ဂေ ဒူအီ ကိူန် ဘော နပ် ဒီ ကာမွုန် တဝ်း၊ “ဂြုဝ်း ပီ ကာလာင် အေ တီ၊ အာဆေ ဒီ ညှိုမ်။း ပီ ဒီ ဘူင် ဇဝ်ဖြာ မိူဝ်၊ န့ ဒီ လိုဝ်း ဒီ အာဆေ။း

2 ခုဝ်၊ ဒူအီ ပီ ဆုတ့် ပီ စ်ု အန် ဇဝ်၊ အန် ဒီ ဘုဝ် ဘဲန် ပီ ဟေ အီ ပု လေး ခဲင် ကာဒါယ် ကာဟဝ်း။ အာရိုပ် အန် တူ စှိတ် မာဆေ။ ဒေါ ယိုဝ် အေ ဒီ အန်၊ အန် တူ မွှိုမ် ယွတ်၊ တူ တဲး အေ မိုဝ်း နဝ်း ဆီ ပွိုန်။

3 ဂေ ဒူအီ မိူဝ် တူ ရုဝ်ဆေ အန် ဘော ဝဲန် အန်၊ တဲး န့ ဝီ ဆဝ် ဒီ နဝ်း အန်။ အန် ဘော ခမ် ဒုက် ဂေ ညှာပ် အီ ကိူန် ကာဆဝ်။ အေ မိူဝ် တူ ဆီ ယွတ် ဆီ ယိုဝ် အန်။ ဂေ ဘော ကာအိး အန်။ န့ မိူဝ် တူ မိုဝ်း အာဆေ အီ ရီမာတ် အန်။

4 မာလဲ၊ အန် ဟဲ့ ခမ် တူတ့် ဆဝ် ရောဂါ ပီ လုဝ် ခမ် အေ။ အန် မိူဝ် ဟဲ့ ခမ် တူတ့် ဒုက် ဂေ ညှာပ် ပီ လုဝ် ခမ် အေ။ အန် ပီ ဘော ဟဲ့ ပါယ် တီ မိူဝ်၊ အေ ယီ ဝီ မာတ် ပီ ခမ် အန် တီ၊ န့ မုး ကူပ် ဟဲ့ ဒမ် ဇဝ်ဖြာ မှာပ် ဒီ အန်။

5 မာလဲ၊ ကူပ် မှာပ် ပီ ဘူင် အေ၊ အန် ဝီ ခမ် အီ ဆတ် အန်၊ တဲး န့ ဘဲန် ဒိမ် အီ ဆဝ် ကာဆဝ် ဒီ အန်။ ကူပ် မှာပ် ပီ ဘူင် အေ၊ အန် ဘော ခမ် အီ မး အန် ကော မာယမ် ဘော ဒုဝ်။ ကူပ် ဟဲ့ ခမ် အန် ဝူတ် ဂေ အာဘြဲတ် တီ၊ အေ ဝီ ပွိုန် ဒီ ကွယ် ဂတ် ဂျီတ် ဂျာမ်ဆာ။ ကူပ် ဟဲ့ ခမ် အန် အီ ဆီဘျြီ့ အန်၊ န့ ဝီ တဲး အေ ဝီ ကဲန် ဘော ပွိုန် ကွယ် ဒါခိုယ်။

6 ခဲ့ ကွယ် အေ ဒူအီ ဘောကာဂ့လျီတ်၊ အေ ဟဲ့ ပီ မာဘူ အီ ဟဲ့ ဘျုဝ်း ကူပ် ဝး အေ န့တေန့်၊ ဘော ဝီ ဒူပ် ပီ အိုင် အေ ရာင် အာဆေ ရာင် အန်။ မာလဲ၊ ဇဝ်ဖြာ ဟဲ့ ဝီ တဲး အန် ခမ် တူတ့် အာဘြဲတ် ပီ လုဝ် ခမ် အေ။

7 အန် ပီ ဘော ဟဲ့ ခမ် အီ ခါနှာပ် ကာဆဝ် အန် မိူဝ်၊ အန် ယီ မိုဝ်း နဝ်း န့စု န့စမ်၊ မိုဝ်း နဝ်း ဂူမ် နဝ်း တျီမ် ဘော ခမ် ဒီ ယိူန် တူ ဂြုဝ်း ခေါ အူ ဒဲ။ အန် ဟဲ့ ပီ မာဘူ ပီ ဒီ ဟာဝ် ငဝ်း ယမ် အီ ဘော ပီ ဒီ ကပ် အီ ဟိုက် အန်။ အန် ယီ ကွယ် နှိမ် နှိမ်၊ တူ ဟမ် တူ ဒတ်။

8 အန် ပီ ဘော ဟဲ့ ခမ် အီ မှေတ့် ဟာဝ် ငဝ်း ယမ် မိူဝ်၊ အာဝ် မိုဝ်း အီ စွယ် အန်။ အန် ဟဲ့ ယမ် ကူပ် မှာပ် ဂေ ဒူအီ ပီ အိုပ် အုဝ် အီ မုး ဇဝ်ဖြာ။

9 ဒေါ ယမ် အန် ဂေ ဝီ ဟာဝ် ဒိပ် အန် ဒူပ် ဂေ ဒူအီ မိုဝ်း မှာပ် ဘော ဒူအီ ဟာယ် ဒူအီ မိူက်။ မာလဲ၊ အန် ယီ တူ ဒွိုမ် ဘူင် လုတ့် ခေါ အူ မျုဝ်၊ တူ ဒွိုမ် ကာလာင် ဂြုဝ်း တူ မှာန် ခေါ အူ ဒဲ။

10 ဇဝ်ဖြာ ယီ ဟဲ့ အိုင် ဒဲစေန့် အန် အီ ဟဲ့ ခမ် ဒုက် ဇိုဝ် တီ။ ဝါယ် ဟဲ့ ဟွတ့် ယမ် အန်၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ်၊ အန် ဒီ ဝီ မိုဝ်း လှုက်လှာန်။ အာဆာက် အန် မိူဝ် ဒီ တူင့်။ ခဲ့ ဟဲ့ ခြာမ် ဇဝ်ဖြာ ဒီ ဘူင်၊ န့ ဒီ ဘော ဘဲန် တူတ့် ဒွန် မျုဝ် ကူပ် ပဲ့ ဟဲ့ ဘူင် ဒဲစေန့် အန် တီ။

11 ဇဝ်ဖြာ ပီ ဝီ တဝ်း၊ “ဝါယ် ဟဲ့ ဟွတ့် ခမ် ဒဲစေန့် အုဝ် ဒုက် တာင် တီ၊ နဝ်း အန် ဒီ ဝီ ဘျုဝ် ဒါခိုယ်။ နဝ်း အန် ဒီ ဝီ နပ် ဒုက် တာင် ပီ ခမ် အန် တီ၊ အန် တူ ခမ် ဒီလူယ် ဒီလာယ်။ ဒဲစေန့် အုဝ် အီ မိုဝ်း နဝ်း ဆိူဝ် နဝ်း မှာန် အီ လဝ့် နဝ်း အုဝ် တီ၊ အန် ဟဲ့ ဟွတ့် ဒိုဝ်း ဟာဝ် တူတ့် ခဲ့ ကွယ် မှာပ် ဂေ ဒူအီ ကိူန်၊ ဝီ ခမ် မှာပ် ဂေ တီ၊ တဲး ဂေ ဘော ပွိုန် နဝ်း ဆိူဝ် နဝ်း မှာန်။ 12 ကူပ် န့ ပါယ် တီ အုဝ် ဒီ ဝီ အိူပ် မျုက် အန်၊ တဲး အန် ဝီ ဘဲန် အီ တာင် အီ မိုဝ်း အာဖုင် ဒင်ခုဝ်။ အန် ဒီ ဝီ ပွိုန် ရုး အန် ပီ ဒါ ဆိုက် အီ လာယ် ကာဆာင် ကြုဝ် ပဲ့ ဟဲ့ ဖာတ် ဂေ။ ခုဝ်၊ အန် မိုဝ်း နဝ်း ဆာထာ၊ ဟဲ့ လှူ အာဆာက် အန် ကာဒါင် ဂေ ဒူအီ အီ ဘူင် နာ တူ မွှိုမ်။ အန် မိူဝ် ဟဲ့ ဟွတ့် ခမ် မှာပ် ဒါင် ဂေ ဒူအီ ကိူန် ဘော ဝီ ဆာခိုဝ် တဲး ဂေ လွတ် ခမ် မှာပ် ဂေ။”