ယေ ဘော ကာပြာ ကာဆဝ်၊ တဲး မဲ ဇဝ် ကာယာတ့် ဂါင်ဟြာဝ် တး လူင် ဒူင် ကွယ် ယေ၊ တဲး နွန် ဘောကာဂ့လျီတ် ကော လာတ့် ဘဲန် အိုမ် ဒေါ တး လူင် မဲ ဇဝ်။

2 တဲး မဲ ဇဝ် တး လူင်၊ တဲး ရန်ဆူ မဲ ကော နပ် လွင် မဲ၊ တဲး ဂေ အာမျုဝ် ဒူအီ ဒဲင် ကာဒါယ် ယုဝ် ဒီယုး ဒီယေန့် ဒီ အာတ့် မဲ၊ တဲး န့ ပီ ငဝ် ကာဆိုမ် ပြဲ ဘော နပ် ဒီ တဲး အိုမ် ဆီနမ်။

3 ခုဝ်၊ မဲ ဇဝ် ဟဲ့ ဒွိုမ် ဘူင် အီ မွှိုမ် အာမ် ကာဆဝ် ဒေါ တူ နမ်လှုဝ်း ယေ။ ဒေါ အန် တီ၊ မဲ ဟဲ့ တး လူင်၊ တဲး နွန် ဘောကာဂ့လျီတ် ဘော ယုဝ် ဒီယုး ဒီယေန့် ကာဆဝ် ဒီ အာတ့် မဲ ဇဝ်။

4 ဆိန့် ဒေါ ဂုဝ် ဒီ မိုဝ်း ကာဒါယ် နီ၊ တူ ဒွိုမ် မိုဝ်း ခေါ အူ ဝီ အီ ဟဲ့ ဒွိုမ် နပ်၊ ဒွိုမ် ယိုဝ် ဘော ထူမ် လွင် ဇဝ်ဖြာ ပေါ အူ ကာဒင် အီ ပီ မဲ ဇဝ်၊ အီ ဟဲ့ ဘူင် နာ ဘွတ် နာ မွှိုမ် ဒီ ဂေ ဒူအီ အီ နှဝ့် န့ဒဝ့် မဲ ဇဝ်။

5 မဲ ဇဝ် ဟဲ့ တး စွယ် ဝီ အီ မိုဝ်း နဝ်း ခူယ် ဒီ ဘူင် ဒူပ် နာ ဆိူဝ် နာ မှာန် ဘော ဝီ အီ နမ်လှုဝ်း န့တေန့် ပီ ဘျ မဲ ဇဝ် ဒီ အန်။ မဲ ဇဝ် ယီ ဟဲ့ ရူ ကာဆဝ် ဒီ ယေ ကူပ် ဟဲ့ အွန် ယေ ဒီ ဝး န့တေန့် တီ ဆေဆေ။ ကူပ် န့ ပါယ် တီ အာဝ် မိုဝ်း အာဆေ အီ ပွိုန် ချွတ် ယေ။

6 ခဲ့ ကွယ် ယေ ဘောကာဂ့လျီတ် ဟဲ့ ဘဲန် ပီ ဒူအီ ကာဒါတ့်။ အီ ဆီငါ ဘွတ် ဘော နာ ဆိူဝ် နာ မှာန် ပီ ဒွိုမ် ဘူင် ယေ ဝီ ဘဲန် တူတ့် ပီ ခြိုင် ကာဒိး။ မှာပ် ပဲ့ ဟဲ့ ဘူင် ယေ ဘော ပီ လှာ ဟေ အီ ဟဲ့ ဟျီ့ ကာဟဝ်း။ မှာပ် ယေ ဘော တဲး ယေ ဟြာယ် ပီ ခုန် တး ဘုတ် တဝ် ယေ။

7 အီ ဆာခိုဝ် ဒီ မဲ ဇဝ် မိူဝ်၊ န့ တူ မိုဝ်း ခေါ အူ ဝီ။ အီ ဂါဝ် ပွုန် မဲ ဇဝ် မိူဝ်၊ အာဝ် မိုဝ်း ခေါ အူ ဝီ။ ခုဝ်၊ မဲ ဇဝ် ဟဲ့ ဝဲန် ယေ၊ တဲး ယေ စှိုမ် လိုဝ် တူတ့် ကူပ် မှာပ် ပီ ဘူင် ယေ တီ။

8 ပီ ဘော ဟဲ့ ပါယ် တီ မိူဝ်၊ မဲ ဇဝ်ဖြာ ယီ မုး ဂုန့် ယေ။ ယေ ဟဲ့ ပီ ကာဒါယ် ကာပိတ်၊ မဲ ဇဝ် ဘော ပီ ဒါ အီ ဘူင် ကာလုဝ့် ကာဒါယ်။ ခဲ့ ကွယ် ယေ ဘောကာဂ့လျီတ်၊ န့ ဘော မုး မဲ ဇဝ် အီ ဘူင် ဘ့လေး ယေ။

9 ခုဝ်၊ ယေ ဝီ မှာန့်၊ ကွဲ့ တဲး မဲ ရူ ကာဆဝ် ဒီ ယေ။ ကွဲ့ တဲး မဲ ဇဝ် နုဝ် မှာပ် ယေ တီ ဆေဆေ။ ခဲ့ ကွယ် ယေ ဘောကာဂ့လျီတ်၊ ယေ ဘော မုး ဒူအီ ပီ အိုပ် မဲ ဇဝ်။ ခုဝ်၊ ယေ မှာန့် တဲး မဲ ဝီ ယွတ် ယေ။

10 မိူင် ပီ အိုပ် မဲ ဇဝ် အီ မုး မိူင် ဆီငါ ဘွတ် တွိုန်၊ ဟဲ့ ဟွတ့် ဝီ ဘဲန် ပြဲ ဂေ ယွုန်။ မိူင် ဇီအူန် ဟဲ့ ဝီ ဘဲန် ပြဲ တာင်။ မိူင် ယေရူဆာလဲမ် မိူဝ်၊ ဟဲ့ ဟွတ့် ဝီ ဘဲန် မိူင် အီ ဟဲ့ လိုဝ် ဟဲ့ ရာမ်။

11 ဟုဝ် မဲ ဇဝ် အီ ဟဲ့ ဆီငါ ဘွတ်၊ အီ ဟဲ့ စှိတ် ကာဆဝ် ဘော မုး ဒူင် ဒွိုမ် တး အိူပ် ဂေ ဂုန့် ဒင် ယေ ဒီ မဲ ဇဝ် မိူဝ်၊ ငဝ် ဟဲ့ ဟွတ့် ကာဆိုမ် တူတ့်။ အီ မုး ဒူင် ပဲ့ ဟဲ့ ရွက့် ဟဲ့ အိုင် ယေ မိူဝ်၊ ဟဲ့ ဟွတ့် လိုဝ် ကာပျာတ့် တူတ့်။

12 အိုယ် မဲ ဇဝ်ဖြာ၊ န့ ပီ မဲ ဇဝ် မိူဝ် တူ ဒိူန် တူ ညိုင်ရာင် ယိုဝ် လွင် အန် တီ။ မဲ ဇဝ် မိူဝ် တူ ဘူင် မာဆေ။ မဲ ဘော ဘ့လေး ဝဲန် ယေ၊ တဲး ယေ ခမ် ဒုက် တာင် တီ။