1 ဝီ အီ ဟဲ့ တး ခဲင် မိူင် အေဒူမ်၊ အီ ဟဲ့ စှိုပ် ခြိုင် ရေန့် အီ တး ခဲင် မိူင် ဘုဝ်ဇာရာ၊ အန် မုး အာဆေ။း ဝီ အီ ဟဲ့ စှိုပ် ခြိုင် ဘွတ် ဘော ဟာဝ် တဲး န့ ဘျ အန် အာဖုင် ဒင်ခုဝ် အန် ဘော ငိုဝ်း ဂိန့် အန် ကူပ် မိုဝ်း အန် အာဖုင် ဒင်ခုဝ် တာင်၊ အန် မုး အာဆေ။း န့ မုး အုဝ် အီ ကာလာင် နာ ဆိူဝ် နာ မှာန် ဘော မိုဝ်း ပွုန် ဒီ ချွတ် ဒူအီ။

2 မှဝ် န့ ပါယ် အိုမ် မာငုန် ဆော ဒိုက် ဒီ ခြိုင် မဲ။း မှဝ် န့ ပါယ် ပီ စှိုပ် မဲ ဒီ တာ ခြိုင် ဒူအီ အီ ဟဲ့ ညဲတ့် ဘ့လေ မာငုန်။း

3 ဇဝ်ဖြာ ဝီ တဝ်း၊ “အုဝ် အူ ဝီ ဟဲ့ ညဲတ့် ဘ့လေ မာငုန်။ ခဲင် အာမျုဝ် ဒူအီ ဟဝ် အာဝ် မိုဝ်း အာဆေ အီ ဖြူမ် ရိုမ် ဒူပ် အုဝ်။ အုဝ် မိူဝ် ဟဲ့ ညဲတ့် ဂေ ရန်ဆူ အုဝ်။ အုဝ် ဟဲ့ ညဲတ့် ထူထိတ့် ဂေ ကူပ် ဟဲ့ လေး ဒေါဆ အုဝ်။ ခုဝ်၊ နှာမ် ဂေ ဟဲ့ ကာစှတ့် ဒီ ခြိုင် အုဝ်၊ တဲး န့ ကာဒါတ့် တူတ့်။

4 အုဝ် ဟဲ့ ဟွတ့် အုန် ခဲင် နဝ်း အုဝ် ဆီငဲ ဒီ ဒမ် အုဝ် မှာပ် ဒီ ဂေ။ အုဝ် မိူဝ် ဟဲ့ နပ် ဆီနမ် ပီ ဒီ ချွတ် အုဝ် ဒီ ဂေ ဒူအီ ပီ အိုပ် အုဝ်။

5 ဒေါ ဝီ ယွတ် အုဝ် အာဝ် မိုဝ်း အီ စွယ် အုဝ် ခေါ အူ ဝီ။ အုဝ် ဘော ဝီ အာမ် လွင် အန် တီ။ ခုဝ်၊ ဒဲ အုဝ် အီ မိုဝ်း ပ့လူမ် ဟဲ့ စွယ် အုဝ် ကူပ် ဟဲ့ လေး ဒေါဆ အုဝ်၊ န့ တဲး အုဝ် ဝဲ ဟဲန့်။

6 အုဝ် မိူဝ် ညဲတ့် တူတ့် ဂေ ဒူအီ ဒွန် မျုဝ် ကူပ် ရူ ကာဆဝ် အုဝ် ဒီ ဂေ။ အုဝ် ဟဲ့ တဲး ဂေ ပီ ဒူအီ ယိုတ့် ပဝ်း ကူပ် ဟဲ့ လေး ဒေါဆ အုဝ်။ နှာမ် ဂေ အုဝ် မိူဝ် ဟဲ့ ဟုး ဒဲင် ကာဒါယ်။” ခဲ့ တီ ပီ ကာလာင် ဇဝ်ဖြာ။

7 အုဝ် ဒီ ဝီ ကာလာင် လွင် နဝ်း ရွက့် ဇဝ်ဖြာ အီ တူ နပ် ဒီ တူတ့် ဒေါ မှဝ်။ တဲး အေ အိူပ် အန် ဇဝ် ကူပ် ပဲ့ ဟဲ့ ဘူင် အန် အာဒါ အေ။ ကူပ် မိုဝ်း အန် ဇဝ် နဝ်း ရွက့် ကာဝေ ကာဆဝ်၊ အန် မိူဝ် ဒွါ နာ ဘွတ် နာ မွှိုမ် ကိူန် ဒီ ဂေ ဒူအီ အီဆာရေလ။

8 ခုဝ်၊ ဇဝ်ဖြာ ဟဲ့ ဝီ တဝ်း၊ “ဂေ တီ၊ ဂေ မုး ဒူအီ ပီ အိုပ် အုဝ်။ ဂေ မိူဝ် တူ ကာဘး ဒီ အုဝ်။” ဟဲ့ ဟွတ့်၊ အန် ဒီ ဝီ ချွတ် ဂေ။

9 ဒုက် ပီ လုဝ် ခမ် ဂေ ဒူအီ ပီ အိုပ် အန် ဇဝ် ဝီ ဘဲန် ဒုက် ဘော ဒီ ဇဝ်ဖြာ။ ဂေ အာမူ အာမာတ် ဇဝ်ဖြာ အီ ကွယ် ဒီ အာတ့် အန် ဇဝ်၊ ဂေ ဟဲ့ ချွတ် ဒူအီ ဂေ တီ။ ကူပ် မိုဝ်း အန် ဇဝ် နဝ်း ရွက့် ကာဝေ၊ အန် မိူဝ် ထုတ် လေး ဂေ။ န့ ပီ အန် ဇဝ် ဟဲ့ စုဝ့် ဒီ ဂူင့် ဂေ၊ ဟဲ့ စုဝ့် ငျီ့ ဂေ ဆိန့် ဒေါ မွိုန်။

10 ဂေ ယီ ဝီ ဘူင် ကာဘး ဒီ အန် ဇဝ်၊ ဘူင် တဲး န့ ဆဝ် ဒီ နဝ်း ဖွိုမ် ဇဝ်ဖြာ အီ ဆီငါ ဘွတ်။ ကူပ် န့ ပါယ် တီ အန် ဇဝ် ဝီ ဘဲန် ရန်ဆူ ဂေ၊ ဝီ ကာဂုဝ်း ဒီ ဂေ။

11 ဒေါ အန် တီ အန် ဇဝ် ဘော ဝီ လှုဝ်း ဒေါ မွိုန်၊ လှုဝ်း ဘော အာမုဝ်ဆဲ ဘော ဂေ ဒူအီ ပီ အိုပ် အန်။ အန် ဝီ ဒီမွှတ် တဝ်း၊ “ဒါ အီ ဟဲ့ ဒိုဝ်း လေး ဂေ ဘော ဒုဝ် ဆတ်ဒါဝါ ဂေ ခဲင် အိုမ် နမ်မုက်ဆာရာ၊ အန် ဝီ ကွယ် ဒီ မှဝ်။း ဇဝ်ဖြာ အီ ဟဲ့ တဲး နဝ်း ဖွိုမ် အန် ကွယ် ကာတဲ ဂေ၊ အန် ဝီ ကွယ် ဒီ မှဝ်။း”

12 အာဆေ ဟဲ့ တာ အာဖုင် ဒင်ခုဝ် အန်၊ စ်ု အာမုဝ်ဆဲ ဘူင် နာ မွှိုမ် အာမ် ကာဆဝ်၊ ဘူင် တဲး အိုမ် နမ်မုက်ဆာရာ ကာယဝ်း ဘဲန် အာ ဘ့လာက်၊ တဲး အာဖုင် ဒင်ခုဝ် အန် လိုဝ်း ဆေဆေ။း

13 အာဆေ ဟဲ့ ယဲတ့် တဲး ဂေ ဟာဝ် ဒူင် လိုက် ကာဒမ် အိုမ်၊ တဲး န့ ပီ မင်ပြွင့် အီ နပ် ဒီ ဟာဝ် ဒါခိုယ် ဒူင် ဂ့လင်၊ တူ ဒီပ့လာတ် တူ ကေး။း

14 ဂေ ဒူအီ ပီ အိုပ် ဇဝ်ဖြာ၊ ဂေ ဘော ပီ ဖိုင် မာမက် အီ လူင် ခဲင် ဂ့လင် ဟြေတ့် ဒီ ဟူမ် ပေတ့်။ နဝ်း ဖွိုမ် ဇဝ်ဖြာ မိူဝ် ဘူင် တဲး ဂေ ပွိုန် ဒီ ဒီလှဝ်။ ပါယ် တီ အန် ဇဝ် ဘော ယဲတ့် ဂေ၊ တဲး န့ ဘော လိုဝ်း ဆီချာ ခဲ့ တာင် ပွုန် အန် ဇဝ်။

15 အိုယ် မဲ ဇဝ်ဖြာ အီ ကွယ် ခဲင် ဂါင်ဟြာဝ်၊ ဒူင် ကွယ် မဲ ဟဲ့ ဆီငါ ဘွတ် ဘော မိုဝ်း ပွုန် တာင်။ ယေ မှာန့်၊ တဲး မဲ ဇဝ် ယွတ် ယေ။ နဝ်း ဆီ ဘူင် ဒီငန့် မဲ ဘော အာဖုင် ဒင်ခုဝ် မဲ၊ အာဝ် ဟူ လိုဝ်း ဒီ ယေ။ နဝ်း မဲ အီ နပ် ဒီ ရွက့် ကာဝေ ကာဆဝ် မိူဝ်၊ ယေ တူ ပွိုန် ယိုဝ်။ ယေ မှာန့်၊ ကွဲ့ တဲး မဲ ဇဝ် ဘ့လေး ဝဲန် ယေ။

16 မဲ ဇဝ် ဘော မုး ဂုန့် ယေ။ အာဘြာဟမ် တွိုန်၊ အန် တူ နပ် ယေ။ အာအီဆာရေလ တွိုန် မိူဝ်၊ တူ ဒွိုမ် ရွုး ယေ။ မဲ ဇဝ် ယီ မုး ဇဝ်ဖြာ အီ ပီ ဂုန့် ယေ။ ဆိန့် ဒေါ မွိုန် ဂေ ဟဲ့ တဝ်း၊ မဲ စိူဝ် “အီ ချွတ် ယေ။

17 မှဝ် န့ ပါယ် ပီ ဘ့လေး ဝဲန် မဲ ဇဝ် ဒီ ယေ၊ တဲး ယေ ဝီ ဝး န့တေန့် ပီ နှဲ မဲ ဇဝ်၊ တဲး ဘော နဝ်း ယေ ဝီ ပ့လူမ် ဒီဂတ့် ဘော ဝဲန် မဲ။ ယေ မှာန့်၊ တဲး မဲ ဇဝ် ဝီ တး ဒူင် ကွယ် ယေ ကူပ် ရွက့် မဲ ဒီ ယေ ဘော ကူပ် ရွက့် မဲ ခြိုဝ် ဒူအီ အီ ပီ ခါဂုန် မဲ။

18 အာဒါ အူ ကာစန် ဂေ ဒူအီ ပီ အိုပ် မဲ အီ ဆီငါ ဘွတ်၊ ဂေ ဟဲ့ ပွိုန် ဒီ ဘိုင် ဒူင် ဘွတ် မဲ ဇဝ်။ ရန်ဆူ ယေ ယီ ဟဲ့ တး ညဲတ့် ဒူင် ဆီငါ ဘွတ် မဲ ဇဝ်၊ တဲး န့ ကာပျာတ့် လိုဝ် တူတ့်။

19 မဲ ဇဝ် ဟဲ့ ဘူင် ဒီ ယေ တဲး ယေ ပီ ဒူအီ ပီ တူ ဒွိုမ် အိုပ် မဲ ဇဝ် ဘော ပီ ဒူအီ အီ တူ ဒွိုမ် နပ် လွင် မဲ။