1 ဒူင် ပြဲ ကာဟဝ်း၊ ဒူင် တူ လတ့် မာဆေ၊ န့ ဒီ ဝီ ဘဲန် ဒူင် ကြွိုမ် ဒူင် ဒါခိုယ်၊ ဒူင် ဟေန့် ဒီ ဝီ မိုဝ်း ပေတ့် ဂေ ဘုဝ်း။

2 န့ ဒီ မိုဝ်း ဘုဝ်း ဘဲန် မျုဝ် ဘဲန် မျုဝ် အီ စှိတ် ကာဆဝ်။ ဂေ ဒူအီ ဒီ ဝီ မိုဝ်း ဒီ ဒတ် တဝ်း မှုဝ် ကူပ် ဟဲ့ ဘျုဝ် ဒါခိုယ် ဂေ။ န့ ဒီ ဘော ဇေ့ဇုင် မိုဝ်း ဘော အာဖုင် ဒင်ခုဝ် ပီ နွန် လေဘာနုန်။ န့ ဒီ ဘော စှိတ် ကာဆဝ် မိုဝ်း ဆာရေ ပီ နွန် ဂါမေလ ဘော ဒီလယ့် အီ စိူဝ် ဆာရူန်။ ဂေ ဒူအီ ဒီ ဘော ယိုဝ် အာဖုင် ဒင်ခုဝ် ဇဝ်ဖြာ ဘော ဆာရေ ဇဝ်ဖြာ ပီ ကြိုပ် အေ။

3 တဲး ဘေ စွယ် ဂေ ဒူအီ အီ ဟဲ့ ဒီလှး၊ တဲး ဂေ ဝီ မိုဝ်း ဟဲန့်။ ဘော ဒဲ ဒူအီ အီ တူ မိုဝ်း ပ့လူမ်၊ တဲး ဘေ စွယ် တဲး ဂေ ဝီ မန် ဆီချာ။ ဘော ဆေ ကိန့်ကြူင့် ဟဲ့ ဒီယုး ဒီယေန့်၊ တဲး ဘေ စွယ်၊ တဲး ဂေ ဝီ မိုဝ်း ပ့လူမ်။

4 ဆေ န့ မိုဝ်း ဒူအီ အီ မိုဝ်း နဝ်း ယုဝ်၊ တဲး ဘေ တဝ်း ဒီ ဂေ၊ “ကွဲ့ ယုဝ်၊ တဲး ဘေ မိုဝ်း နဝ်း တာင်။ ဇဝ်ဖြာ ဒီ တး ချွတ် ဘေ ဘော ဒမ် မှာပ် ဒီ ရန်ဆူ ဘေ။”

5 ဟဲ့ ဟွတ့် ပါယ် တီ ဂေ ဒူအီ ငါယ် အပ် ဒီ ဝီ ပွိုန် ယိုဝ်။ ဂေ ဒူအီ ဟျုဝ့် ကာအာဝ် ဒီ ဝီ ပွိုန် ထူမ် ဆီချာ။

6 ဂေ ဒူအီ စေန့် စွှယ် ဒီ ဘော ဝီ ပွိုန် ယိတ့် ဒဲန် ယိတ့် ဂါ ပီ မာဇ။ ဂေ ဒူအီ အီ တူ နပ် ဒီ ကာလာင် ဂြုဝ်း၊ ဂေ ဒီ ဝီ ပွိုန် တဝ်း မှုဝ် ကူပ် ဟဲ့ ဘျုဝ် ဒါခိုယ် ဒီ နဝ်း ဂေ။ ဘော ဘ့လဲင် အိုမ် ဒီ ဘော လှဲ ဟာဝ် ခဲင် ပြဲ ကာဟဝ်း။

7 ကာဟာတ့် အီ ဒါတ် ကာဆဝ် ဒီ ဘော ဝီ ဘဲန် အိုမ် ဒိုင်။ ခဲင် ဒူင် ကာဒါယ် ကာဟဝ်း ဒီ ဝီ မိုဝ်း အိုမ် တုဝ်း။ ဒူင် ဒွိုမ် ကွယ် မာပြုဝ့် ဒီ ဝီ ဘဲန် နှူင် အိုမ်။ ဒူင် ဒွိုမ် မိုဝ်း မီ ပေတ့် ဒီ ဝီ မိုဝ်း ကာဘာင် ဂ့လူင့် ဂေ မဲအော။

8 ဒူင် တီ ဒီ ဘော မိုဝ်း န့တေန့် တာင် အီ စိူဝ် န့တေန့် ဆီငါ ဘွတ်။ ဝီ အီ တူ ဆီငါ တူ ပွိုန် ဟာဝ် ဒူပ် န့တေန့် တီ။ န့ ပီ ဘော မုး ဒူအီ ရိုဝ်၊ ဂေ တူ ကာလိုပ်၊ ဆေ ဂေ ဒူပ် န့တေန့် တီ။

9 ဒူင် တီ၊ အာဝ် မိုဝ်း မာခြင်ဆီ ခေါ အူ ဒုဝ်။ အာဝ် မိုဝ်း ဒုဝ် အီ ဟာယ် အီ ကာလုဝ်း ဝိဝ် ကာလုဝ်း ဝေန့်။ ဂေ ဒူအီ ပဲ့ ဟဲ့ ချွတ် ဇဝ်ဖြာ၊ ဂေ ဒီ ဒူပ် န့တေန့် တီ။

10 ဒူအီ ပဲ့ ဟဲ့ ချွတ် ဇဝ်ဖြာ ဂေ တီ၊ ဂေ ဒီ ဘော ဝေန့် ဇမ် မိူင် ယေရူဆာလဲမ်။ ဂေ ဒီ ဘော တဝ်း မှုဝ် ဒါခိုယ်။ နဝ်း ဂေ ဒီ ဘျုဝ် ဒါခိုယ် ဆေဆေ။ ဂေ မိူဝ် ဟဲ့ လွတ် ခမ် ဒုက် ညှာပ် ဒီ နဝ်း။ ဂေ တူ လုဝ် ဝီ က့လိုဝ် ဝီ ငှဝ် ဒေါ မှဝ်။