1 ဇဝ်ဖြာ ဝီ တဝ်း၊ “အိုယ် မဲ အီဘိုန့် အီ တူ နပ် ဒီ မိုဝ်း ဂွန်၊ တဲး မဲ ခူယ် ဒါခိုယ်။ မဲ အီ တူ ဒွိုမ် မိုဝ်း ဆဝ် ဒီ ဂွန်၊ တဲး မဲ တဝ်း မှုဝ် တာင် တာင်။ ခုဝ်၊ အီဘိုန့် အီ တူ မိုဝ်း အီမာယ်၊ အန် ဒီ ဝီ မိုဝ်း ဂွန် ကိူန် လွှိုမ် အီဘိုန့် အီ မိုဝ်း အီမာယ်။”

2 တဲး ဘေ ပီလေး ပီဝဝ်း ဝဲင် ထိုပ် ဘိက် ဘေ၊ တဲး န့ တာင်။ တဲး ဘေ ကာထုဝ့် ဘော ဘိက် ဂွင့်၊ တဲး ဒူင် ကွယ် ဘေ ကာဝဝ်း၊ ကွဲ့ တဲး န့ ကာချီ့။ ဘော ဝန် ထိုပ် ဘေ၊ တဲး ဘေ ပီတူင့်။ ဘော လွှက့် ပီ ဒွက် ဘေ၊ တဲး န့ ရိတ်၊ တဲး န့ မန် ဆီချာ။

3 ခုဝ်၊ ဘေ ပွိုန် ဒီ ပီဝဝ်း ပီလေး ကာအုန် ကာဒါယ် ဘေ ဒွန် ဘ့လာက်။ ဂေ လှုက်လှာန် ဘေ ဒီ ဝီ ပွိုန် ဒီ ဒိုဝ်း ကာဒါယ် ပဲ့ ဟဲ့ အိုပ် ဂေ ဒူအီ အာမျုဝ် ဟဝ်၊ တဲး န့ ဝီ ဘဲန် ခါဂုန် ဂေ။ မိူင် တာင် အီ ဟဲ့ ရာမ် အီ တူ မိုဝ်း ဒူအီ ကွယ် နာ ခဲင်၊ ဂေ ဒီ ဝီ မိုဝ်း ဒူအီ ကိူန် တး ကွယ် ကော နုဝ့်။

4 ကွဲ့ တဲး ဘေ ယုဝ်၊ ဘေ အာဝ် ဟူ လုဝ် ဆာယ် အီ၊ အာဝ် ဟူ လုဝ် ပီ ကာဝှ်ု ကာဝျှီန် နဝ်း ဘေ။ ဘေ အာဝ် ဟူ စုဝ်း တျီမ်။ ဘေ ဒီ ဝီ ပိဝ် အီ မွှိုမ် ဆာယ် ပဲ့ ဟဲ့ ဘူင် ဘေ ဒေါ ဆီ နှိုမ် ဘေ တွိုန်။ ဘေ အာဝ် ဟူ မိုဝ်း နဝ်း တျီ့ နဝ်း ဒီတဲတ် ကူပ် ပီ ဘေ ယာ ဆီပြး အီ ကွယ် ရာင် အန်။

5 ခုဝ်၊ အန် ဇဝ် အီ ဖာန် ဘ့လေး မဲ၊ အန် ဟဲ့ ပီ အီမာယ် မဲ။ အန် ဘော စိူဝ် ဇဝ်ဖြာ အီ အိုပ် တူတ့် ဒွန် မျုဝ်။ ဂေ အီ ဟဝ် ဘော တဝ်း၊ ဇဝ်ဖြာ အီ ဆီငါ ဘွတ် အီ မုး ဇဝ်ဖြာ ပီ ကြိုပ် ဒူအီ အီဆာရေလ အီ ဟဲ့ ထုတ် လေး ဂေ၊ အန် ဘော စိူဝ် “ဇဝ်ဖြာ အီ အိုပ် တူတ့် ဒဲင် ကာဒါယ် နီ။”

6 အိုယ် ဘေ ဒူအီ အီဆာရေလ၊ ဘေ ဟဲ့ ပီ အီဘိုန့် ပီ ဝဲန် အီမာယ် အန် ဆိန့် ဒေါ ဆီ နှိုမ် အန်။ န့ ဘော ဘဲန် နဝ်း လိုဝ် နဝ်း တျီ့ ဒီ ဘေ။ မာလဲ၊ ဇဝ်ဖြာ ဟဲ့ ဝီ ဒဲ့ ဘေ ဝီ တး ဒူင် ကွယ် အန်။ အန် တဝ်း၊

7 “အုဝ် ဝဲန် ဘေ မီ အာဒါ အူ ကာစန်။ အုဝ် ဒီ ဝီ ဒိုဝ်း ဝိဝ် ဘေ ကူပ် မိုဝ်း အုဝ် နဝ်း ရွက့် ကာဝေ ကာဆဝ်။

8 ကူပ် ဟဲ့ ရူ ကာဆဝ် အုဝ်၊ အုဝ် ဟဲ့ ဘ့လေး ဝဲန် ဘေ အာဒါ အူ ကာစန်။ အုဝ် ယီ မိုဝ်း နဝ်း ရွက့် နဝ်း မေတ့်တာ၊ တဲး အုဝ် ဝီ ကာဝေ ဘေ ဆေဆေ။” ဇဝ်ဖြာ အီ ဟဲ့ ထုတ် လေး ဘေ၊ အန် ဟဲ့ ကာလာင် အုန် ပါယ် တီ။

9 ဇဝ်ဖြာ ဝီ တဝ်း၊ “ဒေါ အန် တီ၊ န့ ပီ ဒေါ ဟဲ့ မ့ပုန် အိုမ် စုဝ် ဘာန် အာနုဝ် တွိုန်။ အုဝ် ဟဲ့ ဒိူင် ဟဲ့ ကာဆဲန့် တဝ်း၊ ဝါယ် နီ အိုမ် အာဝ် ဟူ မ့ပုန် ကာဒါယ် ပေါ အူ ဇေန့်။ ပါယ် တီ အုဝ် ပီ ဝီ ဒိူင် ကာဆဲန့် တဝ်း၊ အုဝ် အာဝ် ဟူ ပီရူ ပီစာဝ် ဒီ ဘေ။ အုဝ် အာဝ် ဟူ မာနုဝ် ကာဆဝ် ဘေ။

10 နွန် ဒီ တာင် ပီ ဘော ကာထုဝ့် မိူဝ်၊ နွန် ဒီတဲတ် ပီ ဘော ဒီယုး ဒီယေန့် မိူဝ်၊ နဝ်း မေတ့်တာ အုဝ် ယီ တူ တူတ့် တူ ဟြာယ် ဒေါ မှဝ်။ ဘော ကာဒိက် ဆတ်ဇာ ပဲ့ ဟဲ့ ဒွါ အုဝ် ဒီ ဘေ၊ အီ တဲး နဝ်း ဘေ ဂတ် ဂျီတ်၊ န့ တူ ကာဒတ် ဒေါ မှဝ်။” ဇဝ်ဖြာ အီ မိုဝ်း နဝ်း ရွက့် ကာဝေ ဟဲ့ ကာလာင် အုန် ပါယ် တီ။

11 ဇဝ်ဖြာ ပီ ဝီ တဝ်း၊ “အိုယ် ဘေ ဒူအီ မိူင် ယေရူဆာလဲမ်၊ ဘေ ဟဲ့ ဒွိုမ် ခမ် ဒုက် တာင် ကာဆဝ် ပီ ခုန် တာင် အီ ဟဲ့ တဲး ဘေ ဒီယုး ဒီယေန့်။ န့ မိူဝ် တူ မိုဝ်း အီ စွယ် ဘေ။ ဒေါ တီ နီ အုဝ် ယီ ဝီ ဒိုဝ်း ဆဲန့် အီ စှိတ်၊ တဲး န့ ဘဲန် ဒင် မိူင် ဘေ။ အုဝ် ဒီ ဒိုဝ်း ဘော ဆဲန့် ငျီန်၊ တဲး န့ ဘဲန် ဒင် ရွင့်။

12 အုဝ် ဒီ ဒိုဝ်း ဆဲန့် ဒီပုန် ဘ့လေး ဒီ ဟုဝ် စာ ဘေ။ အုဝ် ဒီ ဒိုဝ်း ဆဲန့် ရေန့် ဝွင့် ဘူင် ဘဲန် မာလုဝ်း ဘေ။ အုဝ် ဒီ ဒိုဝ်း ဘော ဆဲန့် ဘဲန် မျုဝ် ဘဲန် မျုဝ် အီ ဘွတ် ဘူင် တဲး န့ ဘဲန် ရဲင် မိူင်။

13 ဘော လှုက်လှာန် ဘေ ဒီ ဘဲန် ဒီဘဲ ဇဝ်ဖြာ။ ဂေ ဒီ ဘော မိုဝ်း နဝ်း ဂတ် ဂျီတ် ဘော နဝ်း ဒါခိုယ်။

14 ဘေ ဒီ ဒူပ် ဒါရာ အီ ဆိူဝ် ဆိူဝ် မှာန် မှာန်၊ အီ ကာရမ်။ ဘေ မိူဝ် ဒီ ဘော လွတ် ခမ် ပီ ခါနှာပ် အီ ဟဝ်၊ အာဝ် မိုဝ်း ဒီ လုဝ် ယုဝ် မာဆေ။

15 ဆေ န့ ယီ မိုဝ်း အီ ကာဂုဝ်း ဒီ ဘေ၊ အာဝ် မုး ပီ ခ့ဝါင် အုဝ်။ အာဆေ ကာဂုဝ်း ဒီ ဘေ၊ အန် ဒီ စှိုမ်။

16 အုဝ် ဟဲ့ ဖာန် ဘ့လေး ဒူအီ စိုမ် ဟိန်၊ တဲး အန် ယု ဘီယု အန်၊ စိုမ် ခြိုင် ကာဂုဝ်း။ အုဝ် ဟဲ့ တဲး န့ မိုဝ်း ဘော ဒါ ဆိုက် အီ ဂူင့် ခြိုင် ကာဂုဝ်း၊ တဲး ဂေ ဘ်ု ဒီ ငဝ်း ရန်ဆူ။

17 မာလဲ၊ ခြိုင် ကာဂုဝ်း အီ ဒီ ဝီ ကာဂုဝ်း ဒီ ဘေ၊ န့ တူ အွင် ဒေါ မှဝ်။ ဒွန် အီ အီ နဲန ဘေ၊ ဘေ ဒီ လုဝ် ဒမ် မှာပ် ဒီ အန်။ အုဝ် ဒီ ဘူင် ပါယ် တီ ဒီ ဂေ ဒူအီ ပီ ဆုတ့် ပီ စ်ု အုဝ်၊ တဲး ဂေ အွင် ရန်ဆူ ဂေ။” ဇဝ်ဖြာ ဟဲ့ ကာလာင် အုန် ပါယ် တီ။