1 ဇဝ်ဖြာ ဝီ တဝ်း၊ “တဲး ဘေ ဒတ် တာင် တာင်၊ ဒတ် ခဲ့ ဆီ ဒီ လေး မဲင် ဘေ။ တဲး န့ ဟမ် တာင် ပီ ဟမ် နိုင် ပဲ။ တဲး ဘေ ကာလာင် ဒီ ဂေ ဒူအီ ပီ အိုပ် အုဝ် လွင် ပီ ကာဘး ဂေ ဒီ အုဝ်။ တဲး ဘေ ဘော ခဲ ဒီ ဂေ ဒူအီ အာမျုဝ် အာကူပ် လွင် မှာပ် ဂေ ဘဲန် မျုဝ် ဘဲန် မျုဝ်။

2 ဂေ ဘော တဝ်း၊ ဂေ ဟဲ့ ဂါဝ် ပွုန် အုဝ် ဒွန် ဆီငဲ ဒွန် ဆီငဲ။ န့ ဘော ပီ ဂေ ကာပြာ ကာဆဝ် ဒီ နပ် ပီ ပါယ် ဇဝ်ဖြာ။ ဂေ ဘော ပီ အာမျုဝ် ဒူအီ အီ မိုဝ်း နဝ်း ဆိူဝ် နဝ်း မှာန် အီ တူ ဝဲန် ဒါရာ ဇဝ်ဖြာ။ ဂေ ဘော မှာန့်၊ တဲး အုဝ် ဆုင်ဖျာတ် ဒါရာ ဆိူဝ် ဆိူဝ် မှာန် မှာန် ဒီ ဂေ။ န့ ဘော ပီ ဂေ ဟဲ့ ဒါခိုယ် ဒီ တဲး ဇဝ်ဖြာ ကွယ် ရိုမ် ဒူပ် ဂေ။”

3 ဂေ ဒူအီ ကိူန် ဘော နပ် ဒီ ဝီ တဝ်း၊ “ပဲ့ ဟဲ့ ယိူန် ယေ ပီ ဒီ ဟူမ် အာဝ် မိုဝ်း ဒီခုဝ် မာဆေ။ ခုဝ်၊ ဇဝ်ဖြာ တူ ယွတ် ယေ။ ဘော လွင် ဟဲ့ ပီ တျီမ် ယေ နဝ်း ယေ၊ အာဝ် မိုဝ်း အာဂျိုဝ် မာဆေ။ ခုဝ်၊ ဇဝ်ဖြာ တူ ညိုင်ရာင် ယိုဝ်။” ဇဝ်ဖြာ ယီ ဝီ တဝ်း ဒီ ဂေ၊ “ဆီငဲ ယိူန် ဘေ ပီ ဒီ ဟူမ် တီ၊ ဘေ ဟဲ့ ဘူင် ဒူပ် ပီ အိုင် ဘေ။ ဘေ ဟဲ့ ခါနှာပ် မှာယ် ဘေ၊ စ်ု ဂေ ဘူင် ဂါန် စန် အီ ညှာပ် ကာဆဝ်။

4 ဘေ ဟဲ့ ယိူန် ပီ ဒီ ဟူမ်၊ ဘေ ယီ ဝီ လာယ် ကာအေး လာယ် ကာလုတ့်။ ဘေ ဘော ဝီ လာယ် ကာမး တာ ဒဲ ဘေ အီ ဟာယ် အီ မိူက်။ ပီ ဘူင် ဘေ ဆီငဲ ယိူန် ဘေ ပီ ဒီ ဟူမ် တီ၊ န့ တူ မွှိုမ်၊ တူ တဲး အုဝ် ထူမ် ဂြုဝ်း ပီ ဆာခိုဝ် ဘေ။

5 ဘေ ထာင် ယိူန် ပီ ဒီ ဟူမ် ပါယ် တီ ဟဲ့ လဝ့် နဝ်း အုဝ်။း ဘေ ထာင်၊ ဆေ ဘေ ဟဲ့ ပီ တျီမ် ဒုဝ် ဘေ အာဒါ အူ ဆီငဲ၊ ဟဲ့ ဂ့လိုမ်။း ဘော ဆေ ဘေ ဂူမ် မုတ် ဂိုပ် တဲး န့ ကော ပီ မဲအော၊ ပီ ဝီ ဒိုဝ်း စာန် ဒ ဘဲန် မ့ဘေ၀်၊ ဝီ ဒိုဝ်း ဘော ကာဝှါင် ခြဝ်း နာ ခြိုမ်၊ ဘေ ထာင် ဇိုဝ် တီ ဟဲ့ မုး ဟဲ့ မှာန် ဒေါ ယိူန် ဘေ ပီ ဒီ ဟူမ်။း ဘေ ထာင် ဟဲ့ လဝ့် နဝ်း အုဝ် ပီ ဘူင် ဘေ တီ။း

6 လွင် ယိူန် ပီ ဒီ ဟူမ် အီ လဝ့် နဝ်း အုဝ်၊ န့ ပါယ် နီ။ ဆေ န့ မိုဝ်း ဒူအီ အီ ကွယ် ခဲင် ကာပိုမ်၊ ယီ တူ မိုဝ်း ဒီ ဘူင် မှာပ်၊ ဘေ လုဝ် ဘ့လေး ဂေ၊ တဲး န့ ပီ ဘေ ဂဝ်း ဝဲန် ဝန် ဟိန် ဂေ တီ။ ဆေ န့ မိုဝ်း ဒူအီ ပဲ့ ဟဲ့ ခါနှာပ် ဘေ၊ တဲး န့ ပီ ဂေ စှိုပ် အဲ့မဝ်၊ တဲး ဘေ ဒိုဝ်း ကာဘက် ဝဲန် အဲ့မဝ် တီ ဒွန် မျုဝ်။

7 ဆေ ဒူအီ ကာပြာန့် ပီ ဒီ ဟူမ်၊ တဲး ဘေ ကာဆာင် ပီ ဒီ ဟူမ် ဘေ ဒီ ဂေ။ ဆေ န့ မိုဝ်း ဒူအီ ဂိန် အီ တူ မိုဝ်း ကာင် ဒူင် ဒီ ကွယ်၊ တဲး ဘေ ဝိုဝ်း မာလုဝ်း ကာင် ဘေ၊ တဲး ဂေ ပွိုန် ဒီ လိုပ် ကွယ်။ ဆေ န့ မိုဝ်း ဒူအီ အီ တူ မိုဝ်း ဒီ တာ ခြိုင်၊ ကွဲ့ တဲး ဘေ တဲး ဂေ ကွယ် ဒုဝ် ဂ့လ ပါယ် တီ။ ဂေ မုး ဘီနွင် ဝေါဝဲ ဘေ။

8 ဆေ ဘေ ဘူင် ပါယ် တီ ပီ ဂေဇူ အုဝ် ဒီ ဘေ ဒီ ဘော ပီ ဘ့လာင် အီ ထွင် ဒဲင် ဘေ ပီ ဘ့လာင် ဆီငဲ ဒေါ မုး စေဝ် ညှာ။ ဒိမ် ဘေ ဂေ ပ့လာ ဘေ ဒီ ဘော စေဝ် ဟြာယ် စေဝ် ကဲန်။ အုဝ် ဒီ ဘော တဲး ဘေ မိုဝ်း နဝ်း ဆိူဝ် နဝ်း မှာန်၊ တဲး န့ ဘော ဂွင့် ရဲ ဒီ အာတ့် ဘေ။ ဘော အာဖုင် ဒင်ခုဝ် အုဝ် ဒီ ဘော ဂွင့် ရဲ ဒီ ပန် ဘေ။

9 ဒေါ ဆာခိုဝ် ဘေ ဒီ အုဝ်၊ အုဝ် ဒီ ဘော ထူမ် ဂြုဝ်း ဘေ။ ဒေါ ဒဲ့ ဘေ ဒီ အုဝ်၊ တဲး အုဝ် စွယ် ဘေ၊ အုဝ် ဒီ ဘော ဝျီ့ ဂြုဝ်း ဘေ။ ဆေ ဘေ ဘော စူ ခါနှာပ် အီ ဟဝ် ဘော စူ ဖျာက် အီ ဟဝ်၊ စူ နဲန အီ ဟဝ် ကာတဲ ဘေ၊

10 ဆေ ဘေ ဘော ဝီ မိုဝ်း နဝ်း ဆာထာ၊ နဝ်း ဟာင်၊ ဝီ ကာဆာင် ပီ ဒီ ဟူမ် ဒီ ဂေ အီ ကာပြာန့်၊ ဝီ စွယ် ဂေ ဒူအီ ပီ ခါနှာပ် အီ ဟဝ်၊ န့ ဒီ မွှိုမ် ဒီ ဘေ။ ပါယ် တီ အီ အပ် ဝွင့် အီ ကွယ် ခူပ် ဘေ တွိုန်၊ န့ ဒီ ဝီ ဘဲန် အီ ဘ့လာင် ပီ ဘ့လာင် ဆီငဲ။

11 ဆေ ဘေ ဘူင် ပါယ် တီ၊ အုဝ် ဒီ ဝီ ယဲတ့် ဝီ နှဲ န့တေန့် ဒီ ဘေ ဆေဆေ၊ တဲး နဝ်း ဘေ ကော ဒါခိုယ် ဂျာမ်ဆာ ပီ အီ ဖဲ ဘူမ်။ ခဲင် ဒူင် ကာဟဝ်း၊ အုဝ် ဒီ ဝီ တဲး ဘေ မိုဝ်း ပ့လူမ် ဂေ ဟဲန့်။ တဲး ဘေ ကွယ် ဒါခိုယ် ဂျာမ်ဆာ။ ဘေ ဒီ ဘော ပီ ကာပိုမ် အူင့် ဘုဝ်း အီ မိုဝ်း အိုမ် ဆီချာ၊ အီ ပီ ဘော အိုမ် တုဝ်း အီ တူ ဒွိုမ် ဟိတ် ဒေါ မှဝ်။

12 ဂေ ဒူအီ ဘေ ဒီ ဘော ဝီ မ့ပြာယ် အီ ဟဲ့ လိုဝ် ဟဲ့ ကာပျာတ့် ဆိန့် ဒေါ မွိုန် အီ ဟဲ့ လှေန့် ကာဆဝ်။ ဂေ ဒီ ဘော ဝီ ဂုဝ် ဝီ ဘ့လေး ဒင် ဘြိမ် အန်။ ပါယ် တီ အီ ဟဝ် မိူဝ် ဒီ တဝ်း၊ ဘေ မုး ဒူအီ အီ ဝီ မ့ပြာယ် ရဲင် မိူင်၊ အီ ဝီ ဆမ် ဝီ ဘျိတ့် ကာင် အီ ဟဲ့ လိုဝ် အီ ကွယ် ခူပ် န့တေန့်။

13 ဇဝ်ဖြာ ပီ ဝီ တဝ်း၊ “ဆေ ဘေ ကမ် ဆီငဲ ဒီလှဝ် တူ တဲး ဘေ ကာလိုပ် ဒီ ဟာဝ် တူင့် ဘော တူ ဘူင် ပီ အိုင် ဘေ၊ ဆေ ဘေ မိူဝ် မာတ် ဆီငဲ တီ ဟဲ့ မုး ဆီငဲ အီ ဆီငါ ဘွတ်၊ ဆေ ဘေ ဘော ဒါခိုယ် ဒီ အုန် ဆီငဲ တီ၊ တဲး န့ ဘဲန် ဆီငဲ အီ အာရေ တာင်၊ ဆီငဲ အီ ဆီငါ ဘွတ်၊ ဆေ ဘေ မိူဝ် ရုဝ်ဆေ ဘော တူ ဝီ ဒူပ် ပီ အိုင် ဘေ ဘော တူ ကာလာင် ဂြုဝ်း အီ တူ မိုဝ်း ဒီခုဝ်၊ န့ ဒီ ဘဲန် အာဂျိုဝ် ဒီ ဘေ။

14 ဆေ ဘေ ဘူင် ပါယ် တီ၊ ဘေ ဒီ ဘဲန် နဝ်း ဘျုဝ် ဒါခိုယ် ဒီ ကြိုပ် အုဝ်။ အုဝ် ဒီ ဝီ တဲး ဘေ ဘဲန် ဒူအီ ပီ ရုဝ်ဆေ အီ ဟဝ် ဒဲင် ကာဒါယ် နီ။ ဘေ ဒီ ဘော ပွိုန် ဒီ ကွယ် ဘျုဝ် ဒါခိုယ် ခဲင် မိူင် ပဲ့ ဟဲ့ အာပ် အုဝ် ဒီ ဂုန့် ဒင် ဘေ အီ စိူဝ် အာကူပ် အီ ဟဲ့ ဘဲန် ခါဂုန် ဘေ တွိုန်။ အုဝ် ဇဝ်ဖြာ ဟဲ့ ကာလာင် အုန် ပါယ် တီ။”