အုဝ် တူ ကွယ် နှိမ် ကူပ် ရွက့် အုဝ် မိူင် ဇီအူန်။ အုဝ် မိူဝ် တူ ဒီလှဝ် ကူပ် ကာဝေ အုဝ် မိူင် ယေရူဆာလဲမ်၊ တဲး န့ ကော ဇမ် ပန် ဒီ ချွတ် အုဝ် ဒီ ဂေ။ အုဝ် ဒီ ဒွါ နဝ်း ဆိူဝ် နဝ်း မှာန် ဒီ ဂေ၊ တဲး န့ ကော လိုဝ်း ဆီချာ ပီ အီ ယိုဝ် ဘ့လာင် ငဝ် ခဲင် မှိုဝ်။ ဘော လွင် ချွတ် အုဝ် ဒီ ဂေ၊ အုဝ် ဒီ တဲး န့ လိုဝ်း ပီ ဘ့လာင် ငဝ် ရုဝ်။

2 အိုယ် ဘေ ဒူအီ ခဲင် မိူင် ယေရူဆာလဲမ်၊ ခဲ့ ကွယ် အာမျုဝ် ဒူအီ ဂေ ဒီ ဘော ယိုဝ် လွင် နဝ်း ဆိူဝ် နဝ်း မှာန် ဘေ။ ခဲ့ ကွယ် ဂေ ခုန်ဒီခမ်၊ ဂေ ဒီ ဘော ယိုဝ် အာဖုင် ဆာရေ ဘေ။ ဘေ ဒီ ဘော ပွိုန် စိူဝ် ကာမာယ် ပီ ဒွါ ဇဝ်ဖြာ ဒီ ဘေ။

3 ဘေ ဒီ ပီ မင်ဂိုမ် အီ စှိတ် ကာဆဝ် ပီ ဂူင့် ဇဝ်ဖြာ။ ဘေ ဒီ ဘော ပီ ဘော ကာမယ့် ဆေန့် ပီ ဂူင့် ဇဝ်ဖြာ အီ အိုပ် ဘေ။

4 ဝါယ် နီ၊ ဘေ မိူဝ် အာဝ် ဟူ လုဝ် ခမ် အီ ဒဲ့ ဘေ တဝ်း၊ “ဒူအီ ပီ ဘ့လေး ဝဲန် ဇဝ်ဖြာ။” ဘော မိူင် ဘေ မိူဝ်၊ အီ အာဝ် ဟူ လုဝ် တဝ်း၊ “မိူင် ရာမ်။” အီ ဒီ ဘော ဒဲ့ စိူဝ် ကာမာယ် တဝ်း၊ “ဇဝ်ဖြာ ဟဲ့ အိုင် မဲ။” ဘော စိူဝ် ကာမာယ် မိူင် ဘေ ဂေ ဒီ ဘော တဝ်း၊ “မိူင် အီ ခတ်” ခုဝ်၊ ဇဝ်ဖြာ ဟဲ့ အိုင် ဟဲ့ ရွက့် အန် ပီ အီမာယ် ရွက့် အီဘိုန့် အန်။

5 န့ ဒီ ပီ ကာညူမ် အီ ဒီ ခတ် ဒိုဝ်း ဒီဘျာ ဇဲတ်။ ပါယ် တီ န့ ပီ ဇဝ်ဖြာ အီ ဟဲ့ ဖာန် ဘ့လေး ဘေ ဒီ ခတ် ဒိုဝ်း ဘေ။ န့ ဘော ပီ အျီ့ ကာမာယ် ဟဲ့ ခူယ် ကူပ် ဟဲ့ ပွိုန် အန် အဝ် ကာမာယ်။ ဇဝ်ဖြာ မိူဝ် ဒီ ခူယ် ကူပ် ဘေ ပါယ် တီ။

6 အိုယ် ဘေ အီ ကွယ် ခဲင် မိူင် ယေရူဆာလဲမ်၊ အုဝ် ဟဲ့ စ်ု ဒူအီ ဘ်ု ရဲင် မိူင် ဘေ၊ တဲး ဂေ ဘ်ု ဆေဆေ၊ ကွဲ့ တဲး ဂေ ကွယ် နှိမ် ဒွင် ဝန် ဒွင် ခိူန်။ ပါယ် တီ ဘော ဘေ အီ လုဝ် ကာလာင် ဒီ ဇဝ်ဖြာ၊ တဲး အန် လှုဝ်း ကာဒိက် ဆတ်ဇာ အန်၊ ကွဲ့ တဲး ဘေ ကွယ် ဆီတွင့် ကွယ် နှိမ် နှိမ်။

7 ကွဲ့ တဲး အန် ဇဝ် ပွိုန် ဒီ ကွယ် ဒီလှဝ်၊ တဲး န့ ကော ဇမ် ပန် ဒီ ဟွတ့် တူတ့် ဝီ ဆမ် ဝီ မ့ပြာယ် ဂေ မိူင် ယေရူဆာလဲမ်။ တဲး မိူင် တီ ဝီ ဘဲန် မိူင် ပီ အိူပ် မျုက် ဒူအီ ဘောကာဂ့လျီတ် ဒဲင် ကာဒါယ်။

8 ဇဝ်ဖြာ ဟဲ့ ဒွိုမ် ဒွါ ကာဒိက် ဆတ်ဇာ အီ ဟဲ့ မှာန် အာခါခ်ု။ အန် ဇဝ် ဒီ ဘော တာ အာဖုင် ဒင်ခုဝ် အန် ဘူင် တဲး န့ ဇေ့ဇုင်။ အန် ဟဲ့ ဒိူင် တဝ်း၊ “ဝါယ် နီ၊ အုဝ် မိူဝ် တူ ဒိုဝ်း ငှုဝ် ဘေ၊ ဝီ ဟျီင် ဂေ ရန်ဆူ ဘေ။ ဂေ ဒူအီ အာမျုဝ် ဟဝ် မိူဝ် အာဝ် ဟူ ပွိုန် ဒီ ဒျီင် အိုမ် မာငုန် ဘေ၊ ကွဲ့ တဲး ဂါန် ဘေ ဝီ စှိုမ်။

9 ဂေ အီ ဟဲ့ ဘြတ် ဆီမာ ငှုဝ်၊ အီ ဟဲ့ ဝီ ဆုဝ့် ကာယူင့် ငှုဝ်၊ ဂေ ဒီ ဘော ပွိုန် ဒီ ဝီ ဟူမ် ခါမုန် ဘော ဒါင် ဂုင် ဂေဇူ ဒီ ဇဝ်ဖြာ။ ဂေ အီ ဟဲ့ ရန့် မာန် မာငုန်၊ အီ ဟဲ့ ပွိုန် ဒီ ဝီ ဘေတ့် ဘ့လေ အန်၊ ဂေ ဒီ ဘော ပွိုန် ဒီ ဒျီင် အိုမ် မာငုန် ခဲင် ဒူင် ကွယ် အုဝ် အီ မုး ဒူင် ဆီငါ ဘွတ်။”

10 တဲး ဘေ ကာလုဝ်း မာလုဝ်း မိူင်၊ တဲး ဘေ မ့ပြာယ် န့တေန့် အာဒါ ဂေ ဒူအီ အာမျုဝ် ဘေ အီ ဒီ ဝီ တး။ တဲး ဘေ ဘူင် တဲး န့တေန့် တာင်။ ဒိုဝ်း ဝဲန် ဘော မာဝ်၊ တဲး ဘေ ဆမ် ရွင့် ဘော ဟွယ် အာလာမ် အီ ဘဲန် လက်ဆာနာ ဒီ ဒူအီ ဒွန် မျုဝ် လွင် ဟဲ့ အွင် ဘေ။

11 ဇဝ်ဖြာ ဟဲ့ ကာလာင် တဲး အီ ယိုဝ် ကော ဇမ် ဒူင် ဆိူတ် ကာဒါယ်။ အန် တဝ်း၊ “တဲး ဘေ ကာလာင် ဒီ ဂေ ဒူအီ ခဲင် မိူင် ယေရူဆာလဲမ် တဝ်း၊ ‘အန် ဇဝ် အီ ဒီ ချွတ် ဘေ၊ အန် ဟဲ့ ဟွတ့် တး။ ဘော ရုး ပီ ဒီ ဒွါ အန် ဒီ အီ၊ အန် ဟဲ့ ဒိုဝ်း တး။ အန် ဟဲ့ ဒိုဝ်း တး ဘော ငဝ်း ခန် ပီ ဒီ ဝျီ့ အန် ဒီ အီ။’”

12 အီ ဒီ ဘော ဒဲ့ စိူဝ် ဘေ တဝ်း၊ “ဒူအီ အီ ဆီငါ ဘွတ် ပီ အိုပ် ဇဝ်ဖြာ၊ ဒူအီ ပဲ့ ဟဲ့ ချွတ် ဇဝ်ဖြာ။” မိူင် ယေရူဆာလဲမ် အီ ဒီ ဘော ဒဲ့ စိူဝ် တဝ်း၊ “မိူင် ဒူင် ကာပြာ အီ ဒီ ကွယ်။” ဘော “မိူင် ပီ တူ ဘ့လေး ဝဲန် ဇဝ်ဖြာ။”