အိုယ် ဘေ ဒူအီ အီ ကွယ် ခဲင် မိူင် ဇီအူန်၊ တဲး ဘေ ဝီ လှုဝ်း ဒုဝ် ဘေ ပီ ဒူအီ ဟဲ့ ဝီ န့ဆိုဝ်း အိတ်။ တဲး ဘေ ဝီ မိုဝ်း ပ့လူမ် ဂေ ဟဲန့်။ အိုယ် ဘေ ဒူအီ အီ ကွယ် ခဲင် မိူင် ယေရူဆာလဲမ် အီ မုး မိူင် အီ ဆီငါ ဘွတ်၊ တဲး ဘေ ဝီ စှိုပ် ခြိုင် စှိတ်။ ဝါယ် နီ၊ ဂေ အီ တူ ခမ် ဒီ ဒူပ် ဒါရာ ဇဝ်ဖြာ၊^a ဘော ဂေ အီ တူ ဆီငါ ဘွတ်၊ ဂေ အာဝ် ဟူ ပွိုန် ဒီ လိုပ် ခဲင် မိူင် ဘေ တီ။

2 ဘေ ဒူအီ ခဲင် မိူင် ယေရူဆာလဲမ်၊ တဲး ဘေ ဒီယိုဝ်း ကာပုး ဒီ ဒုဝ် ဘေ။ တဲး ဘေ ဝီ ယိတ့် ဒီဂြိုဝ်း ဒုဝ် ဘေ။ ဘေ အီ ကွယ် ခဲင် မိူင် ဇီအူန် အီ ဟဲ့ ခမ် အီ ဟဝ် မှေတ့် ဟာဝ် ဘေ၊ တဲး ဘေ ဂဝ်း ဝဲန် ဝန် အီ ဟဲ့ ပက် ဒီ မဲင် ဘေ တီ။

3 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ “ဒေါ ဟဲ့ ဘဲန် ဘေ မှာယ် အီ ဟဝ်၊ အာဝ် မိုဝ်း အာဆေ အီ ဇာယ် ရွိုန် ဒွါ ဒီ ဘေ။ ပါယ် တီ ပန် ဒီ ဝီ ထုတ် လေး အုဝ် ဒီ ဘေ မိူဝ်၊ ဘေ တူ လုဝ် တူတ့် မာဆေ။”

4 ဇဝ်ဖြာ ဝီ တဝ်း၊ “အာတ့် နီ ဂေ ဒူအီ ပီ အိုပ် အုဝ် ဟဲ့ ဟာဝ် ကွယ် ခဲင် မိူင် အဲဂိုပ်။ ဝါယ် အန် တီ ဂေ ဒူအီ အာဆူရီယာ ဟဲ့ ဝီ ခါနှာပ် ဂေ ပီယေန့်။”

5 ဇဝ်ဖြာ ပီ ဝီ တဝ်း၊ “ဒေါ တီ နီ မိူဝ်၊ န့ ဘော ပါယ် တီ။ ဂေ ဒူအီ ပီ အိုပ် အုဝ်၊ ဟဲ့ ဟာဝ် ခမ် ဒုက် တာင် ပီ ဒူအီ အီ တူ မိုဝ်း ဒီခုဝ်။ ခုန်ဒီခမ် အီ အိုပ် ဂေ တီ ဘော ဘူင် တဲး အီ ဆီနန် ဆီနိူင် ဘော ယာမ် တာင်။ ဂေ ဘော နဲန အုဝ် ဒွန် ဆီငဲ။

6 ပါယ် တီ အူ ဆီငဲ ဂေ ဒူအီ ပီ အိုပ် အုဝ်၊ ဂေ ဒီ ဘော နပ် ပီ ပါယ် အုဝ် ဇဝ်ဖြာ။ ဂေ ဒီ ဘော ထူမ် ဂြုဝ်း ပီ ကာလာင် အုဝ် တဝ်း၊ ‘တဲး ဘေ ယွတ်၊ အုဝ် ကွယ် ဒီ နီ။’”

7 အေ ဟဲ့ ပွိုန် ဒီ ယိုဝ် ဝီ အီ ကာလာင် လွင် ဂြုဝ်း အီ တဲး နဝ်း ဒူအီ ဒါခိုယ်။ အန် ဟဲ့ တး ကာလာင် လွင် နာ ဘွတ် နာ မွှိုမ်၊ လွင် အီ တဲး နဝ်း ဒူအီ ဂတ် ဂျီတ်။ အန် ဘော တး ကာလာင် ဘော လွင် အန် ဇဝ် အီ ဒီ ချွတ် အီ။ အန် ဘော ကာလာင် ဒီ ဒူအီ ခဲင် မိူင် ဇီအူန် တဝ်း၊ “ဇဝ်ဖြာ ပီ ကြိုပ် ဘေ၊ အန် ဟဲ့ အိုပ် တူတ့်။” ဒူအီ ဝီ တီ ဘော ဟာဝ် ကာလုဝ်း နွန် ဂေ ဒီလယ့်။ ပ့လဝ် အန် မိူဝ် ဟဲ့ စှိတ် ကာဆဝ်။

8 ဂေ အီ ဘ်ု မိူင်၊ ဂေ ဒီ ဘော ခူယ်၊ ကာဖြူမ် ဒီ တဝ်း မှုဝ် ဒါခိုယ် ကူပ် ဟဲ့ ယိုဝ် ဂေ ဇဝ်ဖြာ ဟဲ့ ဝီ တး လိုပ် ခဲင် မိူင် ဇီအူန်။

9 အိုယ် ဘေ အီ ကွယ် ခဲင် မိူင် ယေရူဆာလဲမ် အီ ဟဲ့ ဒွိုမ် ကာပျာတ့် လိုဝ်၊ တဲး ဘေ ဝီ ဒါခိုယ် ဘော တဝ်း မှုဝ် တာင်။ ခုဝ်၊ ဇဝ်ဖြာ ဟဲ့ ထုတ် လေး ဒူအီ ခဲင် မိူင် ယေရူဆာလဲမ်၊ ဝီ လှဝ် နဝ်း ဂေ ဒူအီ ပီ အိုပ် အန်၊ တဲး ဂေ ဝီ ဒါခိုယ်။

10 န့ ပီ ဇဝ်ဖြာ ဟဲ့ ဘျ ဒဲ အန် အီ ဆီငါ ဘွတ်၊ တဲး ဒူအီ ဒွန် မျုဝ် ပွိုန် ဒီ ယိုဝ်။ အန် ဒီ ဝီ ချွတ် ဂေ ဒူအီ ပီ အိုပ် အန်၊ တဲး ဂေ ဒူအီ အီ ကွယ် ဒူင် ဆိူတ် ဒဲင် ကာဒါယ် ပွိုန် ဒီ ယိုဝ်။

11 ဘေ အီ ဂူင့် ခြိုင် တာ အီ ကွယ် ခဲင် ဟုဝ် ဇဝ်ဖြာ၊ တဲး ဘေ ဝီ လေး ဟာဝ်။ တဲး ဘေ လေး ခဲင် ဒူင် တူ ဘွတ်။ ကွဲ့ တဲး ဘေ ဒိုဝ်၊ ဘေ ပါ မျုဝ် အီ တူ ဆီငါ ဘွတ်။ တဲး ဘေ တဲး ဒုဝ် ဘေ ဆီငါ ဘွတ် ဒူပ် ပီ မှာန့် ဒါရာ။

12 မာလဲ၊ ခါ နီ ဘေ ယီ တူ လုဝ် လေး ဟာဝ် ကာတဝ် ကာတိူ့။ ဘေ မိူဝ် တူ လုဝ် လေး တဝ်။ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဒီ ဘော ယဲတ့် ဘေ ဘော ဒူပ် ဒီ ပန် ဘေ ဘော ဂွင့် ရဲ ဘေ။

13 ဘ်ု ဘေ ယွတ်၊ ဒဲစေန့် အုဝ် ဟဲ့ မိုဝ်း အာငျာန် ဒီ ဘူင် ဒွန် မျုဝ်။ ဂေ ဒီ ဘော အိူပ် မျုက် အန် ဘော တဝ်း အန် မုး အီ ဘွတ် အီ မျာတ် ကာဆဝ်။

14 ဂေ ဒူအီ အီ ယိုဝ် အန်၊ ဂေ ဘော အာမ် ကာဆဝ် ဘော ကာစွာ ကာပိုန့်။ ခုဝ်၊ နာ အန် ဟဲ့ လိုဝ် ကာပျာတ့် ပီ ပီ တူ ဒွိုမ် ယိုဝ် ဂေ။ ဘော ဒုဝ် ဘူင့် အန် အာဝ် ဟူ နှဲန် အာရိုပ် ဒူအီ။

15 ဂေ အာမျုဝ် ဒူအီ ကိူန် ဒီ ဘော အာမ် လွင် အန် တီ။ ဂေ ခုန်ဒီခမ် မိူဝ် ဒီ ဘော အာမ်၊ ဂြုဝ်း ကော ဟူ လေး။ ပီ တူ ဒွိုမ် ကာလာင် အီ ဒီ ဂေ၊ ဂေ ဒီ ဘော ဝီ ယိုဝ်။ ပီ တူ ဒွိုမ် ယိုဝ် ဂေ၊ န့ ဒီ ဝီ ကာလှုး ဒီ နဝ်း ဂေ။