1 ပန် တီ ခုန်ဒီခမ် အာဟေစကီ ဘော ယိုဝ် ဂြုဝ်း တီ၊ အန် ဘော ကာယာတ့် ခြိုင် တာ အန်၊ ဘော ဝီ စှိုပ် ခြိုင် စာန်၊ ဝီ ဟာဝ် ခဲင် ဟုဝ် ဇဝ်ဖြာ။

2 အန် ဘော ဒဲ့ အာအေယာခိမ် အီ အိုပ် တူတ့် ဒွန် မျုဝ် ခဲင် ဟုဝ် ခုန်ဒီခမ် ဘော ဒါ စာရေ အီ စိူဝ် အာဆေဘာနာ ဘော ဒါ တာင် အီ လှူ ဒီ ဇဝ်ဖြာ၊ တဲး ဂေ စှိုပ် တူတ့် ခြိုင် စာန်၊ ဝီ စ်ု ဂေ ဟာဝ် ဒူင် ကွယ် ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာအီဆာယ၊ အီ မုး ဂွန် အာမူတ်။

3 ဂေ ဘော တဝ်း ဒီ အန်၊ “ခုန်ဒီခမ် အာဟေစကီ တဝ်း၊ ‘အာတိုဝ် နီ ဟဲ့ မုး ဆီငဲ အီ မိုဝ်း ဒုက် တာင်၊ ဆီငဲ လုဝ် ထူမ် ဂြုဝ်း ပီ ခါနှာပ် အီ ဟဝ်၊ အီ ဟဲ့ တဲး ယေ မွှိုမ် ဆာယ်။ န့ ပီ ဂွန် င ဟဲ့ လုဝ် ဂွိုတ်၊ ယီ တူ မိုဝ်း ပ့လူမ် ဒီ တဲး အန် ဂွိုတ်။ 4 အုဝ် ထာင်၊ ဇဝ်ဖြာ အီ မုး ဇဝ်ဖြာ ပီ ကြိုပ် မဲ၊ အန် ဟဲ့ ယိုဝ် ဂြုဝ်း ပီ ကာလာင် ဒါ အီ အိုပ် ဒါ ဆိုက် ခုန်ဒီခမ် အာဆူရီယာ။ ခုန်ဒီခမ် တီ ဟဲ့ စ်ု၊ တဲး အန် တး ကာလာင် နာ စာဝ် ဒွန် မျုဝ် လွင် ဇဝ်ဖြာ အီ မုး ဇဝ်ဖြာ အာခါခ်ု။ အုဝ် ထာင်၊ ဇဝ်ဖြာ ဒီ ဘော အေး အန် ကူပ် ဟဲ့ ကာလာင် အန် ဂြုဝ်း တီ။ ခုဝ်၊ အုဝ် မှာန့်၊ တဲး မဲ ဆာခိုဝ် ဘော ဒါင် ဂေ အီ ဆီ ကွယ် ခဲင် မိူင် ယူဒါ အေ နီ။’”

5 အာအီဆာယ ဟဲ့ ဟွတ့် ယိုဝ် ဂြုဝ်း ပီ ဒမ် အာဟေစကီ ဒီ ဒဲစေန့် အန် တီ၊ 6 အာအီဆာယ ဝီ တဝ်း ဒီ ဂေ၊ “တဲး ဘေ ဝီ ဝေန့် ကာလာင် ဒီ ဒါ ကာညာ ဘေ တဝ်း၊ ‘ဇဝ်ဖြာ တဝ်း၊ ကွဲ့ တဲး မဲ ယုဝ် ဂြုဝ်း ပဲ့ ဟဲ့ ယိုဝ် မဲ တီ၊ ပဲ့ ဟဲ့ ကာလာင် ဒဲစေန့် ခုန်ဒီခမ် အာဆူရီယာ နာ စာဝ် လွင် အုဝ် တီ။ 7 ဘ်ု ဘေ ယွတ်၊ အုဝ် ဒီ ဟပ် ခဲင် နဝ်း အန်၊ တဲး အန် မိုဝ်း နဝ်း ဆီ ဝေန့်။ အုဝ် ဒီ တဲး အန် ဝီ ဝေန့် ဒူင် ကွယ် ဘြိမ် အန် ကူပ် ယိုဝ် အန် ဆာဒါင် အူ မျုဝ်။ အန် ဒီ ဘော ယမ် ဒီ မာပွါ့ လာင် အီ ကွယ် ခဲင် ဒဲ အန်။’”

8 ပန် တီ ဒါ ဘုဝ် တာင် အီ အိုပ် ဒါ ဆိုက် ခုန်ဒီခမ် အာဆူရီယာ တွိုန်၊ အန် ဘော ဝီ ယိုဝ် ဆာဒါင် လွင် ခုန်ဒီခမ် ဟဲ့ ဟွတ့် လေး ဟာဝ် တ မိူင် လာခိတ်။ ဒေါ အန် တီ အန် ဘော ဝီ ဝေန့်၊ ဘော ကာတုန့် ခုန်ဒီခမ် ဒေါ ကာဂုဝ်း အန် ဒီ မိူင် လီပါနာ။

9 ခုန်ဒီခမ် အာဆာခါရိပ် ဟဲ့ ဝီ ယိုဝ် အီ ဟဝ် ကာလာင် လွင် ခုန်ဒီခမ် အာတီရီကာ အီ မုး ဒူအီ ကူဆာ။ ဂေ တဝ်း၊ “အန် ဒီ တး ကာဂုဝ်း ဘော ဒီ မဲ။” ဟဲ့ ဟွတ့်၊ ခုန်ဒီခမ် ဘော ဝီ စ်ု ဒါလာမ် အန်၊ တဲး ဂေ ဟာဝ် တိုယ် ပဲ့ ဒီ အာဟေစကီ တဝ်း၊ 10 “ကွဲ့ တဲး ဇဝ်ဖြာ ပီ ကြိုပ် မဲ ကာလုဝ် မဲ တဝ်း၊ ‘ခုန်ဒီခမ် အာဆူရီယာ တူ ပွိုန် ဒီ အိုပ် မိူင် ယေရူဆာလဲမ်။’ 11 မဲ ဟဲ့ ယိုဝ် ပဲ့ ဟဲ့ ဘူင် ဂေ ခုန်ဒီခမ် အီ အိုပ် မိူင် အာဆူရီယာ။ ဂေ ဟဲ့ ပျာတ့် ဝဲန် မိူင် ဒွန် မိူင်။ ဘော မဲ တူ နပ် ဒီ လွတ်။

12 မဲ ဟဲ့ ဒွိုမ် ယိုဝ်၊ ဇဝ်ဖြာ ဘဲန် ကာဒင် ပီ ကြိုပ် ဒူအီ ဟဝ် အာဝ် ပွိုန် စွယ် ဂေ။ န့ မုး ဒါ ဒါ အုဝ်၊ ဂေ ဟဲ့ ပျာတ့် ဝဲန် ဂေ ဘောကာဂ့လျီတ်။ အီ မုး ဇဝ် ပီ ကြိုပ် ဒူအီ ကောစန်၊ ဒူအီ ဟာရာန်၊ ဒူအီ ရေစ ဘော ဂေ ဒူအီ အေဒေန် အီ ကွယ် ဒီ မိူင် တေလဇာ၊ ဂေ ဘောကာဂ့လျီတ် တူ ပွိုန် စွယ် မာဆေ။

13 တဲး မဲ ဟြေတ့် ဘော ခုန်ဒီခမ် အီ အိုပ် မိူင် ဟာမာတ်၊ ခုန်ဒီခမ် အီ အိုပ် မိူင် အာရာဖာတ်၊ ခုန်ဒီခမ် အီ အိုပ် မိူင် ဆေဖာအိမ်၊ ခုန်ဒီခမ် အီ အိုပ် မိူင် ဟေနာ၊ ခုန်ဒီခမ် အီ အိုပ် မိူင် အီဝါ၊ မဲ အာဝ် ပွိုန် ယိုဝ် ဂေ၊ ဂေ အာဝ် ဟူ ကွယ် ဒီ မှဝ်။”

14 ခုန်ဒီခမ် အာဟေစကီ ဘော ဒိုဝ်း ပဲ့ တီ ဒီ ဒါလာမ် တွိုန်။ ဟဲ့ ဟွတ့် တိး၊ အန် ဘော ဝီ ဟာဝ် ခဲင် ဟုဝ် ဇဝ်ဖြာ။ အန် ဘော ဘ့လး၊ တဲး ဇဝ်ဖြာ ယွတ်။

15 ဟဲ့ ဟွတ့်၊ အန် ဘော ဝီ ဆာခိုဝ် ဒီ ဇဝ်ဖြာ တဝ်း၊

16 “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ မဲ မုး ဇဝ်ဖြာ ပီ ကြိုပ် ဒူအီ အီဆာရေလ။ မဲ ဇဝ် ကွယ် ဒူင် ကွယ် ဂေ အာမူ အာမာတ် ဇဝ်ဖြာ အီ စိူဝ် ခေရုပ်။ မဲ ဇဝ် ကွယ် ခဲင် မာန် မိူင် ဒွန် မိူင် ဒဲင် ကာဒါယ်။ န့ မိုဝ်း မဲ ဇဝ်ဖြာ အူ ကာဒင် အီ မုး ဇဝ်ဖြာ။ မဲ ဇဝ် ဟဲ့ ဘူင် ဘော ဂါင်ဟြာဝ် ဘော ကာဒါယ်။

17 အုဝ် မှာန့် မဲ ဇဝ်ဖြာ၊ တဲး မဲ ထူမ်။ မှာန့်၊ တဲး မဲ ယွတ် လူင်၊ တဲး မဲ ယိုဝ် ဂြုဝ်း ပဲ့ ဟဲ့ ဒဲမ် အာဆာခါရိပ်။ အန် ဟဲ့ တး ကာလာင် နာ စာဝ် လွင် မဲ ဇဝ်ဖြာ အီ မုး ဇဝ်ဖြာ အာခါခ်ု။

18 အိုယ် မဲ ဇဝ်ဖြာ၊ ဟဲ့ မှာန်၊ ဂေ ခုန်ဒီခမ် အီ ဒွိုမ် အိုပ် မိူင် အာဆူရီယာ ဂေ ဟဲ့ ပျာတ့် ဒူအီ ဒွန် မိူင် ဒွန် ပ့လုဝ့်။ ဘော မာန် မိူင် ဂေ တီ၊ ဂေ ဟဲ့ ဘူင် တဲး န့ လိုဝ်။

19 ဂေ ဟဲ့ ဒိုဝ်း ဘော အာရိုပ် ပီ ကြိုပ် အာမျုဝ် ဒူအီ ဂေ တီ၊ ဒုဝ့် ခဲင် ငဝ်။ အာရိုပ် ယီ တူ မုး ဇဝ်ဖြာ ခါခ်ု။ န့ မုး မီ မာဝ် ဂေ ဟေ ပီ ဘူင် ဒူအီ၊ ပဲ့ ဟဲ့ ပျာတ့် ဝဲန် ခုန်ဒီခမ် တီ။

20 မဲ ဇဝ်ဖြာ၊ မဲ မုး ဇဝ်ဖြာ ပီ ကြိုပ် အုဝ်။ ဒေါ တီ နီ အုဝ် မှာန့်၊ တဲး ဒူအီ ဒွန် မိူင် ဒွန် ပ့လုဝ့် ကော နပ်၊ န့ မုး မဲ ဇဝ်ဖြာ အူ ကာဒင် အီ မုး ဇဝ်ဖြာ အာခါခ်ု။ အုဝ် ဆာခိုဝ် မှာန့်၊ တဲး မဲ ဇဝ် ချွတ် ယေ၊ တဲး ယေ လွတ် ဒီ ခုန်ဒီခမ် တီ။”

21 ဟဲ့ ဟွတ့် ဆာခိုဝ်၊ အာအီဆာယ အီ မုး ဂွန် အာမူတ် တွိုန်၊ အန် ဘော ဝီ စ်ု ဒူအီ အူ ဝီ ဟာဝ် ဒူင် ကွယ် ခုန်ဒီခမ် အာဟေစကီ ဘော တဝ်း ဒီ အန်၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ တဝ်း၊ ‘အုဝ် ဟဲ့ ဟွတ့် ယိုဝ် ဂြုဝ်း ပီ ဆာခိုဝ် မဲ လွင် အာဆာခါရိပ် အီ မုး ခုန်ဒီခမ် အီ အိုပ် ဒူအီ အာဆူရီယာ တီ။’

22 ဇဝ်ဖြာ မိူဝ် ဟဲ့ ကာလာင် လွင် ခုန်ဒီခမ် တီ တဝ်း၊ ‘ဂေ ဒူအီ ခဲင် မိူင် ဇီအူန်၊ ဂေ ပီ ဂွန် ဒီဘျာ အီ ဟဲ့ တး ဒူင် ကွယ် မဲ၊ ယီ လုက်တာယ် ဘော ကာညး မဲ။ ဂေ ဒူအီ ခဲင် မိူင် ယေရူဆာလဲမ်၊ ဂေ ပီ ဂွန် အီဘိုန့် အီ ပီ ဝါညာက် ဘော မာဝတ် ဂိန့် ဂေ ဒီ မဲ ဒေါ တဝ် မဲ။

23 ဒီ အာဆေ န့ မုး ပဲ့ ဟဲ့ ကာခဲန့် မဲ၊ ပဲ့ ဟဲ့ ကာလာင် မဲ စာဝ် အန်။း ဒီ အာဆေ န့ မုး၊ ပဲ့ ဟဲ့ ဒတ် ဒဲ့ မဲ၊ ဘော ပဲ့ ဟဲ့ ပီခိုက် မဲ ဒီ အန်။း န့ ဘော မုး ဇဝ်ဖြာ အီ ဆီငါ ဘွတ် ပီ ကြိုပ် ဒူအီ အီဆာရေလ၊ ပဲ့ ဟဲ့ ဘူင် မဲ ဇိုဝ် တီ။

24 မဲ ဟဲ့ တဲး ဒါလာမ် မဲ ကာလာင် နာ စာဝ် လွင် ဇဝ်ဖြာ။ မဲ ဟဲ့ တဝ်း၊ “အုဝ် ဟဲ့ ဒိုဝ်း ကိူန် လက်လဝ် အုဝ်၊ ဟုဝ့် ဒဲင် နွန် လေဘာနုန် ဒွန် ပ့လုဝ့်။ အုဝ် ဟဲ့ ဂ်ု ဝဲန် ဘော ဟေ အာရိတ် အီ ဒီ တူင့် ဒီ တာင်။ ဘော ဟေ န့ကေ အီ ဒီ စှိတ် အီ လဝ်၊ အုဝ် ဘူင် တဲး ဂေ ကေး တူတ့်။ အုဝ် ဟဲ့ ဟာဝ် ဇမ် ဒူင် လိုက် ကာဆဝ် ဘော ခဲင် ပြဲ အီ ဟဲ့ မွှိုမ် လွှိုမ် တူတ့်။

25 အုဝ် ဟဲ့ ဂိုဝ်း ဒီ ဒျီင် အိုမ် ခိုမ် ခဲင် မိူင် အီ ဟဝ်။ ဒေါ ဟာဝ် အုဝ် ခဲင် မိူင် အဲဂိုပ် ဒွန် ပ့လုဝ့်၊ အုဝ် ဟဲ့ ဘူင် တဲး ဘ့လဲင် အိုမ် ကော ဟိတ် တူတ့်။”

26 အုဝ် ယီ တဝ်း၊ “မှဝ် န့ ပါယ် ပီ တူ ဒွိုမ် ယိုဝ် မဲ ပီ တဝ်း အုဝ်။း” ဆိန့် အာတ့် နီ အုဝ် ဟဲ့ ဟွတ့် ဆုင်ဖျာတ်။ ဆိန့် ဒေါ မွိုန် အုဝ် ဟဲ့ ခြာမ် ဒီ ဘူင်။ ဒေါ တီ နီ အုဝ် ယီ တဲး န့ ဘဲန် ပီ ဒွိုမ် တဝ်း အုဝ်။ အုဝ် ဟဲ့ တဲး မဲ ပွိုန် ဒီ ပျာတ့် မိူင် အီ မိုဝ်း ရဲင်၊ တဲး ဂေ ဝီ လိုဝ်၊ ဘဲန် မ့ပိုမ် မာဝ်။

27 ကူပ် န့ ပါယ် တီ ဂေ ဒူအီ အီ ကွယ် ခဲင် မိူင် တီ အာဝ် ဟူ မိုဝ်း ဟဲန့်။ န့ ဒီ ဘဲန် ကာဝှ်ု ကာဝျှီန် ဘော နဝ်း လိုဝ် ဒီ ဂေ၊ တဲး ဂေ ဘော စှိုမ် ဆာရေ။ ဂေ ဘော ပီ ပေတ့် အီ လတ့် ခဲင် မာန် ဘော ပီ ငှုဝ် အီ ဆီ န့စမ် ဘော ပီ ပေတ့် အီ လတ့် ဒီ ကာတု ကာင်။ န့ ညှမ် ဒန် တာင်၊ ဟဲ့ ဟွတ့် ဝီ ကာဟဝ်း။

28 အုဝ် ပီ ဘော ဟဲ့ တဲး မဲ ဘူင် ပါယ် တီ၊ အုဝ် ယီ နပ် တူတ့် ဒွန် မျုဝ် ပီ ဒီ ပါယ် မဲ။ မဲ ဘော တုတ့် ဘော ယိတ့်၊ မဲ ဘော လိုပ် ဘော လေး။ မဲ ဘော ရူ ဘော စာဝ် ဒီ အုဝ်၊ အုဝ် ဟဲ့ နပ် တူတ့်။

29 ကူပ် ဟဲ့ ပီရူ မဲ ဒီ အုဝ်၊ ကူပ် ဟဲ့ နပ် တူတ့် အုဝ် လွင် တူ ရီမာတ် မဲ ဒီ အုဝ်၊ အုဝ် ဒီ ဘော ဘူင် ဒီ မဲ တဲး န့ ပီ အုဝ် ဘ့လုး ဂုင်မုး မဲ၊ ဟပ် ဝန်၊ ဟပ် ဘော ကဝ့် ခဲင် မူတ့် မဲ။ အုဝ် ဒီ တိုန့် မဲ ဝီ ဝိဝ် ဒူပ် န့တေန့် ဘြိမ် မဲ။’”

30 ဟဲ့ ဟွတ့်၊ အာအီဆာယ ပီ ဝီ ကာလာင် ဒီ ခုန်ဒီခမ် အာဟေစကီ တဝ်း၊ “အိုယ် မဲ ခုန်ဒီခမ် အာဟေစကီ၊ အုဝ် ဒီ ဘူင် လက်ဆာနာ တဲး မဲ နပ်၊ ဂြုဝ်း အုဝ် ဟဲ့ မှာန်။ နမ် နီ၊ မဲ ဒီ ပွိုန် ဒီ ဟူမ် ဘ့လေ အီ လေး တး ရာင် အန်။ နာ ဒီ တး မိူဝ်၊ မဲ ဒီ ပွိုန် ဒီ ဟူမ် ပါယ် တီ။ တ နာ ဒီ တး၊ မဲ လုဝ် ဆမ် ဘော ဆုဝ့် ငှုဝ် ပီ ဆမ် မဲ။ မဲ လုဝ် ဘူင် မာန် မာငုန် ဘော ပွိုန် ဒီ ဟူမ် ဘ့လေ အန်။

31 ဂေ ဒူအီ အာယူဒါ အီ ဟဲ့ လွတ် ယမ်၊ အီ ဆီ ဂိတ်၊ ဂေ ဒီ ဝီ ပီ ဟေ ပီ ဆမ် အီ၊ နာ ခြိုမ် န့ ဒီ ဘော မိုဝ်း ရျီး အီ လူင် လိုက်၊ နာ ဒဲင် ဒီ ဘော မိုဝ်း ဘ့လေ အန်။

32 ခုဝ်၊ န့ ဒီ မိုဝ်း ဂေ အီ ဆီ ဂိတ်။ ဂေ ဒီ ကွယ် ခဲင် မိူင် ယေရူဆာလဲမ်။ န့ ဘော မိုဝ်း ဂေ အီ ဟဲ့ လွတ် ယမ်။ ဂေ ဒီ တး ဒီ နွန် ဇီအူန်။ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ ခြာမ် ဒီ ဘူင်။ အန် ဒီ ဘော ဘူင် တဲး န့ ကော ဘဲန်။”

33 ကူပ် န့ ပါယ် တီ ဇဝ်ဖြာ ဟဲ့ ဒွိုမ် ကာလာင် လွင် ခုန်ဒီခမ် အာဆူရီယာ တီ တဝ်း၊ “အန် တူ ပွိုန် ဒီ လိုပ် ဟာဝ် ခဲင် မိူင် နီ၊ တူ ပွိုန် ဘန့် လိုပ် ဘ့လာ ခဲင် မိူင်။ ဒါ ဆိုက် အန် အီ ဂူင့် မင် ဂွင့် တူ ပွိုန် ဒီ တး ကာတတ် မိူင် နီ။ ဂေ မိူဝ် တူ ပွိုန် ဒီ ဂိုဝ်း ကာဒါယ်၊ ဘူင် ဘ့လဝ့် န့တဲင် ဒီ ရဲင် မိူင် နီ။

34 အန် တး န့တေန့် မှဝ်၊ အန် ဒီ လုဝ် ဝီ ဝေန့် န့တေန့် တီ။ အန် တူ ပွိုန် လိုပ် ခဲင် မိူင် နီ။ ဇဝ်ဖြာ ဟဲ့ ကာလာင် ပါယ် တီ။

35 ဇဝ်ဖြာ ဘော တဝ်း၊ ‘အုဝ် ဒီ ရဲ ဒီ ချွတ် မိူင် နီ ကူပ် ဆီ တဲး အုဝ် အီ ဟဝ် ရုဝ်ဆေ အုဝ် ဘော ကူပ် လှုဝ်း အုဝ် ဒဲစေန့် အုဝ် အီ စိူဝ် အာဒါဝိတ်။’” ခဲ့ တီ ဇဝ်ဖြာ ဟဲ့ စ်ု အာအီဆာယ ကာလာင် ဒီ ခုန်ဒီခမ် အာဟေစကီ။

36 ဘော ဇမ် ခဲင် မှိုဝ် တီ၊ အာမူ အာမာတ် ဇဝ်ဖြာ ဘော ငဝ်း ယမ် ဒါ ဆိုက် အာဆူရီယာ ခဲင် ဒူင် ချ ဂေ အာဒါ အူ ဆဲန် ဒီ ဒါ မှိုန့် ဒီ ဖန် ဟြဲန့် ဝီ။ ဘော ဇမ် ဆိန့်ဝး ဝွင့်၊ ဒေါ ဝီ န့ဆိုဝ်း မင် အီ၊ ဂေ ယိုဝ် ဟဲ့ မုး တူတ့် မီ ဒူအီ ယမ်။ 37 ပါယ် တီ အာဆာခါရိပ် အီ မုး ခုန်ဒီခမ် ဒူအီ အာဆူရီယာ တွိုန်၊ အန် ဘော ဝီ ဝေန့် ကွယ် ဒီ မိူင် နီနီဝေ။

38 ဝါယ် အန် တီ အူ ဆီငဲ အန် ဘော ဝီ ဟာဝ် ခဲင် ဟုဝ် ဇဝ် နီဆာရွက်၊ တဝ်း ဒီ ကြိုပ် အန် ဇဝ် တီ အီ မုး ဇဝ် ပီ ကြိုပ် အန်။ န့ ယီ မုး ဂွန် အီမာယ် အန် အီ စိူဝ် အာတာရမ်မာလေက် ဂါယ် အာဆာရေဇာ၊ ဂါယ် ဘော ဒိုဝ်း မာပွါ့ လာင်၊ ငဝ်း ယမ် အန်၊ ဘော ဝီ တဝ် ဟာဝ် ဒီ မိူင် အာရာရာတ်။ ပန် တီ ဂွန် အန် အီ စိူဝ် အာဆာဟာဒူန် ဘော ဝီ ဘဲန် ခုန်ဒီခမ် ဝီ အိုပ် မိူင် အာဆူရီယာ။