1 အိုယ် ဘေ ဒူအီ ခဲင် မိူင် ဇီအူန်၊ တဲး ဘေ ယိတ့်။ ခုဝ်၊ ဘ့လာင် ဟဲ့ ဟွတ့် တး။ တဲး ပီ ဘူင် ဘေ ပီ ဘ့လာင် ဆီငဲ အီ ဝီ ထွင် ဒီ အီ ဟဝ်။ န့ မုး အာဖုင် ဒင်ခုဝ် ဇဝ်ဖြာ အီ ပီ ဘ့လာင် တီ၊ အီ ဟဲ့ လိုဝ်း ဒီ ဘေ။

2 အပ် ဝွင့် ဟဲ့ ဝီ ပ့လိုက် ဒူအီ အာမျုဝ် ဟဝ်။ န့ ပီ န့အု ဟေတ့် ဟဲ့ ပ့လိုက် ဂေ ဘောကာဂ့လျီတ်။ အီ မုး ခဲင် မိူင် ဘေ၊ ဘ့လာင် ဇဝ်ဖြာ ဟဲ့ လေး၊ တဲး အာဖုင် ဒင်ခုဝ် အန် ဘော ကွယ် ဒူင် ကွယ် ဘေ။

3 ဂေ ဒူအီ အာမျုဝ် ဟဝ် ဂေ ဒီ ဘော တး ဒူင် ကွယ် ဘေ ကူပ် မိုဝ်း ဘ့လာင် တီ။ ဂေ ခုန်ဒီခမ် ဒီ ဘော တး ဒူင် ကွယ် ဘေ ကူပ် မိုဝ်း ဘ့လာင် ဒူင် ကွယ် ဘေ ဆိန့် ဆိန့်ဝး။

4 တဲး ဘေ ဝီ ယွတ် အီ ဟဲ့ ဘုဝ် ဘဲန်၊ အီ ဟဲ့ ကွယ် ရူပ် ဘေ။ ဂေ ဒူအီ အာမျုဝ် ဘေ ဟဲ့ လာယ် ကာဇု ဝီ တး ဒူင် ကွယ် ဘြိမ် ဂေ။ ဂေ ဂွန် ကာညူမ် ဘေ အီ ဟဲ့ ကွယ် တူင့် ကာဆဝ် ဘော ဝီ တး ဒူင် ကွယ် ဘေ။ ဘော ဂွန် ဒီဘျာ ဘေ ဒီ ဘော ဝီ တး ဒူင် ကွယ် ဘေ ပီ အီ စုဝ့် တး ဂွန် ဒီတဲတ်။

5 ဘေ ဟီ ယိုဝ် လွင် အန် တီ၊ ဘေ ဒီ ဘော ဝီ ခူယ် ကာဆဝ်။ နဝ်း ဘေ ဒီ ဘော ဒီယုး ဒီယေန့် ကူပ် ဟဲ့ ခူယ် ဘေ ပါယ် တီ။ ခြမ် ဂေ ဒူအီ အာမျုဝ် ဟဝ်၊ ဂေ ဒီ ဘော ဝီ ဒိုဝ်း တး ကာဇု ဒူင် ကွယ် ဘေ။ ကြုဝ်ကြာမ် အီ ဘွတ် အီ မွှိုမ် အီ ကွယ် ဒီ မိူင် နာ တ အိုမ် နမ်မုက်ဆာရာ၊ ဂေ ဒီ ဘော ဝီ ဒိုဝ်း တး ကာဇု ဒီ ဒူင် ကွယ် ဘေ။

6 ဖိုင် မင်ပြွင့် ကာဟာတ့် အီ ကိူန် အီ ကွယ် ခဲင် မိူင် မီဒီအာန်၊ ဘော ခဲင် မိူင် အေဖာ တွိုန်၊ ဂေ ဒီ ဘော ဒိုဝ်း တး ဒီ ဒူင် ကွယ် ဘေ။ ဂေ ဒူအီ ခဲင် မိူင် ဆေဘာ ဒီ ဘော ဒိုဝ်း တး ခြိဝ် ဂေ ကာညန် လေဘူန်။ ဂေ ဒူအီ ဒီ ဘော ကာလာင် လွင် နာ ဘွတ် ပဲ့ ဟဲ့ ဘူင် ဇဝ်ဖြာ ဘော အိူပ် အန်။

7 ဖိုင် မာဘူ အီ ကွယ် ခဲင် မိူင် ခေတာ ဒီ ဘော တး ဒူင် ကွယ် ဘေ။ ဘော မာဘူ အာလူင့် အီ တး ခဲင် မိူင် နေယာဘူတ် တွိုန် ဒီ ဘဲန် ကြုဝ် ဘေ။ ဘေ ပွိုန် ဒီ လှူ ဒုဝ် ဂေ တီ ဒဲင် ကာစှူင့် လှူ၊ တဲး န့ လဝ့် နဝ်း အုဝ်။ အုဝ် ဒီ ဘော တဲး အာဖုင် ဒင်ခုဝ် အုဝ် ဝဲ လိုဝ်း ဝဲ ဟိူင် ခဲင် ဟုဝ် အုဝ်။

8 ဂေ အီ ဘိုန့် တး ပီ န့အု မုး အာဆေ။း ဂေ အီ ပီ မာဘ့လူယ် အီ ဘိုန့် တး လိုပ် ခဲင် ကာဟုန် ဂေ မုး အာဆေ။း

9 ဂေ အီ ကွယ် ခဲင် ဂုန် အိုမ် ဂေ ဘ်ု အုဝ်။ ဂေ ရိုဝ် ဆင်ဖုဝ် အီ တး မိူင် ထာဆိတ် ဘော ယဲတ့် ဒီ အာတ့်၊ တဲး ဂေ ဒိုဝ်း တး ဂွန် ဘေ ဘော ရွိုန် ဂေ ခြိဝ် ဂေ။ ပါယ် တီ အာဖုင် ဒင်ခုဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ န့ ဒီ လိုဝ်း ဆီချာ။ အန် ဇဝ် မိူဝ် ဟဲ့ တဲး ဘေ မိုဝ်း ဆာရေ။

10 ဇဝ်ဖြာ ပီ ဝီ ကာလာင် ဒီ ဂေ ဒူအီ ခဲင် မိူင် ယေရူဆာလဲမ် တဝ်း၊ “ဂေ ဒူအီ အာမျုဝ် ဟဝ်၊ ဂေ ဒီ ဘော ဝီ ဂုဝ် ဝီ မ့ပြာယ် ရဲင် မိူင် ဒွါ ဒီ ဘေ။ ခုန်ဒီခမ် ဒူအီ ဂေ တီ၊ ဂေ ဘော ဘဲန် ပီ ဆုတ့် ပီ စ်ု ဘေ။ ခုဝ်၊ အုဝ် ပီ ဘော ဟဲ့ ရူ ဟဲ့ စာဝ် ဒီ ဘေ ဘော ဟဲ့ ဒမ် မှာပ် ဒီ ဘေ၊ အုဝ် ယီ ဝီ မိုဝ်း နဝ်း ကာဝေ ဘေ။

11 မာလုဝ်း မိူင် ဘေ ဒီ ဝိုဝ်း အုန် ဒွင် ခိူန် ဒွင် ဝန်၊ တူ ကာဘိတ် ဒေါ မှဝ်၊ တဲး ဂေ ဒူအီ အာမျုဝ် ဟဝ် ပွိုန် ဒီ ဒိုဝ်း တး ကြုဝ်ကြာမ် ဂေ ဘော ခါဂုန် ဂေ၊ ဒွါ ဒီ ဘေ၊ တဲး ဘော ခုန်ဒီခမ် ဂေ ယဲတ့် ဂေ။

12 ဂေ ဒူအီ အာမျုဝ် ဟဝ် အီ တူ ဆီ ဘဲန် ပီ ဆုတ့် ပီ စ်ု ဘေ၊ ဂေ ဒီ ကာဒုး အီ ပျာတ့် တဲး ဂေ လိုဝ် စှိုမ် တူတ့် ဘောကာဂ့လျီတ်။

13 ဟေ အီ ဘွတ် အီ မွှိုမ် အီ ကွယ် ဒီ နွန် လေဘာနုန် တွိုန်၊ ဘော မုး ဟေ ကာထိန်၊ ဟေ န့ကေ ဘော ဟေ ထာဆူရာ၊ ဂေ အီ ဟဝ် ဒီ ဘော ဒိုဝ်း တး၊ ဝီ မ့ပြာယ် မိူင် ဘေ။ ဂေ ဒီ ဘော ဘူင် တဲး ဟုဝ် အုဝ် ဝီ စှိတ်။ တဲး ဒူင် ကွယ် အုဝ် ဝီ မိုဝ်း ဆာရေ တာင်။

14 ဂွန် ဂေ ဒူအီ အီ ဟဲ့ ဒွိုမ် ခါနှာပ် ဘေ၊ ဂေ ဒီ ဘော လုဝ် ဝီ တး ဂူမ် တး ယူမ် ဘေ ဘော ရုဝ်ဆေ ဘေ။ ဂေ အီ ဟဲ့ ဒွိုမ် လုက်တာယ် ဘေ၊ ဂေ ဒီ ဘော လုဝ် ဝီ တး မုတ် ဂိုပ် ခူပ် ပ့လဝ် ဘေ။ ဂေ ဒီ ဘော တဲး မိူင် ဘေ စိူဝ်၊ ‘မိူင် ဇီအူန် အီ မုး မိူင် ပီ အိုပ် ဇဝ်ဖြာ အီ ဆီငါ ဘွတ်၊ မိူင် ဇဝ်ဖြာ ပီ ကြိုပ် ဂေ ဒူအီ အီဆာရေလ။’

15 အီ ဟဝ် ဟဲ့ ဒွိုမ် ဝး ဘေ ဘော ဇွင့် ဘေ။ န့ မိူဝ် တူ မိုဝ်း အာဆေ အီ တး စ်ု ဘေ။ အုဝ် ယီ ဝီ တဲး ဘေ ဘျုဝ် ဒါခိုယ် ကွယ် ခဲင် မိူင် ဘေ၊ တဲး န့ ဝီ ဘဲန် မိူင် ဒူင် ဆီ ကွယ် ဒွန် အီ ဒွန် စုဝ် ဒွန် ဘာန်။

16 ဂေ ဒူအီ အာမျုဝ် ဟဝ် ဘော ခုန်ဒီခမ် ဂေ၊ ဂေ ဒီ ဘော လုဝ် ဝီ လိုမ်လာ ဘေ၊ တဲး န့ ကော ပီ မာ လိုမ်လာ ဂွန် အန်။ ပန် အန် တီ ဘေ ဒီ ဘော ဝီ နပ် အုဝ် မုး ဇဝ်ဖြာ အီ ဟဲ့ ချွတ် ဘေ၊ ဇဝ်ဖြာ ပီ ကြိုပ် ဒူအီ အီဆာရေလ၊ ဇဝ်ဖြာ အီ မိုဝ်း အာဖုင် ဒင်ခုဝ် တာင် အီ ဟဲ့ ထုတ် လေး ဘေ အီ မုး အာမျုဝ် အာကူပ်။

17 အုဝ် ဒီ ဝီ ဒိုဝ်း ခြိဝ် တး ပ့လု ဘွင့် ဒေန့်။ ဒိုဝ်း ရွိုန် ဝီ တး ပ့လု ဟိန်။ ဒိုဝ်း ဘွင့် ဒေန့် ဝီ ပ့လု ဟေ၊ ဒိုဝ်း ဟိန် ဝီ ပ့လု မာဝ်။ အုဝ် ဒီ တဲး ဘေ မိုဝ်း နဝ်း ဂျီတ် ယေန် ဆေဆေ၊ တဲး န့ ပီ ဒါ အီ အိုပ် ဘေ။ အုဝ် ဒီ တဲး ဘော နဝ်း ဆိူဝ် နဝ်း မှာန် ဒီ ဘေ၊ တဲး န့ ပီ ဒါ ကာညာ ဘေ။

18 အီ ဆီနန် ဆီနိူင် လာယ် ကာဂုဝ်း ကာငဝ်း၊ ဘေ အာဝ် ဟူ ယိုဝ် ခဲင် မိူင် ဘေ ဒေါ မှဝ်။ ဘေ ဒီ ဝီ တဝ်း၊ ရဲင် မိူင် ဘေ မုး ဒူင် ချွတ် အီ။ ဘေ ဒီ ဘော တဝ်း၊ လွင် မာလုဝ်း မိူင် ဘေ၊ န့ မုး ဒူင် အိူပ် အီ ဇဝ်ဖြာ။

19 ဝါယ် အန် တီ ဒေါ ကာတဲ ဆီငဲ ဘေ အာဝ် ဟူ လုဝ် ဘ့လာင် ဆီငဲ။ ခဲင် မှိုဝ်၊ ဘေ အာဝ် ဟူ လုဝ် မာဂျီန် ဘ့လာင် ဒီ ဘေ။ ခုဝ်၊ အုဝ် ဇဝ်ဖြာ ဟဲ့ ဘဲန် အီ ဘ့လာင် ဒီ ဘေ။ ကာတာန် အာဖုင် ဒင်ခုဝ် အုဝ် ဒီ ဘော တဲး န့ ဘ့လာင် ဒီ ဘေ ဆေဆေ။ ဘော ဇဝ်ဖြာ ပီ ကြိုပ် ဘေ ဒီ ဘော တဲး ဘေ မိုဝ်း အာဖုင် ဒင်ခုဝ်။

20 အုဝ် ဇဝ်ဖြာ ဒီ ဘဲန် အီ ဘ့လာင် ဒီ ဘေ ဆေဆေ။ အုဝ် ဒီ ပီ ဆီငဲ ဒီ ဘေ အီ တူ ဂေတ့် ဒေါ မှဝ်။ အုဝ် ဘော ပီ မာဂျီန် ဒီ ဘေ အီ တူ ယမ် ဒေါ မှဝ်။ ဘေ မိူဝ် အာဝ် ဟူ မိုဝ်း က့လိုဝ် မိုဝ်း ဒုက် ဒေါ မှဝ်။

21 ဂေ ဒူအီ အာမျုဝ် ဘေ ဘောကာဂ့လျီတ်၊ ဂေ ဒီ ဘော ဘူင် ဆိူဝ် ဆိူဝ် မှာန် မှာန်။ ဂေ ဒီ ဝီ ပွိုန် ဒီ ဘိုင် မာန် မိူင် ဂေ ဆေဆေ။ ဂေ ပီ ငှုဝ် ပီ ဆမ် အုဝ် တာ ဒဲ အုဝ်၊ တဲး န့ ဘျ ခဲ့ တာင် အာဖုင် ဒင်ခုဝ် အုဝ်။

22 အီ မုး ဝါ တျီ့ ဘေ၊ အန် ဒီ ဝီ ဘြဲ ဝီ ဘဲန် အူ ဟြဲန့် ဝီ။ ဘော ဝီ အီ ဒီတဲတ်၊ အန် ဒီ ဝီ ဘြဲ ဘဲန် အာမျုဝ် ဒူအီ ကိူန်။ ဟီ ဇမ် အာခြာဝ် အန်၊ အုဝ် အီ မုး ဇဝ်ဖြာ၊ အုဝ် ဒီ ဘော ဘူင် လွင် အန် တီ၊ တဲး န့ ဘဲန် ခြန် ခြန် ဟဲ ဟဲ။”