1 ဇဝ်ဖြာ ဝီ တဝ်း၊ “အိုယ် ဘေ ဒူအီ ဒွန် အီ အီ ဆီ ဒျီင် အိုမ်၊ တဲး ဘေ တး ဒူင် မိုဝ်း အိုမ်။ ဘေ အီ တူ မိုဝ်း ရွိုန်၊ တဲး ဘေ တး စိုဝ်း ပီ ဒီ ဟူမ်။ ဘေ ပီ ဆ တူတ့် ရွိုန်၊ တဲး ဘေ တး စိုဝ်း အိုမ် မာငုန် ဘော အိုမ် ပူ မက်။

2 မှဝ် န့ ပါယ် ပီ ဇာယ် ဘေ ရွိုန် စိုဝ်း အီ တူ ဘဲန် ပ့လူမ် ဘဲန် ဟဲန့် ဒီ ဘေ။း ဘေ ဟဲ့ ရန့် ဂါန် စန် ကာဆဝ်။ ရုး ရန့် ဘေ တီ၊ မှဝ် န့ ပါယ် ပီ ဝီ စိုဝ်း ဘေ ပီ ဒီ ဟူမ် အီ တူ တဲး ဘေ ဖဲ။း တဲး ဘေ ဝီ ထူမ် ဂြုဝ်း အုဝ် ဘော ဘူင် ဒူပ် ပီ တဝ်း အုဝ်။ ဆေ ဘေ ဘူင် ပါယ် တီ၊ ဘေ ဒီ ဘော ဘျုဝ် ဒါခိုယ်၊ တဲး န့ ပီ ဘေ ပွိုန် ဒီ ဟူမ် ပီ ဒီ ဟူမ် အီ ဆီငဲး အီ ဘွတ်။

3 တဲး ဘေ ထူမ် ဂြုဝ်း အုဝ် ဘော ဝီ တး ကွယ် ဒူပ် အုဝ်။ ဆေ ဘေ ဘူင် ဒူပ် ဂြုဝ်း အုဝ် တီ၊ နဝ်း ဖွိုမ် ဘေ ဒီ ဝီ အိမ်၊ ဝီ မိုဝ်း အာဆာက် ကာမာယ်။ အုဝ် ဒီ ဝီ ဒွါ ကာဒိက် ဆတ်ဇာ ဒီ ဘေ အီ တူ ဘ့လိူင် ဒေါ မှဝ်။ အုဝ် ဒီ မွင့်ကာရာ ဒွါ နာ ဘွတ် ဒီ ဘေ၊ တဲး န့ ပီ ပီ ဒွိုမ် ကာဆဲန့် အုဝ် ဒီ ခုန်ဒီခမ် အာဒါဝိတ် တွိုန်။

4 အုဝ် ဟဲ့ တဲး အန် ကာလာင် လွင် အုဝ် ဒီ ဒူအီ ဟဝ်၊ တဲး အန် ဘဲန် ဘော အီ အိုပ် အီ ဆုင်ဖျာတ် ဒါရာ ဒီ ဂေ ဒူအီ ဘဲန် မျုဝ် ဘဲန် မျုဝ်။

5 တဲး ဘေ ယွတ်၊ န့ ဒီ မိုဝ်း ဒူအီ အူ မျုဝ် ပီ တူ ဒွိုမ် နပ် ဘေ၊ ဂေ ဒီ တဝ် တး ဒူင် ကွယ် ဘေ။ ဘော ဂေ ဒူအီ ဘဲန် မျုဝ် ဘဲန် မျုဝ် အီ တူ ဒွိုမ် နပ် လွင် ဘေ ဘော ဂေ ဒီ တး ဒူင် ကွယ် ဘေ။ ခုဝ်၊ အုဝ် ဇဝ်ဖြာ အီ မုး ဇဝ်ဖြာ အီ အိုပ် ဘေ၊ အီ မုး ဇဝ်ဖြာ အီ ဆီငါ ဘွတ် ပီ ကြိုပ် ဘေ ဒူအီ အီဆာရေလ၊ အုဝ် ဟဲ့ တဲး ဘေ မိုဝ်း ဆာရေ။”

6 တဲး ဘေ ဝီ ဟြေတ့် ဇဝ်ဖြာ ဒေါ ပွိုန် ဘေ ဒီ ကာတုန့် အန်။ တဲး ဘေ ဘော ဆာခိုဝ် ဒီ ဇဝ်ဖြာ၊ ဒေါ ကွယ် ချြီ့ အန် ဒီ ဘေ။

7 ဒူအီ အီ ဘူင် နာ ဟာယ် နာ မိူက်၊ တဲး အန် ဝဲန် ပီ ဘူင် အန် တီ။ ဒူအီ အီ ခြာမ် ဒီ ဘူင် နာ တူ မွှိုမ်၊ တဲး အန် ဝဲန် ပီ ခြာမ် အန် တီ၊ ဝီ ဒူပ် ဇဝ်ဖြာ။ အန် ဇဝ် ဒီ ဘော ကာဝေ အန်။ တဲး အန် ဝီ ဘူင် အီ လဝ့် နဝ်း ဇဝ်ဖြာ အီ မုး ဇဝ်ဖြာ ပီ ကြိုပ် အေ။ အန် ဇဝ် ဒီ ဘော ဂဝ်း ဝဲန် မှာပ် အန် အီ ကိူန်။

8 ဇဝ်ဖြာ ဝီ တဝ်း၊ “အာကျာမ် အာငျာန် အုဝ် တူ ပီ အာကျာမ် အာငျာန် ဘေ။ န့တေန့် ပီ နှဲ အုဝ် ဒီ ဘေ မိူဝ်၊ န့ တူ ပီ န့တေန့် ပီ အိုင် ဘေ ဒီ ဒူပ်။

9 ဂါင်ဟြာဝ် ဂါယ် ကာဒါယ် နီ လာယ် ကာတူင့် ခဲ့ မှဝ်၊ ခဲ့ တီ န့တေန့် ပီ နှဲ အုဝ် ဒီ ဘေ ဘော န့တေန့် ပီ အိုင် ဘေ ဒီ ဒူပ် ဟဲ့ လာယ် ကာတူင့်။ ဘော အာကျာမ် အာငျာန် အုဝ် ဂါယ် အာကျာမ် အာငျာန် ဘေ မိူဝ်၊ ဟဲ့ လာယ် ကာဝး ခဲ့ တီ။

10 ဂြုဝ်း ပီ ကာလာင် အုဝ်၊ န့ ဘော ပီ ဂ့လာယ် ဘော အိုမ် ဒါတ် အီ စုဝ်း ဒဲင် ကာဒါယ်။ န့ မိူဝ် တူ ဝီ ဟုဝ့် ဒီလူယ် ဒီလာယ်။ န့ ယီ တဲး ကာဒါယ် အမ်၊ ဘော တဲး ဟေ မိုဝ်း ဘ့လေ ကိူန်။ န့ ဘော တဲး ပီ ဆမ် အီ လတ့်၊ တဲး န့ ဝီ မိုဝ်း ဘော ဆီမာ အီ ပွိုန် ဝီ ဆမ်။ တဲး န့ ဘော မိုဝ်း ငှုဝ် အီ ဒီ ပွိုန် ဟူမ်။

11 ဂြုဝ်း ပီ ကာလာင် အုဝ်၊ န့ ဘော ပါယ် တီ။ ခဲ့ ပီ ကာလာင် အုန် အုဝ်၊ အန် တူ ဂါတ် ခေါ အူ ဒဲ။ ဂြုဝ်း အုဝ် တီ၊ န့ ဘော မိုဝ်း ပွုန် ဒီ တဲး န့ ဘုဝ် ဘဲန် ခဲ့ ပီ တဝ်း အုဝ်။ န့ ဘော မိုဝ်း ပွုန် ဒီ ဘူင် တဲး န့ ဘဲန် ပီ ဆီ ဘူင် အုဝ်။

12 ဘေ ဒီ ဘော မိုဝ်း နဝ်း ဇွန်ဇူမ် ဘော ခူယ် ဒီ ဝီ လေး ဒူင် ကွယ် ဘေ။ ဘေ ဒီ ဘော မိုဝ်း နဝ်း ဂတ် ဂျီတ် နဝ်း ဒါခိုယ် ဒီ လေး တ မိူင် တီ။ န့ ဒီ ဘော ပီ နွန် တျီ့ ဂေ နွန် တာင် ဒီ ဘော ဒတ် တဝ်း မှုဝ်။ ဘော ခဲ့ ကွယ် ဟေ ဘောကာဂ့လျီတ် ဒီ ဘော ဘူင် ပီ ဒူအီ ကာထ ဒဲ။

13 ဟေ န့ကေ ဒီ ဘော ဝီ လတ့် ကာဒါင် ယွုန်။ ဟေ မူရာတူ ဒီ ဘော လတ့် ကာဒါင် မာအာတ့်။ လွင် အန် တီ၊ န့ ဒီ ဘော ဘဲန် လက်ဆာနာ အီ တဲး အီ လှုဝ်း ဆေဆေ ခဲ့ တာင် အာဖုင် ဒင်ခုဝ် ဇဝ်ဖြာ။”