ဒေါ ယမ် ဒူအီ အီ မိုဝ်း နဝ်း ဆိူဝ် နဝ်း မှာန် အာဝ် မိုဝ်း အီ ဝီ လှုဝ်း အန်၊ အီ ထာင် ဟဲ့ အာရေ တာင်။ ဆေ ဒူအီ အီ ညှိုမ် ဆီချာ ဇဝ်ဖြာ ဒီ ဘော ယမ်၊ အာဝ် မိုဝ်း အီ ကာလှုး ဒီ နဝ်း လွင် ယမ် ဂေ၊ ကွဲ့ တဲး ဂေ ခမ် ဒုက် တာင်။

2 ဒေါ ဆီ အိမ် ဂေ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ မိုဝ်း နဝ်း ဂတ် ဂျီတ်။ ဂေ ဒီ ဝီ ပွိုန် ဒီ ဒီလှဝ် ဝါယ် ဟဲ့ ယမ် ဂေ။

3 အိုယ် ဘေ အီ မုး ဂွန် ယာ ပြေ၊ တဲး ဘေ တး ဒီ နီ။ ဘော ဘေ အီဘိုန့် အီ မိုဝ်း နဝ်း ကိူန် ဘော ယာ မာလမ်၊ တဲး ဘေ တး။

4 ဘေ ဟဲ့ ညဝ့် ဟဲ့ နဲန အာဆေ။း ဘေ ဟဲ့ ပီလေး ဆီဒ ဘေ ဒီ အာဆေ။း ဘေ ဘော မုး ဒူအီ အီ ကာဘး ဆေဆေ ဘော ဆီမာ ကာလုဝ်။

5 ဘေ ဘော ကြိုပ် ဇဝ် ဘာလ ခြိုမ် ဟေ တာင် ဒွန် ကာဒင် ဒွန် နာ ဒွန် ပ့လုဝ့် ပီ အီဘိုန့် အီ မိုဝ်း နဝ်း ကိူန်။ ဘေ ဘော ဝီ ဒိုဝ်း ဂွန် ဘေ၊ ဝီ လှူ ခဲင် ဒး ဒါအာင် ဘော ခူပ် ဒီလယ့်။

6 ဘေ ဘော ဝီ ဒိုဝ်း မာဝ် ဒီ တီ အီ ဟဲ့ ဂ့လျီတ် ဟဲ့ ချုဝ် ဝီ ကြိုပ်၊ တဝ်း န့ မုး ဇဝ်ဖြာ။ ဘေ ဘော လှုဝ် ဘော အိုမ်၊ တဲး န့ ဘဲန် ပီ ဒီ လှူ ပီ ဒီ ဒျီင်။ ဘေ ဝီ ဒိုဝ်း ဘော ငှုဝ် ဒီဂါဝ် ဝီ လှူ။ ဘေ ပီ ဘော ဟဲ့ ဘူင် ပါယ် တီ ဒွန် မျုဝ် မိူဝ်၊ ဘေ ယီ ထာင်၊ အုဝ် တူ ပါယ် မှဝ်။

7 ဘေ ဘော နပ် ဒီ ဟုဝ့် ဒဲင် နွန် စာ၊ ဝီ ချ ဒီ တီ ဘော လှူ ပီ ဒီ လှူ ဘေ။

8 ဘေ ပီ ဝီ ဘူင် ဘော အာရိုပ် ရာင် အီ မွှိုမ် ကာအိး၊ ဘ့လေး ဒီ ဘာင် မာလုဝ်း ခဲင် ကာင် ဘေ။ ဘေ ဘော ဝဲန် အုဝ်၊ ဝီ ဟုဝ့် ဒဲင် ကာစှူင့် အိတ် ဘေ၊ ဝီ မ့ပြာယ် တဲး န့ ဝဝ်း။ ဘေ ဘော လာယ် ဖြူမ် ဒီ အီ ဟဝ် အီ ဟဲ့ ဒွါ ရုး အိတ် ဘေ ဒူပ် ဂေ။ ဘေ ဘော ဟာဝ် အိတ် ဒူပ် ဂေ ဘော အိုင် ဒုဝ် ဂ့လ ဂေ။

9 ဘေ ဘော ဝီ ဒိုဝ်း နာမန် ဒွါ ဒီ ဇဝ် မုဝ်လုဝ်း ဘော နာမန် အုး ငှုန်၊ ဝီ ဒိုဝ်း လှူ ဒီ အန် ဇဝ် တီ။ ဘေ ဘော ဝီ စ်ု ဒါလာမ် ဘေ ဟာဝ် ဒူင် တူင့် ကာဆဝ်၊ တဲး ဂေ ကော ဝီ ဇမ် မိူင် မာရာန။

10 ဘေ ပီ ဘော ဟဲ့ နုန် ဟဲ့ ဒီလှး ဒီ ဒူပ် ဇဝ် ဘဲန် ကာဒင် ဘဲန် ကာဒင် မိူဝ်၊ နဝ်း ဘေ ယီ တူ လိုဝ်။ ဘေ မိူဝ် တူ တဝ်း၊ “အာဝ် မိုဝ်း ဒီခုဝ်။” န့ ဟဲ့ ဝဲ တဲး ပ့လူမ် ဂေ ဟဲန့် ဒီ ဘေ။ အာဝ် ဟူ ဘဲန် နုန် ဘဲန် ဒီလှး ဒီ ဘေ။

11 အာဆေ ဟဲ့ တဲး ဘေ ယုဝ်၊ တဲး ဘေ ဝီ ဘူင် အီ တူ ကာအာပ် ဘူင် ဒီ အုဝ်၊ တဲး ဘေ ကော ဝီ ပိဝ် တူတ့် လွင် အုဝ်။း န့ ဟဲ့ လှေန့်၊ အုဝ် ဟဲ့ ကွယ် နှိမ် နှိမ်၊ တူ ဘူင် မာဆေ။ ခုဝ် အန် တီ ဘေ အာဝ် ဟူ ရုဝ်ဆေ အုဝ်၊ အာဝ် ဟူ ရီမာတ် အုဝ်။

12 ဘေ ဘော ဝီ ထာင်၊ ပီ ဘူင် ဘေ တီ ဟဲ့ မုး ဟဲ့ မှာန်။ အုဝ် ယီ ဒီ တဲး ဘေ နပ် လွင် ပီ ဘူင် ဘေ ဘော လွင် ပီ ထာင် ဘေ တီ၊ တူ ဘဲန် အာဂျိုဝ် မာဆေ ဒီ ဘေ။

13 ဒေါ ဆာခိုဝ် ဘေ တဲး န့ မိုဝ်း အီ စွယ် ဘေ၊ တဲး အာရိုပ် ရာင် တီ စွယ် ဘေ။ န့ ယီ မိုဝ်း ခုန် ဒီ တး ဘုတ် တဝ် ဂေ။ ဆေ အီ ဟိုဝ်း ဖွိုမ် န့ တဲး ဂေ ဟြာယ်။ မာလဲ၊ ဂေ အီ ညှိုမ် ဘိုင် အုဝ်၊ ဂေ ယီ ပွိုန် ဒီ ကွယ် ခဲင် မိူင် ပီ အိုပ် အုဝ်။ ဂေ ဒီ ဘော ပွိုန် ဒီ ကြိုပ် အုဝ် ဒဲင် နွန် အီ ဆီငါ ဘွတ်၊ တဲး န့ ဘဲန် ခါဂုန် ဂေ။

14 ဇဝ်ဖြာ ဒီ ဝီ တဝ်း၊ “တဲး ဘေ မ့ပြာယ် န့တေန့်။ တဲး ဘေ ဒိုဝ်း ဝဲန် အီ ဂိတ် န့တေန့် ဒူင် ဒီ လုဝ် ဟာဝ် ဒူအီ ပီ အိုပ် အုဝ်။”

15 ခုဝ်၊ ဇဝ်ဖြာ အီ တာင် အီ မျာတ်၊ ဇဝ်ဖြာ အီ ဆီငါ ဘွတ် အီ ကွယ် ဆေဆေ၊ အန် တဝ်း၊ “အုဝ် မုး အန် ဇဝ် အီ ကွယ် ဒူင် စာ ဒူင် ဆီငါ ဘွတ်။ အုဝ် ဘော ကွယ် ရိုမ် ဒူပ် ဂေ ဒူအီ အီ မိုဝ်း နဝ်း ဂူမ်၊ နဝ်း တျီမ်။ အုဝ် ဒီ ဘော ဘျွင် နဝ်း ဂေ၊ တဲး ဂေ အီ မိုဝ်း နဝ်း ဂူမ်၊ ဝီ မိုဝ်း နဝ်း တာင်၊ ဘော ဂေ အီ မိုဝ်း နဝ်း တျီမ်၊ တဲး ဂေ ဝီ မိုဝ်း ပီ နှဝ့် န့ဒဝ့်၊ မိုဝ်း ပီ မာင်။

16 အုဝ် မိူဝ် အာဝ် ဟူ အေး ဂေ ဆေဆေ၊ အာဝ် ဟူ ပီရူ ပီစာဝ် ဒီ ဂေ ဆေဆေ။ ဆေ အုဝ် တူ ဘူင် ပါယ် တီ၊ နဝ်း ဖွိုမ် ဂေ ဒီ ဒီလှး။ ဂေ ဒူအီ ပဲ့ ဟဲ့ ဟပ် အုဝ် နဝ်း ဖွိုမ် အုဝ်၊ ဂေ ဒီ ဘော ယမ်။

17 အုဝ် ဟဲ့ ဒွိုမ် ပီရူ ပီစာဝ် ဒီ ဂေ ကူပ် မှာပ် ပီ ဘူင် ဂေ ဘော ကူပ် နဝ်း လောဖ ဂေ။ အုဝ် မိူဝ် ဟဲ့ ဒမ် မှာပ် ဒီ ဂေ ဘော ဘ့လေး ဝဲန် ဂေ။ မာလဲ၊ ဂေ ယီ ဆီ နဲ့ ပီပ့လူမ် ဂိန့် ဂေ၊ ဝီ ဟာဝ် ဒူပ် န့တေန့် ဘြိမ် ဂေ။

18 အုဝ် ဟဲ့ ဟွတ့် ယိုဝ် တူတ့် ပီ ဘူင် ဂေ။ မာလဲ၊ အုဝ် ယီ ဒီ ဝီ တဲး ဂေ ကဲန်။ အုဝ် ဒီ ဝီ ယဲတ့် ဂေ၊ ဝီ ဒွါ ဘော နဝ်း ဂတ် ဂျီတ် နဝ်း ဒါခိုယ် ဒီ ဂေ အီ ဟဲ့ မိုဝ်း နဝ်း လိုဝ် တီ။

19 အုဝ် ဒီ တဲး ဂေ ဒူအီ အီဆာရေလ အီ ဟဲ့ က့လိုဝ်၊ ဝီ တဝ်း မှုဝ် အီ အိူပ် ဇဝ်ဖြာ။ အုဝ် ဒီ ဝီ ဒွါ နဝ်း ဂတ် ဂျီတ်၊ နဝ်း ဒါခိုယ် ဒီ ဂေ ဒူအီ ဘောကာဂ့လျီတ်၊ ဘော ဒီ ဂေ အီ ကွယ် ဒူင် တူင့်၊ ဘော ဒီ ဂေ အီ ကွယ် ကာတတ်။ အုဝ် ဒီ ဝီ တဲး ဂေ ကဲန်။

20 ဂေ အီ တူ မွှိုမ် ဘော ပီ အိုမ် နမ်မုက်ဆာရာ၊ အာဝ် ယေန် ဒေါ မှဝ်။ မာအိုမ် ဒီ ဘော ဆီလွယ် ဆီလွယ်၊ တဲး ဘော ကာအး ဘော ညုဝ့် ကော လေး။

21 ဒူအီ အီ မိုဝ်း မှာပ်၊ ဂေ တူ မိုဝ်း နဝ်း ဂတ် ဂျီတ် ဒေါ မှဝ်။” ဇဝ်ဖြာ ဟဲ့ ကာလာင် အုန် ပါယ် တီ။