1 အိုယ် ဘေ ဒူအီ ဘဲန် မျုဝ် ဘဲန် မျုဝ်၊ တဲး ဘေ ဝီ တး၊ တဲး ဘေ ဘောကာဂ့လျီတ် တး ထူမ်။ တဲး ဒူအီ ဘော ကာဒါယ် ဘော ဒွန် မျုဝ် အီ ကွယ် ဒဲင် ကာဒါယ် ဘော ပွိုန် ဒီ ယိုဝ်။

2 ခုဝ်၊ ဇဝ်ဖြာ ဟဲ့ ရူ ဒီ ဂေ ဒူအီ ဘဲန် မျုဝ် ဘဲန် မျုဝ်။ အန် ဘော စာဝ် ဒီ ဒါ ဆိုက် ဂေ။ အန် ဇဝ် ဟဲ့ ဟွတ့် ဆုင်ဖျာတ် ဒီ တဲး ဂေ စှိုမ်၊ တဲး အီ ဟဝ် ငဝ်း ယမ် ဂေ။

3 ဒုဝ် ယမ် ဂေ မိူဝ်၊ ဂေ တူ ဘ့လေး ဝဲန် တဲး န့ အုး အမ် ဒွန် ပ့လုဝ့်။ နှာမ် ဂေ ဒီ ဘော လှဲ ဒဲင် နွန် ပီ အိုမ်။

4 ဆီမန့် အီ ကွယ် ခဲင် ဂါင်ဟြာဝ် ဒီ ဘော အမ် လာတ့် ပီ ဘ့လေ အီ ဟဲ့ ဆိန် လုတ်။ ဘ့လေန့် မိူဝ် ဒီ ဟြာယ် ပီ အီ ဆီလွယ် အုန် ပဲ့။ ဘော ဆီမန့် ဒီ ဘော စုဝ်း ပီ လှာ ဟေ မာငုန် ဘော လှာ ဟေ ဒီပူ။

5 အုဝ် ဇဝ်ဖြာ မိူဝ် ဟဲ့ တဲး ဆီမန့် ခဲင် ဂါင်ဟြာဝ် ဟြာယ်။ န့ ပီ ဒါ ဆိုက် ဟဲ့ ဒဲပ် ယမ် ခဲ့ ပွိုန် အန် ဒီ ဒဲပ်။ ဟဲ့ ဟွတ့်၊ အန် ဒီ ဝီ ဘူင် ဟာဝ် ဒီ ဒူအီ ခဲင် မိူင် အေဒူမ် ပါယ် တီ တဲး ဂေ ဒမ် မှာပ် ဒီ ဂေ။ အုဝ် ဟဲ့ ဟွတ့် ဆုင်ဖျာတ် ဒီ ဝဲန် ဂေ။

6 ဒီ မာပွါ့ လာင် ဇဝ်ဖြာ တီ၊ နှာမ် ဟဲ့ နုဝ့်။ န့ မုး နှာမ် ဂွန် မာဘူ ဘော နှာမ် ဂွန် မာပဲ။ န့ မုး ဘော ဘျြီင် အီ ဒိုက် ဒီ ဘ့လေ လမ် ဒုဝ် အာလူင့် ပဲ့ ဟဲ့ လှူ ဂေ။ ခုဝ်၊ ဇဝ်ဖြာ ဒီ ဘူင် ဘ့လွယ် လှူ တာင် ခဲင် မိူင် ဘုဝ်ဇာရာ။ အန် ဒီ ဘော ငဝ်း ယမ် ဒူအီ ခဲင် မိူင် အေဒူမ်၊ ပီ ငဝ်း ဂေ ဒုဝ် ဆတ် ဒေါ ဘူင် ဂေ ဘ့လွယ် လှူ။

7 ဘော ဒူအီ အီ မိုဝ်း ပွုန် တာင် ပီ မက် ပြဲ၊ ဂေ ဒီ ကေး ယမ် ဒူပ် အီ ဟဝ်။ ဘော ဒါ ဘာနှိုမ် အီ ပီ မက် အာလူင့် ဘော ဂေ အီ မိုဝ်း ပ့လူမ် မိုဝ်း ဟဲန့် ပီ မက် ဒီဆုဝ်၊ ဂေ ဘောကာဂ့လျီတ် ဒီ ယမ်။ န့ ဒီ ပီ မိူင် ဘော မိူင် မိုဝ်း မီ နှာမ် ဒီလူယ်။ ကာဒါယ် ဘော ကာဒါယ် မိုဝ်း မီ ဘျြီင် ဒုဝ် ဂေ တီ။

8 လွင် အန် တီ ဇဝ်ဖြာ ဒီ ဘူင် ဝျီ့ ပဲ့ ဟဲ့ ဘူင် အီ ဟဝ် ဒီ ဒူအီ အီဆာရေလ။ အန် ဟဲ့ ဟွတ့် အုန် အာခြာဝ် ပန် ဒီ ဝီ ချွတ် အန် ဒူအီ ခဲင် မိူင် ဇီအူန်။

9 ပန် အန် တီ၊ အိုမ် ဘ့လဲင် မိူင် အေဒူမ် ဒီ ဘော ဘဲန် ပီ ဘျြီင် န့ကေ အီ ဟဲ့ ဒုဝ့် ဒီ ငဝ်။ ကာပုး ခဲင် မိူင် တီ၊ န့ ဒီ ဘော ဘဲန် ဂန်ဒိူက်။ ခဲင် မိူင် တီ ဘော မိူင်၊ န့ ဒီ ဘော ပီ ဘျြီင် န့ကေ အီ ကာဆိုမ် ခဲင် ငဝ်။

10 ငဝ် တီ ဒီ ဘော ကုး ဒွင် ခိူန် ဒွင် ဝန်။ ဒက် ငဝ် တီ မိူဝ် ဘော လေး ဆေဆေ။ မိူင် တီ ဒီ ဘော ရာမ် ဆေဆေ ဒွန် စုဝ် ဒွန် ဘာန် ဟာဝ် နာ အာတ့်။ အာဝ် မိုဝ်း အာဆေ အီ ဒီ တး လိုပ် တး ဝဝ့် ခေါ အူ ဇေန့်။

11 မိူင် တီ၊ န့ ဒီ ဝီ မိုဝ်း မီ မာဒီဘုဝ့် ဘော မင်ဂိုဝ်း အီ ကွယ် ကော နုဝ့် နာ ခဲင်။ န့ ဒီ ဘော မိုဝ်း မာတီတုတ် ဘော မာကာအ။ ဇဝ်ဖြာ ဒီ ဝီ ဘူင် တဲး န့ ကာဝှ်ု ကာဝျှီန်၊ တဲး န့ ပီ ဒေါ ငွင့် အာတ့် ဖာန် ဘ့လေး အန် ကာဒါယ် နီ။ န့ ပီ ဇဝ်ဖြာ ဟဲ့ ဒိုဝ်း တး ဆေန့် မဲမီ ပီ တာ အီ ဆမ် ကာင်၊ ယီ ဂဝ် ခဲ့ ကိူန် အီ ကာဝှ်ု ကာဝျှီန် တီ။ န့ ဘော ပီ အန် ဇဝ် ဟဲ့ ဒိုဝ်း ဘ့လေ အာဖမ်၊ ကွဲ့ တဲး န့ မိုဝ်း ဒူင် ကာဆိူဝ် ဘော ဒူင် ဆီချာ ခေါ အူ ပ့လုဝ့်။

12 ဒေါ အန် တီ န့ မိူဝ် တူ မိုဝ်း ခုန်ဒီခမ် အီ ဒီ အိုပ် မိူင် တီ။ ဂေ အာမူ အာမာတ် မိူဝ်၊ အာဝ် မိုဝ်း ခေါ အူ ဝီ။

13 ခဲင် ဝဲင် ဟုဝ် ခုန်ဒီခမ်၊ န့ ဒီ ဝီ လေး ဒဝ် မာအာတ့် ဂေ ယွုန် မာအာတ့်။ ရဲင် မိူင် မိူဝ်၊ ပြဲ ဂေ ပေတ့် ဟဲ့ ဟွတ့် ဝီ ပုဝ့် တူတ့်။ န့ ဒီ ဝီ ဘဲန် ဒူင် ကွယ် မာတီတုတ် ဂေ မာဆုဝ် ပြဲ။

14 ဂေ မာဒုဝ် ပြဲ အီ ဟာယ် ဒီ ဘော ဟာဝ် ဝိဝ် ဟာဝ် ဝေန့် ဒူင် တီ။ ဂေ မာဆုဝ် ပြဲ ဒီ ဘော ကွယ် ပြုဝ်း ဒီ တီ။ ဂေ မာဒုဝ် ပြဲ ဒီ ဘော ကွယ် ရိုမ် ဒူပ် မာပြုဝ့် ဒူင် တီ။ ဘော မာပဲ ပြဲ ဒီ ဘော ဒဲ့ ဂိုက် အန်၊ ဘော ဂေ ဒုဝ် အီ လဲ ခဲင် မှိုဝ် ဒီ တး ဒီလှဝ် ဒီ တီ။

15 ဂေ မာတီတုတ် ဒီ ဘော ဘူင် ကာဟုန် ဂေ ဒီ တီ။ ဂေ ဒီ ဝီ ပွိုန်၊ ဝီ ကာနမ် ပွိုန် ဂေ တီ၊ တဲး န့ ကော ကး။ ဂေ ဒီ ဘော ဝီ လိုမ်လာ ဂွန် ဂေ တီ တဲး ဂေ ကော တာင်။ ဂေ မာဂ့လာင် အာမူင့် ဒီ ဘော တး ကွယ် ကာဇု ဒီ တီ ဘဲန် ဂူ ဘဲန် ဂူ။

16 တဲး ဘေ ဟြေတ့် ဒီ တိး ခဲင် ဘပ် ဇဝ်ဖြာ လွင် အန် တီ၊ ဟဲ့ ဟွတ့် ဒဲမ် အုန် လွင် ဒုဝ် ဂေ တီ ဒွန် ဒုဝ်။ အာဝ် မိုဝ်း ပီ ပိဝ် ဒီ ဒဲမ် ခေါ အူ ဒုဝ်။ ဒုဝ် အီ တူ မိုဝ်း ဂူ မိူဝ်၊ န့ တူ မိုဝ်း ခေါ အူ ဒုဝ်။ ဇဝ်ဖြာ ဟဲ့ ကာလာင် အုန် တဲး န့ ဘဲန် ပါယ် တီ။ နဝ်း ဖွိုမ် အန် ဟဲ့ စ်ု တဲး ဂေ တး ကာဇု ဒီ တီ။

17 ဇဝ်ဖြာ ယီ ဒီ ကာယဝ်း ကာဆာင် ကာဒါယ် တီ ဒီ ဂေ ဒူအီ အာမျုဝ် အန်၊ တဲး န့ ဘဲန် ခါဂုန် ဂေ မျုဝ် မှဝ် မျုဝ် အန်။ ဂေ ဒီ ဘော ကွယ် ခဲင် မိူင် ဂေ တီ ဆေဆေ။ န့ ဒီ ဘော ဘဲန် ကာဒါယ် ဒူင် ဘိုင် ဒူင် ကွယ် ဂေ ဒွန် စုဝ် ဒွန် ဘာန်။