1 ဒဲစေန့် ဇဝ်ဖြာ ဟဲ့ တဝ်း၊ “အိုယ် ဘေ အီ ကွယ် ခဲင် ဂုန် အိုမ်၊ တဲး ဘေ ထူမ် ဂြုဝ်း အုဝ်။ ဘေ အီ ကွယ် တူင့်၊ တဲး ဘေ ယိုဝ် ပီ ကာလာင် အုဝ်။ ဇဝ်ဖြာ ဟဲ့ ဒဲ့ အုဝ် ဆိန့် အာတ့် ဂွိုတ် အုဝ်။ အန် ဟဲ့ ဒွိုမ် ကာလာင် စိူဝ် အုဝ်၊ တဲး အီ နပ်။

2 အန် ဇဝ် ဟဲ့ တဲး အုဝ် ကာလာင် ဂြုဝ်း အီ နပ် ဒီ ဒိုဝ် နဝ်း အီ ပီ မာပွါ့ လာင် အီ လမ် ကာဆဝ်။ အန် ဟဲ့ ဘ်ု ရိတ် အုဝ် ပီ အန် တဲး အုဝ် ကွယ် ခြိုမ် ယာပ် ဒဲ အန်။ အန် ဇဝ် ဟဲ့ ရဝ်း အုဝ် ပီ ဒူအီ ရဝ်း ဘ့လာ အ အီ ဘတ့် ဆီချာ၊ အီ ကွယ် ခဲင် ဘယ့် ဘ့လာ။

3 အန် ဇဝ် မိူဝ် ဟဲ့ တဝ်း ဒီ အုဝ်၊ ‘အိုယ် ဘေ ဒူအီ အီဆာရေလ၊ ဘေ မုး ဒဲစေန့် အုဝ်။ ကူပ် ယိုဝ် အီ ဟဝ် ပီ ပါယ် ဘေ၊ အာဖုင် ဒင်ခုဝ် အုဝ် ဒီ ဘော လိုဝ်း ဆီချာ ဒီ ဂေ ဒူအီ ကိူန်။’

4 အုဝ် ယီ ဝီ တဝ်း၊ ‘အုဝ် ဟဲ့ ဟွတ့် ဘူင် ဂါန် ကိူန်။ မာလဲ၊ န့ ယီ တူ ဘဲန် အာဂျိုဝ် မာဆေ။ အုဝ် ဟဲ့ ဟွတ့် ဘူင် ခဲ့ မိုဝ်း အုဝ် ပ့လူမ်၊ န့ ယီ တူ မိုဝ်း ဒီခုဝ်။’ ပါယ် တီ အုဝ် ဘော ဝီ ညှိုမ် ဘိုင် ဇဝ်ဖြာ၊ တဲး အန် စွယ် အုဝ်၊ ဒွါ ရုး ခဲ့ ပီ ဘူင် ပီ ရန့် အုဝ် တီ။

5 ဆိန့် အာတ့် ဂွိုတ် အုဝ်၊ ဇဝ်ဖြာ ဟဲ့ တဲး အုဝ် ဘဲန် ဒဲစေန့် အန် အီ ဒီ ဒဲ့ ဂေ အာမျုဝ် အာကူပ် ဝီ တး ကာဒိုက် ကာဒဝ့် ဒီ အန်။ ဂေ ဒူအီ အီဆာရေလ ယီ တူ တး။ န့ ပီ ဘော ဟဲ့ ပါယ် တီ မိူဝ်၊ ဇဝ်ဖြာ ဟဲ့ တဲး အုဝ် မိုဝ်း အာဖုင် ဒင်ခုဝ်၊ တဲး အုဝ် မိုဝ်း ဘော ပ့လူမ် ဂေ ဟဲန့်။”

6 ဇဝ်ဖြာ ဘော တဝ်း၊ “မဲ ဟဲ့ ဘဲန် ဒဲစေန့် အုဝ်၊ အုဝ် ဟဲ့ တဲး မဲ ဝီ တဲး ဟဲန့် ဒီ နဝ်း ဂေ ဒူအီ အီဆာရေလ။ အုဝ် မိူဝ် တဲး မဲ မိုဝ်း ပွုန် ဒီ ဝီ ဒဲ့ တး ကာဇု ဂေ ဒူအီ အီဆာရေလ အီ ဆီ ဂိတ် ဆီ ကွယ်၊ တဲး ဂေ ဝီ တး ကွယ် ဒူင် ကွယ် ဘြိမ် ဂေ။ ဒဲင် တီ၊ မဲ ဒီ တဲး န့ ဘ့လာင် ဘော ဒီ ဒူအီ ဒွန် မျုဝ် ဒဲင် ကာဒါယ် နီ၊ တဲး န့ ဘော ချွတ် ဂေ အီ ကွယ် ဒူင် ဆိူတ် ကာဒါယ်။”

7 ဇဝ်ဖြာ အီ ဆီငါ ဘွတ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ အီ နပ် ဒီ ထုတ် လေး ဒူအီ၊ အန် ဝီ ကာလာင် ဒီ ဒူအီ အီ ခမ် ဒုက်။ အန် ဘော ကာလာင် ဒီ ဒူအီ အီ ဘဲန် ပီ လုက်တာယ် အီ ဟဝ်၊ အီ ပီ ဇွင့် အီ ဟဝ် ဒွန် မိူင်၊ ဘော ဒီ ဒူအီ အီ ကာဒုး ဒီ ဘဲန် မှာယ် ခုန်ဒီခမ်။ အန် တဝ်း၊ “ဂေ ခုန်ဒီခမ် ဒီ ဘော ဝီ ယိုဝ် မဲ၊ ဂေ ဒီ ဘော ဝီ ရုဝ်ဆေ မဲ။ ဘော ဂေ ဂွန် ဒါ ကာညာ ဘောကာဂ့လျီတ် ဒီ ဘော ဝီ ယိုဝ် လွင် ပီ ဒီ ဘူင် ဇဝ်ဖြာ၊ ဂေ ဒီ ဘော ဝီ မုတ် ဂိုပ် ဒီ အာတ့် မဲ၊ ဝီ ရုဝ်ဆေ မဲ။ ခုဝ်၊ ဇဝ်ဖြာ အီ ဆီငါ ဘွတ် ဘော မိုဝ်း နဝ်း ဆိူဝ် နဝ်း မှာန် အီ ဟဲ့ ရဝ်း မဲ၊ အီ မုး ဒဲစေန့် အန်။”

8 ဇဝ်ဖြာ ပီ ဝီ တဝ်း၊ “ဆေ ဟီ ဇမ် အာခြာဝ် ပီ အိုင် အုဝ်၊ အုဝ် ဒီ ဘော ထူမ် ပီ ဆာခိုဝ် ပီ မှာန့် မဲ။ ဆေ ဟီ ဇမ် အာခြာဝ် ဒီ ချွတ် အုဝ် ဒီ မဲ၊ အုဝ် ဒီ စွယ် မဲ။ အုဝ် ဒီ ယွတ် မဲန် မဲ ဘော ဂွင့် ရဲ မဲ ဘော ဒွါ ကာဒိက် ဆတ်ဇာ ဒီ မဲ၊ တဲး န့ ဘဲန် ပီ ပီ ကာဆဲန့် အုဝ် ဒီ ဒူအီ အီဆာရေလ။ အုဝ် ဒီ တဲး ဂေ ဝီ ကွယ် ခဲင် မိူင် ဂေ အီ ဟဲ့ ရာမ် ဒေါ တီ နီ၊ တဲး ဂေ ဘော ဝီ ပွိုန် ဒီ ဘိုင် ခါဂုန် ဒါ ဒါ ဂေ။

9 မဲ ဒီ ကာလာင် ဒီ ဂေ ဒူအီ အီ စုဝ်း ကာပိုမ် တဝ်း၊ ‘တဲး ဘေ လေး ဟာဝ် ဒါခိုယ် ဒါခိုယ်။’ ဘော ဒီ ဂေ အီ ကွယ် ခဲင် အပ် ဝွင့် မဲ ဒီ တဝ်း၊ ‘တဲး ဘေ လေး။’ ဒူအီ ဂေ တီ၊ ဂေ ဒီ ပီ မာဘူ အီ ဝိန် ဒီ လဲ ဘော ပွိုန် ဒီ ဟူမ် ပေတ့် ဒွန် နွန်။

10 ဂေ မိူဝ် တူ အေတ့် အိုမ်၊ တူ အေတ့် ပီ ဒီ ဟူမ်။ ဆောဒါတ် အီ ကာဟွာ့ ကာဆဝ် ခဲင် ပြဲ ကာဟဝ်း မိူဝ် တူ ဘဲန် ပါယ် မှဝ် ဒီ ဂေ။ ခုဝ်၊ ဒါ အီ ရွက့် ကာဝေ ဂေ ဟဲ့ တိုယ် ဂေ ဟာဝ် ဒူင် မိုဝ်း အိုမ် တုဝ်း။

11 အုဝ် ဒီ ဘော ဘူင် န့တေန့် တာင် အီ ကာလုဝ်း နွန် တာင် ဒွန် နွန်။ န့တေန့် အီ စုဝ်း တျီမ်၊ အုဝ် ဒီ မ့ပြာယ် တဲး န့ ကော စာ။

12 ဒူအီ ပီ အိုပ် အုဝ် တီ၊ ဂေ ဒီ တး ဒူင် တူင့် ကာဆဝ်။ ဂေ ဒီ ဘော တး ဘ့လာက် နာ ကွာ၊ တး ဘော ဘ့လာက် နာ ဂေတ့် ဆီငဲ ဘော နာ မိူင် ဆီနိမ်။”

13 အိုယ် ဘေ အီ ကွယ် ခဲင် ဂါင်ဟြာဝ်၊ တဲး ဘေ တဝ်း မှုဝ်။ ဘေ အီ ကွယ် ဒဲင် ကာဒါယ်၊ တဲး ဘေ ဒါခိုယ်။ ဘော ဘေ နွန် ဘောကာဂ့လျီတ်၊ တဲး ဘေ တဝ်း မှုဝ် အီ ဘျုဝ် ဘျုဝ် ကျဝ် ကျဝ်။ ခုဝ်၊ ဇဝ်ဖြာ ဟဲ့ ဘူင် တဲး ဂေ ဒူအီ ပီ အိုပ် အန် ဂျာမ်ဆာ။ အန် ဒီ ကာဝေ ဂေ ဒူအီ အီ ဟဲ့ ခမ် ဒုက် တာင်။

14 မာလဲ၊ ဒူအီ ခဲင် မိူင် ဇီအူန် ယီ ဝီ တဝ်း၊ “ဇဝ်ဖြာ ဟဲ့ ဟွတ့် ဘ့လေး ဝဲန် ယေ။ အန် ဟဲ့ ဟွတ့် ပိဝ် ယေ။”

15 ပါယ် တီ ဇဝ်ဖြာ ပီ ဝီ တဝ်း၊ “ဘေ ဒွိုမ် ယိုဝ် အီဘိုန့် အီ နပ် ဒီ ဝီ ပိဝ် ဂွန် အန်။း ဘေ နပ် လွင် အီဘိုန့် အီ တူ ဝီ ကာဝေ ဂွန် အန်။း ပီ ဘော ဟဲ့ မိုဝ်း အီဘိုန့် အီ ဟဲ့ ပိဝ် ဂွန် အန် ပါယ် တီ မိူဝ်၊ အုဝ် ယီ တူ ပိဝ် ဘေ ဒေါ မှဝ်။

16 အုဝ် ဟဲ့ ဒဲမ် အုန် စိူဝ် ဘေ ခဲင် ကာဘာ ဒဲ အုဝ်။ ရဲင် မိူင် ဘေ မိူဝ် အုဝ် ဘော ယွတ် ဆေဆေ။

17 ဂေ ဂွန် ဘေ အီ ဒီ ဝီ တး တွိုန်၊ ဂေ ဒီ ဘော တး ခြန် ခြန်။ ဂေ အီ ပျာတ့် အီ ဖာတ် ဒိုဝ်း ကြုဝ်ကြာမ် ဘေ၊ ဂေ ဒီ ဘော လေး တဝ် တ ဘေ။

18 တဲး ဘေ ကာဘတ် ယွတ် ဒွန် ဘ့လာက်။ ဂေ ဒူအီ ကိူန် ဟဲ့ ဟွတ့် ကာဇု ကာဒိုမ်၊ ဝီ တး ဒူင် ကွယ် ဘေ။ အုဝ် ဇဝ်ဖြာ တဝ်း အာခါခ်ု ဒီ ဘေ၊ ဘေ ဒီ ဝီ ပွိုန် ဒီ ဘျုဝ် ဒါခိုယ် ဘော ပွိုန် ဒီ ပီဖုင် ဘေ ကူပ် ဂေ ဒူအီ ကိူန် တီ။ ဘေ ဒီ ဘော ပီ အဝ် ကာမာယ် အီ ဟဲ့ စှိုပ် ဆီလူပ် ဒုယ် နှာင် ဘော တာ ခြိုင် ခြိဝ် ဂေ ရွိုန်။

19 မာန် မိူင် ဘေ အီ ဟဲ့ လိုဝ် ဟဲ့ ရာမ် တွိုန်၊ ဒေါ တီ နီ န့ ဒီ ဝီ ဒီတဲတ် ကာချီ့ အာဒါ ဂေ ဒူအီ အီ ဒီ ဝီ တး ကွယ် ဒူင် တီ။ ဂေ အီ ဟဲ့ ဘူင် တဲး မိူင် ဘေ လိုဝ် တွိုန်၊ ဂေ ဒီ ဝီ တဝ် ဟာဝ် ကွယ် တူင့် ဘေ။

20 ဂေ ဂွန် ဘေ အီ ဂွိုတ် ဝါယ် ဟဲ့ ခမ် ဘေ ဒုက် တာင် တီ၊ အူ ဆီငဲ စေဝ် စေဝ် ဂေ ဒီ ဝီ တဝ်း ဒီ ဘေ၊ ‘မိူင် ဒူင် ကွယ် အေ နီ၊ န့ ဒီတဲတ်၊ န့ ကာချီ့ ကာဆဝ် အာဒါ အေ။ တဲး ဘေ ဝီ ဟာဝ် ဟြေတ့် ကာဒါယ် အီ ကာဝဝ်း လွှိုမ် နီ၊ တဲး အေ ပွိုန် ဒီ ကွယ်။’

21 ဟဲ့ ဟွတ့် ပန် အန် တီ၊ ဘေ ဒီ ဝီ ကာဖာ ခဲင် နဝ်း ဘေ တဝ်း၊ ‘အာဆေ ဟဲ့ ဂွိုတ် ဂွန် ဂေ နီ ဒွါ ဒီ ယေ အီ မုး ဒူအီ မှန် အီ တူ ဒွိုမ် မိုဝ်း ဂွန်။း ယေ ဟဲ့ ကွယ် ရာင် ယေ၊ တူ မိုဝ်း ဒီ ဟျီင် ဂွန်။ ယေ ဟဲ့ ခမ် အီ မှေတ့် ယေ၊ ဘဲန် ဒူအီ ပီ ဟုဝ် ဝဲန် ဂေ မိူင် တေတ့် မိူင် တ။ အာဆေ ဟဲ့ ဝီ ဒိုဝ်း တး ဂွန် ဂေ နီ။း ဂွန် ဂေ နီ ဘော တး နာ မှဝ်။း’”

22 ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ ဝီ ကာလာင် တဝ်း၊ “တဲး ဘေ ယွတ်၊ အုဝ် ဒီ တာ ဒဲ အုဝ် ယပ် တး ဒူအီ ဒွန် မိူင်။ အုဝ် ဒီ ဘော ဘျ ပွုန် အုဝ် ဒီ ဂေ ပီ ဒါ ဆိုက် ဘ့လေး အာလာမ် ဂေ ဒူင် ဟဲ့ အွင် ဂေ။ ပန် တီ ဒူအီ ဂေ တီ၊ ဂေ ဒီ ဘော စုဝ့် တး ဂွန် ကာညူမ် ဘေ၊ ပုဝ် တး ဘော ဂွန် ဒီဘျာ ဘေ ဒဲင် ယ ဂေ၊ ဝီ တး တိုယ် ဒူင် ကွယ် ဘေ။

23 ဂေ ခုန်ဒီခမ် ဒီ ဝီ ဘဲန် ဂုန့် ဟျီင် ဘေ။ ဂေ နာင် ဟောခမ် ဒီ ဘော ဘဲန် မာ ဂဲပ် ဘေ။ ဂေ ဒီ ဘော ဝီ ဂူမ် မုတ် တး ဒူင် ကွယ် ဘေ၊ တဲး န့ ဘော ဘျ ဂေ ရုဝ်ဆေ ဘေ။ ပန် အန် တီ ဘေ ဒီ ဝီ နပ် အုဝ် မုး ဇဝ်ဖြာ၊ နပ် ဘော လွင် ဂေ အီ နှဝ့် န့ဒဝ့် အုဝ်၊ ဂေ တူ မွှိုမ် ဆာယ် ဒေါ မှဝ်။”

24 ဆေ ဒါ ဆိုက် အီ မိုဝ်း ပ့လူမ် တာင် ဟဲ့ ဖာတ် ဒိုဝ်း ကြုဝ်ကြာမ် အီ၊ အာဝ် မိုဝ်း အာဆေ အီ ယ ဝီ တး ဒိုဝ်း ဝိဝ်။ ဘော၊ ဆေ ဒါ တာင် ဟဲ့ ခြွင့် ဒူအီ တူ မွှိုမ် ခဲင် ကာပိုမ်၊ အာဝ် ပွိုန် တဲး အန် ဝီ လေး။

25 ခုဝ်၊ ဇဝ်ဖြာ ဝီ တဝ်း၊ “လွင် အန် တီ ပီ ဘော ဟဲ့ မှာန် မိူဝ်၊ အုဝ် ယီ တူ ဘူင် တဲး န့ ဘဲန်။ ဂေ ဒူအီ ပီ ခြွင့် ဂေ ဒါ ဆိုက် ခဲင် ကာပိုမ်၊ ဂေ ယီ ဒီ ပွိုန် ဒီ လွတ် လေး။ ကြုဝ်ကြာမ် ပဲ့ ဟဲ့ ဟွတ့် ဒိုဝ်း ဟာဝ် ဂေ ဒူအီ အီ မိုဝ်း ပ့လူမ် တာင် ဟဲ့ ပွိုန် ဝီ ဒိုဝ်း လေး။ ခုဝ်၊ အုဝ် အီ ဒီ ကာဂုဝ်း ဒီ ဂေ အီ ကာဂုဝ်း ဒီ ဘေ။ အုဝ် ဒီ ချွတ် လေး ဂေ ဂွန် ဘေ။

26 အုဝ် ဒီ ဘူင် တဲး ဂေ အီ ခါနှာပ် ဘေ ဝီ လာယ် ဟူမ် ယင် ဂေ၊ တဲး ဂေ ဝီ လာယ် ဒျီင် နှာမ် ဂေ ပီ ဂေ ဒျီင် အိုမ် မာငုန် အီ ဆီငဲး။ ခဲ့ ကွယ် ဒူအီ ဒဲင် ကာဒါယ် ဘောကာဂ့လျီတ်၊ ဂေ ဒီ ဘော နပ်၊ အုဝ် မုး ဇဝ်ဖြာ အီ ဟဲ့ ချွတ် ဘေ ဘော ထုတ် လေး ဘေ။ အုဝ် မုး အန် ဇဝ် အီ မိုဝ်း အာဖုင် ဒင်ခုဝ် တာင်၊ အီ အိုပ် ဒူအီ အာမျုဝ် အာကူပ်။”