1 ဇဝ်ဖြာ ပီ ဝီ တဝ်း၊ “အိုယ် ဘေ အီ မိုဝ်း နဝ်း ဆိူဝ် နဝ်း မှာန်၊ ဘေ အီ ဘိုင် ဇဝ်ဖြာ၊ ဘေ အီ ပီ ဂွန် မာဝ်၊ တဲး ဘေ လှုဝ်း အန် ဇဝ် အီ ပီ ဒါအာင် မာဝ် ဒူင် လေး တး ဘေ။ တဲး ဘေ ဘော လှုဝ်း အန် ဇဝ် အီ ပီ မာဝ် ဒီဂ့လုဝ့် ဒူင် လေး ဘေ။

2 တဲး ဘေ ဝီ လှုဝ်း အာဘြာဟမ် အီ မုး ဂုန့် ဒင် ဘေ ဘော နာင် ဆာရာ အီ မုး မာ ဒူင် ဂွိုတ် တး ဘေ။ ဒေါ ဒဲ့ အုဝ် ဒီ အာဘြာဟမ် တွိုန်၊ အန် တူ မိုဝ်း ဂွန်။ မာလဲ၊ အုဝ် ဘော ဝီ မွင့်ကာရာ ဒွါ ဒီ အန် ဘော ဒီ ဂေ ဂွန် အန်၊ တဲး ခြိုဝ် အန် ဝီ ဘြဲ ကိူန်။

3 အန် ဇဝ် ဒီ ဝီ လှဝ် နဝ်း ဂေ ဒူအီ ခဲင် မိူင် ဇီအူန် အီ ဟဲ့ ကာပျာတ့် လိုဝ်။ ဒွန် ပ့လုဝ့် အီ ဟဲ့ ဝီ ဘဲန် ပြဲ ကာဟဝ်း၊ အုဝ် ဒီ ဝီ ဘူင် တဲး န့ ဝီ ပီ ကာပိုမ် အေဒေန်။ ဒူင် မုး ကာဟာတ့် ဒီ ဝီ ဘဲန် ကာပိုမ် အီ စှိတ် ကာဆဝ်။ ဂေ အီ ကွယ် ဒူင် တီ၊ ဂေ ဒီ ဘော ဘျုဝ် ဒါခိုယ် ဘော ကျဝ် ဒီ နဝ်း ဂေ။ ဂေ ဒီ ဝီ တဝ်း မှုဝ် အီ ဒါင် ဂုင် ဂေဇူ အီ အိူပ် မျုက် အန် ဇဝ်။

4 အိုယ် ဘေ ဒူအီ ပီ အိုပ် အုဝ်၊ တဲး ဘေ ထူမ် ဂြုဝ်း ပီ ကာလာင် အုဝ်။ အုဝ် ဒီ ဒွါ ဒါရာ အုဝ် ဒီ ဂေ ဒူအီ ဒဲင် ကာဒါယ် နီ ဘော ပီ ဆုင်ဖျာတ် အုဝ် ဒီ ဘဲန် ဘ့လာင် ဒီ ဂေ။

5 အာဝ် လှေန့် အုဝ် ဒီ ဘော ဘျ နဝ်း ဆိူဝ် နဝ်း မှာန် အုဝ်။ အုဝ် ဒီ ဘော ချွတ် ဂေ ခြန် ခြန်။ အုဝ် ဒီ ဘော ဆုင်ဖျာတ် ဒါရာ ဒီ အီ။ ဂေ ဒူအီ အီ ကွယ် ခဲင် ဂုန် အိုမ်၊ ဂေ ဒီ ဘော ဘိုင် ပွုန် အုဝ်။

6 တဲး ဘေ ဆာကိုဝ်း ယွတ် ခဲင် ဂါင်ဟြာဝ်၊ ပီ ဝီ မုတ် ယွတ် ဘော ကာဒါယ်။ ဂါင်ဟြာဝ် ဒီ ဘော ဟြာယ် ပီ ဒက်။ ကာဒါယ် ဒီ ဘော ဘြိမ် ပီ ခြိုင် အီ ဟဲ့ ရာမ်။ ဘော ဒူအီ အီ ကွယ် ဒဲင် ကာဒါယ်၊ ဂေ ဒီ ဘော ယမ် ပါယ် တီ။ အီ မုး ဒါရာ အုဝ်၊ ဒါရာ အီ ချွတ် အီ၊ န့ ယီ ဒီ ကွယ် ဆေဆေ။ ဘော နဝ်း ဆိူဝ် နဝ်း မှာန် အုဝ်၊ န့ တူ ဟြာယ် ဒေါ မှဝ်။

7 အိုယ် ဘေ ဒူအီ အီ ဟဲ့ နပ် လွင် နဝ်း ဆိူဝ် နဝ်း မှာန် အုဝ်၊ ဘော ဘေ အီ ဟဲ့ ဒိုဝ်း အုန် ဒါရာ အုဝ် ခဲင် နဝ်း ဘေ၊ တဲး ဘေ ထူမ် ဂြုဝ်း အုဝ်။ ကွဲ့ တဲး ဘေ ထူမ် ဆေ အီ ဟဝ် နဲန ဘေ။ ကွဲ့ တဲး ဘေ ယုဝ် ဆေ ဂေ ဖျာက် ဘေ။

8 ခုဝ်၊ ဂေ ဒီ ဘော ဝီ ဟြာယ် ပီ ခြိုင် ပီ ဟူမ် မာဝ။ ဂေ ဒီ ဘော ပီ ဟိုက် မာဘူ ပီ ဟူမ် ဝရျီ။ နဝ်း ဆိူဝ် နဝ်း မှာန် အုဝ် ယီ ဒီ ကွယ် ဆေဆေ။ အုဝ် မိူဝ် ဒီ ချွတ် အီ ဒွန် စုဝ် ဒွန် ဘာန်။”

9 အိုယ် မဲ ဇဝ်ဖြာ၊ တဲး မဲ ဇဝ် ယိတ့်။ တဲး မဲ ဇဝ် ဒိုဝ်း ပွုန် မဲ၊ တဲး မဲ ဘျ အာဖုင် ဒင်ခုဝ် မဲ ပီ ဒေါ မွိုန် ဒေါ မုး ဘာန် ဒါ ဒါ ယေ။ မဲ ဇဝ် ဘော မုး အီ ဟဲ့ ကာဒဲပ် မာကြာယ် တာင် အီ စိူဝ် ရာဟာပ် တွိုန်။ မဲ ဟဲ့ ဘ့လုး တဲး အန် ယမ်။

10 မဲ ဇဝ် ဘော မုး အီ ဘူင် တဲး အိုမ် နမ်မုက်ဆာရာ ဟိတ်၊ တဲး န့ ဝီ ဘဲန် န့တေန့် တဲး ဂေ ဒူအီ ပီ အိုပ် မဲ ဝီ ပွိုန် ဒီ ကာလုဝ်း ဟာဝ်။

11 ဂေ ဒူအီ ပဲ့ ဟဲ့ ထုတ် လေး မဲ ဇဝ် တီ၊ ဂေ ဒီ ဝီ တး ဒီ မိူင် ဇီအူန်။ ဂေ ဒီ ဘော ခူယ် ဒါခိုယ် တဝ်း မှုဝ် တာင် တာင် ဘော ဘျုဝ် ဘျုဝ် ကျဝ် ကျဝ်။ ဂေ မိူဝ် ဒီ ခူယ် ဒါခိုယ် ပါယ် တီ ဆေဆေ။ ဂေ မိူဝ် ဒီ လွတ် ဒုက် ဒီ နဝ်း ဒီ ဖွိုမ်၊ အာဝ် ဟူ လုဝ် က့လိုဝ်၊ အာဝ် ဟူ လုဝ် ငှဝ် ဒေါ မှဝ်။

12 “အုဝ် အီ မုး ဇဝ်ဖြာ၊ အုဝ် အီ ပွိုန် လှဝ် နဝ်း ဘေ၊ တဲး ဘေ ဒါခိုယ်။ မှဝ် န့ ပါယ် ပီ ဝီ ယုဝ် ဘေ ဒူအီ အီ နပ် ဒီ ယမ် ဘော ဂေ ဂွန် ဒူအီ အီ ပီ ပြဲ ဂေ ပေတ့် တွိုန်။း

13 ပါယ် တီ ဘေ ဟဲ့ ဝီ ပိဝ် ဇဝ်ဖြာ အီ ဖာန် ဘ့လေး ဘေ။ ဘေ ဟဲ့ ပိဝ် အန် ဇဝ် အီ ဘူင် တဲး န့ မိုဝ်း ဘ့လေန့် ဂေ ဂါင်ဟြာဝ် ဘော ဘိူန် ကာဒါယ်။ ဘေ ဘော ယုဝ် ဘော ကာပိုန့် ဒွန် ဆီငဲ ကူပ် နာ ဟာယ် ပီ ဘူင် ဂေ အီ ဆီ ခါနှာပ် ဘေ၊ ဘော ဂေ အီ ဟဲ့ ဖြူမ် ဒီ ပျာတ့် တဲး ဘေ လိုဝ် စှိုမ် တွိုန်။ ဘေ ယီ တူ ယိုဝ် နာ ဟာယ် နာ မိူက် ပီ ဘူင် ဂေ တီ ဒေါ မှဝ်။

14 ဂေ အီ ဟဲ့ စုဝ်း ခဲင် ကာပိုမ်၊ ဂေ ဒီ ဝီ ပွိုန် ဒီ စေဝ် လေး၊ တူ လုဝ် ယမ်။ ပီ ဒီ ဟူမ် ဂေ မိူဝ် ဒီ ဘော ဂ့လိုမ်။

15 အုဝ် မုး ဇဝ်ဖြာ ပီ ကြိုပ် ဘေ။ အုဝ် အီ ဘူင် တဲး အိုမ် နမ်မုက်ဆာရာ ကာယဝ်း ဒေါ ဟဲ့ ကာတုန် အန်၊ တဲး န့ ဒီငိုန့် ဘော ဆီလွယ် ဆီလွယ်။ အုဝ် ဘော စိူဝ် ဇဝ်ဖြာ အီ အိုပ် တူတ့် ဒွန် မျုဝ်။

16 အုဝ် ဟဲ့ ဟပ် ဂြုဝ်း အုဝ် ခဲင် မူတ့် မဲ။ အုဝ် မိူဝ် တဲး မဲ ကွယ် ခြိုမ် ယာပ် ဒဲ အုဝ်။ န့ ဘော မုး အုဝ် အီ ဟဲ့ ဘ့လး ဘ့လေန့် ဘော ဘ့လေး အုန် ဒင် ကာဒါယ်။ အုဝ် ဘော ဝီ တဝ်း ဒီ ဂေ ဒူအီ အီ ကွယ် ခဲင် မိူင် ဇီအူန်၊ ‘ဘေ မုး ဒူအီ ပီ အိုပ် အုဝ်။’”

17 အိုယ် ဘေ ဒူအီ အီ ကွယ် ခဲင် မိူင် ယေရူဆာလဲမ်၊ တဲး ဘေ ဝီ န့ဆိုဝ်း၊ တဲး ဘေ ယိတ့်။ ဘေ ဟဲ့ ခမ် နဝ်း ရူ ဇဝ်ဖြာ ပီ ဘေ ဟဲ့ ဒျီင် ဆီလယ့် ပဝ်း ပဲ့ ဟဲ့ ဒွါ ဇဝ်ဖြာ အီ တဲး ဘေ ယုဝ် ဒီယုး ဒီယေန့်။ န့ ပီ ဘေ ဟဲ့ ဒျီင် တူတ့် ဟဲ့ ဟူမ် ဘော ခ်ု အန်။

18 ဒူအီ အီ ကွယ် ခဲင် မိူင် တီ၊ အာဝ် မိုဝ်း ခေါ အူ ဝီ အီ ဒီ ဝီ ပါ ဒဲ ဘေ ဘော ယဲတ့် ဘေ။

19 န့ ဒီ ဘော မိုဝ်း အာဖေ အာရေ အာ မျုဝ် အီ ဘုဝ် ဘဲန် ဒီ ဘေ။ န့ ယီ တူ မိုဝ်း အီ ကာဝေ ဘေ။ န့ ဒီ မိုဝ်း အီ ပျာတ့် ဘေ၊ ဘူင် တဲး ဘေ လိုဝ် စှိုမ်၊ တဲး မာန် မိူင် ဘေ ကော လိုဝ် ကော ရာမ် တူတ့်။ ပေါ အူ မျုဝ်၊ န့ ဒီ ဘော မိုဝ်း အီ လာယ် ကာဂုဝ်း လာယ် ကာငဝ်း တာ မာပွါ့ လာင် ဘော အေတ့် ပီ ဒီ ဟူမ်။ န့ ယီ တူ မိုဝ်း ခေါ အူ ဝီ အီ ဒီ ကာဝေ ဘေ။

20 ဂေ ဂွန် ကာညူမ် အီ ကွယ် ခဲင် မိူင် တီ၊ ဂေ ဟဲ့ ဒီလှး ဒီလွှယ်၊ ဟဲ့ ပိဝ် ဒုဝ် ဘော အိတ် ဒီ ဘာင် န့တေန့် ဒွန် နာ ဒွန် ပ့လုဝ့်။ ဂေ ဒီ ဘော ပီ မာဇ အီ ဟဲ့ ခြေ ယွတ့် ဒူအီ လဲ ပြဲ။ ပါယ် တီ ဂေ ဟဲ့ ခမ် ပီ မာနုဝ် ဇဝ်ဖြာ ဒီ ဂေ၊ တဲး န့ ပီ ဂေ ဖဲ ဘူမ်။

21 အိုယ် ဘေ အီ ဟဲ့ ခမ် ဒုက် ခဲင် မိူင် ယေရူဆာလဲမ်၊ ဘေ အီ ဟဲ့ ကာကျီင် ကာကေး ပီ ဒူအီ ယိုတ့် ပဝ်း၊ တဲး ဘေ ထူမ်။

22 ဇဝ်ဖြာ အီ မုး ဇဝ်ဖြာ ပီ ကြိုပ် ဘေ အီ ဟဲ့ ဘ်ု ဘေ၊ အန် ဟဲ့ တဝ်း၊ “အုဝ် ဟဲ့ ဟွတ့် ဝဲန် နဝ်း ရူ အုဝ် ဒီ ဘေ အီ ပီ ကွက့် ပဝ်း ပဲ့ ဟဲ့ ဒျီင် ဘေ တွိုန်။ ပါယ် တီ ဝါယ် နီ ဘေ အာဝ် လုဝ် ဟာဝ် ကာကျီင် ကာကေး ပီ ဒူအီ ယိုတ့် ပဝ်း တွိုန်။

23 အုဝ် ဟဲ့ ဝီ ဒိုဝ်း ကွက့် တီ၊ ဝီ ဒွါ ဒီ ဂေ အီ ခါနှာပ် ဘေ၊ ဘော ဒီ ဂေ အီ ဘူင် တဲး ဘေ ကေး ဒူပ် န့တေန့် ဘော ညဲတ့် ဘေ ပီ အီ ညဲတ့် ဒဲင် ကာပုး။”