1 ခုန်ဒီခမ် အာဟေစကီ ဟဲ့ အိုပ် မိူင် ယူဒါ အာဒါ ဂိုဝ် ဒီ ဖွုန် ဆီနမ်။ ဒေါ အန် တီ ခုန်ဒီခမ် အာဆာခါရိပ် အီ အိုပ် မိူင် အာဆူရီယာ၊ အန် ဘော တး ကာဂုဝ်း ဒီ မိူင် အီ မိုဝ်း ရဲင် ဒွန် မိူင်၊ အီ ကွယ် ခဲင် ကာဒါယ် မိူင် ယူဒါ တွိုန်။ အန် ဘော ပွိုန် မိူင် တီ ဒွန် မိူင်။ 2 ဝါယ် အန် တီ၊ ခုန်ဒီခမ် အီ အိုပ် မိူင် အာဆူရီယာ တွိုန် ကွယ် ခဲင် မိူင် လာခိတ်။ အန် ဘော စ်ု ဒါ ဘုဝ် တာင် အီ အိုပ် ဒါ ဆိုက် အန်၊ တဲး ဘော အန် ဘော ဒါ ဆိုက် အန် ကိူန် ဟာဝ် ဒူင် ကွယ် ခုန်ဒီခမ် အာဟေစကီ ခဲင် မိူင် ယေရူဆာလဲမ်၊ စ်ု အန် တဲး အန် ချ ဒါ ဆိုက် အန်။ ဒါ ဘုဝ် တာင် တီ၊ ဟဲ့ တး ဇမ် ဒူပ် န့တေန့် အီ ဟာဝ် ဒူင် လး ဂေ ခြိုင် အီ ကွယ် ဘာင် အိုမ် ဒိုင် နာ ကွာ။ 3 ဒေါ အန် တီ အာအေယာခိမ် အီ မုး ဂွန် အာဟီလာခီ အီ အိုပ် ခဲင် ဟုဝ် ခုန်ဒီခမ် ဘော ဒါ စာရေ တာင် အီ စိူဝ် အာဆေဘာနာ ဘော ဒါ အီ စွယ် ဒါ စာရေ တာင် အီ စိူဝ် အာယုဝ်အာ အီ မုး ဂွန် အာဆာပ်၊ ဂေ အူယ် ဝီ တီ ဘော လေး ဟာဝ် ဒူင် ကွယ် ရန်ဆူ ဂေ တွိုန်။

4 ဒါ ဘုဝ် တာင် အီ အိုပ် ဒါ ဆိုက် အာဆူရီယာ တွိုန် ဘော ကာလာင် ဒီ ဂေ တဝ်း၊ “တဲး ဘေ ဝီ ဝေန့် ကာလာင် ဒီ ခုန်ဒီခမ် အာဟေစကီ လွင် ခုန်ဒီခမ် တာင် အီ အိုပ် မိူင် အာဆူရီယာ ဟဲ့ ဒီမွှတ် တဝ်း၊ ‘မဲ ဘိုင် အာဆေ၊ တဲး မဲ ယ ကာဂုဝ်း ဒီ အုဝ်။း 5 မဲ ထာင် ဆေ မဲ ကာလာင် မီ ဂြုဝ်း၊ န့ ဒီ တဲး မဲ မိုဝ်း အာငျာန် ဘော မိုဝ်း ပွုန် ဒီ ကာဂုဝ်း အွင်။း မဲ ဟဲ့ ယ ဝီ ကာဘး ဒီ အုဝ်။ ဒေါ တီ နီ၊ အာဝ် ဟူ မိုဝ်း အာဆေ အီ ပွိုန် စွယ် မဲ။ 6 ယွတ်၊ ဆေ မဲ ဘိုင် ခုန်ဒီခမ် မိူင် အဲဂိုပ်၊ အန် ပီ အီ ဒိုဝ်း မဲအော ဘဲန် န့ကြွုန်။ မဲအော တီ နပ် ဒီ ဒုး ဒဲ ဒူအီ အီ ဘိုင် အန် တဲး န့ ကာလှုး။ ခုန်ဒီခမ် မိူင် အဲဂိုပ် ဒီ ဘူင် ပါယ် တီ ဒီ ဒွန် အီ အီ ဘိုင် အန်။’ 7 ဆေ မဲ ပီ ဝီ တဝ်း ဒီ အုဝ်၊ ‘အုဝ် ဘိုင် ဇဝ်ဖြာ အီ မုး ဇဝ်ဖြာ ပီ ကြိုပ် ယေ။’ န့ တူ မိုဝ်း ဒီခုဝ်။ မဲ ဟဲ့ ဒွိုမ် ပျာတ့် ဝဲန် ဒူင် ကြိုပ် ဂေ ဇဝ်ဖြာ တီ၊ ဘော ကာစှူင့် လှူ အီ ကွယ် ဒူင် စာ ဘဲန် ပ့လုဝ့် ဘဲန် ပ့လုဝ့်။ ဟဲ့ ဟွတ့်၊ မဲ မိူဝ် ဟဲ့ တဝ်း ဒီ ဒူအီ အာယူဒါ ဘော ဒူအီ မိူင် ယေရူဆာလဲမ်၊ တဲး ဂေ ကြိုပ် မီ ဒူင် ပီ ဘျ မဲ ဒီ ဂေ။

8 ဒေါ တီ နီ၊ တဲး ဘော မဲ ဘော ခုန်ဒီခမ် အာဆူရီယာ အီ မုး ဒါ ကာညာ အုဝ် လာယ် ဇာပ်။ အုဝ် ဒီ ဒွါ မင်ပြွင့် အာ ဟြဲန့် ဒုဝ် ဒီ မဲ၊ ဆေ မဲ မိုဝ်း ဒါ ဆိုက် အီ ပွိုန် ပဝ့် ဂေ။ 9 ဆေ မဲ တဝ်း ဒီ ဘိုင် ဂေ ဒူအီ အာမျုဝ် အဲဂိုပ်၊ တဲး ဂေ ဒွါ ဒီ မဲ ဒါ ဆိုက် အီ ပဝ့် လက်လဝ် ဘော ဒါ ဆိုက် အီ ပဝ့် မင်ပြွင့် တး စွယ် မဲ။ မှဝ် မဲ ထာင် မဲ ပွိုန် ကာခဲန့် ဒီ ဒါ ဆိုက် ဒူအီ အာဆူရီယာ အီ ချဝ့် လွှိုမ် အီ ဟဝ်။း 10 အာဝ် ဝန် မီ ခဲ့ တီ။ ဇဝ်ဖြာ တူ ခြဲ အုဝ် တး ကာဂုဝ်း တး ပျာတ့် မိူင် မဲ နီ။ ဇဝ်ဖြာ တီ အီ ဟဲ့ စ်ု အုဝ် ရဲန် ဒါ ဆိုက် အုဝ် တး ကာဂုဝ်း တး ပျာတ့် မိူင် မဲ နီ၊ တဲး န့ လိုဝ်။”

11 ဒါ ဘုဝ် တာင် တွိုန် ဟဲ့ ဟွတ့် ကာလာင် ဂြုဝ်း တီ၊ အာအေယာခိမ် အာဆေဘာနာ ဘော အာယုဝ်အာ၊ ဂေ ဝီ ကာလာင် ဒီ အန် တဝ်း၊ “တဲး မဲ ကာလာင် ဂြုဝ်း အာရာမီ ဒီ ယေ။ ယေ နပ် ဂြုဝ်း ဇိုဝ် တီ။ အာဝ် လုဝ် ကာလာင် ဂြုဝ်း ဟဲဘြဲ။ ဒူအီ အီ ကွယ် ဒဲင် ရဲင် မိူင် ဘောကာဂ့လျီတ် ဟဲ့ ဘ်ု ဒီ ထူမ်။” 12 ဒါ ဘုဝ် တာင် တီ ဝီ တဝ်း ဒီ ဂေ၊ “ဘေ ထာင် ခုန်ဒီခမ် စ်ု အုဝ် တး ကာလာင် ဂြုဝ်း မီ ဒီ ခုန်ဒီခမ် ဘော ဒီ ဘေ။း အာဝ် မုး ပါယ် တီ။ အုဝ် လုဝ် ကာလာင် တဲး ဘော ဂေ အီ ကွယ် ဒဲင် ရဲင် မိူင် ထူမ်။ န့ မုး ဂေ အီ ဒီ ဝီ ဟူမ် အျီင် ဂေ၊ ဝီ ဒျီင် အိုမ် စှီ ဂေ ဒူပ် ဘေ။”

13 ပါယ် တီ အန် ဘော ဝီ ယိတ့် စွင့်၊ ကာလာင် ဂြုဝ်း တာင် ခဲင် ဂြုဝ်း ဟဲဘြဲ ဒီ ဂေ တဝ်း၊ “တဲး ဘေ ထူမ် အာမိင် ပီ ကာလာင် တး ခုန်ဒီခမ် အာဆူရီယာ။ 14 အန် ဟဲ့ ဒမ် တး တဝ်း၊ ကွဲ့ တဲး အာဟေစကီ ကာလုဝ် ဘေ။ 15 ခုဝ်၊ အာဟေစကီ တီ၊ အန် တူ ပွိုန် စွယ် တူ ပွိုန် ချွတ် ဘေ။ ကွဲ့ တဲး အာဟေစကီ ယဲတ့် ဘေ ဘိုင် ဇဝ်ဖြာ။ ဘေ ကွဲ့ ထူမ် ဆေ အန် တဝ်း၊ ဇဝ်ဖြာ ဒီ ချွတ် ဘေ။ ဇဝ်ဖြာ တူ ပွိုန် ဂွင့် ရဲ ဘေ ဒီ ယေ ဒါ ဆိုက် ဒူအီ အာဆူရီယာ။

16 ကွဲ့ ထူမ် ဂြုဝ်း အာဟေစကီ တီ။ ခုန်ဒီခမ် အီ အိုပ် မိူင် အာဆူရီယာ ဟဲ့ ဘ့လေး အာမိင် တဝ်း၊ ဆေ ဘေ ဘော လေး ဟာဝ် တ မိူင် ဘေ ဘော ခမ် ဒီ စှိုမ်၊ ဘေ ဒီ ဝီ ပွိုန် ဒီ ဟူမ် ဘ့လေ မာငုန် ဒီ ဟေ မာငုန် ဘေ၊ ဘော ဘ့လေ ဒီပူ ဒီ ဟေ ဘ့လေ ဒီပူ ဘေ။ ဘေ ဒီ ဝီ ပွိုန် ဒီ ဒျီင် ဘော အိုမ် ခဲင် အိုမ် ခိုမ် ဘေ ရာင် အာဆေ ရာင် အန်။ 17 ဘေ ဒီ ပွိုန် ကွယ် ပါယ် တီ တဲး န့ ကော ဇမ် ပန် ဒီ ဒိုဝ်း ဟာဝ် ခုန်ဒီခမ် ဒီ ဘေ၊ တဲး ဘေ ကွယ် ခဲင် မိူင် အီ ပီ မိူင် ဒူင် ကွယ် ဘေ နီ။ န့ မုး မိူင် အီ မိုဝ်း ငှုဝ် ဘော အိုမ် မာငုန်၊ မိူင် အီ မိုဝ်း ပီ ဒီ ဟူမ် ဘော မာန် မာငုန်။

18 ကွဲ့ တဲး အာဟေစကီ ပွိုန် ဒီ ကာလုဝ် ဘေ ဆေ အန် တဝ်း၊ ‘ဇဝ်ဖြာ ဒီ ချွတ် အေ။’ န့ မိူဝ် တူ ဒွိုမ် မိုဝ်း ဇဝ်ဖြာ ပီ ကြိုပ် ဒူအီ မျုဝ် မှဝ် အီ ဟဲ့ ဒွိုမ် စွယ် ဒွိုမ် ချွတ် ဒူအီ အီ ဘိုင် အန်၊ တဲး ဂေ လွတ် ဒီ ခုန်ဒီခမ် အာဆူရီယာ။ 19 ဂေ ဇဝ် ပီ ကြိုပ် ဂေ ဒူအီ အီ ကွယ် ခဲင် မိူင် ဟာမာတ် ဘော ခဲင် မိူင် အာရာဖာတ်၊ ဂေ ကွယ် ဒီ မှဝ်။း ဂေ ဇဝ် ပီ ကြိုပ် ဂေ ဒူအီ ခဲင် မိူင် ဆေဖာအိမ် ဘော ကွယ် ဒီ မှဝ်။း ဇဝ် ဂေ တီ၊ ကာဒင် မှဝ် အီ ဟဲ့ ချွတ် ဒူအီ ခဲင် မိူင် ဆာမာရီ တဲး ဂေ လွတ် ဒီ အုဝ်။း 20 ဇဝ် ပီ ကြိုပ် ဂေ တီ ဘော ဒွန် မိူင်၊ ကာဒင် မှဝ် အီ ဟဲ့ ဒွိုမ် ချွတ် ဒူအီ ပီ အိုပ် အန်၊ တဲး ဂေ လွတ် ဒီ ခုန်ဒီခမ် အီ အိုပ် ယေ။း မှဝ် န့ ပါယ် ပီ ထာင် ဘေ၊ ဇဝ်ဖြာ ဘေ ဒီ ပွိုန် ချွတ် ဘေ ခဲင် မိူင် ယေရူဆာလဲမ် နီ။း” ခဲ့ တီ ဂြုဝ်း ပီ ကာလာင် ဒါ ဘုဝ် တွိုန်။

21 မာလဲ၊ ဂေ ဒါ တာင် တူ ဝျီ့ ဂြုဝ်း တီ။ ဂေ ဟဲ့ ထူမ် ဂြုဝ်း ပီ ကာလာင် အုန် ခုန်ဒီခမ် အာဟေစကီ ဒီ ဂေ ခါ အာတ့်။ အန် ဟဲ့ တဝ်း၊ “ဘေ ကွဲ့ ဂြုဝ်း။”

22 ပန် တီ အာအေယာခိမ် အီ မုး ဂွန် အာဟီလာခီ အီ အိုပ် ခဲင် ဟုဝ် ခုန်ဒီခမ် ဘော အာဆေဘာနာ အီ မုး ဒါ စာရေ တာင် တွိုန်၊ ဘော အာယုဝ်အာ အီ မုး ဂွန် အာဆာပ် တွိုန်၊ ဂေ ဘော ကာယာတ့် ခြိုင် ပီ တာ ဂေ၊ ဝီ တး ဒူင် ကွယ် ခုန်ဒီခမ် အာဟေစကီ၊ ဝီ ကာလာင် ဂြုဝ်း ပီ ကာလာင် ဒါ ဘုဝ် တာင် တွိုန် ဒီ အန်။