1 ဘေ ကွဲ့ ထာင် ဇဝ်ဖြာ တူ ပွိုန် ချွတ် ဘေ။ ဘေ ကွဲ့ ထာင် ဇဝ်ဖြာ တူ ယိုဝ် ဂြုဝ်း ဘေ။

2 န့ ယီ မုး မှာပ် ဘေ အီ တဲး ဇဝ်ဖြာ ကာယဝ်း ဒီ ဘေ။ န့ ဘော မုး နာ စီစိဝ် ပီ ဘူင် ဘေ၊ အီ တဲး ဇဝ်ဖြာ တူ ယွတ် ဘေ ဘော တူ ထူမ် ဂြုဝ်း ဘေ။

3 ခုဝ်၊ မှာပ် ပီ ဘူင် ဘေ၊ န့ ပီ နှာမ် ဟဲ့ ဒိုက် ဒီ ဒဲ ဘေ၊ တဲး နဝ်း ဘေ ယုဝ် ဘော ကာပိုန့်။ ဘေ မိူဝ် ဟဲ့ ကာလာင် ဂြုဝ်း ကာလုဝ် ဘော တဝ်း ဂြုဝ်း စီစိဝ်။

4 အာဝ် မိုဝ်း ခေါ အူ ဝီ အီ ဆီ ဘူင် တဲး န့ ဒူပ် ဒါရာ။ အာဝ် မိုဝ်း ခေါ အူ ဝီ အီ ဆီ ဘူင် ဆိူဝ် ဆိူဝ် မှာန် မှာန်။ ဂေ ဘော ဘိုင် အီ တူ မှာန် ဘော ကာလုဝ် တဲး ဂေ အွင် အာမူ ဂေ။ ပီ ဇေန့်ဇာ ဂေ၊ န့ ပီ ဂေ ဟဲ့ ဒဲ ဘာဒိက် ဆန်ထေ။ အီ ဂွိုတ် ဝါယ် အန် တီ ဘဲန် နာ ဟာယ် နာ မိူက်။

5 အာကျာမ် အာငျာန် ဂေ အီ ဟာယ် အီ မိူက် တီ၊ န့ ဘော ပီ ဂေ ကာနမ် ပွိုန် မာဟန့် ဘော ဘူင် ကာင် မာပုင်ပျေန့်။ ဂေ အီ ဟူမ် ပွိုန် မာဟန့် တီ၊ ဂေ ဒီ ယမ်။ ပွိုန် မာဟန့် တီ ဟီ ကး၊ န့ ဒီ လေး အီ ဟာယ် ကာဆဝ်။

6 ဘော မာပုင်ပျေန့် နပ် ဒီ ဆိန့် ဝန် အန်။ မာလဲ၊ ဝန် အန် တီ ယီ တူ ပွိုန် ဝီ ဒဝ့် ဘဲန် ခြိုင် တာ အန်၊ အာဝ် ပွိုန် ဝီ ကာဘိတ် ဒုဝ် အန်။ ပီ ဘူင် ဂေ မိူဝ်၊ ဟဲ့ ဟာယ် ကာဆဝ်၊ နပ် ဒီ ကာလုတ့် ကာဂုဝ်း ဆေဆေ။

7 ဒူင် ဟာဝ် ဒူင် ဝဝ့် ဂေ၊ ဂေ ဘော ဘူင် တဲး န့ လိုဝ်၊ တဲး န့ ကာပျာတ့်။ ဂေ ဘော အွန် ဒီ ငဝ်း ယမ် အီ ဟဝ် အီ တူ မိုဝ်း ပီ လုတ့်။ ဂေ ဘော ခြာမ် မီ ဒီ ဘူင် အီ ဟာယ် အီ မိူက် ဆေဆေ။

8 ဒူင် ဝဝ့် ဒူင် ဝေန့် ဂေ၊ အာဝ် မိုဝ်း အာဆေ အီ ပွိုန် ကွယ် ဆီချာ ကွယ် ဂတ် ဂျီတ်။ ခဲ့ ပီ ဘူင် ဂေ၊ တူ ဒူပ် ဒါရာ။ ဂေ ဘော ဟာဝ် ဒူပ် န့တေန့် ဂုဝ့်၊ ဂေ အီ ဝီ ဟာဝ် ဒူပ် န့တေန့် တီ တူ ပွိုန် ဂျာမ်ဆာ ဒေါ မှဝ်။

9 ဂေ ဒူအီ ကိူန် ဝီ တဝ်း၊ “ဒေါ တီ နီ ယေ ဟဲ့ ဟွတ့် နပ် န့ ပါယ် မှဝ်။ အာဝ် မိုဝ်း အီ ဒီ ဆုင်ဖျာတ် အာမူ ယေ၊ တဲး န့ ဒူပ် ဒါရာ။ ယေ မိူဝ် တူ ပွိုန် နဝ်း ဆိူဝ် နဝ်း မှာန် ပီ ဒွါ ဇဝ်ဖြာ။ ယေ ဘော ဟြေတ့် နာ ဘ့လာင်၊ အပ် ဝွင့် ယီ ဝီ ပ့လိုက် ယေ။ ယေ ဆီ ကွယ် ဒူင် မိုဝ်း ဘ့လာင် ဆီငဲ၊ ယီ ဝီ မိုဝ်း မီ အပ် ဂေ ကာမိုက်။

10 ကူပ် ပါယ် တီ ယေ ဘော ကာဒုး ဒီ ဟာဝ် ဘုန် ပီ ဒူအီ ငါယ် အပ်။ ဒေါ ကာတဲ ဆီငဲ၊ ယေ ဘော နပ် ဒီ ဒီပ့လာတ် ကေး ပီ ဒေါ ပြဲ ဟဲ့ အပ်။ ကာတဲ ဂေ ဒူအီ အီ မိုဝ်း ပ့လူမ် ဂေ ဟဲန့် ယေ ပီ ဒူအီ ယမ်။

11 ယေ ဘော ကာအိူန် ပီ မာဂြေး။ ယေ ဘော ငှုန် ပီ ဟမ် မာဘ့လူယ်။ ယေ ဝီ ဟြေတ့် နာ မုး နာ မှာန် မိူဝ်၊ ယီ တူ ယိုဝ်။ ယေ ဟြေတ့် အီ ဒီ ချွတ် ယေ မိူဝ်၊ ယီ ပီ န့ ကွယ် ကာတူင့် ကာဆဝ်။

12 အိုယ် မဲ ဇဝ်ဖြာ၊ မှာပ် ယေ ဟဲ့ ကိူန် ကာဆဝ်။ မှာပ် ယေ တီ ဟဲ့ ဝီ ဖျာက် ယေ ဒီ အာတ့် မဲ။ ယေ ဟဲ့ နပ် လွင် အီ တူ မွှိုမ် ပီ ဘူင် ယေ တီ ဘော ကာလာင် လွင် အန် တီ ဒီ မဲ ဇဝ်။

13 ယေ ဟဲ့ ဘူင် ကာဘး ဒီ မဲ ဇဝ်၊ ဟဲ့ ဝဲန် မဲ ဇဝ်။ ယေ ဟဲ့ ဝီ ခါနှာပ် အီ ဟဝ် ဘော တဲး အီ ဟဝ် ဝီ ဘူင် ကာဘး ဒီ မဲ။ ဂြုဝ်း ပီ ကာလာင် ယေ ဘော မုး ဂြုဝ်း ကာလုဝ် အီ လေး ခဲင် နဝ်း ယေ။

14 ခုဝ်၊ ပီ ဆုင်ဖျာတ် အီ ဒူပ် ဒါရာ ဟဲ့ လှဲ လေး။ ဘော နဝ်း ဆိူဝ် နဝ်း မှာန် ဟဲ့ ကွယ် တူင့် ယေ။ နာ မုး နာ မှာန် မိူဝ် ဟဲ့ ဟွတ့် ကေး ဒူပ် န့တေန့်။ နာ ဆိူဝ် ဆိူဝ် မှာန် မှာန် မိူဝ်၊ အာဝ် ဟူ ပွိုန် ဒီ လိုပ် တး။

15 နာ ဆိူဝ် နာ မှာန် အာဝ် ဟူ ပွိုန် ယိုဝ် နာ မှဝ်။ ဂေ အီ ဝး နာ စီစိဝ်၊ ဂေ ဘော ဘဲန် ပီ ဖာတ် ဒိုဝ်း အီ ဟဝ်။” ဂေ ဒူအီ ကိူန် တဝ်း ခဲ့ တီ။

ဇဝ်ဖြာ ဘော ယိုဝ် လွင် အန် တီ၊ န့ တူ လဝ့် နဝ်း အန် ကူပ် တူ မိုဝ်း ဂေ အီ ဆုင်ဖျာတ် တဲး န့ ကာရမ်။

16 အန် ဇဝ် ဟဲ့ ယိုဝ် အာဝ် မိုဝ်း ဒူအီ ခေါ အူ ဝီ စွယ် ဂေ အီ ခမ် တီ။ အန် ဘော အာမ် ကာဆဝ် ကူပ် တူ မိုဝ်း ခေါ အူ ဝီ အီ ဆာခိုဝ် လွင် အန် တီ။ အန် ဇဝ် ယီ ဝီ တာ အာဖုင် ဒင်ခုဝ် အန်၊ ဝီ ချွတ် ဂေ ဘော တဲး နဝ်း ဆိူဝ် နဝ်း မှာန် အန် ဝီ စွယ် ဂါန် အန်။

17 အန် ဇဝ် ဟဲ့ ဒိုဝ်း နာ ဆိူဝ် နာ မှာန်၊ တဲး န့ ပီ ဒါ ဆိုက် အီ ဟဲ့ ဂူင့် မင် ဂွင့်။ အန် ဘော ဒိုဝ်း ဒါရာ အီ ချွတ် အီ၊ တဲး န့ ပီ ဒါ ဆိုက် စှိုပ် မာဂိန့် ဟိန်။ အန် ဘော ဘ့လေး နဝ်း ဆီ ဘူင် ဝျီ့ ဒီ ဂေ ဒူအီ ဟာယ်၊ တဲး န့ ပီ အန် စှိုပ် ခြိုင်။ အန် ဘော မိုဝ်း နဝ်း ဆီ ဘူင် ဒီငန့်၊ တဲး န့ ပီ အန် ကန် ဟိုပ်။

18 အန် ဒီ ဘော ဘူင် ဝျီ့ ဒီ ဂေ ရန်ဆူ အန်၊ တဲး န့ ကာဒါန် ခဲ့ ပီ ဒွိုမ် ဘူင် ဂေ။ ဂေ အီ ဘူင် ကာဘး ဒီ အန်၊ ဂေ လုဝ် ခမ် ခဲ့ ကာအာပ် ဂေ ခမ်။ အန် ဒီ ဘူင် ဝျီ့ ဘော ဒီ ဂေ အီ ကွယ် ခဲင် ဂုန် အိုမ်။

19 ဂေ ဒူအီ အီ ကွယ် ဘ့လာက် နာ လေး ဆီငဲ၊ ဂေ ဒီ ဘော ယုဝ် ဇဝ်ဖြာ။ ဘော ဂေ အီ ကွယ် ဘ့လာက် နာ ဂေတ့် ဆီငဲ၊ ဂေ ဒွန် အီ ဒီ ဘော ရုဝ်ဆေ အာဖုင် ဒင်ခုဝ် အန် ဇဝ်။ ခုဝ်၊ ပန် ဒီ တး အန် ဇဝ်၊ န့ ဒီ ပီ ဇဝ်ဖြာ ဟဲ့ ဟိုဝ်း ဖွိုမ် အန် ဘော တဲး အိုမ် ကော ဇဲဝ် ကာဆဝ်။

20 ဇဝ်ဖြာ ဝီ တဝ်း၊ “အုဝ် ဒီ ဝီ တး ဒီ မိူင် ဇီအူန်၊ တဲး အုဝ် ပွိုန် ဒီ တး ထုတ် လေး ဂေ ဘော ချွတ် ဂေ အီ ဟဲ့ လှုဝ်း ဟဲ့ ဝဲန် မှာပ် ဂေ ဒွန် အီ။

21 ကာဒိက် ဆတ်ဇာ ပီ ဒွါ အုဝ် ဒီ ဘေ န့ ပါယ် နီ။ အုဝ် ဒီ တဲး နဝ်း ဖွိုမ် အုဝ် အိုပ် ဘေ။ ဘော ဂြုဝ်း ပဲ့ ဟဲ့ ဟပ် အုန် အုဝ် ခဲင် မူတ့် ဘေ၊ န့ တူ လေး တူ ဟြာယ် ဒေါ မှဝ်။ စုး အာတိုဝ် နီ ဟာဝ် နာ အာတ့်၊ ဘော ဂွန် ဘေ ဂေ လှုက်လှာန် ဘေ၊ ဂေ ဒီ ဘော လှုဝ်း ဂြုဝ်း အုဝ် ဆေဆေ၊ တူ ပိဝ် ဒေါ မှဝ်။” ဇဝ်ဖြာ ဟဲ့ ကာလာင် အုန် ပါယ် တီ။