဲန် အီ ခဲင် ငဝ်။”

13 ဘေ ဒူအီ အီ ကွယ် တူင့်၊ တဲး ဘေ ထူမ် လွင် ပဲ့ ဟဲ့ ဘူင် အုဝ်။ ဘေ ဒူအီ အီ ကွယ် ကာတတ်၊ တဲး ဘေ ကာလာင် ခဲ့ တာင် အာဖုင် ဒင်ခုဝ် အုဝ်။

14 ဂေ ဒူအီ ခဲင် မိူင် ဇီအူန် အီ မိုဝ်း မှာပ်၊ ဂေ မိုဝ်း နဝ်း ယုဝ်။ ဘော ဂေ အီ တူ ညှိုမ် ဇဝ်ဖြာ၊ ဂေ ဒီ ဘော ယုဝ် ကော ဒီယေန့်။ ဂေ ဒီ ဘော တဝ်း၊ “အာဝ် မိုဝ်း အာဆေ အီ ပွိုန် ကွယ် ခဲင် ငဝ် အီ ကုး ဆေဆေ။ အာဝ် မိုဝ်း အာဆေ အီ ပွိုန် ကွယ် ခူပ် ငဝ် အီ ကုး ဆေဆေ။”

15 ဆေ ဘေ ယီ ကာလာင် ဆိူဝ် ဆိူဝ် မှာန် မှာန်၊ ဆေ ဘေ တူ ဒိုဝ်း ပွုန် ဘေ ဝီ ပုဝ်း ဒီ ဟူမ် ဒူအီ ဖ့လာန်၊ တူ ဒိုဝ်း ဒီ ဟူမ် လက်ဆွင် ပီ ပြာ အီ ဟဝ် ဒီ ဒွါ၊ ဆေ ဘေ မိူဝ် တူ ဟြေတ့် ဒီ ဒူပ် ဒူအီ မိူက် အီ ဟြေတ့် ဒီ ငဝ်း အာဆာက် အီ ဟဝ်၊ ဘော တူ ယွတ် အီ ဟာယ် အီ မိူက်၊

16 ဆေ ဘေ ဘူင် ပါယ် တီ ဘေ ဒီ ဝီ ပွိုန် ဒီ ကွယ် ဆီချာ ကွယ် နှိမ် နှိမ်။ ဘေ ဒီ ဝီ ပွိုန် ဒီ ကွယ် ဒါခိုယ် ကွယ် ဂျာမ်ဆာ ပီ ဘေ ဟဲ့ ပွိုန် ဒီ ကွယ် ဒူင် အီ ဟဲ့ မန် ဆီချာ။ ဘေ ဒီ ဝီ မိုဝ်း ဘော ပီ ဒီ ဟူမ် ပီ ဒီ ဒျီင်။

17 ဘေ ဒီ ဝီ ပွိုန် ဒီ ယိုဝ် ခုန်ဒီခမ် အီ မိုဝ်း အာဖုင် ဆာရေ၊ အီ စှိတ် ကာဆဝ်။ ဘေ ဒီ ဘော ယိုဝ် အန် အိုပ် မိူင် အီ တာင် အီ ကာဝဝ်း။

18 ဘေ ဒီ ဘော ဝီ လှုဝ်း ဘော ဇေန့်ဇာ လွင် ပဲ့ ဟဲ့ ဒွိုမ် ယုဝ် ကာဆဝ် ဘေ။ ဘေ ဒီ ဘော ဝီ တဝ်း၊ “ဂေ ဒူအီ အီ တိး ဇာရာင် ဘော ဂေ ဒူအီ အီ ဆ ရွိုန် စိုင်၊ ဂေ ကွယ် ဒီ မှဝ်။း ဂေ အီ လဲပ် ဒီ ယွတ် ဒူင် ကွယ် ဟုဝ် စာ ခဲင် မိူင် အီ မုး ဒူင် အာရေ တာင်၊ ဂေ ဟဲ့ ဝီ ဟာဝ် ကွယ် ဒီ မှဝ်။း”

19 အုဝ် ယီ တဝ်း ဒီ ဘေ၊ ဘေ အာဝ် ဟူ လုဝ် ယိုဝ် ဒူအီ ဟာယ် ဘော ဒူအီ အီ ကာလာင် ဂြုဝ်း ပီ တူ နပ် ဘေ။

20 တဲး ဘေ ယွတ်၊ မိူင် ဇီအူန် ဒီ ဘော ဘဲန် မိူင် ဒူင် ဒီ ဘူင် ဘေ ဘ့လွယ် ပဲ့ ဟဲ့ စ်ု ဇဝ်ဖြာ ဘေ ဘူင်။ မိူင် ယေရူဆာလဲမ် ဒီ ဘော ဘဲန် မိူင် အီ ဟဲ့ ယေန် ဒါခိုယ်၊ မိူင် အီ မွှိုမ် ကွယ်။ န့ မုး မိူင် အီ ပီ ထိုပ် အီ တူ လုဝ် ကာထုဝ့် ဒေါ မှဝ်။ လွှက့် အန် မိူဝ်၊ အာဝ် လုဝ် ရိုတ့် ဒေါ မှဝ်။ ဝန် ပက် အန် မိူဝ်၊ အာဝ် ကာဒတ် ဒေါ မှဝ်။

21 ခဲင် မိူင် တီ၊ ဇဝ်ဖြာ အီ မိုဝ်း ပွုန် တာင် ဘော အာဖုင် ဒင်ခုဝ် တာင်၊ အန် ပီ အိုမ် ဘ့လဲင် တာင် အီ လှဲ ဒူင် ကွယ် အေ။ ခဲင် အိုမ် တီ ရိုဝ် ပီ ပဝ့် ဒါ ဆိုက် ဘော ရိုဝ် ဆင်ဖုဝ် အီ တာင် ကာဆဝ် ယီ တူ ပွိုန် ကာလုဝ်း ဟာဝ်။

22 ခုဝ်၊ ဇဝ်ဖြာ မုး ဒါ တာင် အီ ဆုင်ဖျာတ် ဒါရာ ဒီ အေ။ အန် မုး ဒါ ကာညာ အီ အိုပ် အေ၊ မုး ဘော ခုန်ဒီခမ် အေ။ အန် ဒီ ချွတ် အေ။

23 ဘေ ဒူအီ ဘဲန် မျုဝ် ဘဲန် မျုဝ်၊ န့ ပီ ဝန် ပီ ပက် ဘေ ဒီ ရိုဝ် ဘေ အာဝ် ဟူ ရိတ်။ ဘော ရွင့် ခဲင် ရိုဝ် ဘေ၊ အာဝ် ဟူ မန်။ န့ တူ တဲး ဘိက် အန် န့ ဘ့လး ဆီချာ၊ န့ တဲး ဘေ စှိုမ်။ ရန်ဆူ ဘေ ဒီ ဖာတ် ဒိုဝ်း ကြုဝ်ကြာမ် ဘေ ဘော ကာဆာင် ကာတဲ ဂေ။ ဒူအီ ပ့လဝ် ဂဲ့ မိူဝ် ဒီ ဘော ပွိုန် ဒီ ဒိုဝ်း။

24 ဂေ အီ ကွယ် ခဲင် မိူင် ယေရူဆာလဲမ် အာဝ် ဟူ မိုဝ်း ဒူအီ အီ တဝ်း၊ “အုဝ် ဟဲ့ ဆဝ်။” ဇဝ်ဖြာ ဒီ ဘော ဂဝ်း ဝဲန် တူတ့် မှာပ် ဂေ ဒူအီ ဘောကာဂ့လျီတ် အီ ကွယ် ခဲင် မိူင် တီ။