1 ဇဝ်ဖြာ ဝီ တဝ်း၊ “ဂေ ဒူအီ အီ တူ ဒီမွှတ် အုဝ်၊ အုဝ် တဲး ဂေ နပ် လွင် အုဝ်။ ဂေ ဒူအီ အီ တူ ဟြေတ့် အုဝ်၊ အုဝ် တဲး ဂေ ယိုဝ် အုဝ်။ အုဝ် ဟဲ့ ကာလာင် ဒီ ဂေ အာမျုဝ် ဒူအီ အီ တူ ဂါဝ် ပွုန် အုဝ် တဝ်း၊ ‘တဲး ဘေ ယွတ် အုဝ်၊ အုဝ် ကွယ် ဒီ နီ။’

2 အုဝ် ဟဲ့ ဆူင့် ဒဲ အုဝ် ဘော ဒွင် ဝန်၊ တဲး အုဝ် ရွုး ဂေ ဒူအီ အီ ဒိူဝ် ကာဆဝ်၊ အီ ဟဲ့ ဘူင် ကာလိုပ်၊ ဘူင် ဒူပ် ပီ ခြာမ် ဂေ ဆေဆေ။

3 ဂေ ယီ တူ နပ် ဒီ ဆာယ်၊ ဂေ ဘော ယ ဘူင် တဲး အုဝ် ရူ ဆေဆေ။ ဂေ လှူ ဒီ အုဝ် ဒူင် တူ ကာအာပ် လှူ။ ဂေ ဘော ဒုဝ့် ကာညန် လေဘူန်၊ လှူ ဒဲင် မာဝ် မာအုတ်။^a

4 ခဲင် မှိုဝ် ဂေ ဘော နပ် ဒီ ဟာဝ် ကွယ် ခဲင် ဘာရေဝ်၊ ဘော ပြာ ဒီ ဘူင် ပီ တူ ပွိုန် ယိုဝ် အီ။ ဂေ ဘော ဝီ ဟူမ် ယင် လေတ့် ဘော အိုမ် ယင် အီ မွှိုမ် ကာအိး ပဲ့ ဟဲ့ ကွင့် ဂေ။

5 ပါယ် တီ ဂေ ဘော နပ် ဒီ ကာလာင် ဒီ အီ ဟဝ် တဝ်း၊ ‘တဲး ဘေ ကွယ် ရာမ် ကာတူင့် ဒီ ယေ၊ ယေ မုး ဒူအီ အီ ဆီငါ ဘွတ် လွှိုမ် ဘေ။ အာဝ် ကာအာပ် ယေ တာ ဒိုဝ် တာ ဒူင် ဘေ။’ ပီ ဘူင် ဂေ ဇိုဝ် တီ၊ န့ ဘော တဲး အုဝ် ရူ ကာဆဝ်။ န့ ဘော ပီ ဒက် ငဝ် ဒီ ဂုင်မုး အုဝ် ဘော ငဝ် အီ ကုး ဒွင် ဝန်။

6 ဘ်ု ဘေ ယွတ်၊ အီ ဟဝ် ဟဲ့ ဟွတ့် ဒဲမ် အုန် လွင် အုဝ်။ န့ တဝ်း၊ ‘အုဝ် တူ ပိဝ် လွင် ပဲ့ ဟဲ့ လုတ့် ဂေ တီ။ အုဝ် ဒီ ဝီ ဘူင် ဝျီ့၊ တဲး န့ ကာဒါန် မှာပ် ဂေ။

7 အုဝ် ဒီ ဝီ ဘူင် ဝျီ့ တဲး န့ ကာဒါန် ဒီ မှာပ် ပီ ဘူင် ဂေ ဘော မှာပ် ပီ ဘူင် ဂုန့် ဒင် ဂေ။ ဂေ ဟဲ့ ဒုဝ့် ကာညန် လေဘူန် ဒဲင် နွန် စာ၊ ပီ ဝီ နဲန အုဝ် ဒီ နွန် တျီမ်။ ကူပ် န့ ပါယ် တီ အုဝ် မိူဝ် ဒီ ဝီ ဘူင် ဝျီ့ ဒီ ဂေ ခဲ့ ကာဒါန် မှာပ် ဂေ၊ တဲး န့ ပီ ဒူအီ အုန် ကြုဝ် ခဲင် ဆီဂ့လိုမ် ဂေ။”

8 ဇဝ်ဖြာ ပီ ဝီ တဝ်း၊ “အာဝ် မိုဝ်း အာဆေ အီ ပျာတ့် ဝဲန် မ့ပူင့် ဘ့လေ မာငုန် အီ ဆီ မိုဝ်း ဘ့လေ အီ ဟဲ့ စှိတ် ဟဲ့ ဆီချာ။ ခုဝ်၊ ဂေ ဘော ပွိုန် ဒီ ကြိတ် တဲး န့ လေး အိုမ် မာငုန်၊ တဲး န့ ဘော ဘဲန် အာဂျိုဝ် ဒီ အီ။ ပါယ် တီ အုဝ် မိူဝ် တူ ဘျတ် ဝဲန် တူတ့် ဂေ ဒူအီ ပီ ဆုတ့် ပီ စ်ု အုဝ်။

9 အုဝ် ဒီ ဘော တဲး ခြိုဝ် အာကူပ် မိုဝ်း လှုက်လှာန်။ အုဝ် ဒီ တဲး န့ မိုဝ်း အီ ပ့လု နွန် ခဲင် မိူင် ယူဒါ။ နွန် ဂေ တီ ဒီ ဘဲန် ခါဂုန် ဒီ ဂေ ဒူအီ ပီ ရဝ်း အုဝ်။ ဂေ ဒူအီ ပီ ဆုတ့် ပီ စ်ု အုဝ် ဒီ ဘော ကွယ် ဒီ တီ။

10 ခဲင် ဒီလယ့် အီ စိူဝ် ဆာရူန် န့ ဒီ မိုဝ်း ဖိုင် မာဘူ၊ ဘော ခဲင် ဒီလယ့် အာခေါ ဒီ ဘဲန် ဒူင် အိတ် ဖိုင် မာမက်။ ခုဝ်၊ ဂေ ဒူအီ ပီ အိုပ် အုဝ် ဟဲ့ ဝီ ဟြေတ့် အုဝ်။

11 အီ မုး ဘေ၊ ဘေ ဟဲ့ ဝဲန် အုဝ်။ ဘေ ဟဲ့ ပိဝ် နွန် အီ ဆီငါ ဘွတ် အီ မုး ဒူင် ကွယ် အုဝ်။ ဘေ ဟဲ့ ဝီ ဟျီင် ဇဝ် ဂါတ် တွိုန် ဘော လှူ ပီ ဒီ ဒျီင် ဒီ ဇဝ် မေမီ။ ^b

12 ကူပ် န့ ပါယ် တီ အုဝ် ဒီ ဝဲန် ဘေ ဘောကာဂ့လျီတ်၊ တဲး ဘေ ယမ် ဒီ မာပွါ့ လာင်။ ခုဝ်၊ ဒေါ ဒဲ့ အုဝ် ဒီ ဘေ၊ ဘေ တူ အိုဝ် ဂြုဝ်း အုဝ်။ ဒေါ ကာလာင် အုဝ် ဂြုဝ်း ဒီ ဘေ၊ ဘေ တူ ထူမ်။ ဘေ ဟဲ့ ဝီ ရဝ်း ဒီ ဘူင် ပီ တူ အိုင် အုဝ်၊ ဝီ ဘူင် အီ တူ ဘွတ် အီ တူ မွှိုမ် အီ တူ လဝ့် နဝ်း အုဝ်။

13 ဘေ ယွတ်၊ အုဝ် ကာလာင် တဲး ဘေ နပ်။ ဂေ ဒဲစေန့် အုဝ်၊ ဂေ ဒီ ပွိုန် ဒီ ဟူမ် ဖဲ။ အီ မုး ဘေ၊ ဘေ ယီ ဒီ ကာပြာန့် ကာဆဝ်။ ဂေ အီ ဒူပ် အုဝ်၊ ဂေ ဒီ ဘျုဝ် ဒါခိုယ်၊ ဘေ ယီ ဒီ လုဝ် ခမ် အီ မွှိုမ် ဆာယ်။ ဂေ ဒဲစေန့် အုဝ် ဒီ ဘော ပွိုန် ဒီ ဒျီင် ဖဲ။ ဘေ ယီ တူ မိုဝ်း ဒီ ဒျီင်။

14 ဂေ ဒဲစေန့် အုဝ် တီ၊ ဂေ ဒီ ဘော တဝ်း မှုဝ် ဘျုဝ် ဘျုဝ် ကျဝ် ကျဝ်။ အီ မုး ဘေ၊ ဘေ ယီ ဒီ လုဝ် ယာမ် ဘော မိုဝ်း နဝ်း လိုဝ်။ ဘေ ဒီ ဘော လုဝ် ဒတ် ကူပ် မိုဝ်း ဘေ နဝ်း ကာပျာတ့်။

15 ဒူအီ ပဲ့ ဟဲ့ ရဝ်း အုဝ် တီ၊ ဂေ ဒီ ဘော ဒိုဝ်း စိူဝ် ဘေ၊ တဲး န့ ဘဲန် ကာဆမ် ဒိူင် ကာဆမ် အေး အီ။ အုဝ် ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် ဒီ ဘော ဒဲပ် ဝဲန် ဘေ။ အီ မုး ဂေ အီ မုး ဒဲစေန့် အုဝ်၊ အုဝ် ဒီ ဘော ဒွါ စိူဝ် ကာမာယ် ဒီ ဂေ။

16 ပန် အန် တီ၊ ဆေ န့ ဘော မိုဝ်း ဒူအီ ခဲင် မိူင် ဂေ အီ ဆီ ပွိုန် မွင့်ကာရာ၊ အန် ဒီ မှာန့် ဒီ ဇဝ်ဖြာ အီ ဘူင် နာ မုး နာ မှာန် ဆေဆေ။ ဆေ န့ မိုဝ်း အီ ဆီ ဒိူင်၊ ဆီ ဒွါ ကာဒိက် ဆတ်ဇာ၊ အန် ဒီ ဒိူင် တဲး ဇဝ်ဖြာ ထူမ်။ ခုဝ်၊ အန် ဇဝ် မိုဝ်း နဝ်း မှာန်။ န့ ဒီ ဘုဝ် ဘဲန် ပါယ် တီ ကူပ် ဟဲ့ ဟြာယ် ဟဲ့ ပိဝ် အုဝ် ဒုက် တာင် ပဲ့ ဟဲ့ ဒွိုမ် ခမ် ဂေ အာတ့် နီ။”

17 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “အုဝ် ဟဲ့ ခြာမ် ဒီ ဘူင် ကာဒါယ် အီ ကာမာယ် ဘော ဂါင်ဟြာဝ် အီ ကာမာယ်။ လွင် အီ ဟဲ့ ပွုန် တး နာ ပန် တွိုန်၊ အာဝ် ဟူ မိုဝ်း အီ လှုဝ်း အီ နုဝ် ဒေါ မှဝ်။

18 တဲး ဘေ ဘျုဝ် ဒါခိုယ် ဒူပ် ပီ ဒီ ဖာန် ဘ့လေး အုဝ် တီ။ မိူင် ယေရူဆာလဲမ် ကာမာယ် တီ တဲး အီ ဘျုဝ် ဒါခိုယ်။ ဂေ ဒူအီ အီ ကွယ် ခဲင် မိူင် ယေရူဆာလဲမ် တီ၊ ဂေ မိူဝ် မိုဝ်း နဝ်း ခူယ် နဝ်း ဘျုဝ်။

19 အုဝ် မိူဝ် ဒီ မိုဝ်း နဝ်း ခူယ် ဒါခိုယ် ကူပ် မိူင် ယေရူဆာလဲမ် ဘော ကူပ် ဒူအီ အီ ကွယ် ခဲင် မိူင် တီ။ အာဝ် ဟူ မိုဝ်း အီ ယာမ် အီ ဒတ်။

20 ဂွန် အာင မိူဝ် တူ ယမ် ဒေါ ဆီ အာင အန်။ ဒူအီ ဘောကာဂ့လျီတ် ဒီ ဘော မိုဝ်း အာဆာက် တူင့် ကာဆဝ်။ ဆေ အာဆာက် ဂေ ဟဲ့ နုဝ့် အူ မာယဝ်း ဆီနမ်၊ ဂေ ယီ ပီ ဒူအီ နှိုမ်။ ဆေ အီ ယမ် အာတ့် နုဝ့် အာဆာက် အန် အူ မာယဝ်း ဆီနမ်၊ န့ မုး ဒူအီ ပဲ့ ဟဲ့ ဒိူင် အုဝ်။

21 ဂေ ဒီ ဘော ဘူင် ကာင် ဘော ကွယ် ဒီ တီ။ ဂေ ဒီ ဘော ဆမ် ဟေ မာငုန် ဘော ပွိုန် ဒီ ဟူမ် ဘ့လေ အန်။

22 အာဝ် ဟူ ပီ ခါ အာတ့်၊ ဒေါ ဆမ် ဂေ ကာင် ဂေ၊ ယီ မိုဝ်း အီ ဟဝ် တး ကွယ်။ ဒေါ ဆမ် ဂေ မာန် မာငုန် ဂေ၊ ယီ မိုဝ်း အီ ဟဝ် တး ဟူမ်။ ခုဝ်၊ ဂေ ဒူအီ ပီ အိုပ် အုဝ်၊ ဂေ ဒီ မိုဝ်း အာဆာက် တူင့် ပီ ဟေ။ ဂေ ဒီ ဘော ဘျုဝ် ဒါခိုယ် ကူပ် ဟဲ့ ပွိုန် ဂေ ဒီ ဘိုင် ပဲ့ ဟဲ့ ဘူင် ဂေ၊ ပဲ့ ဟဲ့ လိုမ်လာ ဂေ။

23 ဂါန် ပီ ဘူင် ပီ ရန့် ဂေ၊ န့ ဒီ ဘော ကျ ဘော အွင်။ န့ကြိုဝ်း ဂေ၊ အာဝ် မိုဝ်း အီ ဒုက် အီ ညှာပ် ဒီ နဝ်း ဒေါ မှဝ်။ ခုဝ်၊ အုဝ် ဒီ ဘော မွင့်ကာရာ ဒွါ နာ ဘွတ် နာ မွှိုမ် ဒီ ဂေ ဘော ဒီ လှုက်လှာန် ဂေ။

24 ဆိန့် အာတ့် ဟွတ့် ဆာခိုဝ် ဂေ၊ အုဝ် ဟဲ့ ဟွတ့် ထူမ် ဂြုဝ်း ဂေ။ ဒေါ ဆီ ကာလာင် ဂေ အုဝ် ဒီ ဘော ဒွါ ပီ မှာန့် ဂေ။

25 ဒေါ အန် တီ၊ မာဆုဝ် ပြဲ ဂါယ် ဂွန် မာဘူ ဒီ ကွယ် ကာဒူပ် ဟူမ် ရိုမ်။ မာခြင်ဆီ ဒီ ဘော ဟူမ် ဟျြီင် ပီ မာမက်။ ခဲ့ ကွယ် အာမျုဝ် မာဟန့်၊ ဂေ ဒီ ဘော ဟူမ် ကာပုး။ န့ မိူဝ် ဟူ မိုဝ်း အာဖေ အာရေ မာဆေ ဒီ နွန် ဇီအူန် အီ မုး ဒူင် ဆီငါ ဘွတ်၊ ဒူင် ကွယ် အုဝ်။” ခဲ့ တီ ပဲ့ ဟဲ့ ကာလာင် ဇဝ်ဖြာ။