1 ဇဝ်ဖြာ ဝီ ကာလာင် ဒီ ဂေ ဒူအီ ပီ အိုပ် အန် တဝ်း၊ “တဲး ဘေ ဘူင် ဒူပ် ဒါရာ၊ တဲး န့ ဆိူဝ် ဆိူဝ် မှာန် မှာန်။ ခုဝ်၊ အုဝ် မိူဝ် ဒီ စေဝ် တး ချွတ် ဘေ။ တဲး န့ ဘော လိုဝ်း လွင် နဝ်း ဆိူဝ် နဝ်း မှာန် အုဝ်။

2 အုဝ် ဒီ မွင့်ကာရာ ဒွါ ဒီ ဒူအီ အီ ဘူင် ပါယ် တီ။ အုဝ် ဒီ မွင့်ကာရာ ဒွါ ဘော ဒီ ဂွန် ဂေ အီ ကမ် ဆီငဲ ဒီလှဝ်၊ ဘော ဂေ အီ တူ ဘူင် ကာလိုပ် ဘူင် ဘ့လိူင် ဆီငဲ ဒီလှဝ် တီ။ အုဝ် ဒီ မွင့်ကာရာ ဒွါ ဘော ဒီ ဂေ အီ တူ ဘူင် နာ တူ မွှိုမ်။”

3 ဘော ဂေ ဒူအီ အာမျုဝ် ဟဝ် အီ ဟဲ့ ညှိုမ် ဇဝ်ဖြာ၊ ဂေ မိူဝ် အာဝ် ဟူ မိုဝ်း ဒီ တဝ်း၊ “ဇဝ်ဖြာ တူ တဲး ယေ ပွိုန် ဒီ ကြိုပ် ဒူပ် ဂေ ဒူအီ ပီ အိုပ် အန်။” ဘော ဂေ ဒူအီ ဆး၊ အာဝ် ဟူ ပွိုန် တဝ်း၊ “အုဝ် ဟဲ့ ပီ ဟေ ကာဟဝ်း။”

4 ဇဝ်ဖြာ ဘော ဝီ ကာလာင် ဒီ ဂေ ဒူအီ ဆး အီ ကမ် ဆီငဲ ဒီလှဝ် ဘော ဘူင် ပီ အိုင် အန် အီ လဝ့် နဝ်း အန် ဘော ညှိုမ် ဆီချာ ကာဒိက် ဆတ်ဇာ ပီ ဒွါ အန် ဒီ ဂေ။

5 အန် တဝ်း၊ “ခဲင် ဟုဝ် အုဝ်၊ အုဝ် ဒီ ဒွါ တဲး ဘေ မိုဝ်း ဒူင် ဒီ လှုဝ်း အီ ဒီ ဘေ ဆေဆေ၊ တဲး ဂေ လှုဝ်း ဘေ လွှိုမ် ဂေ ဒူအီ အီ မိုဝ်း ဂွန် အီဘိုန့် ဘော ဂွန် အီမာယ် ဘောကာဂ့လျီတ်။ တဲး ဘေ ပွိုန် ဒီ လိုပ် ခဲင် ဝဲင် ဟုဝ် အုဝ်၊ အုဝ် ဒီ တဲး အီ လှုဝ်း ဘေ ဆေဆေ၊ တူ တဲး န့ ဟြာယ် ဒေါ မှဝ်။”

6 ဇဝ်ဖြာ ပီ ဝီ ကာလာင် ဘော ဒီ ဂေ ဒူအီ အာမျုဝ် ဟဝ် အီ ညှိုမ် ဘိုင် ဇဝ်ဖြာ ဘော ဘဲန် ဒဲစေန့် အန်၊ ဂေ အီ ရွက့် အန်၊ အီ ကြိုပ် အန်၊ အီ ညှိုမ် ဆီချာ ကာဒိက် ဆတ်ဇာ ပီ ဒွါ အန် ဒီ ဂေ။

7 အန် တဝ်း၊ “အုဝ် ဒီ ဝီ ဒိုဝ်း တး ဘေ ဒီ နွန် အီ ဆီငါ ဘွတ်၊ အီ မုး ဒူင် ကွယ် အုဝ်။ အုဝ် ဒီ တဲး ဘေ ဘျုဝ် ဒါခိုယ် ဒေါ ကွယ် ဘေ ခဲင် ကာင် အုဝ်၊ အီ မုး ဒူင် ဆာခိုဝ် အီ။ အုဝ် မိူဝ် ဒီ ဒိုဝ်း ပီ လှူ ဘေ ပီ ဘ့လေး ဘေ ဒဲင် ကာစှူင့် လှူ။ ကာင် ဒူင် ကွယ် အုဝ်၊ ဂေ ဒီ ဘော တဝ်း ဟဲ့ မုး ကာင် ဒူင် တး ဆာခိုဝ် ဒူအီ ဒွန် မျုဝ်၊ ဒွန် ခြိုဝ် ဒီ ဇဝ်ဖြာ။” 8 ဇဝ်ဖြာ အီ အိုပ် ဒွန် မျုဝ်၊ အီ ဝီ ဒဲ့ ကာဇု ဂေ ဒူအီ အီဆာရေလ ပဲ့ ဟဲ့ မှေတ့် ဟာဝ် အီ၊ အန် တဝ်း၊ “အုဝ် ဒီ ဝီ ဒိုဝ်း ဒူအီ ဒွန် ဇိုဝ် ဒွန် ခြိုဝ်၊ တဲး ဂေ ဝီ တး ကွယ် ကာတဲ ဂေ ဒူအီ ပီ အိုပ် အုဝ်၊ အီ ဟဲ့ ဟွတ့် တး ကာဇု။”

9 ဇဝ်ဖြာ ပီ ဝီ ကာလာင် ဒီ ဂေ ဒူအီ အာမျုဝ် ဟဝ် တဝ်း၊ “တဲး ဘေ ဝီ တး၊ တဲး ဘေ ပီ မာဒုဝ် ပြဲ အီ ဟာယ်၊ တဲး ဘေ တး ကဝ့် ယမ် တူတ့် ဂေ ဒူအီ ပီ အိုပ် အုဝ်။

10 ငါယ် ဂေ အီ ဘ်ု မိူင် အီဆာရေလ ဟဲ့ အပ်။ ဂေ ဟဲ့ ပီ မာဆုဝ် အီ တူ နပ် ဒီ ပြုဝ်း။ ဂေ ဘော အိတ် ဒွန် နာ ဒွန် ပ့လုဝ့် ဘော အိတ် မ့ဘာဝ်။

11 ဂေ ဘော ပီ မာဆုဝ် အီ ကာပြာန့် ကာဆဝ် ဘူမ်။ ဂေ ဘော ဟူမ် မိူဝ် ယီ တူ နပ် ဒီ ဖဲ။ ဒါ တာင် ဂေ တီ၊ ဂေ ဘော ပီ ဒူအီ အီ ဟျီင် မာဘူ၊ ဂေ ယီ တူ နပ် မာဆေ။ ဂေ ဘောကာဂ့လျီတ် ဘော ဘူင် ဒူပ် ပီ အိုင် ဂေ၊ တဲး န့ ဘဲန် အာဂျိုဝ် ဒီ ဒုဝ် ဘြိမ် ဂေ ရာင် အာဆေ ရာင် အန်။

12 ဂေ ဘော ယိုတ့် ပဝ်း၊ ဘော နပ် ဒီ တဝ်း၊ ‘တး၊ တဲး အေ ဒျီင် ပဝ်း။ တဲး အေ ဒျီင် ဖဲ ဖဲ။ ခဲညှာ န့ ဒီ ကျဝ် ပီ အာတိုဝ် နီ။ န့ ဒီ ဘော ကျဝ် လွှိုမ် တီ။’”