1 ဇဝ်ဖြာ ဝီ တဝ်း၊ “မှဝ် န့ ပါယ် ပီ ထာင် ဘေ အုဝ် ဟဲ့ ဝဲန် မာ ဘေ ပီ အီမာယ် ဝဲန် အီဘိုန့် အန်။း ဆေ ဘော မုး ပါယ် တီ မှဝ် ပဲ့ အီ ဟဲ့ ဒဲမ် လွင် လာယ် ဝဲန် ကာဒတ်။း ဘေ ဘော ထာင် အုဝ် ဟဲ့ ယွင့် ဘေ ပီ ဒူအီ ယွင့် ဂွန် ဂေ ဘဲန် မှာယ် အီ ဟဝ်။း အာဝ် မုး ပါယ် တီ။ ကူပ် မှာပ် ပီ ဘူင် ဘေ၊ ဘေ လုဝ် ခမ် ဒုက် ပီ ဘေ ဟဲ့ ယွင့် ဒုဝ် ဘေ။ ကူပ် ပီ လုတ့် ဘေ၊ အုဝ် ဘ့လေး ဝဲန် မာ ဘေ။

2 မှဝ်၊ ဒေါ တး အုဝ် ဒူင် ကွယ် ဘေ၊ အာဝ် မိုဝ်း အီ ဝျီ့ ဂြုဝ်း အုဝ်။ ဒေါ ဒဲ့ အုဝ် ဒီ ဘေ၊ အာဝ် မိုဝ်း အီ ယဝ်း ဂြုဝ်း အုဝ်။ န့ ပီ ဘေ ထာင် ဒဲ အုဝ် ဟဲ့ ဒီတျီမ်၊ အာဝ် ပွိုန် ထုတ် လေး ဘေ။ ဘေ မိူဝ် ထာင် အုဝ် တူ မိုဝ်း ဟဲန့် ဒီ စွယ် ဘေ။ တူ မိုဝ်း ပွုန် ဒီ ထုတ် လေး ဘေ။ ဘေ တူ ယိုဝ် အုဝ် အီ စ်ု အိုမ် နမ်မုက်ဆာရာ တဲး န့ ဟိတ်၊ အုဝ် နပ် ဒီ တဲး အိုမ် ဒွန် ဒီလယ့် ဒွန် ဘ့လဲင် ဝီ ဘဲန် ကာဒါယ် ဟေန့် ကာဒါယ် ကာဟဝ်း၊ တဲး မာဂါ ဘော ယမ် အုး အမ် တူတ့် ကူပ် အာဝ် မိုဝ်း အိုမ်။

3 အုဝ် ဒိုဝ်း အပ် ဝွင့် စှိုပ် ဒီ ဂါင်ဟြာဝ် ပီ အီ စှိုပ် ခြိုင်။ အုဝ် ဘူင် တဲး မ့ပ့လာ ပီ အီ ဒိုဝ်း စာန် ပ့လိုက်။”

4 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ မာနုဝ် အုဝ်၊ တဲး အုဝ် ဘော နပ် ဒီ ကာလာင် ပီ ဒူအီ အီ မိုဝ်း အာငျာန်။ အန် တဲး အုဝ် နပ် ဒီ ဝီ မာနုဝ် အီ ဟဝ် ဒေါ ဟဲ့ ဆင်ဒုဝ်။ အန် တဲး အုဝ် ဒွါ ဘော ပ့လူမ် ဂေ ဟဲန့် ဒီ ဂေ အီ ဟဲ့ ဒီလှး။ ဒွန် ညှာ အန် ဇဝ် မိူဝ် ဘျိတ့် အုဝ်၊ တဲး အုဝ် ထူမ် ဂြုဝ်း ပီ မာနုဝ် အန်။

5 ဇဝ်ဖြာ မိူဝ် ကာလာင် ဂြုဝ်း၊ တဲး န့ လိုဝ်း ဆီချာ ဒီ အုဝ်။ အုဝ် မိူဝ် ထူမ် တူ ကာဘး ဒီ အန်။ အုဝ် မိူဝ် ဒူပ် ဆီချာ တူ ဝီ ဝိဝ် နာ ပန်။

6 အုဝ် မိူဝ် တဲး အီ မး ကာတု အုဝ်။ အုဝ် မိူဝ် တူ ခြဲ ဂေ ဝီ အီ ဒိူတ် လာက် အုဝ်၊ တဲး ဂေ ကာထ ဘော ကာလာ အုဝ်။ အုဝ် မိူဝ် တူ ဝး ဂေ အီ ပတ့် နာ အုဝ် ဘော ခမ် ဂေ ဖျာက် ဆာရေ အုဝ်။

7 ခဲ့ ပီ ဘူင် ဂေ ဒီ အုဝ် တီ န့ ယီ တူ ဘဲန် အာဖေ အာရေ မာဆေ ဒီ အုဝ်။ အုဝ် ဟဲ့ နပ် ဆီချာ၊ ဇဝ်ဖြာ အီ အိုပ် တူတ့် ဒွန် မျုဝ် ဒီ စွယ် အုဝ် တူ တဲး အုဝ် စှိုမ်။ အုဝ် မိူဝ် တူ တဲး နဝ်း အုဝ် ဘ့လိူင်။ ခုဝ်၊ အုဝ် ဟဲ့ ဟွတ့် နပ်၊ အုဝ် တူ မွှိုမ် ဆာယ် ဒေါ မှဝ်။

8 ကူပ် ဇဝ်ဖြာ ဟဲ့ ကွယ် ရိုမ် ဒူပ် အုဝ်၊ အန် ဟဲ့ နပ် လွင် တူ မိုဝ်း အုဝ် မှာပ်။ အာဆေ ဆီ ဖျာက် အုဝ်၊ တဲး အေ ဟာဝ် ဒီ အာတ့် ဒါ တာင် အီ ဆုင်ဖျာတ် ဒါရာ။ အာဆေ ဆီ ကာခဲန့် ဒီ အုဝ်၊ တဲး အန် တး ကွယ် ကာတတ် အုဝ်။

9 ဇဝ်ဖြာ အီ အိုပ် တူတ့် ဒွန် မျုဝ်၊ ဟဲ့ ဘ်ု ဒီ စွယ် အုဝ်။ အာဝ် မိုဝ်း အာဆေ အီ ပွိုန် ဒမ် မှာပ် ဒီ အုဝ်။ ဂေ အီ ဆီ ဖျာက် အုဝ်၊ ဂေ ဘောကာဂ့လျီတ် ဒီ ဘော ဟြာယ် ပီ ခြိုင် အီ ဟဲ့ ရာမ်၊ ခြိုင် ပီ ဟူမ် မာဝ။

10 အိုယ် ဘေ အီ ရုဝ်ဆေ ဇဝ်ဖြာ အီ ထူမ် ဘော ဘူင် ဒူပ် ပီ ကာလာင် ဒဲစေန့် အန်၊ ဆေ န့တေန့် ပီ လုဝ် ဒူပ် ဘေ ဒီ ဘော အပ် ဝွင့်၊ တဲး ဘေ ညှိုမ် ဘိုင် ဇဝ်ဖြာ။

11 ဘေ အီ ပီ ဒူအီ အီ ဒိုဝ်း ငဝ် ရာင်၊ ခြာမ် ဒီ ဒုဝ့် အီ ဟဝ်၊ တဲး ဘေ ဒူပ် ငဝ် ရာင် ဘေ တီ။ အုဝ် ဇဝ်ဖြာ ယီ ဒီ ဘူင် တဲး န့ ဘဲန် ဒုက် ဒီ ဘေ၊ တဲး န့ ဘဲန် နဝ်း လိုဝ် ဒီ ဘေ။