1 ဝါယ် အန် တီ ခုန်ဒီခမ် အာဟေစကီ ဝီ မိုဝ်း ဆဝ်။ ဟဲ့ ရိန် ဒီ ယမ် ဒီ ဆဝ် အန် တီ။ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာအီဆာယ အီ မုး ဂွန် အာမူတ် တွိုန်၊ အန် ဘော တး စ်ု အာဟေစကီ ဘော ကာလာင် ဒီ အန် တဝ်း၊ “ဇဝ်ဖြာ တဝ်း၊ ‘တဲး မဲ ရဲန်၊ တဲး န့ ဇေ့ဇုင် တူတ့် ဒွန် မျုဝ် ကူပ် တူ ကဲန် မဲ။ မဲ ဒီ ယမ်။’”

2 အာဟေစကီ ဘော ဝီ မာငး နာ ရဲင်၊ ဝီ ဆာခိုဝ် ဒီ ဇဝ်ဖြာ တဝ်း၊ 3 “အိုယ် မဲ ဇဝ်ဖြာ၊ မှာန့် တဲး မဲ လှုဝ်း ပီ ဘူင် အုဝ်။ အုဝ် ဟဲ့ ခတ် နဝ်း ဒီ ဒူပ် မဲ ဘော မိုဝ်း နဝ်း ဆိူဝ် နဝ်း မှာန် ဘော ဘူင် နာ ဘွတ် နာ မွှိုမ် ပီ အိုင် မဲ ဆေဆေ။” အန် ဟဲ့ ဟွတ့် တဝ်း ပါယ် တီ၊ အန် ဘော ဝီ ယာမ် တာင်။

4 ပန် တီ ဇဝ်ဖြာ ပီ ဝီ စ်ု အာအီဆာယ၊ တဲး အန် ဝီ ဝေန့် ဒူင် ကွယ် အာဟေစကီ၊ 5 ဝီ ကာလာင် ဒီ အန် တဝ်း၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် ဒင် မဲ အီ မုး အာဒါဝိတ် တွိုန်၊ အန် တဝ်း၊ ‘အုဝ် ဟဲ့ ယိုဝ် ဂြုဝ်း ပီ ဆာခိုဝ် ပီ မှာန့် မဲ။ ခဲ့ ဟဲ့ ယာမ် မဲ မိူဝ်၊ အုဝ် ဟဲ့ ယိုဝ်။ အုဝ် ဒီ ဝီ ဆိူပ် ဟာဝ် အာဆာက် မဲ ပေါ ဂိုဝ် ဒီ ဖန် ဆီနမ်။

6 အုဝ် ဒီ ချွတ် မဲ ဘော မိူင် ယေရူဆာလဲမ်၊ တဲး ဘေ လွတ် ဒီ ခုန်ဒီခမ် အီ အိုပ် မိူင် အာဆူရီယာ။ အုဝ် ဒီ ဂွင့် ဒီ ရဲ မိူင် နီ။’”

7 အာအီဆာယ ဟဲ့ ဟွတ့် ကာလာင် ဂြုဝ်း ဇဝ်ဖြာ ဒီ အာဟေစကီ တီ။ အန် ပီ ဝီ တဝ်း၊ “လက်ဆာနာ ပီ ဒီ ဒွါ ဇဝ်ဖြာ အီ တဲး မဲ နပ် ဆီချာ လွင် ဒီ ဘူင် ဒူပ် အန် ကာဒိက် ဆတ်ဇာ တီ၊ န့ ပါယ် နီ။ 8 ဒီ ဘ့လဝ့် န့တဲင် ပီ ဘူင် အုန် ခုန်ဒီခမ် အာခါတ် တွိုန်၊ ဇဝ်ဖြာ ဒီ တဲး ကာမိုက် ဝီ ဟုဝ့် နာ ပန် ဂိုဝ် ဘ့လဝ့်။’” အာအီဆာယ ဟဲ့ ဟွတ့် ကာလာင် ပါယ် တီ ဆီငဲ ဝီ ဟုဝ့် နာ ပန် တဲး န့ ပီ ပီ ကာလာင် အန်။

9 ဝါယ် ဟဲ့ ဝီ ကဲန် အာဟေစကီ ဒီ ဆဝ် အန် တီ၊ အန် ဝီ ဒဲမ် မှုဝ် အီ အိူပ် ဇဝ်ဖြာ။

10 အန် တဝ်း၊ “ဒေါ ဟဲ့ ကာတဲ အာဆာက် အုဝ်၊ အုဝ် လုဝ် ဟာဝ် ကွယ် ခဲင် မိူင် မာရာန။ အုဝ် ထာင်၊ အုဝ် အာဝ် ဟူ လွတ် ယမ်။

11 အုဝ် ဘော ထာင်၊ အုဝ် အာဝ် ဟူ ဝီ ယိုဝ် ဇဝ်ဖြာ ဒေါ ကွယ် အုဝ် ဒဲင် ကာဒါယ် ဒူပ် ဒူအီ အိမ် နီ။ အုဝ် ဘော ထာင်၊ အာဝ် ဟူ ယိုဝ် ဒူအီ ခေါ အူ ဝီ အီ ကွယ် ဒဲင် ကာဒါယ် နီ။

12 အာဆာက် အုဝ် နီ ဟဲ့ ဟွတ့် တူတ့်။ ဟဲ့ ပီ အီ ဒဲပ် တဲး န့ ကာဒတ်။ ဟဲ့ ပီ အီ ပျာတ့် ဝဲန် ထိုပ် ဒါ အီ ဟျီင် မာဘူ။ ဟဲ့ ပီ အီ ကပ် လေး ဒဝ့် ဒီ ကာဘွင့်။ အုဝ် ဘော ထာင်၊ ဇဝ်ဖြာ ဟဲ့ ဟွတ့် တဲး အာဆာက် အုဝ် တူတ့် ခြန် ခြန်၊ ပီ ဆိန့်ဝး ဇမ် အပ်။

13 အုဝ် ဘော ယာမ် ဒွင် ဝန် ဒွန် ခိူန် ကူပ် ဟဲ့ ဆဝ် ကာဆဝ် အုဝ်။ န့ ဘော ပီ မာခြင်ဆီ ဟဲ့ ကာဘက် ကာအာင် အုဝ်။ အုဝ် ဘော ထာင်၊ ဇဝ်ဖြာ ဒီ တဲး အာဆာက် အုဝ် တူတ့် ခြန် ခြန်၊ ပီ ဆိန့်ဝး ဇမ် အပ်။

14 အုဝ် ဘော ငှုန် ဘော ပိုန့် ပီ ဟမ် မာလေဝ် ဂေ မာနူက်ကွန်။ အုဝ် ဘော ဂြုဝ်း ပီ ဟမ် မာဘ့လူယ်။ ငါယ် အုဝ် မိူဝ် ဟဲ့ ဟွတ့် န့ စမ် ကူပ် ဆာကိုဝ်း ယွတ် အုဝ် ဂါင်ဟြာဝ်။ အိုယ် မဲ ဇဝ်ဖြာ၊ အုဝ် ဘိုင် မဲ တဲး မဲ ဒိုဝ်း လေး အုဝ် ခဲင် ဒုက် တာင် တီ။

15 အုဝ် ယီ တူ ပွိုန် တဝ်း မာဆေ။ ခုဝ်၊ ဇဝ်ဖြာ ဟဲ့ ဟွတ့် ကာလာင် ဒီ အုဝ်။ ဇဝ်ဖြာ ဟဲ့ ဘူင် ဒူပ် ပီ ခြာမ် အန် တီ။ န့ ဘော ဆဝ် ဒီ နဝ်း အုဝ်၊ တူ တဲး အုဝ် ပွိုန် ဒီ အိတ်။

16 အိုယ် မဲ ဇဝ်ဖြာ၊ ဂြုဝ်း မဲ တဲး ဒူအီ မိုဝ်း အာဆာက်။ ဘော အုဝ် မိုဝ်း အာဆာက် ကူပ် ဂြုဝ်း မဲ။ မဲ မိူဝ် ဟဲ့ ဆီနမ် အုဝ်၊ တဲး အုဝ် ကဲန်၊ တဲး အုဝ် ဝီ အိမ်။

17 အီ ဒုက် အီ ဆဝ် ဒီ နဝ်း အုဝ်၊ န့ ဟဲ့ ဝီ ဘဲန် နာ ဘွတ် နာ မွှိုမ် ဒီ အုဝ်။ မဲ ဇဝ် ဟဲ့ ချွတ် လေး အုဝ် ခဲင် ကာဒဝ် ဘာရေဝ်။ မဲ ဟဲ့ ဂဝ်း ဝဲန် ဘော မှာပ် အုဝ်၊ ကွဲ့ ဟူ တဲး မဲ ဆီ လှုဝ်း။

18 ဒူအီ ယမ် အီ ကွယ် ခဲင် မိူင် မာရာန၊ ဂေ တူ ပွိုန် ဒါင် ဂုင် ဂေဇူ ဘော အိူပ် မျုက် မဲ ဇဝ်။ ဒူအီ ယမ် မိူဝ် တူ ပွိုန် ဒီ ဘိုင် မဲ ဇဝ် ဘော ဘူင် နာ မုး နာ မှာန် ဆေဆေ။

19 န့ မုး မီ ဒူအီ အိမ် အီ ပွိုန် အိူပ် မျုက် မဲ ဇဝ်၊ တဲး န့ ပီ အုဝ် အိူပ် မျုက် မဲ ဇဝ် ဒေါ တီ နီ။ ခဲ့ ကွယ် ဂေ အီ မုး ဂုန့် ဒွန် အီ၊ ဂေ ဘော ကာလာင် ဒီ ဂွန် ဂေ လွင် မဲ ဇဝ် မိုဝ်း နဝ်း ဆိူဝ် နဝ်း မှာန် ဆေဆေ။

20 အန် ဇဝ် ဟဲ့ ဟွတ့် တဲး အုဝ် လွတ် ယမ်။ ယေ ဒီ ဘော ဘး ဒိင်၊ တဝ်း မှုဝ် အီ အိူပ် မဲ ဇဝ်။ ယေ ဒီ ဘော တဝ်း မှုဝ် အီ အိူပ် မဲ ဇဝ် ခဲင် ဟုဝ် ဇဝ်ဖြာ ဘော စုဝ် ယေ။” ခဲ့ တီ မှုဝ် ပဲ့ ဟဲ့ တဝ်း အာဟေစကီ။

21 ဒေါ ညှမ် ကဲန် အာဟေစကီ အာအီဆာယ မိူဝ် ဟဲ့ ဒွိုမ် တဝ်း ဒီ အန်၊ “တဲး မဲ ဒိုဝ်း ဘ့လေ ဒီပူ အီ ဘဲန် ဒီက့လွုန်၊ ဝီ အိုပ် ကာဆိူဝ် ဒိမ် တီ၊ တဲး န့ ကဲန်။”

22 အာဟေစကီ မိူဝ် ဟဲ့ ဒီမွှတ် တဝ်း၊ “န့ ဒီ မိုဝ်း လက်ဆာနာ ပါယ် မှဝ်၊ အီ တဲး အုဝ် နပ် ဆီချာ လွင် ဒီ ပွိုန် အုဝ် ဟာဝ် လိုပ် ခဲင် ဟုဝ် ဇဝ်ဖြာ။း”