1 ဇဝ်ဖြာ အီ အိုပ် တူတ့် ဒွန် မျုဝ် အန် ဟဲ့ တဲး နဝ်း ဖွိုမ် အန် ပ့လိုက် အုဝ်။ အန် ဟဲ့ ရဝ်း အုဝ်၊ တဲး အုဝ် ဟာဝ် ကာလာင် ဒီ ဒူအီ ဂိန် လွင် အီ ဒီ တဲး နဝ်း ဒူအီ ဒါခိုယ်။ အန် တဲး အုဝ် ကာလာင် ဒီ ဂေ အီ မိုဝ်း နဝ်း လိုဝ်၊ တဲး န့ ဘော ဝီ လှဝ် နဝ်း ဂေ၊ တဲး ဂေ အီ ကာဒုး မှေတ့် ဝီ ပွိုန် ဒီ လွတ်၊ တဲး ဘော ဂေ အီ စုဝ်း ကာပိုမ် ဝီ ပွိုန် ဒီ လေး။

2 အန် ဇဝ် ဟဲ့ စ်ု အုဝ် ဟာဝ် ကာလာင် လွင် ဆီနမ် ဒီ ဝီ ဂေဇူ ဇဝ်ဖြာ ဒီ ဂေ ဒူအီ ပီ အိုပ် အန် ဘော ဆီငဲ ဒီ ဝီ ဘူင် ဝျီ့ အန် ဇဝ် ဒီ ရန်ဆူ အန်။ အန် ဇဝ် မိူဝ် စ်ု အုဝ် ဟာဝ် လှဝ် နဝ်း ဂေ အီ မိုဝ်း နဝ်း က့လိုဝ်။

3 အန် ဇဝ် တဲး အုဝ် ဝီ ဒွါ အီ ဘျုဝ် ဒါခိုယ် ဒီ ဂေ အီ ဟဲ့ ငှုန် ဟဲ့ က့လိုဝ်၊ အီ ကွယ် ခဲင် မိူင် ဇီအူန်။ အန် တဲး အုဝ် ဒွါ အီ ပီ ကာမယ့် စှိတ်၊ ဝီ ကာဒါင် ကာဝှါင် ပဲ့ ဟဲ့ ခြဝ်း ဂေ ဒဲင် ဂိန့် ဂေ။ တဲး ဂေ ဝီ ဖဝ်း နာမန် အုး ငှုန်၊ ဝီ ကာဒါင် ခြိုင် စာန်၊^a တဲး ဂေ ဝီ ပွိုန် တဝ်း မှုဝ် အီ အိူပ် ဇဝ်ဖြာ၊ ဝီ ကာဒါင် ဒုက် ညှာပ် ပဲ့ ဟဲ့ ခမ် ဂေ။ အီ ဟဝ် ဒီ ဝီ တဝ်း၊ ဂေ ပီ ဟေ ပီ ဆမ် အုန် ဇဝ်ဖြာ အီ ဘျ နဝ်း ဆိူဝ် နဝ်း မှာန် အန် ဇဝ်၊ တဲး အီ အိူပ် အာဖုင် ဆာရေ အန် ဇဝ်။

4 ဂေ ဒီ ဘော ဝီ မ့ပြာယ် မိူင် အီ ဟဲ့ လိုဝ် ဆိန့် အာတ့် နီ၊ ဝီ ဒဲ မိူင် အီ ဟဲ့ ကာပျာတ့်။ ဂေ ဒီ ဘော ဝီ ယွတ် လိုမ်လာ ဒူင် ဟဲ့ ရာမ် ဆိန့် စုဝ် ဘာန် ဂုန့် ဒင် ဂေ ဒေါ မွိုန်။

5 ဂေ ဒူအီ အာမျုဝ် ဟဝ် ဒီ ဘော ဝီ တး ယွတ် လိုမ်လာ ဖိုင် မာဘူ မာပဲ ဘေ။ ဂွန် ဂေ ဒူအီ ဟဝ် ဒီ ဝီ ရန့် ဒွါ ဒီ ဘေ မာန် ဂေ ဒူင် နာ ဘေ။ ဂေ ဒီ ဘ်ု လိုမ်လာ ဘော မာန် မာငုန် ဘေ။

6 အီ ဟဝ် ဒီ ဘော ဝီ ဒဲ့ ဘေ တဝ်း၊ ဘေ မုး ဒါ အီ လှူ ဒီ ဇဝ်ဖြာ၊ မုး ဘော ဒူအီ အီ ဘူင် ဂါန် ဇဝ်ဖြာ။ ဘေ ဒီ ဘော ဝီ ဘျုဝ် ဒါခိုယ် ကူပ် ဟဲ့ ပွိုန် ဘေ ဒီ ဘိုင် ကြုဝ်ကြာမ် ဒူအီ အာမျုဝ် ဟဝ်။ ဘေ ဒီ ဘော ဝီ ခူယ် ဒါခိုယ် ကူပ် ဟဲ့ မိုဝ်း ဘေ အာဖုင် ဆာရေ။

7 ခဲ့ ပီ မွှိုမ် ဆာယ် ဘေ၊ ဘေ ဒီ ဝီ ပွိုန် အာဂျိုဝ် အာ ဘုန်။ ခဲ့ ပီ ဟဲ့ စှိုမ် ဘေ ဆာရေ ဘေ ဒီ ဝီ ပွိုန် နဝ်း ဒါခိုယ်။ ဘေ ဒီ ဝီ ပွိုန် ခါဂုန် အာ ဘုန် ခဲင် မိူင် ဘေ။ ဘေ ဒီ ဘော ဝီ ဘျုဝ် ဒါခိုယ် ဆေဆေ။

8 ခုဝ်၊ အုဝ် အီ မုး ဇဝ်ဖြာ ဘော အိုင် ဘော ရွက့် နာ မုး နာ မှာန်။ အုဝ် ဘော ဇွင့် ဂေ အီ ဖာတ် ဒိုဝ်း ကြုဝ် အီ။ အုဝ် ဒီ ဝီ ဒွါ ရုး ဒီ ဂေ ဒူအီ ပီ အိုပ် အုဝ် အာခ်ု မှာန်။ အုဝ် ဒီ ဒွါ ကာဒိက် ဆတ်ဇာ အီ ကွယ် ဆေဆေ ဒီ ဂေ။

9 ဂေ ဒူအီ အာမျုဝ် ဟဝ် ဒီ ဘော နပ် လှုက်လှာန် ဘေ တီ။ ဂေ ဒူအီ ကိူန် ဒီ ဘော နပ် ဆီချာ ဂွန် ဂေ ဒူအီ ပီ အိုပ် အုဝ်။ ဒွန် အီ ဒီ ဘော နပ် ဂေ မုး ဒူအီ ပဲ့ ဟဲ့ မွင့်ကာရာ ဒွါ ဇဝ်ဖြာ။

10 အုဝ် ဒီ ဘော ဘျုဝ် ဒါခိုယ် ကူပ် ဇဝ်ဖြာ။ နဝ်း ဖွိုမ် အုဝ် ဒါခိုယ် ကူပ် ပဲ့ ဟဲ့ ဘူင် ဇဝ်ဖြာ။ ခုဝ်၊ အန် ဇဝ် ဟဲ့ ချွတ် အုဝ်၊ တဲး န့ ပီ အန် ဟဲ့ ဒွါ ခြိုင် စှိတ် ဒီ အုဝ်။ အန် ဇဝ် ဟဲ့ ဒွါ နဝ်း ဆိူဝ် နဝ်း မှာန် ဒီ အုဝ်၊ တဲး န့ ပီ အန် ဒွါ အုဝ် ကန် ဟိုပ်။ ပဲ့ ဟဲ့ ဘူင် အန် ဇဝ် ဒီ အုဝ်၊ ဟဲ့ ပီ ကာညူမ် ဘြဝ့် ကာမယ့် ကာမာယ် ဘော ဒီဘျာ စှိုပ် ခြိုင် ဆဲန့် ခြိုင် ခြိဝ် ဒေါ မုး ဆီငဲ ခတ်။

11 ဇဝ်ဖြာ ဒီ တဲး နဝ်း ဆိူဝ် နဝ်း မှာန် အန် လိုဝ်း ဒီ ဒူအီ ဒွန် မျုဝ် ဒဲင် ကာဒါယ်၊ တဲး န့ ပီ ပြဲ ဂေ ပေတ့် အီ လတ့် ဒွန် နာ ဒွန် ပ့လုဝ့် ဘော ပီ ပိတ် ပီ ဆမ် အီ လေး ဆီချာ။